Jesu Ọ Kẹ Ohrẹ Kpahe Efe

Okenọ Jesu ọ jẹ re emu evaọ uwou ohwo Farisi na, ahwo buobu a te kokohọ otafe uwou na be hẹrẹ iẹe. Whaọ, epọvo na ogbotu ahwo a kokohọ kẹe evaọ obọ Galili re. (Mak 1:33; 2:2; 3:9) Evaọ ẹwho Judia nọ ọ rrọ na, ahwo buobu a gwọlọ nọ a rẹ ruẹ e riẹ jẹ gaviezọ kẹ eme riẹ. Yọ uruemu nana u wo ohẹriẹ no onọ otu Farisi nọ a gbẹ be re emu na a dhesẹ.

Ẹme nọ Jesu ọ kake ta o wo otofa ulogbo kẹ ilele riẹ, ọ ta nọ: “Wha muẹrohọ otọ kẹ ẹvi otu Farisi na, onọ o rrọ eviẹhọ.” Jesu ọ kẹ unuovẹvẹ nana no vẹre, rekọ oware nọ ọ ruẹ evaọ oke nọ a jẹ re emu na u dhesẹ nọ a re ru lele ohrẹ nana kpata kpata. (Luk 12:1; Mak 8:15) Otu Farisi na a sai ru wọhọ ẹsenọ a kiẹrẹe gaga be rọ ere ko emuemu rai dhere, rekọ a rrọ yoyoma yọ u fo nọ Jesu ọ rẹ fere onana via. Jesu o ru ẹme na vẹ nọ: “Oware ovo nọ a nabe kodhere nọ o te bẹre via ha o rrọ họ, yọ oware ovo nọ u dhere nọ a te riẹ hẹ o rrọ họ.”—Luk 12:2.

Ẹsejọhọ ibuobu enọ e be gaviezọ kẹ Jesu na yọ ahwo Judia nọ a yo eware nọ Jesu o wuhrẹ evaọ obọ Galili na ha. Fikiere ọ tẹ wariẹ igogo eware jọ nọ o wuhrẹ no vẹre. Ọ kẹ enọ e be gaviezọ kẹe ohrẹ nọ: “Wha dhozọ enọ i re kpe ugboma na ha, nọ a te ru ere no a gbẹ sai ru vrẹ ere he.” (Luk 12:4) Wọhọ epanọ ọ ta no vẹre, o ru rie vẹ kẹ ogbotu na epanọ u wuzou te re ilele riẹ a fievahọ Ọghẹnẹ inọ ọ te rẹrote ai. O tẹ jẹ gwọlọ nọ a re vuhu oghẹrẹ ohwo nọ Ọmọ ohwo ọ rrọ mu, u ve je mu ai ẹro nọ Ọghẹnẹ ọ sai fiobọhọ kẹ ae.—Matiu 10:19, 20, 26-33; 12:31, 32.

Kẹsena ọzae jọ nọ ọ rrọ udevie ogbotu na ọ tẹ ta oware jọ nọ o be kẹe uye inọ: “Owuhrẹ, ta kẹ oniọvo mẹ re ọ ghale uku ọsẹ mai re ọvuọ ẹkẹ riẹ ọ rehọ.” (Luk 12:13) Uzi na o ta nọ ọmọzae ọkpako ọ rẹ rehọ abava uku na, fikiere oware yena o rẹ wha ẹwhọ tha ha. (Iziewariẹ 21:17) Rekọ o wọhọ nọ ọzae nana ọ gwọlọ wo vrẹ onọ u re tei. Jesu ọ gwọlọ dhomahọ ẹme na ha, ọ nọ ọzae na nọ: “Ọzae, ono ọ rehọ omẹ mu obruoziẹ kẹ owhai imava?”—Luk 12:14.

