“Ọghẹnẹ Họ Uyoyou”

“Ohwo nọ o wo uyoyou hu, ọ riẹ Ọghẹnẹ hẹ; keme Ọghẹnẹ họ uyoyou.”—1 JỌN 4:8.

1-3. (a) Didi ẹme Ebaibol na e ta kpahe okwakwa Jihova na, uyoyou, kọ ẹvẹ ẹme nana ọ rọ rrọ oghẹrẹsa? (b) Fikieme Ebaibol na e rọ ta nọ “Ọghẹnẹ họ uyoyou”?

EKWAKWA Jihova kpobi i mu urirẹ, e rrọ gbagba, yọ i re siuru. Rekọ onọ o mai siuru evaọ ekwakwa Jihova họ uyoyou. Oware ovo o riẹ hẹ nọ u re si omai kẹle Jihova ga te uyoyou riẹ. O rrọ oware evawere inọ uyoyou họ okwakwa riẹ nọ o karo re. Ẹvẹ ma rọ riẹ ere?

² Ebaibol na e ta oware jọ kpahe uyoyou nọ o ta kpahe ekwakwa ilogbo Jihova efa ha. Ikereakere na e ta ha inọ Ọghẹnẹ họ ogaga hayo inọ Ọghẹnẹ họ uvi-ẹdhoguo hayo tubọ inọ Ọghẹnẹ họ areghẹ. O wo ekwakwa eyena, ọye họ uzedhe ehri esa na kpobi. Rekọ a ta okpẹme jọ kpahe uyoyou eva 1 Jọn 4:8: ‘Ọghẹnẹ họ uyoyou.’ Ẹhẹ, uyoyou o rrọ oma Jihova didi. O rrọ ẹkoma riẹ. Ma rẹ sai roro iei enẹ: Ogaga Jihova u re ru ei jẹ owọ. Uvi-ẹdhoguo gbe areghẹ riẹ e rẹ kpọ oghẹrẹ owọ nọ ọ rẹ jẹ. Rekọ uyoyou Jihova oye o rẹ wọe j’owọ. Yọ uyoyou riẹ o rẹ kpọ edhere nọ ọ rẹ rehọ ekwakwa efa riẹ ro ruiruo.

³ A rẹ tae ẹsikpobi nnọ Jihova họ ehri uyoyou. Fikiere, ma tẹ gwọlọ wuhrẹ kpahe uyoyou, ma re wuhrẹ kpahe Jihova hrọ. Nọ o rrọ ere na, j’oma kiẹ abọ jọ uyoyou Jihova nọ u wo ibe he na riwi.

Odhesẹvia Uyoyou nọ O Mai Kpehru

 4, 5. (a) Odhesẹvia uyoyou vẹ họ onọ o mae rro no emuhọ kpobi ze? (b) Ẹvẹ ma sae rọ ta nọ ọgbakugbe uyoyou nọ o mae ga kpobi u kru Jihova avọ Ọmọ riẹ kugbe?

⁴ Jihova o dhesẹ uyoyou no evaọ idhere buobu, rekọ ovo jọ o riẹ nọ u kpehru vi edekọ kpobi. Eme ọye? Ọmọ riẹ nọ o vi ze re ọ ruẹ-uye je whu k’omai. Ma sae ta gbagba inọ onana họ odhesẹvia uyoyou nọ o mae rro kparobọ no emuhọ ze. Ẹvẹ ma jẹ sae ta ere?

⁵ Ebaibol na i se Jesu “ọnọ ọ rọ ọtuyẹ evaọ emama kpobi.” (Ahwo Kọlọsi 1:15) Dai roro iei—Ọmọ Jihova ọ jọ uzuazọ taure a tẹ te ma ehrugbakpọ na. Fikiere, ẹvẹ Ọsẹ gbe Ọmọ na a jọ kugbe krite? Ekiotọ-eriariẹ jọ e ta nnọ ehrugbakpọ na ọ kpako te ikpe ima-odu 13 no. Dede na, ekele nana ọ tẹ make gba, u re te he re a rehọ iẹ kele epanọ Ọmọ otuyẹ Jihova ọ rria uzuazọ kri te no! Eme o je ru eva ikpe yena kpobi? Ọmọ na ọ rehọ evawere jọ “osu iruo” rọkẹ Ọsẹ riẹ. (Itẹ 8:30; Jọn 1:3) Jihova avọ Ọmọ riẹ a ru iruo kugbe ma eware nọ i kiọkọ kpobi. O jọ etoke evawere igbunu gaga! Kọ ono evaọ usu mai na ọ rẹ sai ghine wo otoriẹ ọgbakugbe ọgaga nọ o kri te ikpe buobu itieye no? U re vevẹ, ọgbakugbe uyoyou nọ o mai ga kpobi u kru Jihova Ọghẹnẹ avọ Ọmọ riẹ kugbe.

