‘Ọrigbo Ẹrọwọ Na’ O Fi Ẹdawọ Na Kparobọ!

“Oke ẹdhọ-oguo u te no, nọ ọ te rehọ uviuwou Ọghẹnẹ muhọ.”—1 Pita 4:17.

 1. Eme Jesu ọ ruẹ okenọ ọ kiẹ “ọrigbo” na riwi?

EVA Pẹntikọst 33 C.E., Jesu ọ rehọ “ọrigbo” mu re ọ rehọ emuore kẹ “uwou” riẹ evaọ ẹruoke. Evaọ 1914, a rehọ Jesu mu wọhọ Ovie, yọ u kri hi, oke u te te re ọ kiẹ “ọrigbo” yena riwi. Ọ ruẹ nnọ ibuobu nọ i ru utu “ọrigbo” na via a dhesẹ nnọ a wo “ẹrọwọ gbe areghẹ.” Fikiere, ọ tẹ rehọ iẹe mu “uzou eware riẹ kpobi.” (Matiu 24:45-47) Dede na, ọrigbo ọgeva jọ ọ jariẹ, ọnọ o wo ẹrọwọ hayo areghẹ hẹ.

‘Ọrigbo Omuomu Ọyena’

 2, 3. Diẹse ‘ọrigbo omuomu yena’ o no ze, kọ ẹvẹ o ro muhọ?

² Jesu ọ t’ẹme kpahe ọrigbo omuomu na nọ ọ nwane t’ẹme kpahe ‘ọrigbo ẹrọwọ avọ areghẹ na’ no. Ọ ta nọ: ‘Rekọ ọrigbo omuomu ọyena ọ tẹ jọ eva riẹ ta nọ, “Olori mẹ o re ti lehie,” o ve mu ibe erigbo riẹ họ ẹfa, o ve bi lele edidi na re jẹ da, olori ọrigbo ọyena ọ rẹ te tha ẹdẹ nọ o rẹro riẹ hẹ gbe okenọ ọ riẹ hẹ, ọ vẹ te kẹe uye, o ve ti kele iei kugbe eviẹwẹ na; etẹe oviẹ gbe akọriọ riẹ ọ rẹ te jọ.’ (Matiu 24:48-51) Ẹme na ‘ọrigbo omuomu ọyena’ u si iroro mai kpohọ eme nọ Jesu ọ kake ta vẹre kpahe ọrigbo nọ o wo ẹrọwọ avọ areghẹ na. Ẹhẹ, usu ọrigbo ẹrọwọ na ‘ọrigbo omuomu’ na o no ze.a Evaọ oghẹrẹ vẹ?

³ Taure 1914 o te ti te, ahwo buobu erọ utu ọrigbo ẹrọwọ na a wo ẹruore ọgaga ọrọ ẹjọ kugbe Ọva na evaọ obọ odhiwu evaọ ukpe oyena, rekọ irẹro rai i rugba ha. Fiki onana gbe eware efa nọ e via, oma o tẹ lọhọ ibuobu, yọ umutho rai jọ a gbẹ jẹ were eva ha. Enana jọ a tẹ rehọ ẹmeunu muọ enọ e jọ inievo rai vẹre na họ “ẹfa” a te je kuomagbe “edidi,” eko egagọ erọ Kristẹndọm.—Aizaya 28:1-3; 32:6.

 4. Ẹvẹ Jesu o ro dhesẹ oware kẹ ‘ọrigbo omuomu’ na avọ ahwo kpobi nọ i dhesẹ ọkpọ ẹzi riẹ?