Kẹsena Jesu ọ tẹ kẹ ohwo kpobi nọ ọ jọ etẹe ohrẹ, inọ: “Wha muẹrohọ otọ jẹ yọroma kẹ oghẹrẹ uvou-uthei kpobi keme ohwo ọ tẹ maki wo eware buobu, eware na e rẹ kẹe uzuazọ họ.” (Luk 12:15) Makọ epanọ ohwo o fe te kẹhẹ, kọ o gbe ti whu ẹdẹjọ jẹ nyasiọ eware na kpobi ba? Jesu ọ tẹ kẹ ọtadhesẹ jọ ro ru ẹme nana vẹ je dhesẹ epanọ u wuzou te re ohwo o wo emamọ odẹ evaọ obọ Ọghẹnẹ, inọ:

“Ekakọ ọdafe jọ e mọ ziezi. Fikiere ọ tẹ be jọ udu riẹ roro nọ, ‘Enẹna nọ me gbe wo oria nọ me re koko ivuẹvu mẹ fihọ họ na, kọ eme me re ru?’ Ọ tẹ ta nọ, ‘Enẹ me ti ru: Me ti kporo iwou nọ mẹ rẹ jọ rawo eware fihọ otọ mẹ vẹ bọ ilogbo, kọ etẹe me re koko eka mẹ kpobi gbe eware mẹ kpobi fihọ, mẹ vẹ ta kẹ omamẹ nọ: “Who wo emamọ eware buobu nọ who kokohọ no kẹ ikpe buobu nọ e be tha; who gbe du ruawa ha, re, da, reakpọ kuoma.”’ Rekọ Ọghẹnẹ ọ tẹ ta kẹe nọ, ‘Ogheghẹ, aso nana a ti mi owhẹ uzuazọ ra no. Kọ ono o ti wo eware nọ who kokohọ na?’ Ere o rẹ jọ kẹ ohwo nọ o koko efe họ kẹ omobọ riẹ rekọ nọ o fe evaọ obọ Ọghẹnẹ hẹ.”—Luk 12:16-21.

Ilele Jesu gbe amọfa nọ a be gaviezọ kẹ Jesu a gbẹ yọroma ha, a sai kie ruọ ẹta ilale efe. Hayo awaọruọ ọ sai ru ai siuke kpemu evaọ egagọ Ọghẹnẹ. Fikiere Jesu ọ tẹ wariẹ kẹ ohrẹ jọ nọ ọ kẹ evaọ Ovuẹ obọ Ugbehru enwenọ ẹgbukpe gbe emerae ezeza nọ i kpemu, inọ:

“Wha siọ awa ba ẹruọ kpahe uzuazọ rai fiki onọ wha rẹ re hayo kpahe ugboma rai fiki oware nọ wha re kuhọ. . . . Wha roro kpahe ekọlọbe: A rẹ kọ ibi hayo vu hu; a wo eru hayo uwou nọ a rẹ jọ rawo eware he; ghele na, Ọghẹnẹ ọ be kuọ ae. Kọ wha gbẹ ghare gaga vi evra? . . . Wha roro kpahe epanọ idodo obọ ẹwọ e be rọ rro: A re kporo udhu hayo ko iwu hu; rekọ mẹ be ta kẹ owhai nọ makọ epanọ Solomọn o fe te, ọ gẹgọ woma te idodo nana ọvuọvo ho. . . . Fikiere, wha siọ awa ba ẹruọ kpahe emu nọ wha te re gbe onọ wha te da, wha siọ awaọruọ ọgaga ba. . . . Ọsẹ rai ọ riẹ nọ eware nana e roja kẹ owhai. . . . Wha ruabọhọ gwọlọ Uvie riẹ, o ti fi eware nana ba kẹ owhai.”—Luk 12:22-31; Matiu 6:25-33.

Amono a te gwọlọ Uvie Ọghẹnẹ? Jesu o dhesẹ nọ umutho ahwo jọ nọ i wo ẹrọwọ nọ o se “uthuru okakao,” a ti ru onana. Uwhremu na, a te ti dhesẹ nọ ahwo nana a ti bu te idu udhuhrẹ gbe ene (144,000). Eme ahwo nana a bi rẹro riẹ? Jesu ọ kẹ rai imuẹro nọ: “O ruọ Ọsẹ rai no inọ ọ rẹ kẹ owhai Uvie na.” Ahwo nana a bi koko efe rai họ eva akpọ na ha, oria nọ iji e rẹ sai jo tho ai. Rekọ a fi udu rai kpobi họ “efe nọ ọ rẹ raha ha evaọ obọ odhiwu,” oria nọ a te jọ lele Kristi su.—Luk 12:32-34.