Ahwo Nọ A Wuhrẹ Re A Ru Oreva Jihova

“Wuhrẹ omẹ re me ru orọ eva ra, keme whẹ họ Ọghẹnẹ mẹ!”—OLEZI 143:10.

 1, 2. (a) Okevẹ a re ro wuhrẹ omai, kọ avọ eriwo ọgbagba vẹ? (b) Fikieme u je wuzou tere re Jihova o wuhrẹ omai?

ẸDẸ kpobi nọ ohwo ọ rọ uzuazọ jẹ rọ gaga, a rẹ sai wuhriẹe oware uwoma jọ. Oyena o rọ uzẹme k’owhẹ, yọ ere o rọ kẹ amọfa re. Rekọ eme ọ rẹ via evaọ oke uwhu? O rẹ lọhọ re a wuhrẹ ohwo oware ovo ho hayo re o wuhrẹ okenọ o whu no ho. Ebaibol na ọ ta riẹ vevẹ inọ iwhuowhu na “e riẹ oware ovo ho.” Eriariẹ e rọ Sheol ho, uki ohwo-akpọ. (Ọtausiuwoma Na 9:5, 10) Kọ onana u dhesẹ inọ ewuhrẹ nọ a bi wuhrẹ omai, eriariẹ nọ ma bi kokohọ na, ivrẹvru? Oyena o r’oma hwa oware nọ a wuhrẹ omai gbe epanọ ma be rọ eriariẹ eyena ruiruo.

² Otẹrọnọ eware akpọ na ọvo a wuhrẹ omai, koyehọ obaro mai u ti kri hi. Avọ evawere, a bi wuhrẹ ima ahwo evaọ erẹwho na kpobi oreva Ọghẹnẹ avọ ẹjiroro uzuazọ ebẹdẹ bẹdẹ. Ehri ẹruore ọnana ọ r’oma hwa ewuhrẹ Jihova, Ehri eriariẹ nọ e rẹ kẹ uzuazọ.—Olezi 94:9-12.

 3. (a) Fikieme a jẹ sae tae nọ Jesu họ ọmọ-uwuhrẹ ọsosuọ Ọghẹnẹ? (b) Didi imuẹro ma wo inọ Jihova o ti wuhrẹ ahwo-akpọ, kọ eme u re noi ze?

³ A wuhrẹ Ọmọ otuyẹ Ọghẹnẹ, wọhọ ọmọ-uwuhrẹ ọsosuọ Riẹ, re o ru oreva Ọsẹ riẹ. (Itẹ 8:22-30; Jọn 8:28) U no ere no, Jesu o te dhesẹ nọ Ọsẹ riẹ o ti wuhrẹ ahwo-akpọ buobu re. Kọ eme họ ẹruore mai enọ i bi wuhrẹ mi Ọghẹnẹ na? Jesu ọ ta nọ: “A kere họ eva eruẹaro na nọ, ‘Ai kpobi Ọghẹnẹ o re ti wuhrẹ.’ Kohwo kohwo nọ o yo, je wuhrẹ [no] obọ Ọsẹ na ze, o bru omẹ ze. . . . Uzẹme, uzẹme mẹ ta kẹ owhai, ọnọ ọ rọwo o wo uzuazọ ebẹdẹ bẹdẹ.”—Jọn 6:45-47.

 4. Ẹvẹ ewuhrẹ Ọghẹnẹ o bi ro kpomahọ ima ahwo, kọ didi ẹruore a wo?

⁴ Jesu ọ jẹ t’ẹme no Aizaya 54:13 ze, ọnọ a ta kpeze se aye ẹwoho Ọghẹnẹ, Zayọn obọ odhiwu na. Eruaruẹ ọyena ọ mai kie kpahe emọ riẹ, ilele 144,000 Jesu Kristi nọ a kẹ ẹzi na. Ikiọkotọ emọ ẹzi eyena a rọ uzuazọ nẹnẹ, be kobaro ọruẹrẹfihotọ ewuhrẹ akpọ na soso. Wọhọ oware nọ u no rie ze, ima ahwo efa enọ i ru “otu obuobu” na via a bi je wo erere no ewuhrẹ Jihova ze. A wo ẹruore ewuhrẹ nọ uwhu o rẹ whaha ha. Evaọ oghẹrẹ vẹ? Whaọ, a rọ edhere nọ a te rọ zọ no ‘uye ulogbo’ nọ o be nyaze kpata kpata na re a jẹ reawere uzuazọ ebẹdẹ bẹdẹ evaọ otọakpọ aparadase.—Eviavia 7:9, 10, 13-17.

