Jesu Ọ Kẹ Ohrẹ Kpahe Ezoruẹ gbe Uzioraha

Jesu o dhesẹ oghẹrẹ uruemu nọ u fo nọ ilele riẹ a re wo no. U fo nọ a re rri omarai wọhọ emaha, enọ i wo omaurokpotọ nọ e rẹ gwọlọ okpodẹ hẹ. O gwọlọ nọ ilele na a re ‘dede emaha itieye rehọ fiki odẹ riẹ keme oyena u dhesẹ nọ a dede Jesu rehọ re.’—Matiu 18:5.

U ri kri hi nọ ikọ na a jẹ vravro kpahe ohwo nọ ọ mae rro, fikiere a sae rehọ iẹe nọ ọwhọkuo Jesu ọ kẹ rai na. Obọnana Jọn ukọ na o te fi ẹme oware ofa jọ nọ o via họ otọ, inọ: “Owuhrẹ, ma ruẹ ohwo jọ nọ ọ jẹ rọ odẹ ra le idhivẹri no, yọ ma daoma re ma whaha iẹe keme ọ rrọ usu mai nọ i bi lele owhẹ na ha.”—Luk 9:49.

Kọ Jọn o roro nọ ikọ na ọvo a wo udu nọ a re ro siwi ahwo hayo le izi igbegbe? O tẹ rrọ ere, ẹvẹ ohwo Ju nana ọ be sai ro le izi igbegbe no ahwo oma? O wọhọ nọ Jọn o roro nọ u fo re ọzae na o ru iruo igbunu hu keme ọ rrọ usu Jesu avọ ikọ na ha.

Jesu ọ tẹ ta ẹme jọ nọ o gbe Jọn unu, inọ: “Wha whaha iẹe he, keme ohwo nọ ọ be rọ odẹ mẹ ru iruo igbunu ọ te nwane ta ẹme oyoma kpahe omẹ vẹrẹ vẹrẹ hẹ. Keme ohwo kpobi nọ ọ be wọso omai hi yọ ọ rrọ abọ mai. Yọ ohwo kpobi nọ ọ kẹ owhai egho ame fikinọ whai yọ erọ Kristi, uzẹme mẹ be ta kẹ owhai, o ti wo osohwa riẹ hrọ.”—Mak 9:39-41.

Evaọ oke nana, u du gwọlọ nọ ọzae nana ọ rẹ nya lele Jesu taure o te ti dhesẹ nọ ọ rrọ abọ Jesu hu. A re rọ ukoko Ileleikristi na mu hu, fikiere dede nọ ọzae nana o bi lele iei no oria ruọ oria ha, u dhesẹ nọ ọ wọso Jesu hayo ọ rrọ egagọ erue he. O rrọ vevẹ nọ ọzae nana o fi ẹrọwọ họ odẹ Jesu, yọ ẹme nọ Jesu ọ ta u dhesẹ nọ ọzae na o ti wo osohwa.

Evaọ abọdekọ riẹ, u ti yoma gaga otẹrọnọ ẹme gbe uruemu ikọ na o lẹliẹ ọzae na zoruẹ. Jesu ọ ta nọ: “Ohwo kpobi nọ o ru ọjọ evaọ usu esese nana nọ i wo ẹrọwọ na zoruẹ, o te mai woma kẹe otẹrọnọ a gba utho nọ a re ro wuhu eka fihọ iẹe ohọe a ve gbolo iei fihọ abade.” (Mak 9:42) Kẹsena Jesu ọ tẹ ta nọ ilele riẹ a re si eware nọ e maki wuzou gaga wọhọ obọ, owọ, hayo ubiẹro no oma rai otẹrọnọ u bi ru ai zoruẹ. O te mai woma re a ruọ Uvie Ọghẹnẹ ababọ oware utioye viukpenọ a re gbolo omarai soso fihọ Gehena (Ukiekpotọ Hinọm) fikinọ a rọwo siobọnoi hi. O sae jọnọ ikọ na a be hae ruẹ ukiekpotọ nana nọ o kẹle Jerusalẹm na, onọ a rẹ jọ mahe ezuzu, fikiere a wo otoriẹ ẹme na inọ oria nana u dikihẹ kẹ ọraha ebẹdẹ bẹdẹ.

