Jesu O Siwi Ọmọzae Jọ nọ Ẹzi Ogbegbe Ọ Jọ Oma

Nọ Jesu, Pita, Jemis, gbe Jọn a nwrotọ no ehru ugbehru na ze, a te zere ogbotu ahwo. Oware jọ o be thọ. Otu ikere-obe na a wariẹ ikọ na họ bi lele ai vravro. Nọ ahwo na a ruẹ Jesu u gbe rai unu, a tẹ dhẹ bru rie re a yere iei. Ọ tẹ nọ ae nọ: “Eme wha bi lele ae vravro kpahe?”—Mak 9:16.

Ọzae jọ evaọ udevie ogbotu na o te kigwẹ fihọ aro Jesu, ọ tẹ ta kẹe nọ: “Owuhrẹ, mẹ rọ ọmọzae mẹ bru owhẹ ze keme o wo ẹzi ogbegbe nọ u ru rie dienu. Oria kpobi nọ ẹzi ogbegbe na o je kru rie ọ rẹ rehọ iẹe fa otọ, ivuhu i ve bi no unu riẹ ze ọ vẹ be reakọ, oma o vẹ lọhọ iẹe no. Mẹ vuẹ ilele ra nọ a le ẹzi ogbegbe na no, rekọ a sai ru ere he.”—Mak 9:17, 18.

Ẹsejọhọ otu ikere-obe na a jẹ fo ilele Jesu fikinọ a sai siwi ọmọzae na ha, yọ o sae jọnọ a je se ai ẹkoko dede. Fikiere, ukpenọ Jesu ọ kpahe fihọ ẹme nọ ọzae na ọ ta kẹe na, ọ tẹ ta kẹ ogbotu na nọ: “O oge nọ ọ kare ẹrọwọ jẹ vọ avọ uzioraha, ẹvẹ mẹ rẹ jọ kugbe owhai kri te? Ẹvẹ me re thihakọ kẹ owhai kri te?” Ababọ avro, otu ikere-obe na họ enọ ọ ta eme egaga nana kẹ na, enọ i je lele ikọ riẹ vravro evaọ emu riẹ na. Kẹsena Jesu ọ tẹ rẹriẹ ovao ku ọsẹ ọmọ na, ọ tẹ ta kẹe nọ: “Rehọ ọmọ na se omẹ.”—Matiu 17:17.

Nọ ọmọzae na ọ be nya bru Jesu ze na, ẹzi ogbegbe na ọ tẹ rehọ iẹe fa otọ, o te bi kie ewawa. Ọmọ na o te bi ghelie evaọ otọ, yọ ivuhu i bi no unu riẹ ze. Jesu ọ tẹ nọ ọsẹ ọmọ na nọ: “Anwọ oke vẹ onana u bi ro ru ei?” Ọ tẹ kuyo nọ: “No oke emaha ze, yọ ẹsibuobu o re gele ọmọ na fihọ erae je gele iei fihọ ame re ọ ruẹsi kpei no.” Ọsẹ ọmọ na ọ tẹ be lẹ Jesu nọ: “Otẹrọnọ whọ sai ru oware jọ, re ohrọ mai re who fiobọhọ kẹ omai.”—Mak 9:21, 22.

Ọsẹ ọmọ na ọ be ruawa, keme ilele Jesu dede a sai siwi ọmọ riẹ hẹ. Nọ Jesu ọ ruẹ epanọ oware na o be kẹ ọzae na uye te, ọ tẹ tuduhọ iẹe awọ nọ: “Kọ whọ be ta nọ, ‘Otẹrọnọ whọ sai’? Whaọ, eware kpobi e rẹ lọhọ kẹ ohwo nọ o wo ẹrọwọ.” Ọsẹ ọmọ na ọ tẹ nwani bo nọ: “Me wo ẹrọwọ! Fiobọhọ kẹ omẹ evaọ abọ nọ mẹ jọ gwọlọ ẹrọwọ!”—Mak 9:23, 24.

Jesu o te muẹrohọ nọ ogbotu ahwo a be dhẹ bru rie ze. Jesu ọ tẹ jọ iraro ahwo na kpobi whọku ẹzi ogbegbe na nọ: “Whẹ ẹzi ogbegbe nọ o dienu je diezọ, mẹ be ta kẹ owhẹ nọ, no oma riẹ no, yọ whọ gbẹ ruẹe oma ofa ha!” Nọ ẹzi ogbegbe na o je no ọmọ na oma, o te ru ei bo je kie ewawa unuẹse buobu. Kẹsena ọmọ na ọ tẹ rrọ otọ, o gbe bi nuhu oma ha. Nọ ogbotu na a ruẹ onana, ibuobu rai a tẹ be ta nọ: “O whu no!” (Mak 9:25, 26) Rekọ nọ Jesu o kru ọmọ na obọ, ọ tẹ kpama, oma riẹ “o tẹ ga no auwa yena vrẹ.” (Matiu 17:18) Oware nọ Jesu o ru na u gbe ahwo na kpobi unu.

Evaọ oke nọ u kpemu nọ Jesu o vi ilele riẹ nyae ta usiuwoma, a je le izi igbegbe no ahwo oma. Fikiere, nọ ae ọvo a jọ kugbe Jesu evaọ uwou jọ, a tẹ nọe nọ: “Fikieme ma gbẹ sai ro le idhivẹri na no ho?” Jesu o te ru ei vẹ kẹ ae nọ fikinọ a kare ẹrọwọ, inọ: “Oghẹrẹ ọnana ọ sai no ohwo oma ha ajokpaọ ẹkwoma olẹ.” (Mak 9:28, 29) Re a sai le ẹzi ogbegbe ọgaga otiọna, o gwọlọ ẹrọwọ ọgaga gbe olẹ rọkẹ obufihọ Ọghẹnẹ.

Jesu o te ku ẹme na họ nọ: “Uzẹme mẹ be ta kẹ owhai, otẹrọnọ wha te wo ẹrọwọ nọ ọ make kawo wọhọ ubi mọstad, wha te ta kẹ ugbehru nana nọ, ‘No etenẹ kpohọ obei,’ o ve no etẹe, yọ oware ovo o te bẹ owhai eruo ho.” (Matiu 17:20) Ẹrọwọ o gine wo ẹgba gaga.

Ezadhe gbe ebẹbẹ nọ e rẹ gwọlọ ru nọ ma gbe ro wo ẹnyaharo evaọ egagọ Jihova ha e rẹ sae jọ wọhọ ugbehru nọ u re nuhu hu. Ghele na, ma te wo ẹrọwọ, ma rẹ sai fi ẹbẹbẹ itieye na kparobọ.