“Wha Hai Rroro”!

“Ẹme nọ mẹ ta kẹ owhai na, ahwo kpobi mẹ ta kẹ, Wha hai rroro.”—MAK 13:37, NW.

 1, 2. (a) Didi uwuhrẹ ọzae jọ o wuhrẹ kpahe oghẹrẹ nọ ọ rẹ rọ thọ eyero riẹ? (b) No ọtadhesẹ Jesu kpahe oji na ze, eme ma wuhrẹ kpahe aro nọ a rẹ jaja vi?

JUAN o fi ekwakwa eghaghae riẹ họ uwou. O si rai no họ otọ ehwa riẹ—oria nọ o roro nọ o mae f’oma evaọ uwou riẹ. Ghele na, evaọ aso ẹdẹjọ nọ avọ aye riẹ a jọ owezẹ, oji ọ tẹ ruọ ukpẹ na. Oji na ọ riẹ uzedhe oria nọ o re kpohọ. Ọ tẹ lẹlẹ kwa eware eghaghae na no otọ ehwa na kugbe igho nọ Juan o si no họ evaọ edrọwa emẹjẹ nọ e rrọ akotọ ehwa na. Okiokiọ riẹ, Juan ọ tẹ te riẹ nọ a tho rie. Ọ te kareghẹhọ uwuhrẹ odada nọ onana o kẹ riẹ oke krẹkri: Ohwo nọ ọ rrọ owezẹ ọ sae thọ eyero riẹ hẹ.

² Ere ọvona o rrọ evaọ abọ-ẹzi. Ma rẹ sae yọrọ ẹruore avọ ẹrọwọ mai hi ma tẹ rrọ owezẹ. Oye jabọ nọ Pọl ọ rọ kẹ uduotahawọ nnọ: “Wha jọ oma wezẹ hẹ, epanọ edekọ i re ruo; rekọ wha je oma siọ owezẹ ba re ma jọ aruro.” (1 Ahwo Tẹsalonika 5:6) Jesu ọ rehọ oriruo oji dhesẹ epanọ o rrọ oja te re a jaja aro vi. O dhesẹ eware nọ e te via nọ i ti su kpohọ ẹtha riẹ wọhọ Oguẹdhọ, ọ tẹ vẹvẹ unu nnọ: “Fikiere wha roro, keme wha riẹ ẹdẹ nọ Ọnowo rai ọ rẹ te tha ha. Rekọ wha riẹ onana, ọnọ o wo ighẹ ọ tẹ riẹ okenọ oji ọ rẹ tha ọ hai roro, ọ hae rọwo nọ a tọ uwou riẹ lafi hi. Fikiere wha hẹrẹ oma re; keme okenọ wha roro ho Ọmọ ohwo ọ rẹ tha.” (Matiu 24:42-44) Oji o re woro ẹdẹ nọ ọ be rọ nya ze he. Ọ rẹ gwọlọ nya ze eva okenọ ohwo ọvo o rẹro ho. Epọvo na re, wọhọ epanọ Jesu ọ ta, ekuhọ eyero ọnana ọ te tha eva ‘auwa nọ ma roro ho.’

“Wha Roro, Wha Dikihẹ Ga Evaọ Orọwọ”

 3. Ẹvẹ Jesu ọ rọ rehọ oriruo erigbo nọ e be hẹrẹ ezihetha olori rai nọ o kpohọ ehaa-orọo ro dhesẹ epanọ aro ọjajavi o wo uzou te?

³ Wọhọ epanọ a kere evaọ Usiuwoma Luk, Jesu ọ rehọ Ileleikristi dhesẹ erigbo nọ e be hẹrẹ olori rai bẹsenọ o re zihe no ehaa-orọo ze. O gwọlọ nọ a re mu ẹro họ otọ, re nọ ọ jẹ nya ze, a vẹ ruẹ nọ a kp’aro fihọ, ruẹrẹ oma kpahe re a dede iei. Evaọ edhere ọvo na, Jesu ọ ta nọ: “Okenọ wha roro ho Ọmọ ohwo ọ rẹ te tha.” (Luk 12:40) Otujọ nọ e gọ Jihova te ikpe buobu no a sai ku oma ovẹrẹ kpahe edẹ nọ ma rrọ na fiẹ. A rẹ sai tube ku ei họ nnọ urere na o gbẹ rrọ obaro thethabọ dede. Rekọ iroro itieye na e rẹ sae lẹliẹ omai si ẹro no eware abọ-ẹzi kpohọ itee abọ-iwo, eware nọ i re reghe iroro nọ e rẹ sae lẹliẹ owezẹ su omai evaọ abọ-ẹzi.—Luk 8:14; 21:34, 35.