Jesu ọ vẹvẹ e rai unu re nọ: “Wha yọroma re wha siọ ọjọ evaọ usu esese nana ba erivo, keme mẹ be ta kẹ owhai nọ ikọ-odhiwu rai a bi rri ovao Ọsẹ mẹ nọ ọ rrọ obọ odhiwu ẹsikpobi.” Ẹvẹ Ọsẹ riẹ o rri “esese nana” ghare te? Jesu ọ ta kpahe ọzae jọ nọ o wo igodẹ 100 nọ ọvo jọ evaọ usu rai o vru. Ọzae na ọ tẹ nya siọ 99 nọ i kiọkọ ba nyae gwọlọ ọnọ o vru na. Nọ ọ ruẹ e riẹ, ọ ghọghọ fiki riẹ vi 99 nọ i vru hu na. Jesu o te fibae nọ: “O rẹ were Ọsẹ mẹ nọ ọ rrọ obọ odhiwu hu re ọjọ evaọ usu esese nana o vru.”—Matiu 18:10, 14.

Ẹsejọhọ Jesu o je roro kpahe ikọ riẹ nọ e jẹ vravro kpahe ohwo nọ ọ mae rro, kẹsena ọ tẹ kẹ ae ohrẹ nọ: “Wha wo uwhei evaọ omarai, re wha lele ohwohwo rria dhedhẹ.” (Mak 9:50) Uwhei u re ru emu were. Nọ uwhei o tẹ rrọ ohwo unu, evaọ odẹme, u re ru ei lọhọ nọ ahwo a rẹ rọ jẹ ẹme nọ ọ ta rehọ, yọ o rẹ wha udhedhẹ ze. Rekọ avro ọ rẹ sae wha udhedhẹ ze he.—Ahwo Kọlọsi 4:6.

Ẹsejọ ẹbẹbẹ ologbo ọ sae romavia, yọ Jesu ọ ta oware nọ ohwo o re ru. Ọ ta nọ: “Otẹrọnọ oniọvo ra o ru owhẹ thọ, nya re whọ ta oware nọ o ru thọ na kẹe nọ whai imava ọvo wha tẹ rrọ oria. Ọ tẹ gaviezọ kẹ owhẹ, yọ who wo oniọvo ra tobọ no.” Kọ ọ gbẹ gaviezọ họ? Jesu ọ ta nọ: “Rehọ omọvo hayo imava efa lele oma re a ruẹse jọ evaọ unu isẹri ivẹ hayo esa vuhu uzẹme ẹme kpobi.” Ẹme na o gbe kuhọ họ, ohwo na ọ vẹ ta kẹ “ukoko na,” koyehọ ekpako ukoko nọ e rẹ sai gu ẹdhọ na. Kọ ọnọ o ru ohwo thọ na ọ gbẹ gaviezọ ghele he? “Whọ vẹ rehọ iẹe wọhọ ohwo erẹwho na gbe wọhọ ọnọ o re mi osa-uzou,” koyehọ oghẹrẹ ohwo nọ ahwo Ju a re kuomagbe he.—Matiu 18:15-17.

O gwọlọ nọ ekpako ukoko a re ru lele ẹme nọ Ebaibol na ọ ta. A tẹ ruẹ nọ ohwo jọ ọ thọ uzi nọ ọ jọ gwọlọ ọwhọkuo, oware kpobi nọ a rọwo fihọ yọ onọ “a gba no evaọ obọ odhiwu.” Rekọ a tẹ ruẹ nọ ohwo na o ruthọ họ, a rẹ riẹ nọ onana yọ “onọ a ra no evaọ obọ odhiwu.” Ithubro nana i ti fiobọhọ kẹ ikọ na gaga nọ a tẹ rọ ukoko Ileleikristi na mu no. Okpẹme otiọye ọ tẹ rrọ otọ, Jesu ọ ta nọ: “Nọ imava hayo imasa a te kokohọ evaọ odẹ mẹ, mẹ rrọ udevie rai.”—Matiu 18:18-20.