⁴ A te ti vuhu enana nọ e jọ Ileleikristi vẹre na mu wọhọ ‘ọrigbo omuomu’ na, Jesu ọ tẹ kẹ ae ‘uye gaga.’ Evaọ oghẹrẹ vẹ? Ọ se rae, a te ku ẹruore obọ odhiwu rai fiẹ. Dede na, a raha e rai ẹsiẹsiẹ hẹ. A rẹ kake rioja etoke oviẹ gbe akọriọ evaọ ‘ebi otafe’ ukoko Ileleikristi na tao. (Matiu 8:12) No anwọ oke oyena ze, umutho ahwo jọ nọ a wholo a dhesẹ ọkpọ ẹzi oyoma ọyena no, bi dhesẹ oma rai via wọhọ ‘ọrigbo omuomu na.’ Otujọ evaọ usu “igodẹ efa” na a raro kele uruemu uyoma rai no. (Jọn 10:16) Ewegrẹ Kristi itieye na kpobi a rrọ ‘ebi otafe’ abọ-ẹzi ọvona.

 5. Didi uruemu ọrigbo nọ o wo ẹrọwọ avọ areghẹ na o dhesẹ, wo ohẹriẹ no orọ ‘ọrigbo omuomu’ na?

⁵ Dede na, ọrigbo nọ o wo ẹrọwọ avọ areghẹ na ọ riẹriẹ ovao ku ẹdawọ ọvona nọ a kẹ ‘ọrigbo omuomu na.’ Rekọ ukpenọ a dheva, a tẹ kpọ iroro rai vi. (2 Ahwo Kọrint 13:11) Uyoyou rai kẹ Jihova gbe inievo rai o tẹ ga viere. Fikiere, a zihe ruọ “odẹẹ gbe ugbẹhẹ uzẹme” na no evaọ “edẹ urere” ẹvohẹ nana.—1 Timoti 3:15; 2 Timoti 3:1.

Emetẹ-Kọkọ Iwareghẹ gbe Igheghẹ

 6. (a) Ọtadhesẹ vẹ Jesu o ro dhesẹ areghẹ utu ọrigbo ẹrọwọ riẹ? (b) Taure 1914 o te ti te, didi ovuẹ Ileleikristi nọ a wholo na a whowho?

⁶ Nọ ọ t’ẹme kpahe ‘ọrigbo omuomu ọyena’ no, Jesu ọ tẹ kẹ etadhesẹ ivẹ ro dhesẹ oware nọ Ileleikristi jọ nọ a wholo a ti ro dhesẹ ẹrọwọ gbe areghẹ rekiyọ efa a ti ru ere he.b Nọ ọ jẹ kẹ ọtadhesẹ kpahe areghẹ, ọ ta nọ: “Uvie odhiwu o rẹ te wọhọ emetẹ ikpe nọ e rehọ ikpẹ rai, a tẹ nya i zere ọva. Isoi rai jọ igheghẹ, isoi rai jọ iwoareghẹ. Keme igheghẹ nọ e rehọ ikpẹ rai, a rehọ ewhri kugbe ai hi; rekọ iwoareghẹ a tẹ wha ewhri evaọ ifihọ rai gbe ikpẹ rai.” (Matiu 25:1-4) Emetẹ-kọkọ ikpe na e kareghẹhọ omai Ileleikristi nọ a wholo taure 1914 o te ti te. A ruẹ inọ ọva na, Jesu Kristi, ọ be te roma via. Fikiere, ‘a tẹ nyai’ zere iei, be rehọ aruọwha whowho inọ “oke ahwo Egedhọ na” u re ti kuhọ evaọ 1914.—Luk 21:24.

