Ọ Rehọ Umutho Ebrẹdi gbe Imiyei Ko Idu Ahwo Buobu

Ikọ 12 na a reawere usiuwoma ota rai evaọ Galili soso, yọ a vuẹ Jesu “eware kpobi nọ a ru je wuhrẹ.” Obọnana oma o rrọ rai no. Yọ a tube wo uvẹ nọ a rẹ rọ re emu hu keme ahwo buobu a rrọ kugbe ai, ejọ e be nya kpo yọ efa e be nyaze. Jesu ọ tẹ ta nọ: “Wha nyaze re ma kpohọ oria nọ u siomano re wha serihọ omojọ.”—Mak 6:30, 31.

A tẹ ruọ okọ, ẹsejọhọ kẹle Kapaniọm, a te lehọ kpohọ oria nọ u siomano evaọ ofẹ ovatha-ọre Jọdan nọ o dina thabọ no Bẹtsaida. Dede na, ahwo buobu a ruẹ e rai nọ a jẹ nyavrẹ, yọ amọfa a yo inọ a nyavrẹ no. Aikpobi a tẹ rọ owotọ dhẹ akakotọ abade na nyae hẹrẹ ae evaọ oria nọ okọ rai o be te kpahe.

Nọ Jesu o nwrotọ no okọ na jẹ ruẹ ogbotu obuobu na, ohrọ rai o tẹ re iẹe keme a wọhọ igodẹ nọ i wo othuru hu. Fikiere o te “mu ae eware buobu họ ewuhrẹ” kpahe Uvie na. (Mak 6:34) O te je “siwi enọ e jẹ mọ.” (Luk 9:11) Nọ oke u thabọ no, ilele na a tẹ ta kẹ Jesu nọ: “Ahwo a be rria oria nana ha yọ oke owọwọ u bi te no; siobọno ogbotu na re a kpohọ iwhre nọ e kẹle onana nyae dẹ emu nọ a rẹ re.”—Matiu 14:15.

Jesu ọ tẹ ta kẹ ae nọ: “U du gwọlọ nọ a rẹ nyavrẹ hẹ; wha kẹ ae oware nọ a rẹ re.” (Matiu 14:16) Dede nọ Jesu ọ riẹ oware nọ o bi ti ru, ọ tẹ nọ Filip onọ be rọ dawo iẹe inọ: “Diẹse ma te jọ ruẹ ebrẹdi dẹ kẹ ahwo nana kpobi nọ a rẹ re?” U gine fo nọ Filip a rẹ nọ keme ọye o no ẹwho Bẹtsaida nọ ọ kẹle etẹe ze. Rekọ orọnọ oria nọ a rẹ jọ ruẹ ebrẹdi dẹ họ ẹbẹbẹ na ha. Whaọ ezae nọ e jọ etẹe i bu te idu isoi (5,000). Yọ a te kele eyae gbe emaha na kugbe, ahwo na a sai bu te idu ikpe (10,000) dede. Filip ọ tẹ kuyo nọ: “Ebrẹdi nọ i re te dinariọs egba ivẹ [dinariọs ọvo yọ osa iruo okpẹdoke] e rẹ sai te ahwo na kpobi hi a tẹ make ghale ebrẹdi na umumutho.”—Jọn 6:5-7.

Ẹsejọhọ, re Andru ọ ruẹsi dhesẹ nọ a te sae ko ogbotu ahwo yena kpobi hi, ọ tẹ ta nọ: “Ọmọzae ọsese jọ ọ rrọ etenẹ nọ o wo ikulu ebrẹdi ebali isoi gbe imiyei ivẹ. Rekọ eme enana i re te ru evaọ ogbotu nana?”—Jọn 6:9.

O jọ amara Asa hayo Ane, ehaa Ọnyavrẹ orọ 32 C.E. e kẹle no, yọ ẹbe ọrọrọ ọ jọ oria kpobi. Jesu ọ tẹ ta kẹ ilele riẹ nọ a vuẹ ahwo na re a keria ẹbe na evaọ ẹkuẹko 50 gbe 100. Ọ tẹ rehọ ikulu ebrẹdi isoi gbe imiyei ivẹ na, ọ tẹ lẹ yere Ọghẹnẹ. O te bru ebrẹdi na jẹ ghale imiyei na. Kẹsena ọ tẹ rehọ ae kẹ ilele riẹ, ilele na a tẹ ghale ae kẹ ahwo na. Oware igbunu jọ o tẹ via, ahwo na kpobi a re bẹsenọ eva e rọ vọ ae.

Uwhremu na Jesu ọ tẹ ta kẹ ilele riẹ nọ: “Wha koko ewẹ nọ i kiọkọ họ, re oware ovo o seba ẹraha kufiẹ.” (Jọn 6:12) Nọ a koko enọ a re kiọkọ fihọ, e vọ ikete 12.