Fikieme Ilele Jesu A gbẹ be Siọ Emuọriọ Ba Ha?

Anwọ okenọ Jesu o ro no ehaa Ọnyavrẹ ọrọ ukpe 30 C.E. kpozi no a ro fi Jọn Ọhọahwo-Ame na họ uwou-odi. Jọn ọ gwọlọ nọ ilele riẹ a zihe ruọ ilele Jesu, rekọ orọnikọ aikpobi a bi lele Jesu anwọ okenọ Jọn ọ rọ rrọ uwou-odi na ha.

Obọnana nọ ehaa Ọnyavrẹ ọrọ ukpe 31 C.E. o be kẹle na, ilele Jọn jọ a tẹ nya bru Jesu jẹ nọe nọ: “Emejabọ nọ mai gbe otu Farisi na ma rẹ rọ siọ emuọriọ ba rekọ ilele ra a rẹ siọ emuọriọ ba ha?” (Matiu 9:14) Otu Farisi a rri emuọseba wọhọ abọjọ egagọ rai. Uwhremu na, Jesu ọ tubẹ jọ ọtadhesẹ ta kpahe ohwo Farisi jọ nọ o rri omariẹ kiẹrẹe gaga, ọnọ ọ jẹ lẹ nọ: “O Ọghẹnẹ, me yere owhẹ nọ mẹ wọhọ amọfa kpobi hi . . . Mẹ rẹ siọ emuọriọ ba isiava ẹkpoka.” (Luk 18:11, 12) Ẹsejọhọ ilele Jọn a jẹ siọ emuọriọ ba keme a rri rie wọhọ abọjọ egagọ rai re. O sae jẹ jọnọ a jẹ siọ emuọriọ ba fikinọ Jọn ọ rrọ uwou-odi. U je gbe amọfa nọ a jọ etẹe unu re oware nọ ilele Jesu a gbẹ be rọ siọ emuọriọ ba ha, ẹsejọhọ re a rọ ere dhesẹ nọ oware nọ o via kẹ Jọn na o be kẹ ae uye.

Jesu ọ tẹ rọ oriruo jọ rọ kẹ uyo onọ rai na, inọ: “Egbẹnyusu ọva a wo oware ovo nọ o rẹ lẹliẹ ai weri hi nọ ọva na ọ rrọ kugbe ae na, manikọ ere he? Rekọ edẹ e be tha nọ a rẹ te rehọ ọva na siọ ae ba, kẹsena a vẹ te siọ emuọriọ ba.”—Matiu 9:15.

Jọn ọ tubẹ ta nọ Jesu yọ ọva. (Jọn 3:28, 29) Fikiere, nọ Jesu ọ rrọ kugbe ilele riẹ na, o gwọlọ nọ a rẹ siọ emuọriọ ba ha. Oyejabọ nọ ilele Jesu a gbẹ be siọ emuọriọ ba ha na. Evaọ obaro nọ Jesu o te whu no, ilele riẹ a ve ti weri jẹ siọ emuọriọ ba keme emu ọ gbẹ te ro ae oma ha. Rekọ eware i ti nwene nọ a tẹ kpare iẹe no uwhu ze no. Evaọ oke yena, oware ovo u gbe ti ru ai weri jẹ siọ emuọriọ ba ha.

Kẹsena, Jesu ọ tẹ rọ etadhesẹ ivẹ nana rọ ta ẹme, inọ: “Ohwo ọvo o re ko ẹwẹ-ohọ ọkpokpọ fihọ oria ewu anwae nọ ọ bẹre he, keme ẹwẹ-ohọ ọkpokpọ na ọ rẹ bẹre no ewu na, u ve ru ei bẹre vi epaọ ọsosuọ. Yọ ahwo a re ku udi okpokpọ họ oviẹ-udi anwae he. A te ru ere, oviẹ-udi na o rẹ sa bẹre, udi na u ve hwẹ kufiẹ, yọ oviẹ-udi na o raha no. Ukpoye, ahwo a re ku udi okpokpọ họ oviẹ-udi okpokpọ.” (Matiu 9:16, 17) Eme họ otọ ẹme Jesu na?

Jesu o bi fiobọhọ kẹ ilele Jọn Ọhọahwo-Ame na riẹ nọ ohwo ọvo ọ sai rẹro nọ ilele riẹ a re gbe ru uruemu anwae egagọ ahwo Ju hu, wọhọ emuọseba. Orọnikọ ọ nyaze te zuẹ egagọ ahwo Ju nọ i bi ti n’otọ kẹle na ha, onọ o wọhọ ewu anwae nọ o bẹre no. Egagọ nọ Jesu o bi wuhrẹ ahwo kpahe u wo ohẹriẹ no orọ ahwo Ju nọ a be jọ ru lele iwuhrẹ ahwo-akpọ. Jesu o bi ko ẹwẹ-ohọ ọkpokpọ fihọ oria ewu anwae he, yọ o bi ku udi okpokpọ họ oviẹ-udi anwae gbe he.