 7. Oke vẹ gbe fikieme Ileleikristi nọ a wholo a ro ‘kie ruọ owezẹ,’ wọhọ odẹme?

⁷ A ta gba. Oke ahwo egedhọ na u ghine kuhọ evaọ 1914, yọ Uvie Ọghẹnẹ evaọ otọ Kristi Jesu u te mu esuo họ. Rekọ obọ odhiwu nọ a rẹ ruẹ hẹ oyena o jọ via. Evaọ otọakpọ, ahwo-akpọ a te muọ ‘uye’ nọ a ruẹaro riẹ họ ẹruẹ. (Eviavia 12:10, 12) Oke ẹdawọ u te muhọ. Fikinọ a wo otoriẹ eware vevẹ hẹ, Ileleikristi nọ a wholo a te roro nọ ‘ọva na ọ be raha oke.’ Avọ eware nọ e jọ rai aro gedegede gbe akpọ na nọ o bi mukpahe ae, a te rolo obọ, iruo usiuwoma ota na e tẹ whoma serihọ. Wọhọ emetẹ-kọkọ ọtadhesẹ na, a “go a tẹ wezẹ,” evaọ abọ-ẹzi wọhọ epanọ enọ i se oma rai Ileleikristi nọ e kare ẹrọwọ a ru na okenọ ikọ Jesu a whu no.—Matiu 25:5; Eviavia 11:7, 8; 12:17.

 8. Eme o su kpohọ ubo na: “Ri, ọva [na] ọna!” kọ oke nọ a re ro ru eme onana o jọ kẹ Ileleikristi nọ a wholo na?

⁸ Kẹsena evaọ 1919, oware nọ a rẹro riẹ hẹ o tẹ via. Enẹ ma se: “Rekọ udevie aso a te bo nọ, ‘Ri, ọva [na] ọna! Wha nyaze i zere ie.’ Kẹsena emetẹ na kpobi a tẹ kparoma a tẹ ruẹrẹ ikpẹ rai.” (Matiu 25:6, 7) Nwanọ okenọ o wọhọ nnọ eware kpobi e nyathọ no, a te yo edo ubo onọ o ta kẹ ae nọ a jaja aro vi! Evaọ 1918, Jesu, “ukọ ọvọriọ na,” ọ nyaze etẹmpol abọ-ẹzi Jihova re ọ kiẹ je ru ukoko Ọghẹnẹ fo. (Malakae 3:1) Obọnana, u fo re Ileleikristi nọ a wholo a ruọ otafe re a zere iei evaọ ọgwa otọakpọ ọrọ etẹmpol yena. O jọ oke nọ a re ro ru re “elo rai ọ via.”—Aizaya 60:1; Ahwo Filipai 2:14, 15.

 9, 10. Evaọ 1919, fikieme Ileleikristi jọ a rọ jọ “iwoareghẹ” yọ ejọ “igheghẹ”?

⁹ Rekọ, dina hẹrẹ! Evaọ ọtadhesẹ na, emetẹ na jọ a wo ẹbẹbẹ. Jesu ọ ta haro nọ: “Ighẹghẹ na e tẹ ta kẹ iwoareghẹ na nọ, ‘Wha kẹ omai iwhri rai jọ, keme ikpẹ mai i bi fuẹ.’ ” (Matiu 25:8) Ababọ ewhri, ikpẹ na i re lo ho. Fikiere, ewhri ukpẹ ọ rẹ kareghẹhọ omai Ẹme Ọghẹnẹ nọ ọ rrọ uzẹme gbe ẹzi ọfuafo riẹ, enọ e rẹ kẹ egegagọ uzẹme ẹgba nọ a rẹ rọ jọ ewha elo. (Olezi 119:130; Daniẹl 5:14) Taure 1919 o te ti te, Ileleikristi nọ a wholo nọ i wo areghẹ a rehọ ọwhọ kiẹ re a riẹ oware nọ oreva Ọghẹnẹ o rrọ kẹ ae, dede nọ a jọ whrehe whrehe evaọ omoke oyena. Fikiere, okenọ ubo na o lahwe inọ a lo via, yọ a ruẹrẹ oma kpahe no.—2 Timoti 4:2; Ahwo Hibru 10:24, 25.