 6. Ẹvẹ Jihova o ro dhesẹ iroro riẹ kpahe Ọmọ Riẹ eva okenọ Jesu ọ họ ame?

⁶ Ghele na, Jihova o vi Ọmọ riẹ ze otọakpọ re a yẹe wọhọ ọmọ ohwo-akpọ. Ere oruo u dhesẹ nọ evaọ ikpe buobu, Jihova ọ te jọ ababọ usu okpekpe nọ o wo kugbe Ọmọ oyoyou riẹ na evaọ obọ odhiwu. Avọ isiuru egaga, O rri no odhiwu ze nọ Jesu ọ jẹ rro te ọzae ọgbagba na. Nọ ọ kpako te oware wọhọ ikpe 30 no, Jesu ọ tẹ họ ame. Eva oke yena Ọsẹ na ọ rọ unu riẹ ta ẹme no odhiwu ze inọ: “Ọnana họ Ọmọ oyoyou mẹ, ọnọ ọ were omẹ hrọ.” (Matiu 3:17) O ghinẹ were Ọsẹ riẹ eva gaga nọ ọ ruẹ nnọ Jesu ọ rehọ ẹrọwọ ru eware kpobi nọ a ruẹaro rai gbe enọ a gwọlọ mi ei kpobi gba!—Jọn 5:36; 17:4.

 7, 8. (a) Eme Jesu o thihakọ rai eva Nisan 14, 33 C.E., kọ ẹvẹ u ro kpomahọ Ọsẹ obọ odhiwu riẹ? (b) Fikieme Jihova ọ rọ k’uvẹ kẹ Ọmọ riẹ re ọ ruẹ uye je whu?

⁷ Ẹvẹ o jọ Jihova oma evaọ Nisan 14, 33 C.E., nọ a vivie Jesu nọ otu-ugbarugba a ro mu ei? Okenọ a je se Jesu ẹkoko, nwo-eya ku ei, jẹ tehe iẹe? Okenọ a fae, nọ eviaviẹ e jẹ viẹ iwo uke riẹ lahwe? Nọ a tehe itu họ iẹe abọ gbe awọ fihọ ure oliọliọ jẹ nya siẹe ba yagha etẹe nọ ahwo a je nie-abọ họ iẹe? Ẹvẹ o jọ Ọsẹ na oma nọ Ọmọ oyoyou riẹ ọ viẹ sei evaọ akọriọ edada? Ẹvẹ o jọ Jihova oma nọ Jesu o s’ẹwẹ urere riẹ, jẹ ruẹ nọ Ọmọ oyoyou Riẹ nọ ọ rrọ uzuazọ no anwọ emuhọ emama kpobi ze na ọ gbẹ jọ uzuazọ okioke yena ha?—Matiu 26:14-16, 46, 47, 56, 59, 67; 27:26, 38-44, 46; Jọn 19:1.

⁸ Nọ oware o rẹ da Jihova na, ma sae rọ unu gbiku epanọ uwhu Ọmọ riẹ o da riẹ te he. Ẹme nọ ma rẹ sae ta họ ẹjiroro nọ Jihova ọ rọ kuvẹ re onana o via. Fikieme Ọsẹ na ọ jẹ lahiẹ oma riẹ enẹ? Jihova ọ fere oware igbunu jọ via k’omai eva Jọn 3:16—owọ Ebaibol nọ u w’uzou te epanọ a ro sei ọwhẹgbe Usiuwoma na. O ta nọ: “Ọghẹnẹ o you akpọ na hrọ, ọ jẹ rehọ Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.” Fikiere oware nọ o wọ Ọghẹnẹ họ: uyoyou. A ri dhesẹ uyoyou ovo nọ u vi onana ẹdọvo ho.

