Oletu Ogbaẹmo O Dhesẹ Ẹrọwọ Ologbo

Nọ Jesu ọ kẹ Ovuẹ obọ Ugbehru na no, o te kpobọ ẹwho Kapaniọm. Nọ o te obei, ekpako ahwo Ju a tẹ nya bru rie ze. Ọzae jọ nọ ọ rrọ ohwo Ju hu họ ọnọ o vi rai, oletu ogbaẹmo ahwo Rom jọ nọ o wuzou isoja udhusoi.

Odibo oletu na jọ nọ o you gaga ọ mọ te uwhu no. Dede nọ oletu nana ohwo Ju hu, ọ be yare obufihọ Jesu. Ekpako ahwo Ju nọ oletu na o vi bru Jesu na a ta kẹ Jesu nọ, “okie o kie odibo [oletu na] fihọ otọ evaọ obọ uwou, yọ o be lahiẹ iẹe gaga.” (Matiu 8:6) Ekpako ahwo Ju na a vuẹ Jesu nọ oletu na o te ohwo nọ o re fi obọ nana họ kẹ, inọ: “O you orẹwho mai yọ ọye ọ bọ uwou-egagọ mai na.”—Luk 7:4, 5.

Jesu ọ tẹ nwani lele ekpako na bi kpobọ uwou oletu na. Nọ a kẹle obei no, oletu na o te vi amọfa bru Jesu, nọ: “Ọga, who du nyaze he, keme me te ohwo nọ whọ rẹ nyaze uwou riẹ hẹ. Oyejabọ nọ me ro rri omamẹ inọ me te ohwo nọ ọ rẹ nya bru owhẹ ze he na.” (Luk 7:6, 7) Ọzae nana o wo omaurokpotọ kẹhẹ, maero nọ ma tẹ kareghẹhọ nọ o wo ahwo buobu nọ e rrọ otọ riẹ. Onana u dhesẹ nọ ọzae nana o wo ohẹriẹ gaga no ahwo Rom nọ a rẹ lahiẹ idibo rai.—Matiu 8:9.

Ababọ avro, oletu na ọ riẹ nọ ahwo Ju a re kuomagbe ahwo erẹwho efa ha. (Iruẹru Ikọ 10:28) Ẹsejọhọ oyejabọ nọ oletu na ọ rọ vuẹ ahwo nọ o vi na inọ a ta kẹ Jesu nọ: “Thakpe ta ẹme na ọvo, ẹyao odibo mẹ o ti kpo.”—Luk 7:7.

Ẹme nana o gbe Jesu unu, ọ tẹ ta nọ: “Mẹ be ta kẹ owhai nọ, mẹ re jọ evaọ Izrẹl dede ruẹ ẹrọwọ ologbo otiọna ha.” (Luk 7:9) Nọ ahwo nọ oletu na o vi a zihe te obọ uwou oletu na, a tẹ ruẹ nọ ẹyao odibo na o kpo no.

Nọ Jesu o siwi odibo na no, ọ tẹ rọ uvẹ yena wuhrẹ inọ ahwo nọ a rrọ ahwo Ju hu nọ a wo ẹrọwọ a ti wo oghale. Ọ ta nọ: “Ahwo buobu a ti no obọ ovatha-ọre gbe obọ ukiediwo-ọre ze ti lele Abraham gbe Aiziki gbe Jekọp keria re emu evaọ Uvie obọ odhiwu na.” Kọ ẹvẹ kpahe ahwo Ju nọ a wo ẹrọwọ họ? Jesu ọ ta nọ a ti ‘gbolo ai fihọ ebi obọ otafe. Etẹe a te jọ vioja jẹ reakọ.’—Matiu 8:11, 12.

Fikiere, a te siọ ahwo Ju nọ a kaki rovie uvẹ ọrọ Uvie odhiwu fihọ kẹ, rekinọ a rọwo jẹe rehọ họ na. Rekọ a te kẹ ahwo erẹwho efa uvẹ re a lele Jesu keria “evaọ Uvie obọ odhiwu.”