¹⁰ Dede na, ejọ nọ a wholo a ruẹrẹ oma kpahe he re a ruẹ uye hayo lahiẹ oma evaọ iruo rai—dede nọ o rrọ isiuru rai re a jọ kugbe Ọva na. Fikiere nọ oke u te no re a fi oma họ ewhowho emamọ usi na, a ruẹrẹ oma kpahe he. (Matiu 24:14) A tubẹ daoma dede re a si egbẹnya rai enọ i wo ajọwha kpemu, be jọ obọ rai yare ewhri jọ. Evaọ ọtadhesẹ Jesu na, didi ẹme emetẹ-kọkọ iwareghẹ na a kpahe? A ta nọ: “Otiẹsejọ i re ti te omai gbe owhai hi; ikpoye wha nya kpo obọ enọ e rẹ zẹ wha dẹ rehọ.” (Matiu 25:9) Epọvo na re, evaọ 1919, Ileleikristi omarokpotọ nọ a wholo a se nnọ a re ru oware kpobi nọ u re whrehe ẹgba rai nọ a re ro lo via. Fikiere a fi ẹdawọ na kparobọ.

11. Eme ọ via kẹ emetẹ-kọkọ igheghẹ na?

¹¹ Jesu o kuhọ nọ: “Oke nọ [emetẹ-kọkọ igheghẹ na] a nyavrẹ e dẹ, ọva ọ tẹ nwane nyaze, enọ e ruẹrẹ oma kpahe a vae a tẹ ruọ eva kpo obọ eha orọwo; a te wuhu ẹthẹ. Uwhremu na emetẹ nọ i kiọkọ a tẹ nyaze i re, anọ, ‘Olori, olori, rovie kẹ omai.’ Rekọ o te yo kẹ ae nọ, ‘Uzẹme mẹ ta kẹ owhai, mẹ riẹ owhai hi.’ ” (Matiu 25:10-12) Ẹhẹ, ejọ e ruẹrẹ oma kpahe kẹ ẹtha Ọva na ha. Fikiere, a kie evaọ ẹdawọ na a te ku uvẹ nọ a re ro kpohọ ehaa orọo obọ odhiwu na fiẹ. O d’ohwo no!

Ọtadhesẹ Talẹnti Na

12. (a) Ọtadhesẹ vẹ Jesu o ro dhesẹ ekru ẹrọwọ? (b) Ono họ ohwo nọ o “kpo orẹwho ofa” na?

¹² Nọ ọ kẹ ọtadhesẹ kpahe areghẹ no, Jesu ọ tẹ kẹ ọtadhesẹ ọfa kpahe ẹrọwọ. Ọ ta nọ: “Keme o wọhọ epanọ ohwo jọ o je kpo orẹwho ofa, o te se idibo riẹ ọ tẹ rehọ eware riẹ kẹ ae; ọ tẹ rehọ talẹnti isoi rọ kẹ ọjọ, ọfa ivẹ, ọfa ọvo, epanọ a rẹ sai ruẹ ọ rọ kẹ omomọvo ọ tẹ nwane kpo erẹ riẹ.” (Matiu 25:14, 15) Evaọ ọtadhesẹ na, ohwo na họ Jesu omariẹ, ọnọ o “kpo orẹwho ofa” okenọ ọ kparoma kpohọ odhiwu evaọ ukpe 33 C.E. Rekọ taure o te ti tovrẹ, Jesu o mu “eware riẹ” họ ilele ẹrọwọ riẹ obọ. Evaọ oghẹrẹ vẹ?

13. Ẹvẹ Jesu ọ rọ ruẹrẹ otọ họ kẹ iruo ilogbo jẹ kẹ “idibo” riẹ udu inọ a ru iruo?

¹³ Evaọ etoke odibọgba otọakpọ riẹ, Jesu o mu otọ họ ẹruẹrẹhọ kẹ iruo ilogbo ẹkwoma emamọ usi Uvie na nọ o whowho evaọ ẹkwotọ Izrẹl kpobi. (Matiu 9:35-38) Taure o te ti “kpo orẹwho ofa,” ọ rehọ iruo na kẹ ilele ẹrọwọ riẹ, ọ ta nọ: “Fikiere wha wuhrẹ ahwo erẹwho kpobi, wha họ ae ame evaọ odẹ Ọsẹ, gbe Ọmọ gbe Ẹzi Ẹri, wha wuhrẹ ai, re a ru eware kpobi nọ mẹ vuẹ owhai.” (Matiu 28:18-20) Ẹkwoma eme nana, Jesu ọ kẹ “idibo” riẹ udu inọ a ru iruo bẹsenọ o re zihe ze, wọhọ “epanọ a rẹ sai ruẹ.”