Epanọ Jihova Ọ rọ k’Omai Imuẹro Uyoyou Riẹ

 9. Eme Setan ọ gwọlọ nọ ma rọwo kpahe oghẹrẹ nọ Jihova o rri omai, rekọ eme Jihova ọ kẹ omai imuẹro riẹ?

⁹ Dede na, onọ jọ nọ u w’uzou o roma via. Kọ Ọghẹnẹ o you omai omomọvo? Ahwo jọ a rẹ rọwo nnọ Ọghẹnẹ o you ahwo-akpọ kpobi, wọhọ epanọ Jọn 3:16 o ta na. Rekọ a re roro inọ, ‘Ọghẹnẹ ọ sai you omẹ dẹẹ hẹ.’ Uzẹme riẹ họ, o rrọ Setan Ẹdhọ na oja gaga re ọ lẹliẹ omai roro nnọ Jihova o you omai hi hayo o se omai gb’ahwo ho. Evaọ abọdekọ riẹ, oghẹrẹ kpobi nọ ma roro nọ a sai you omai hi hayo inọ ma fioka ha, Jihova ọ kẹ omai imuẹro inọ omomọvo idibo ẹrọwọ riẹ a rrọ ghaghae kẹe.

10, 11. Ẹvẹ ọtadhesẹ erata nọ Jesu ọ kẹ na u ro dhesẹ nọ ma rrọ ghaghae eva aro Jihova?

¹⁰ Wọhọ oriruo, roro kpahe eme ọ Jesu nọ e rrọ Matiu 10:29-31. Bi dhesẹ epanọ ilele riẹ e ghare te, Jesu ọ ta nnọ: “A be zẹ [erata] ivẹ ẹnini hi? Rekọ ọvuọvo rai o re kie otọ emu Ọsẹ rai hi. Makọ egẹ-eto uzou rai kpobi a kele i rai. Fikiere wha dhẹ ozọ họ; wha wo aghae vi [erata] buobu.” Roro otofa nọ eme eyena i wo kẹ ahwo ikpe-udhusoi ọsosuọ nọ e jẹ gaviezọ kẹ Jesu na.

¹¹ Evaọ edẹ Jesu, arata họ ọvra nọ ọ mai ku nọ a rẹ dẹ ro there emu. Ohwo ọ rẹ sae rehọ ẹnini ọvo gheghe dẹ erata ivẹ. Rekọ wọhọ epanọ o rrọ Luk 12:6, 7, Jesu ọ ta uwhremu na inọ otẹrọnọ ohwo o kru inini ivẹ, ọ rẹ sae dẹ erata isoi, orọnikọ ene he. Okpahọ na yọ onọ a ro ru ufihọ wọhọ ẹsenọ u wo aghare ọvuọvo ho. Ẹsejọhọ ahwo a rri evra eyena kuẹku gheghe, rekọ ẹvẹ Ọnọma na o rri rai? Jesu ọ ta nọ: “Ae ọvuọvo [makọ ọnọ a fihọ na dede] ọ thọrọ ẹro eva aro Ọghẹnẹ hẹ.” Enẹna ma sai mu otọ ẹme Jesu na họ ẹriẹ. Nọ o rọnọ Jihova o re rri arata ọvo gheghe ghare tere na, dai roro epanọ ohwo-akpọ ọ ghare te! Wọhọ epanọ Jesu ọ tae, Jihova ọ riẹ eware kpobi kpahe omai. Whaọ ọ tubẹ riẹ unu eto uzou mai dede!

12. Ẹvẹ o sai ro mu omai ẹro nọ ẹme ọ Jesu na inọ a riẹ unu eto uzou mai yọ oware aghẹruẹ hẹ?

¹² Ahwo jọ a sai roro nnọ Jesu ọ jọ etenẹ bru okpa họ ẹme na. Rekọ, dai roro kpahe ẹkparomatha na. Roro epanọ Jihova ọ riẹ omai te nọ ọ sae rọ wariẹ ma omai! Ọ rehọ omai ghare te epanọ ọ rẹ rọ kareghẹhọ oware kpobi kpahe omai, kugbe epanọ ma rrọ gbe uzuazọ nọ ma yeri vrẹ no gbe eware nọ e via k’omai no. Re o kele unu eto uzou mai—nọ uzou ovo u re wo ibieto nọ i bu te oware wọhọ 100,000 na—o rẹ bẹe eru hu. Rri epanọ eme ọ Jesu na e ghinẹ k’omai imuẹro te inọ Jihova ọ be dao ezọ mai omomọvo!