A be Mae Fiẹgba họ Eruo Oreva Ọghẹnẹ

 5. (a) Eme họ uzoẹme ẹgbukpe 1997 na? (b) Ẹvẹ ekpohọ iwuhrẹ Ileleikristi o rẹ jọ omai oma?

⁵ Evaọ etoke 1997, evaọ ikoko nọ i bu vi 80,000 evaọ akpọ na soso, Isẹri Jihova a te kareghẹhọ eme emuhọ Olezi 143:10 na: “Wuhrẹ omẹ re me ru orọ eva ra.” Oyena o rẹ te jọ uzoẹme ẹgbukpe ọrọ 1997. Eme eyena, nọ a ti kere fihọ evaọ Egwa Uvie na, e te jọ wọhọ ekareghẹhọ inọ oria nọ a re jo wo ewuhrẹ Ọghẹnẹ họ eva iwuhrẹ ukoko na, oria nọ ma re jo wo abọ evaọ ọruẹrẹfihotọ ewuhrẹ nọ o be nyaharo. Okenọ ma te bi kuomagbe inievo mai re Owuhrẹ Ologbo na o wuhrẹ omai, o rẹ sae j’omai oma wọhọ epanọ o jọ ọnọ ọ so ilezi na oma, ọnọ o kere nọ: “Eva e were omẹ hrọ nọ a ta kẹ omẹ nọ, ‘Ma kpo obọ uwou ỌNOWO.’ ”—Olezi 122:1; Aizaya 30:20.

 6. Evaọ eme ọ Devidi, eme ma re vuhumu?

⁶ Ẹhẹ, ma rẹ sae wo isiuru re a wuhrẹ omai oreva Ọghẹnẹ ukpenọ a re wuhrẹ omai oreva ọwegrẹ mai Ẹdhọ hayo oreva ahwo-akpọ nọ e gba ha. Fikiere, wọhọ Devidi, ma vuhu Ọghẹnẹ nọ ma be gọ jẹ be gbodibo kẹ mu: “Keme whẹ họ Ọghẹnẹ mẹ! Ru re ẹzi owoma ra o su omẹ eva ada ọpraprara!” (Olezi 143:10) Ukpenọ ọ gwọlọ kuomagbe ahwo erue, Devidi ọ salọ nọ ọ rẹ jọ oria nọ a rẹ jọ wha egagọ Jihova haro. (Olezi 26:4-6) Avọ ẹzi Ọghẹnẹ nọ ọ rẹ kpọ ithihi riẹ, Devidi ọ rẹ sae nya evaọ edhere ẹrẹreokie.—Olezi 17:5; 23:3.

 7. Ẹvẹ ẹzi Ọghẹnẹ o ro ru iruo no evaọ ukoko Ileleikristi na?

⁷ Devidi Ologbo na, Jesu Kristi, ọ kẹ ikọ na imuẹro inọ ẹzi na o re ti wuhrẹ ai eware kpobi je zihe eware nọ ọ vuẹ rai kpobi ze iroro rai. (Jọn 14:26) No oke Pẹntikọst vrẹ, oye Jihova o bi ro rovie “eware ididi Ọghẹnẹ” nọ e rọ Ẹme riẹ nọ a kere. (1 Ahwo Kọrint 2:10-13) O ru onana no ẹkwoma edhere nọ a rẹ ruẹ nọ Jesu o se ‘ọrigbo nọ o wo ẹrọwọ avọ areghẹ’ na. O be kẹ emu ẹzi nọ a bi ro ruiruo evaọ ọruẹrẹfihotọ ewuhrẹ kẹ ikoko ahwo Ọghẹnẹ evaọ akpọ na soso.—Matiu 24:45-47.