14. Fikieme a gbe ro rẹro nnọ ahwo kpobi a re ru iruo epọvo na ha?

¹⁴ Eme eyena i dhesẹ inọ orọnikọ Ileleikristi ikpe-udhusoi ọsosuọ kpobi a wo iyero gbe uvẹ ovona ha. Ejọ, wọhọ Pọl gbe Timoti, a wo uvẹ nọ a ro wo obọ vọvọ ziezi evaọ iruo ewhowho gbe ewuhrẹ na. Ẹsejọhọ uyero amọfa o kẹ rai uvẹ vievie he nọ a re ro ruiruo na oke kpobi. Wọhọ oriruo, Ileleikristi jọ a jọ erigbo, efa a je dhe ẹmẹmọ, ejọ e kpako no, hayo a wo ewha-iruo uviuwou. Uzẹme, oghẹrẹ uvẹ-iruo jọ evaọ ukoko na e jọ kẹ ahwo kpobi hi. Eyae na gbe ezae jọ nọ a wholo a je wuhrẹ evaọ ukoko na ha. (1 Ahwo Kọrint 14:34; 1 Timoti 3:1; Jemis 3:1) Ghele na, makọ oghẹrẹ nọ uyero rai o jọ, ilele Jesu nọ a wholo kpobi —t’ezae t’eyae—a kẹ rai iruo re a rehọ uvẹ gbe iyero rai ru iruo ziezi evaọ odibọgba Ileleikristi na. Ilele Jesu inẹnẹ a bi ru epọvo na re.

Oke Ọkiẹriwo U te Muhọ!

15, 16. (a) Oke vẹ u ro te re a niyẹrẹ epanọ a nya te? (b) Uvẹ okpokpọ vẹ nọ a re ro ‘ru iruo’ u rovie fihọ kẹ otu ẹrọwọ?

¹⁵ Ọtadhesẹ na ọ ta haro nọ: “Whaọ nọ u kri no olori idibo na ọ tẹ nyaze, a vae a te bi kele igho.” (Matiu 25:19) Evaọ 1914—ghinọ oke thethei rono 33 C.E.—Kristi Jesu o te muọ ọzino uvie riẹ họ. Ikpe esa gbe ubro nọ e kpahe riẹ, koyehọ evaọ 1918, ọ tẹ nyaze etẹmpol abọ-ẹzi Ọghẹnẹ o te ru eme ọ Pita na gba: “Keme oke ẹdhọ-oguo u te no, nọ ọ te rehọ uviuwou Ọghẹnẹ muhọ.” (1 Pita 4:17; Malakae 3:1) Oke u te no nọ a rẹ rọ niyẹrẹ epanọ a nya te.

¹⁶ Didi oware erigbo na, inievo Jesu nọ a wholo, a rehọ “talẹnti” Ovie na ru? No 33 C.E. vrẹ, gbe ikpe jọ taure 1914 o te ti te, ibuobu e jẹ daoma gaga evaọ ‘iruo’ Jesu na. (Matiu 25:16) Makọ evaọ etoke ẹmo akpọ ọsosuọ na, a dhesẹ isiuru egaga nọ a rẹ rọ gọ Olori na. Enẹna u fo re a kẹ enọ i wo ẹrọwọ uvẹ okpokpọ nọ a re ro ‘ru iruo.’ Oke ekuhọ uyerakpọ nana u totọ no. A rẹ ta usiuwoma na nya akpọ-soso wariẹ. A re vu “ivuẹvu akpọ na.” (Eviavia 14:6, 7, 14-16) A rẹ gwọlọ ahwo urere erọ utu eka na a ve je koko “otu obuobu” ọrọ igodẹ efa na họ.—Eviavia 7:9; Matiu 13:24-30.