13. Ẹvẹ oriruo Jehoshafat Ovie na o ro dhesẹ nọ Jihova ọ be t’ẹrovi ewoma nọ ọ rrọ omai oma dedenọ ma gba ha?

¹³ Ebaibol na i dhesẹ oware ofa nọ o kẹ omai imuẹro uyoyou Jihova. Ọ rẹ t’ẹrovi je rri ewoma nọ ọ rrọ omai oma ghaghae. Wọhọ oriruo, roro kpahe Jehoshafat Ovie owoma na. Okenọ ovie na o ru oware ugheghẹ jọ, ọruẹaro Jihova ọ tẹ ta kẹe nọ: “Fiki onana ỌNOWO na ọ jẹ dheva kpahe owhẹ.” Ẹvẹ ẹme na o mu ọwhewhe te! Rekọ ovuẹ Jihova o jọ etẹe serihọ họ. O ta haro nọ: “Dede, ọ ruẹ oware uwoma jọ evaọ eva ra.” (2 Iruẹru-Ivie 19:1-3) Fikiere evedha ikiẹrẹe Jihova i tu rie aro kẹ “oware uwoma” nọ o jọ oma Jehoshafat he. Kọ o gbẹ kẹ imuẹro nọ ma rọ riẹ nọ Ọghẹnẹ o bi rri ewoma nọ ọ rrọ omai oma dede nọ ma gba ha?

Ọghẹnẹ nọ Ọ “Vọ Avọ Erọvrẹ”

14. Ma tẹ raha uzi, edada iroro vẹ ma re wo, rekọ ẹvẹ ma sai ro wo erere no erọvrẹ Jihova ze?

¹⁴ Ma tẹ raha uzi, edada, omovuọ gbe obrukpe iroro e rẹ sae lẹliẹ omai roro nọ ma rẹ gbẹ sai te ahwo nọ a rẹ gọ Jihova ha. Dede na, kareghẹhọ inọ Jihova ọ ‘rẹ rọ vrẹ.’ (Olezi 86:5) Ẹhẹ, ma te kurẹriẹ no izieraha mai jẹ daoma gaga re ma se ae ba ẹwariẹ, ma rẹ sai wo erere no erọvrẹ Jihova ze. Roro epanọ Ebaibol na i dhesẹ emamọ abọ nana ọrọ uyoyou Jihova.

15. Ẹvẹ Jihova o re fi izieraha mai thabọ no omai te?

¹⁵ Devidi ọso-ilezi na ọ rehọ eme ivevẹ jọ ro dhesẹ erọvrẹ Jihova: “Wọhọ epanọ ovatha-ọre ri te ukiediwo riẹ u thabọ na, jẹ ruere o si eware iyoma mai no omai.” (Ẹjẹlẹ ibiẹme na ọmai; Olezi 103:12) Ẹvẹ ovatha-ọre u thabọ no ukiediwo-ọre te? Ẹme na họ, ovatha-ọre họ oria nọ o mai thabọ no ukiediwo-ọre; ive na e sai zere ohwohwo ho. Ọwena-isukulu jọ ọ ta nọ ẹme nana o dhesẹ “epanọ o rẹ sai thabọ te kpobi.” Eme nana nọ a kẹ Devidi ẹgba ẹzi kere na e ta k’omai nnọ okenọ Jihova ọ tẹ rọ vrẹ, o re fi izieraha mai thabọ n’omai gaga.