 4. Didi imuẹro e rẹ wọ omai hai rroro ẹsikpobi, kọ ẹvẹ Jesu o ro dhesẹ onana?

⁴ Ma rẹ sai wuhrẹ oware ofa jọ no ọtadhesẹ Jesu na ze. Dede nọ erigbo na a riẹ auwa nọ olori na ọ te rọ ze he, a riẹ aso na. O hae jọ bẹbẹ re erigbo na a riaro okioke otẹrọnọ a roro nọ olori rai ọ sae nya tha evaọ aso ọfa jọ. Rekọ a riẹ aso nọ ọ rẹ te rọ tha, yọ oyena o kẹ rai ẹgba nọ a re ro riaro okioke. Evaọ oghẹrẹ edhere ọvo na, eruaruẹ Ebaibol i dhesẹ vevẹ inọ ma be rria evaọ edẹ urere na; rekọ e vuẹ omai uzedhe ẹdẹ hayo auwa urere na ha. (Matiu 24:36) Orọwọ mai inọ urere na o be tha u re fi obọ họ kẹ omai jaja aro vi, rekọ u te mu omai ẹro nọ ẹdẹ Jihova ọ ghinẹ kẹle no, ma re wo ọwhọ viere nọ ma re ro rroro ẹsikpobi.—Zefanaya 1:14.

 5. Ẹvẹ ma sai ro fi uduotahawọ Pọl na inọ “wha hai rroro” họ iruo?

⁵ Nọ o je kere se ahwo Kọrint, Pọl ọ kẹ uduotahawọ nnọ: ‘Wha hai rroro, wha dikihẹ ga evaọ orọwọ na.’ (1 Ahwo Kọrint 16:13) Uzẹme, aro ọjajavi u wo obọ kugbe edikihẹ ga mai evaọ ẹrọwọ Oleleikristi na. Ẹvẹ ma sae rọ jaja aro vi? Ẹkwoma ewo eriariẹ ididi Ẹme Ọghẹnẹ. (2 Timoti 3:14, 15) Emamọ uruemu ọ uwuhrẹ omobọ-ohwo gbe iwuhrẹ kpohọ ẹsikpobi u re fi obọ họ bọ ẹrọwọ mai ga, yọ ẹdẹ Jihova nọ ma re si te iroro o rrọ abọ ologbo jọ ẹrọwọ mai. Fikiere, ẹkiẹriwi ikẹse kẹse ọrọ imuẹro Ikereakere na nọ i dhesẹ nọ ma rria kẹle ekuhọ eyero ọnana no, u ti fi obọ họ kẹ omai nọ obọdẹ uzẹme kpahe urere nọ o be tha na o gbẹ thọrọ omai ẹro ho.a U te je fo re ma mu ẹro họ eware nọ e rrọ akpọ na via nọ i bi ru eruaruẹ Ebaibol gba. Oniọvo jọ evaọ obọ Germany o kere nọ: “Ẹsikpobi nọ me rri iyẹrẹ eware nọ e be via—ẹmo, etọ nọ i bi nyuhu, ozighi, gbe akpọ na nọ a be nwa—o rẹ kareghẹhọ omẹ epanọ urere na o kẹle te no.”

 6. Edhere vẹ Jesu o ro dhesẹ nọ ohwo ọ sai kie ruọ owezẹ abọ-ẹzi nọ oke o be nya họ aro na?

⁶ Evaọ Mak uzou avọ 13, ma re duku okerefihotọ ọfa ọrọ uduotahawọ Jesu kẹ ilele riẹ inọ a jaja aro vi. Wọhọ epanọ uzou nana o ta, Jesu o kele uyero rai dhe oriẹthẹ nọ ọ be hẹrẹ bẹsenọ olori riẹ o re no erẹ ugbothabọ ze. Oriẹthẹ na ọ riẹ auwa nọ olori riẹ o ti ro zihe tha ha. Ọ rẹ jaja aro vi ọvo. Jesu o dhesẹ etoke euwa ene sa-sa nọ olori na ọ sae rọ nya tha. Auwa avọ ene na o re muhọ eva ighọjọ esa irioke rite okenọ ọre ọ rẹ va tha. Eva auwa urere yena, owezẹ o rẹ sai mu oriẹthẹ na. A ta inọ irioke họ emamọ oke nọ elakpa-ẹmo a rẹ rọ vẹ ruọ ọwegrẹ. Ere ọvo na re, eva auwa urere nana, nọ akpọ nọ ọ wariẹ omai họ ọ rọ rrọ owezẹ udidi evaọ abọ-ẹzi na, o sae gwọlọ omodawọ gaga re ma jaja aro vi. (Ahwo Rom 13:11, 12) Oyejabọ, evaọ ọtadhesẹ riẹ, Jesu ọ kẹ uduotahawọ unuẹse buobu nnọ: “Wha mu ẹro họ otọ, jaja aro vi . . . Fikiere wha hai rroro . . . Ẹme nọ mẹ ta kẹ owhai na, ahwo kpobi mẹ ta kẹ, Wha hai rroro.”—Mak 13:32-37, NW.