17. Oghẹrẹ vẹ Ileleikristi ẹrọwọ nọ a wholo a rọ ‘ruọ eva oghọghọ olori rai’?

¹⁷ Oke ivuẹvu yọ oke oghọghọ. (Olezi 126:6) Fikiere o tẹ nwani fo inọ evaọ 1919, nọ Jesu ọ kẹ inievo ẹrọwọ riẹ nọ a wholo iruo efa, ọ ta nọ: ‘Whọ jọ oruọzewọ eva eware ekakao, mẹ te rehọ owhẹ muẹ uzou eware buobu. Ruọ eva oghọghọ olori ra.’ (Matiu 25:21, 23) Ofariẹ, oghọghọ Olori na wọhọ Ovie ọkpokpọ nọ a ro mu ọrọ Uvie Ọghẹnẹ a rẹ sai gbiku riẹ hẹ. (Olezi 45:1, 2, 6, 7) Utu ọrigbo ẹrọwọ na a be ruẹ oghọghọ oyena re ẹkwoma edikihẹ kẹ Ovie na je bi ru ekwakwa riẹ vihọ evaọ otọakpọ. (2 Ahwo Kọrint 5:20) A rẹ ruẹ evawere rai evaọ eme eruẹaruẹ erọ Aizaya 61:10: “Mẹ rẹte ghọghọ eva ỌNOWO na, ẹwẹ mẹ ọ rẹte ghọghọ evaọ Ọghẹnẹ mẹ; keme ọ gọ omẹ ẹgọ usiwo.”

18. Fikieme otujọ a gbẹ rọ kparobọ evaọ ẹdawọ na ha, kọ eme o no rie ze?

¹⁸ U yoma gaga, otujọ a fi ẹdawọ na kparobọ họ. Ma se nọ: “Ọnọ ọ rehọ talẹnti ọvo na ere re ọ tẹ nyaze, a nọ, ‘Olori, mẹ riẹ nọ whẹ ọrivri, whọ rẹ gadiẹ eva oria nọ whọ kọhọ họ, whọ vẹ kua kuku eva oria nọ whọ jọ vaha ha; keme ozọ u mu omẹ mẹ tẹ nyavrẹ me je si talẹnti ra no họ otọ. Ri, ora ona.’ ” (Matiu 25:24, 25) Epọvo na re, Ileleikristi jọ nọ a wholo a ‘ru iruo’ ho. Taure 1914 o te ti te, a rehọ ajọwha whowho ẹruore rai kẹ amọfa ha, yọ a gwọlọ muhọ họ evaọ 1919. Eme Jesu o ru kpahe omoya rai? O mi rai ọkwa-iruo rai kpobi. A te ‘gbolo ai fihọ ebi obọ otafe, oria nọ oviẹ gbe akọriọ rai o te jọ.’—Matiu 25:28, 30.