16. Okenọ Jihova ọ tẹ rehọ izieraha vrẹ omai no, fikieme u je mu omai ẹro nnọ o rri omai fuafo no oke oyena vrẹ?

¹⁶ Kọ whọ dao oma re who si oware jọ nọ u mu ewu ra no ẹdẹjọ? Ẹsejọhọ makọ epanọ whọ dao oma te, oka na u no ewu na riẹriẹriẹ hẹ. Muẹrohọ oghẹrẹ nọ Jihova o dhesẹ epanọ ọ rẹ rọ vrẹ te: ‘Dede nọ izieraha rai e ware wọhọ azẹ, e rẹ te fo wọhọ ukpoiwo, dede nọ e rrọ wawae wọhọ ibosu, e rẹ te fua wọhọ olulu.’ (Aizaya 1:18) Ẹme na “ware wọhọ azẹ” u dhesẹ okọlọ owawae nọ o rrọ gbagbagba.a “Ibosu” yọ okọlọ owawae nọ u mu gaga. Ma sae rọ omodawọ obọ mai si oka uzioraha no ho. Rekọ Jihova ọ rẹ sai voro izieraha nọ e ware wọhọ azẹ jẹ wọhọ ibosu no, o ve ru ai fo wọhọ ukpoiwo hayo olulu ọfuafo. Fikiere nọ Jihova ọ tẹ rọ izieraha mai vrẹ omai, ma re du roro nnọ abọjọ izieraha itieye na e gbẹ tamu omai oma evaọ etoke uzuazọ mai soso ho.

17. Edhere vẹ Jihova o bi ro gbolo izieraha mai họ emu riẹ?

¹⁷ Evaọ ole ọwhọ uyere nọ Hẹzikaya o kere okenọ a thọe no ẹyao nọ o je ti kpei no, ọ ta kẹ Jihova nọ: ‘Who fi eyoma mẹ kpobi họ obọ emu ra.’ (Aizaya 38:17) A jọ etenẹ dhesẹ Jihova wọhọ ẹsenọ ọ rẹ rehọ izieraha orumuomu nọ o kurẹriẹ o ve gbolo ai fihọ emu Riẹ, oria nọ Ọ rẹ jọ rue rae hayo muẹrohọ ae he. Wọhọ epanọ obe jọ o ta, a rẹ sai dhesẹ ẹme na enẹ: “Who ru izieraha mẹ wọhọ ẹsenọ e via ha.” Kọ oyena o gbẹ rrọ eme omosasọ?

18. Ẹvẹ Maeka ọruẹaro na o ro dhesẹ nọ okenọ Jihova ọ tẹ rọ vrẹ, O re si izieraha mai no riẹriẹriẹ?

¹⁸ Evaọ eyaa ezihetha jọ, Maeka ọruẹaro na ọ fodẹ imuẹro nọ o wo inọ Jihova ọ te rọ vrẹ ahwo riẹ nọ i kurẹriẹ: ‘Ọghẹnẹ vẹ ọ rrọ wọhọ owhẹ, . . . nọ o re rri iruthọ vo rọ kẹ ereuku riẹ nọ i kiọkọ? . . . Whọ rẹ te wha izieraha mai kpobi kufiẹ i fihọ eva edidi abade.’ (Maeka 7:18, 19) Dai roro oware nọ eme eyena i dhesẹ kẹ enọ e jẹ rria oke Ebaibol na. Kọ whọ sai zihe oware nọ a gbolo “fihọ eva edidi abade” ze? Fikiere eme ọ Maeka na i dhesẹ nnọ okenọ Jihova ọ tẹ rọ vrẹ no, o re si izieraha mai no riẹriẹriẹ.

‘Ohrọoriọ Uyoyou Ọghẹnẹ Mai’

19, 20. (a) Eme họ otofa ubiẹme Hibru nọ a fa “dhesẹ ohrọ” hayo “wo ọdawẹ” na? (b) Ẹvẹ Ebaibol na e rọ rehọ ọdawẹ nọ oni o re wo kẹ ọmọ riẹ ro wuhrẹ omai kpahe ohrọoriọ Jihova?

¹⁹ Ohrọoriọ yọ abọfa jọ ọrọ uyoyou Jihova. Eme họ ohrọoriọ? Evaọ Ebaibol na, ohrọoriọ avọ ohrọ, okọ gbe uvi. A rẹ rehọ eme Hibru gbe Griki buobu ro dhesẹ ohrọoriọ. Wọhọ oriruo, ẹsibuobu a rẹ fa ubiẹme Hibru na ra·chamʹ wọhọ “dhesẹ ohrọ” hayo “wo ọdawẹ.” Ubiẹme Hibru nana, onọ Jihova o ro dhesẹ oma riẹ na, u tho ubiẹme nọ a rẹ rọ fa “edhede” yọ a rẹ sai dhesẹ iẹe wọhọ “ohrọoriọ oniọmọ.”