A bi Wuhrẹ Omai Oreva Jihova eva Iwuhrẹ Mai

 8. Fikieme abọ nọ a re wo evaọ Ewuhrẹ Uwou Eroro Na u je wuzou tere?

⁸ Eme nọ a rẹ jọ Uwuhrẹ Uwou Eroro Na wuhrẹ k’ẹkpoka k’ẹkpoka evaọ ukoko na ẹsikpobi e rẹ t’ẹme te efihiruo izi Ebaibol. Enana i re ghine fiobọhọ k’omai thihakọ awaọruọ uzuazọ. Evaọ iwuhrẹ efa a rẹ t’ẹme te uzẹme ẹzi hayo eruẹaruẹ Ebaibol na. Ẹvẹ a bi wuhrẹ omai te evaọ iwuhrẹ eyena! Evaọ ekuotọ buobu Egwa Uvie e be vọ mu unu kẹ iwuhrẹ eyena. Ghele evaọ erẹwho jọ, ahwo nọ e be ziọ iwuhrẹ na i kie kpotọ no. Kọ eme who roro nọ o be wha oyena ze? Kọ iruo i bi ru ejọ nọ a gbe bi ro kuomagbe he re a “wo uyoyou, je ru iruo ezi kpobi”? Hayo kọ a rẹ raha euwa buobu riakpọ hayo evaọ eriwo etẹlivisiọne, o vẹ jọ wọhọ nọ ohwo o wo uvẹ nọ o re ro kpohọ iwuhrẹ na kpobi hi? Kareghẹhọ ujaje nọ a rehọ ẹgba-ẹzi kere na eva Ahwo Hibru 10:23-25. Kọ oma kokohọ kẹ uthubro Ọghẹnẹ o gbẹ mai wuzou nọ ma “riẹ nọ ẹdẹ na ọ kẹlino” no na?

 9. (a) Ẹvẹ Ewuhrẹ Odibọgba na ọ sae rọ thọ omai evaọ odibọgba na? (b) Eme o rẹ jọ uruemu mai kpahe isẹrise?

⁹ Usu ehwa-iruo nọ ma rẹ rọ karo họ ẹgọ wọhọ egbodibo Ọghẹnẹ. A ruẹrẹ Ewuhrẹ Odibọgba na họ re u wuhrẹ omai epanọ ma re ro ru onana gba ziezi. Ma re wuhrẹ epanọ ma rẹ rọ nya bru ahwo, oware nọ ma rẹ ta, epanọ ma re ru nọ a tẹ riẹ uyo kẹ, gbe oware nọ ma re ru dede okenọ ahwo a tẹ se ovuẹ mai. (Luk 10:1-11) Nọ a be t’ẹme te ona nọ u w’iruo je bi dhesẹ ai via evaọ ewuhrẹ k’ẹkpoka k’ẹkpoka na, ma rẹ thoma vẹrẹ viere re ma nyate ibiudu ahwo orọnikọ evaọ n’uwou ruọ uwou ọvo ho rekọ nọ ma tẹ be ta usiuwoma evaọ iyẹrẹ, oria nọ imoto e rẹ kpahe, who te bi kpohọ erẹ, ogege arupre, evaọ oria eki, hayo evaọ isukulu. Nya lele ayare mai, “Wuhrẹ omẹ re me ru orọ eva ra,” ma te gwọlọ rehọ uvẹ kpobi re ma ru epanọ Olori mai ọ ta: “Ru re elo rai o lo iraro ahwo, re a . . . jiri Ọsẹ rai nọ ọ rọ obọ odhiwu.”—Matiu 5:16.

10. Ẹvẹ ma sai ghine ro fiobọhọ kẹ ‘enọ i te’?