Ọkiẹriwo na Ọ Gbẹ r’Otọ

19. Evaọ edhere vẹ ọkiẹriwo na ọ gbẹ be rọ nyaharo, kọ eme Ileleikristi nọ a wholo kpobi a gbamu nọ a re ru?

¹⁹ Uzẹme, ibuobu enọ i ti zihe ruọ erigbo Kristi nọ a wholo evaọ etoke urere na, a ri mu Jihova họ ẹgọ họ evaọ okenọ Jesu o mu ọkiẹriwo riẹ họ evaọ 1918. Kọ u dhesẹ nọ ọkiẹriwo na o ti te enana ha? Vievie. Emuhọ gheghe oke ọkiẹriwo na u muhọ evaọ 1918 fihọ 1919 nọ ọrigbo ẹrọwọ avọ areghẹ na wọhọ utu a ro fi ẹdawọ na kparobọ. A rẹ gbẹ kiẹ omomọvo Ileleikristi nọ a wholo riwi bẹsenọ oka-ukpehọ rai u ti ro muẹro. (Eviavia 7:1-3) Fikinọ a vuhu onana mu, inievo Kristi nọ a wholo a gba riẹ mu no re a ruabọhọ ‘iruo nọ a re ru.’ A gba riẹ mu inọ a re wo areghẹ, rawo ewhri buobu re elo rai ọ gbẹ hai lo nwranwranwra. A riẹ inọ okenọ omomọvo rai o te kru ẹrọwọ rite urere uzuazọ riẹ, Jesu o ti dede iei rehọ ruọ ẹria obọ odhiwu.—Matiu 24:13; Jọn 14:2-4; 1 Ahwo Kọrint 15:50, 51.

20. (a) Eme igodẹ efa na nẹnẹ a gbamu nnọ a re ru? (b) Eme Ileleikristi nọ a wholo na a vuhumu?

²⁰ Otu obuobu ọrọ igodẹ efa na a raro kele inievo rai nọ a wholo na no. A riẹ inọ eriariẹ rai kpahe ẹjiroro Ọghẹnẹ o kẹ rai owha-iruo ulogbo. (Izikiẹl 3:17-21) Fikiere, avọ obufihọ Ẹme Jihova gbe ẹzi ọfuafo riẹ, ae omarai re a bi fiba ewhri rai ẹsikpobi ẹkwoma ewuhrẹ gbe omakokohọ Ileleikristi. Yọ a bi ru elo rai lo, bi wo abọ evaọ iruo usiuwoma ota gbe ewuhrẹ na, jẹ be rehọ ere ‘ru iruo’ kugbe inievo rai nọ a wholo. Dede na, Ileleikristi nọ a wholo a riẹ ziezi inọ obọ rai a mu talẹnti na họ. A ti guọvunu hrọ epanọ a rehọ ekwakwa Olori na evaọ otọakpọ ro ru iruo. Dede nọ a rrọ kakao, a re si obọ no owha-iruo rai kẹ otu obuobu na ha. Avọ onana nọ a wo họ iroro, ọrigbo nọ o wo ẹrọwọ avọ areghẹ na ọ gbẹ be kobaro evaọ ẹruorote iruo Ovie na, avọ eva nọ e be were ae fiki uketha ahwo otu obuobu na nọ e rehọ oma kẹ. Otu obuobu na a riẹ owha-iruo nọ o rrọ uzou inievo rai nọ a wholo, yọ a rehọ e riẹ wọhọ ọghọ re a ru iruo evaọ otọ ẹruọsa rai.

21. Didi uduotahawọ o rrọ kẹ Ileleikristi kpobi taure 1919 o te ti te rite je rite edẹ mai na?

²¹ Fikiere, dede nọ etadhesẹ ivẹ nana i fi elo họ eware nọ e via evaọ 1919 hayo etoke nọ ọ wariẹ e riẹ họ, eware nọ a rẹ sae jọ eva rai wuhrẹ i kie kpahe Ileleikristi uzẹme kpobi evaọ edẹ urere na kpobi. Evaọ edhere ọnana, dede nọ uduotahawọ nọ Jesu ọ kẹ eva ekuhọ ọtadhesẹ emetẹ-kọkọ ikpe na u kaki kie kpahe Ileleikristi nọ a wholo na taure 1919 o te ti te, eware nọ a rẹ jọ eva riẹ wuhrẹ i kie kpahe Ileleikristi kpobi. Fikiere, jọ mai kpobi ma yo eme Jesu na: “Fikiere wha roro, keme wha riẹ ẹdẹ na hayo oke gbe he.”—Matiu 25:13.

[Oruvẹ-obotọ]

Kọ Whọ Sae k’Iyo Nana Vevẹ?