²⁰ Ebaibol na e rehọ ọdawẹ nọ oni o re wo kẹ ọmọ riẹ ro wuhrẹ omai kpahe otofa ohrọoriọ Jihova. Aizaya 49:15 o ta nnọ: “Kọ ọmọ-unuevie ọ sae thọ aye ẹro, nọ ọ gbẹ reohrọ [ra·chamʹ] ọmọ nọ o no edhede riẹ ze he? O sae thọ enana ẹro dede, rekọ wha sae thọ omẹ ẹro ho.” O rrọ bẹbẹ re ma roro nọ o rẹ thọrọ oni-ọmọ ẹro re ọ ko jẹ rẹrote ọmọ unuevie riẹ. Whaọ, ọmọfofa o wo obọ họ; t’aso t’uvo ọmọfofa ọ gwọlọ ẹruorote gbe uyoyou oni riẹ. U yoma gaga inọ ini jọ e be dhẹ siọ emọ rai ba, maero kọ evaọ “oke ẹbẹbẹ” nana. (2 Timoti 3:1, 3) Jihova o whowho nọ: “Rekọ wha sae thọ omẹ ẹro ho.” Ohrọoriọ nọ Jihova o wo kẹ idibo riẹ o ga vi iroro ọdawẹ ohwo-akpọ nọ e mae rro nọ ma rẹ sai roro ku thethabọ—ohrọoriọ nọ oni-ọmọ o re wo kẹ ọmọfofa riẹ.

21, 22. Eme emọ Izrẹl a rọ ẹro ruẹ evaọ Ijipti anwae, kọ didi owọ Jihova ọ jẹ kpahe ubo rai?

²¹ Wọhọ ọyewọ oyoyou, ẹvẹ Jihova o re ro dhesẹ ohrọoriọ? A rẹ ruẹ okwakwa onana vevẹ evaọ oghẹrẹ nọ o ro yeri kugbe Izrẹl anwae. Evaọ ekuhọ ikpe-udhusoi avọ 16 B.C.E., ima emọ Izrẹl buobu a jọ igbo evaọ Ijipti, oria nọ a jẹ jọ lahiẹ ae gaga. (Ọnyano 1:11, 14) Evaọ akọriọ rai, emọ Izrẹl a bo se Jihova. Didi owọ Ọghẹnẹ ohrọoriọ na ọ jẹ?

²² U duobọte Jihova udu gaga. Ọ ta nọ: “Mẹ ruerẹ uye ahwo mẹ nọ a rọ evaọ Ijipti, me te je yo oviẹ rai fiki ahwo nọ a bi su ai; mẹ riẹ uye rai.” (Ọnyano 3:7) Jihova ọ rẹ sae ruẹ uye-oruẹ ahwo riẹ hayo yo oviẹ rai ababọ ohrọ nọ o rẹ riẹe he he. Jihova yọ Ọghẹnẹ ọdawẹ. Yọ ọdawẹ—koyehọ re edada amọfa e d’omai—yọ omoni ohrọoriọ. Dede na, orọnikọ o da Jihova kẹ ahwo riẹ ọvo ho; oma o wọ riẹ j’owọ ro fi obọ họ kẹ ae. Aizaya 63:9 o ta nọ: “Fiki uyoyou gbe ohrọriọ riẹ ọ rọ ta ae no igbo.” Ọ rehọ ‘ugbobọ ulogbo’ siwi emọ Izrẹl no Ijipti ze. (Iziewariẹ 4:34) Kẹsena, ọ tẹ kẹ ae emuore igbunu je si rai ruọ ẹkwotọ owoma obọ rai.

23. (a) Ẹvẹ eme ọ ọso-ilezi na e rọ k’omai imuẹro inọ Jihova ọ be daezọ mai gaga wọhọ omomọvo? (b) Idhere vẹ Jihova o bi ro fi obọ họ k’omai?