¹⁰ Evaọ iwuhrẹ ukoko itieye na, a bi je wuhrẹ omai re ma ru ilele amọfa. Nọ ma tẹ nwane ruẹ isiuru hayo nọ ma te fi obe họ ada, ẹjiroro mai nọ ma te bi ru ozihebro họ re ma mu iwuhrẹ Ebaibol họ. Eva oghẹrẹ jọ, onana o wọhọ epanọ ilele na a jẹ hẹ rọ jọ kugbe ‘ahwo nọ i te’ re a ruẹse wuhrẹ ai eware nọ Jesu o j’uzi rai. (Matiu 10:11; 28:19, 20) Nọ ma wo obọdẹ obufihọ na, wọhọ obe Eriariẹ Nọ I Re Su Kpohọ Uzuazọ Ebẹdẹ Bẹdẹ na, ma ghinẹ ruẹrẹ oma họ no ziezi re ma ru odibọgba mai gba. (2 Timoti 4:5) Koka koka nọ who bi kpohọ Ewuhrẹ Odibọgba gbe Isukulu Odibọgba Ọghẹnẹ na, daoma re who wo otoriẹ eme obufihọ nọ i ti fiobọhọ k’owhẹ jọ emamọ ọgbodibo Ọghẹnẹ nọ o te, nọ ọ be wha oreva riẹ haro.—2 Ahwo Kọrint 3:3, 5; 4:1, 2.

11. Ẹvẹ ahwo jọ a ro dhesẹ ẹrọwọ no evaọ eme nọ e rọ Matiu 6:33?

¹¹ O rọ oreva Ọghẹnẹ re ma “kake guọlọ uvie riẹ gbe ẹrẹreokie riẹ.” (Matiu 6:33) Nọ oma ra nọ, ‘Ẹvẹ me ti fi ujaje onana h’iruo otẹrọnọ ẹgwọlọ evaọ oria iruo mẹ [hayo ọrọ ọrivẹ-orọo mẹ] u kpeke kugbe ekpohọ ewuhrẹ?’ Ibuobu nọ e kpako no evaọ ẹzi a rẹ jowọ re a t’ẹme kugbe ọnọ ọ rehọ e rai iruo na. Ọkobaro jọ ọ ta kẹ ohwo nọ ọ rehọ e riẹ iruo inọ ọ te rehọ oke no iruo koka koka re ọ ruẹse kpohọ iwuhrẹ ukoko. Ọ kẹ riẹ uvẹ. Rekọ fiki okpakpa re ọ riẹ oware nọ o rẹ via evaọ iwuhrẹ na, ọ tẹ ta nọ ọ rẹ nya re. Evaọ obei o te yo owhowhovia kpahe okokohọ ubrotọ nọ ọ be tha. Fikiere, ọnọ o wo iruo na ọ tẹ ruẹrẹhọ re ọ raha okpẹdoke ọvo evaọ okokohọ na. Kọ eme who wuhrẹ no oriruo ọnana ze?

Ewuhrẹ Oreva Jihova Ẹkwoma Esẹ gbe Ini nọ E rọ Ahwo Ọghẹnẹ

12. Re a wuhrẹ emaha oreva Jihova, eme esẹ gbe ini Ileleikristi a re ru avọ odiri gbe okruga?

¹² Rekọ orọnikọ iwuhrẹ ukoko gbe ikokohọ ọvo họ eruẹrẹfihotọ nọ a re jo wuhrẹ omai kpahe oreva Ọghẹnẹ hẹ. Esẹ gbe ini ahwo Ọghẹnẹ a j’uzi kẹ ai nọ a wuhrẹ, whọku, jẹ yọrọ emọ rai re a jiri Jihova je ru oreva riẹ. (Olezi 148:12, 13; Itẹ 22:6, 15) Ere o ruo o gwọlọ nọ a rẹ rehọ “emaha” kpohọ iwuhrẹ oria nọ a sae jo ‘yo je wuhrẹ,’ rekọ ẹvẹ rọ kpahe ewuhrẹ emọ na kpahe ikere efuafo na evaọ obọ uwou? (Iziewariẹ 31:12; 2 Timoti 3:15) Nọ iviuwou buobu a te muọ ọruẹrẹfihotọ ewuhrẹ Ebaibol uviuwou ẹsikpobi họ no, u re kri hi a vẹ kuvẹ re o yẹ no hayo a ve gbabọ kẹe. Kọ onana o via ere k’owhẹ no? Kọ who roro nọ ẹme ọ ewuhrẹ ẹsikpobi otiọye na u f’owhẹ hẹ hayo inọ uviuwou ra o wo ẹhẹriẹ thesiwa fikiere o sai ti wo iruo k’owhai hi? Epanọ o rọ kpobi, iviena esẹ gbe ini wha kiẹ riwi uzoẹme ọ “Ukuoriọ Efe Ẹzi Mai” gbe “Osaohwa Ithihakọ” evaọ Uwou Eroro Na ọrọ August 1, 1995 (ọrọ Oyibo).

