“Ọghẹnẹ . . . Enọ E Rọ Uzuazọ”

Kọ uwhu o ga vi Ọghẹnẹ? Vievie. Ẹvẹ uwhu hayo “ọwegrẹ” ọfa jọ ọ rẹ ga vi “Ọghẹnẹ Erumeru” na? (1 Ahwo Kọrint 15:26; Ọnyano 6:3) Ọghẹnẹ o wo ẹgba nọ o ti ro si uwhu no otọ ẹkwoma ẹkparomatha na, yọ ọ ya eyaa nọ o ti ru ere evaọ akpọ ọkpokpọ na.a Kọ ọ te sai gine ru ere? Jesu ọ ta eme jọ nọ e rẹ sae lẹliẹ omai fi eva họ eyaa yena.—Se Matiu 22:31, 32.

Nọ Jesu o je lele otu Sadusi nọ e rọwo ẹkparomatha na ha ta ẹme, ọ ta kẹ ae nọ: “Wha ri se epanọ Ọghẹnẹ ọ ta kẹ owhai kpahọ ẹme ẹkparomatha iwhuowhu na, anọ, ‘Mẹ họ Ọghẹnẹ Abraham gbe Ọghẹnẹ Aiziki, gbe Ọghẹnẹ Jekọp’? Ọ rọ Ọghẹnẹ iwhuowhu hu, rekọ ọ rọ enọ e rọ uzuazọ.” Jesu ọ be jọ etenẹ ta kpahe ẹme nọ Ọghẹnẹ ọ ta kẹ Mosis evaọ ẹwọ nọ ọ jẹ to na, oware wọhọ ikpe idu esa, egba isoi (3,500) nọ i kpemu. (Ọnyano 3:1-6) Wọhọ epanọ Jesu ọ ta na, ẹme nọ Jihova ọ ta kẹ Mosis inọ “Mẹ họ Ọghẹnẹ Abraham gbe Ọghẹnẹ Aiziki, gbe Ọghẹnẹ Jekọp,” u dhesẹ nọ eyaa ẹkparomatha na e te seba erugba ha. Evaọ oghẹrẹ vẹ?

Roro kpahe ahwo nọ a fodẹ na. Evaọ okenọ Jihova ọ rọ ta ẹme nana kẹ Mosis, Abraham o whu te ikpe udhusoi akuasa gbe udhegbizii (329) no, Aiziki o whu te ikpe udhusoi akuava gbe udhegbene (224) no, yọ Jekọp o whu te ikpe udhuzii gbe ikpegbihrẹ (197) no. Ghele na, Jihova ọ ta nọ mẹ họ Ọghẹnẹ rai, orọnikọ ọ ta nọ mẹ jọ Ọghẹnẹ rai hi. Jihova ọ ta ẹme na wọhọ ẹsenọ ezae esa yena a gbẹ jọ uzuazọ. Fikieme ọ rọ ta ere?

Jesu ọ ta nọ: “[Jihova] ọ rọ Ọghẹnẹ iwhuowhu hu, rekọ ọ rọ enọ e rọ uzuazọ.” Rri epanọ ẹme yena o wo ẹgba te. O hae rọnọ ẹkparomatha ọ riẹ hẹ, koyehọ Abraham, Aiziki, gbe Jekọp a hae te jọ uki bẹdẹ bẹdẹ. Yọ o tẹ rrọ ere, koyehọ Jihova yọ Ọghẹnẹ iwhuowhu, orọnikọ ọrọ enọ e rrọ uzuazọ họ. Yọ oyena o hai ti dhesẹ nọ uwhu o ga vi Jihova, wọhọ ẹsenọ o wo ẹgba nọ ọ sai ro siwi idibo riẹ no abọ uwhu hu.

O tẹ rrọ ere, kọ eme ma rẹ sae ta kpahe Abraham, Aiziki, Jekọp, gbe idibo Jihova efa nọ i whu no? Jesu ọ ta nọ: “Evaọ aro riẹ aikpobi a rrọ uzuazọ.” (Luk 20:38, NW) Fikinọ eyaa Jihova kpahe ẹkparomatha idibo riẹ nọ i whu no e te seba erugba ha, ọ be rehọ iẹe wọhọ ẹsenọ a rrọ uzuazọ. (Ahwo Rom 4:16, 17) Jihova ọ te kareghẹhọ idibo riẹ kpobi nọ i whu no jẹ kpare ae ziọ uzuazọ.

Kọ o te were owhẹ re whọ wariẹ kuomagbe ahwo nọ who you nọ a te kpare ze? Kareghẹhọ nọ Jihova ọ ga vi uwhu. Oware ovo o rẹ sae dae obọ ji hi re o ru eyaa riẹ gba kpahe iwhuowhu nọ ọ te kpare ziọ uzuazọ. Iviena, ma tuduhọ owhẹ awọ nọ gbe wuhrẹ kpahe eyaa ẹkparomatha na gbe Ọghẹnẹ nọ o ti ru eyaa yena gba. Ere oruo u ti si owhẹ kẹle Jihova, “Ọghẹnẹ . . . enọ e rọ uzuazọ” na.