 7. Ẹbẹbẹ ologbo vẹ ọ riẹ, kọ fiki onana, uduotahawọ vẹ ma rẹ jọ Ebaibol na duku kẹse kẹse?

⁷ Eva etoke odibọgba riẹ gbe nọ ọ kpare oma no, unuẹse buobu Jesu ọ kẹ uduotahawọ kpahe aro ọjajavi. Evaọ uzẹme, enwenọ ẹsikpobi nọ Ikereakere na e tẹ ta ẹme te ekuhọ urere uyerakpọ na, ma re duku unuovẹvẹ na inọ ma jaja aro vi hayo ma hai rroro.b (Luk 12:38, 40; Eviavia 3:2; 16:14-16) U re vevẹ, oma owezẹ abọ-ẹzi yọ ẹbẹbẹ ologbo. Mai kpobi ma gwọlọ unuovẹvẹ oyena!—1 Ahwo Kọrint 10:12; 1 Ahwo Tẹsalonika 5:2, 6.

Ikọ Esa nọ E Sae Jaja Aro Vi Hi

 8. Evaọ ọgbọ Getsemane, ẹvẹ ikọ esa Jesu a ru kpahe ayare riẹ inọ a rroro?

⁸ Re a jaja aro vi o gwọlọ vi emamọ iroro nọ ohwo o re wo ọvo, wọhọ epanọ ma rẹ ruẹ no oriruo Pita, Jemis, gbe Jọn ze na. Ezae esa nana yọ ahwo abọ-ẹzi enọ e rọ oma kpotọ lele Jesu je wo uyoyou udidi kẹe. Dede na, eva aso ọ Nisan 14, 33 C.E., a sae jaja aro vi hi. Nọ a no ubrukpẹ ehru nọ a jọ ru ehaa Ọnyavrẹ na no, ikọ esa na a te lele Jesu kpohọ ọgbọ Getsemane. Jesu ọ vuẹ rae eva obei nnọ: “Ẹzi mẹ o bi welẹ gaga te uwhu; wha jọ etenẹ, wha lele omẹ roro.” (Matiu 26:38) Isiasa Jesu ọ rova eva olẹ se Ọsẹ obọ odhiwu riẹ, yọ isiasa o zihe bru egbẹnyusu riẹ ze, di ai họ owezẹ.—Matiu 26:40, 43, 45.

 9. Eme o wọhọ nọ o wha owezẹ ikọ na ze?

⁹ Fikieme ezae ẹrọwọ nana e gbẹ sae nya te irẹro Jesu eva aso yena ha? Oware jọ nọ o wha riẹ ze họ oma o rrọ rai no. Oke na u thabọ no, o wọhọ nọ o vrẹ udevie aso no, yọ ‘owezẹ o vọ rae aro.’ (Matiu 26:43) Ghele na, Jesu ọ ta nọ: “Wha roro hẹ lẹ, re wha siọ ẹdawọ ba ẹruọ; ẹzi ọ ghinẹ rọwo rekọ uwo o lọhọ.”—Matiu 26:41.

10, 11. (a) Ghelọ oma nọ o rrọ riẹ no, eme o fi obọ họ kẹ Jesu jaja aro vi evaọ okenọ ọ jọ ọgbọ Getsemane? (b) Eme ma rẹ sai wuhrẹ no oware nọ o via kẹ ikọ esa na ze eva okenọ Jesu ọ vuẹ ae nnọ a rroro?

¹⁰ Ababọ avro, oma o rrọ Jesu re eva aso yena nọ ọ viodẹ na. Ghele na, ukpenọ ọ wezẹ, ọ rehọ omoke uvẹ urere yena lẹ gaga. Umutho edẹ jọ nọ i kpemu no, ọ ta udu họ ilele riẹ awọ re a lẹ, ọ ta nọ: “Rekọ wha roro kẹse kẹse, wha hẹ lẹ re wha sae va eware nana kpobi abọ, enọ i re ti ruẹ na, re wha sai dikihẹ aro Ọmọ ohwo.” (Luk 21:36; Ahwo Ẹfẹsọs 6:18) Otẹrọnọ ma yo ohrẹ Jesu jẹ nya lele emamọ oriruo riẹ evaọ ẹme olẹ, elẹ ayare mai se Jihova nọ i no udu ze i ti fi obọ họ kẹ omai jaja aro vi evaọ abọ-ẹzi.