13. Ẹvẹ iviuwou a sai ro wo erere no ese okpẹdẹ na ze?

¹³ A tudu họ iviuwou awọ re a wo uruemu ọ eroro kpahe ese okpẹdẹ na no Examining the Scriptures Daily ze. Re a se ikere na gbe ẹme nọ a kpahe fihọ iẹe ọvo u woma, rekọ re a kpahe fihọ ikere na je fi ei họ iruo oye o rẹ mai kẹ erere. Wọhọ oriruo, whọ tẹ be t’ẹme kpahe Ahwo Ẹfẹsọs 5:15-17, ahwo uviuwou na a sai roro kpahe epanọ ‘a re ro ru uvẹ oke’ kẹ uwuhrẹ omobọ ohwo, re a wo abọ evaọ abọjọ iruo ọkobaro na, re a jẹ rẹro te eruẹrẹfihọ Ọghẹnẹ. Ẹhẹ, re uviuwou a se ese okpẹdẹ na kugbe o sae wọ omọvo jọ hayo ibuobu re a ‘riẹ oware nọ oreva Jihova o rọ vọvọ.’

14. Didi iwuhrẹ Iziewariẹ 6:6, 7 o dhesẹ nọ esẹ gbe ini a rẹ jọ, nọ o gwọlọ eme?

¹⁴ Esẹ gbe ini a rẹ jọ uvi iwuhrẹ emọ rai. (Iziewariẹ 6:6, 7) Rekọ orọnikọ ẹkwoma eme nọ a rẹ rọ fa emọ rai ova ẹsikpobi hayo gbae họ họ. U fo re esẹ gbe ini a gaviezọ re, ere a rẹ rọ riẹ oware nọ u fo nọ a re ru vevẹ, kpọ viẹ, dhesẹ, hayo jẹ wariẹ. Evaọ uviuwou Oleleikristi jọ, ọsẹ gbe oni na a rovie edhere ẹmeọta odode fihọ ẹkwoma udu nọ a ta họ emọ rai awọ re a nọ enọ kpahe eware nọ a wo otoriẹ rai hi hayo onọ u bi kpokpo ai. Ẹsiẹ a rọ riẹ nọ ọmọzae-uzoge rai jọ o wo ẹbẹbẹ kpahe uzẹme na nọ Jihova o wo emuhọ họ. Ọsẹ gbe oni na a tẹ sae ruẹ evuẹ no ebe Watch Tower Society ze nọ u dhesẹ nọ oke gbe idedeghe u wo oba ha. O tẹ wọhọ nọ otofa ẹme na ọye, yọ oyena o vọ ọmọzae rai na eva. Fikiere rehọ oke re whọ k’uyo enọ rai vevẹ je no Ikereakere na ze, fiobọhọ kẹ ai ruẹ inọ ewuhrẹ re a ru oreva Ọghẹnẹ o rẹ wha edẹro ze. Kọ eme ọfa ahwo Ọghẹnẹ—te emaha te ekpako a bi wuhrẹ nẹnẹ?

A Wuhrẹ Omai re Ma You jẹ Họre

15. Ẹvẹ a sae rọ riẹ epanọ uyoyou inievo mai u kodo te?