²³ Orọnikọ Jihova ọ rẹ reohrọ ahwo riẹ wọhọ ẹko ọvo ho. Ọghẹnẹ oyoyou mai o wo ọdawẹ odidi kpahe omai omomọvo. Ọ riẹ kpahe uye kpobi nọ o rẹ sai te omai. Ọso-ilezi na ọ ta nọ: “Ibiaro ỌNOWO i bi ri ikiẹrẹe, ezọ riẹ i bi yo eviẹ rai. ỌNOWO ọ kẹle enọ i wo eva owhrori, o je siwi enọ a nwẹ eva ẹzi.” (Olezi 34:15, 18) Ẹvẹ Jihova o re ro fi obọ họ kẹ omai omomọvo? Orọnikọ ọ rẹ nwani si oware nọ o be wha uye-oruẹ mai ze no ho. Rekọ o ru eruẹrẹfihotọ buobu no kẹ enọ i bi bo sei kẹ obufihọ. Ẹme riẹ ọ kẹ ohrẹ nọ u w’iruo nọ o rẹ sai fi obọ họ. Evaọ ukoko na, Jihova ọ kẹ esẹro nọ i te evaọ abọ-ẹzi, enọ e be daoma dhesẹ ohrọoriọ riẹ evaọ obufihọ kẹ amọfa. (Jemis 5:14, 15) Wọhọ “ọnọ o re yo elẹ,” Jihova ọ rẹ rọ “Ẹzi Ẹri kẹ enọ e yare riẹ.” (Olezi 65:2; Luk 11:13) Eruẹrẹfihotọ eyena kpobi yọ odhesẹvia ọ ‘ohrọoriọ uyoyou Ọghẹnẹ mai.’—Luk 1:78.

24. Didi owọ whọ te jẹ kpahe uyoyou Jihova?

²⁴ Kọ o gbẹ rrọ oware urirẹ re ma roro kpahe uyoyou Ọsẹ obọ odhiwu mai? A jọ uzoẹme nọ u kpemu na kareghẹhọ omai inọ Jihova o re dhesẹ ogaga, uvi-ẹdhoguo, gbe areghẹ riẹ evaọ idhere uyoyou rọkẹ erere mai. Yọ evaọ uzoẹme nana, ma ruẹ no inọ Jihova o re dhesẹ uyoyou riẹ kẹ ahwo akpọ—jẹ rọkẹ omai omomọvo—evaọ idhere igbunu. Enẹna, u fo re mai omomọvo ọ nọ inọ, ‘Owọ vẹ mẹ rẹ jẹ kpahe uyoyou Jihova?’ Jowọ re whọ rehọ eva ra kpobi, iroro, ẹwẹ, gbe ẹgba ra kpobi you riẹ. (Mak 12:29, 30) Jọ oghẹrẹ nọ who bi yere uzuazọ ra kẹdẹ kẹdẹ u dhesẹ isiuru ẹwẹ ra kpobi nọ whọ gwọlọ ro si kẹle Jihova viere. Yọ ajọ Jihova, Ọghẹnẹ uyoyou na, o si kẹle owhẹ viere—rite bẹdẹ bẹdẹ!—Jemis 4:8.

[Oruvẹ-obotọ]

Kọ Whọ Kareghẹhọ?

• Ẹvẹ ma rọ riẹ nọ uyoyou họ okwakwa Jihova nọ o mae rro?

• Fikieme a jẹ sae ta nọ Ọmọ riẹ nọ Jihova o vi ze te ruẹ uye je whu kẹ omai na họ edhesẹ uyoyou nọ o mae rro kpaobọ?

• Ẹvẹ Jihova ọ rọ kẹ omai imuẹro nnọ o you omai wọhọ omomọvo?

• Idhere ivevẹ vẹ Ebaibol na i ro dhesẹ erọvrẹ Jihova?

[Uwoho nọ o rrọ ẹwẹ-obe avọ 27]

“Ọghẹnẹ [ọ] . . . rehọ Ọmọvo riẹ kẹ”

[Uwoho nọ o rrọ ẹwẹ-obe avọ 28, 29]

“Wha wo aghae vi emevra buobu”

[Ọnọ o wo uwoho]

© J. Heidecker/VIREO

[Uwoho nọ o rrọ ẹwẹ-obe avọ 30]

Ọdawẹ nọ oni o re wo kẹ ọmọ riẹ ọ rẹ sai wuhrẹ omai kpahe ohrọoriọ Jihova