• Oke vẹ Jesu ọ rọ kiẹ ilele riẹ riwi, kọ eme ọ ruẹ?

• Fikieme Ileleikristi jọ nọ a wholo a ro wo ẹzi ọ “odibo omuomu” na?

• Ẹvẹ ma sai ro dhesẹ nnọ ma wo areghẹ evaọ abọ-ẹzi?

• Evaọ aruorokele inievo ẹrọwọ Jesu nọ a wholo, edhere vẹ ma sae rọ ruabọhọ ‘iruo’?

[Ẹkpẹti nọ o rrọ ẹwẹ-obe avọ 28]

OKEVẸ JESU Ọ RỌ NYAZE?

Evaọ Matiu uzou avọ 24 gbe 25, a ta nnọ Jesu ọ te “nyaze” evaọ idhere sa-sa. Orọnikọ ọ rẹ kpama no oria nọ ọ rrọ tao re o tẹ jọ nọ ọ “nyaze” he. Ukpoye, ọ rẹ “nyaze” ẹkwoma ovao nọ ọ rẹ rẹriẹ ku ahwo-akpọ hayo ku ilele riẹ, evaọ ẹsibuobu rọkẹ ẹdhoguo. Fikiere, evaọ 1914, ọ “nyaze” ti mu ọzino riẹ họ wọhọ Ovie nọ a ro mu. (Matiu 16:28; 17:1; Iruẹru 1:11) Evaọ 1918, ọ “nyaze” wọhọ ukọ ọvọ na o te mu enọ e ta nnọ a be gọ Jihova ẹdhọ họ egu. (Malakae 3:1-3; 1 Pita 4:17) Eva Amagẹdọn, ọ te “nyaze” ti guẹdhọ bru kpe iwegrẹ Jihova.—Eviavia 19:11-16.

Ẹnyaze nọ a ta ẹme te ẹsibuobu evaọ Matiu 24:29-44 gbe 25:31-46 na o te jọ eva etoke ‘uye ulogbo’ na. (Eviavia 7:14) Evaọ abọdekọ riẹ, ẹnyaze nọ a ta ẹme te ẹsibuobu evaọ Matiu 24:45 rite 25:30 na u w’obọ kpahe ẹdhoguo enọ i se oma rai ilele riẹ no 1918 vrẹ. Wọhọ oriruo, o rẹ jọ oware iroro ho re a ta nọ osohwa kẹ ọrigbo ẹrọwọ na, ẹdhoguo emetẹ-kọkọ igheghẹ na, gbe ẹdhoguo ọrigbo ọyẹlẹ na, ọnọ ọ tọ talẹnti Olori na h’otọ na, e te via evaọ okenọ Jesu ọ tẹ “nyaze” eva etoke uye ulogbo na. O tẹ rrọ ere koyehọ u ti dhesẹ nnọ a te ruẹ ibuobu enọ a wholo na inọ a kare ẹrọwọ eva oke oyena, fikiere a ve ti nwene ai. Dede na, Eviavia 7:3 u dhesẹ nnọ eva oke uye ulogbo na yọ a “koka” nọ a rẹ sai voro ho họ erigbo Kristi kpobi nọ a wholo na no.

[Uwoho nọ o rrọ ẹwẹ-obe avọ 26]

“Odibo omuomu” na o wo eghale he evaọ 1919

[Uwoho nọ o rrọ ẹwẹ-obe avọ 27]

Emetẹ-kọkọ iwareghẹ na a ruẹrẹ oma kpahe okenọ ọva na ọ nyaze

[Uwoho nọ o rrọ ẹwẹ-obe avọ 29]

Erigbo ẹrọwọ na a ‘ru iruo’

[Uwoho nọ o rrọ ẹwẹ-obe avọ 29]

Ọrigbo ọyẹlẹ na o ru iruo ho

[Iwoho nọ e rrọ ẹwẹ-obe avọ 30]

Enọ a wholo gbe “otu obuobu” na a gbe bi ru re elo rai o lo