¹⁵ Nya lele ujaje okpokpọ Jesu, “Ọghẹnẹ oma riẹ ọvo o wuhrẹ [omai] no nọ, [mai] ohwo o you ohwo.” (1 Ahwo Tẹsalonika 4:9) Nọ eware e tẹ rọ malẹ be nya ziezi, ma rẹ sai roro inọ ma you inievo mai kpobi. Rekọ eme o rẹ via otẹrọnọ ẹwhọ ọ roma via hayo otẹrọnọ a kp’omai eva fiki oware nọ Oleleikristi ọfa jọ ọ ta hayo o ru? Etenẹ a rẹ jọ ruẹ epanọ uyoyou mai u kodo te. (Wawo 2 Ahwo Kọrint 8:8.) Kọ eme Ebaibol na o wuhrẹ omai nọ ma ru evaọ okioye? Oware jọ họ ma rẹ daoma re ma dhesẹ uyoyou vọvọ ziezi. (1 Pita 4:8) Ukpenọ ma rẹ gwọlọ isiuru obọ mai, re ma dheva fiki eware nọ i fioka ha, hayo re ma fi ẹgo fihọ eva, ma rẹ daoma re uyoyou u ruru izieraha buobu. (1 Ahwo Kọrint 13:5) Ma riẹ nọ onana họ oreva Ọghẹnẹ, keme onana họ onọ Ẹme riẹ o wuhrẹ.

16. (a) Didi oghẹrẹ ẹmuofio a wuhrẹ Ileleikristi nọ a re fiẹ? (b) Ẹvẹ a rọ ruẹrẹ omai họ no?

¹⁶ Fikinọ ahwo buobu a rẹ ruẹ epanọ uyoyou gbe ẹmuofio a ro tho oma ha, ẹmuofio yọ oware nọ a bi wuhrẹ omai, rekọ oghẹrẹ ẹmuofio ọfa. Devidi ọ rẹro so Jihova re o wuhrẹ iẹe epanọ o re ro fi ẹmo, dede nọ evaọ oke riẹ oyena u kugbe ẹmo ugbobọ nọ o re fi kugbe ewegrẹ Izrẹl. (1 Samuẹle 17:45-51; 19:8; 1 Ivie 5:3; Olezi 144:1) Kọ ẹvẹ kpahe ohọre mai nẹnẹ? Ekwakwa ẹmo mai e rọ erọ iwo ho. (2 Ahwo Kọrint 10:4) Ọmai yọ ohọre ẹzi, yọ ma rẹ rọ ekwakwa-ẹmo ẹzi thọ oma mai ziezi. (Ahwo Ẹfẹsọs 6:10-13) Ẹkwoma Ẹme gbe ahwo ukoko riẹ, Jihova o bi wuhrẹ omai re ma fi ẹmo ẹzi na kparobọ.

17. (a) Didi ẹghẹ Ẹdhọ o bi ro ruiruo re ọ rẹriẹ iroro mai thọ? (b) Kọ eme ma rẹ whaha avọ areghẹ?

¹⁷ Evaọ edhere eviẹhọ, gbe ẹghẹ, ẹsebuobu Ẹdhọ ọ be rehọ akpọ na ruiruo, wọhọ ikọ-erue, gbe ewọsuọ efa erọ uzẹme na evaọ omodawọ re ọ rẹriẹ ova mai kpohọ eware nọ i fioka ha. (1 Timoti 6:3-5, 11; Taitọs 3:9-11) O wọhọ epaọ ẹsenọ ọ ruẹ nọ ọ be sae rehọ ohọre ovadhova, ọrọ ozighi, ro gele omai kie he, fikiere ọ tẹ be gwọlọ ru omai zoruẹ ẹkwoma inoma nọ ma re gu ẹsikpobi hayo nọ enọ igheghẹ, enọ i wo erere ẹzi ọvo ho. Wọhọ egbaẹmo nọ e rẹ tẹro viotọ, ma rẹ yọrọ oma kẹ ọza itieye na nwane wọhọ epanọ ma rẹ yọrọ oma kẹ ohọre ovadhova na.—1 Timoti 1:3, 4.

18. Eme ẹria nọ ma rẹ rria k’omobọ mai ha o ghinẹ gwọlọ?

¹⁸ Ma be wha isiuru ahwo hayo oreva erẹwho haro ho. Jihova o wuhrẹ omai no ẹkwoma oriruo Jesu inọ ma gbẹ rria kẹ omobọ mai hi; ukpoye, ma re wo oghẹrẹ iroro Kristi Jesu jẹ rria kẹ oreva Ọghẹnẹ. (2 Ahwo Kọrint 5:14, 15) Evaọ oke nọ u kpemu, ma yeri uzuazọ ofafariẹ, nọ u fioka ha no, be raha oke oghaghae kufiẹ. Ehaa ilogbo, edada, gbe ọfariẹ-ogbe họ oka akpọ omuemu ọnana. Enẹna nọ a bi wuhrẹ omai re ma ru oreva Ọghẹnẹ na, kọ eva e gbẹ be were omai inọ ma wo ohẹriẹ no akpọ ogbekuo ọnana? Fikiere j’oma họre evaọ ẹzi gaga re ma whaha omadhehọ iruemu ogbekuo akpọ na.—1 Pita 4:1-3.

A bi Wuhrẹ Omai re U Woma k’Omai

19. Re a wuhrẹ omai oreva Jihova je ghine ru ei, didi irere o rẹ wha ze?

¹⁹ U wuzou re ma riẹ nọ re Jihova o wuhrẹ omai o rẹ k’omai erere gaga. Avọ otoriẹ, ma re ru ẹkẹ abọ mai ẹkwoma ezọgaviẹ ziezi re ma ruẹse wuhrẹ je lele ehrẹ nọ i bi t’omai obọ ẹkwoma Ọmọ riẹ je no Ẹme riẹ ze gbe ahwo okugbe riẹ. (Aizaya 48:17, 18; Ahwo Hibru 2:1) Ẹkwoma ere oruo, ma jẹ te ruẹrẹ oma họ re ma dikihẹ ga evaọ oke okpẹtu enana jẹ dadamu kẹ ẹkporo nọ ọ rọ obaro na. (Matiu 7:24-27) Makọ enẹna, ma re ru Ọghẹnẹ eva were ẹkwoma eruo oreva riẹ avọ imuẹro inọ ọ te k’iyo kẹ elẹ mai. (Jọn 9:31; 1 Jọn 3:22) Ma vẹ te ghinẹ ruẹ uvi evawere.—Jọn 13:17.

20. Eme u re fo nọ who re roro kpahe nọ whọ be ruẹ uzoẹme ẹgbukpe na evaọ etoke 1997 na?

²⁰ Evaọ etoke ukpe 1997 na, ma ti wo uvẹ nọ ma re ro se je roro kpahe ese ẹgbukpe na, Olezi 143:10: “Wuhrẹ omẹ re me ru orọ eva ra.” Nọ ma bi ru ere na, jọ ma rehọ uvẹ mai jọ ro roro kpahe ekwakwa nọ Ọghẹnẹ ọ kẹ no rọ kẹ ewuhrẹ mai, enọ a dhesẹ evaọ obehru na. Yọ j’oma rehọ eroro kpahe eme enana wọhọ ẹgba nọ ma rẹ rọ j’owọ lele olẹ oyena, nọ ma riẹ nọ “ohwo nọ o re ru oreva Ọghẹnẹ ọ rẹ jọ bẹdẹ [na].”—1 Jọn 2:17.

Ẹvẹ Whọ te k’Uyo?

◻ Amono a bi wuhrẹ nẹnẹ re a ru oreva Jihova?

◻ Ẹvẹ Olezi 143:10 o re kpomahọ omai evaọ etoke 1997?

◻ Ẹvẹ a bi ro wuhrẹ omai re ma ru oreva Jihova?

◻ Eme a gwọlọ mi esẹ gbe ini Ileleikristi evaọ ewuhrẹ emọ rai?