¹¹ Uzẹme, Jesu ọ riẹ nọ omoke krẹ ọvo u kiọkọ re a mu ei je bru oziẹ uwhu kpe ei, rekọ ilele riẹ a riẹ onana ha eva oke oyena. Edawọ riẹ i re ti kuhọ avọ edada evaọ ure oja. Jesu ọ vẹvẹ ilele riẹ unu no vẹre kpahe eware enana, rekọ a wo otoriẹ oware nọ ọ jẹ ta ha. Fikiere a te kie ruọ owezẹ nọ ọye omariẹ ọ jaja aro vi be lẹ. (Mak 14:27-31; Luk 22:15-18) Wọhọ epanọ o jọ kẹ ikọ na, ma wo oyẹlẹ ugboma re yọ eware jọ e riẹ nọ ma ri wo otoriẹ rai hi. Ghele na, otẹrọnọ ma kpa iroro vrẹ ẹkpata oke nọ ma rrọ na, ma rẹ sai kie ruọ owezẹ abọ-ẹzi. Ẹkwoma ọ ẹromuhotọ ọvo ma sae rọ jaja aro vi.

Ekwakwa Esa nọ E Rrọ Oja

12. Didi ekwakwa esa Pọl o dhesẹ nọ i wo obọ kugbe ẹyọrọ iroro mai?

¹² Ẹvẹ ma sae rọ yọrọ iroro ovẹrẹ mai na? Ma ruẹ epanọ olẹ u wo uzou te no gbe ẹgwọlọ nọ ma re ro si ẹdẹ Jihova te iroro. Fibae, Pọl ọ fodẹ ekwakwa eghaghae esa nọ ma re wo. Ọ ta nọ: “Nọ oma rọ e rọ uvo no na, jọ oma se idi-eda ba re ma fi ojese-udu orọwọ avọ uyoyou mai họ; wha jo oma rọ etu ẹruore usiwo mai tuwu.” (1 Ahwo Tẹsalonika 5:8) Jọ oma kiẹ kpẹkpẹe kpahe epanọ orọwọ, ẹruore, gbe uyoyou i re ro fi obọ họ kẹ omai jaja aro vi evaọ abọ-ẹzi.

13. Abọ vẹ ẹrọwọ o wo evaọ aro nọ ma rẹ jaja vi?

¹³ Ma re wo ẹrọwọ ọgaga inọ Jihova ọ rrọ uzuazọ gbe nnọ ọye họ ọnọ ọ rẹ “hwosa kẹ e nọ e guọlọ e riẹ.” (Ahwo Hibru 11:6) Orugba ọsosuọ ọrọ eruaruẹ Jesu kpahe urere na nọ o roma via evaọ ikpe-udhusoi ọsosuọ na, o bọ ẹrọwọ mai ga fihọ orugba ologbo riẹ eva oke mai na. Yọ ẹrọwọ mai ọ rẹ lẹliẹ omai rehọ ọwhọ hẹrẹ ẹdẹ Jihova, avọ imuẹro nnọ ‘eruaruẹ na e rẹ seba erugba ha, o te raha oke he.’—Habakuk 2:3.

14. Ẹvẹ ẹruore ọ rọ rrọ oja otẹrọnọ ma rẹ jaja aro vi?

¹⁴ Ẹruore mai nọ o mu ẹro ọ wọhọ “umuokọ rọkẹ ẹwẹ na” nọ u re fi obọ họ kẹ omai thihakọ ebẹbẹ o tẹ make rọnọ ma rẹ hẹrẹ orugba eyaa Ọghẹnẹ jọ dede. (Ahwo Hibru 6:18, 19, NW ) Margaret, oniọvo-ọmọtẹ nọ a wholo, nọ ọ kpakọ vrẹ ikpe 90 no, yọ ọ họ-ame vrẹ ikpe 70 no, ọ ta enẹ: “Okenọ eyao-ọta ọ da ọzae mẹ te uwhu no evaọ 1963, o jọ omẹ oma nnọ o hai woma gaga otẹrọnọ urere na o rẹ ze vẹrẹ vẹrẹ. Rekọ enẹna, me ti vuhu mu no inọ isiuru omobọ mẹ ọvo me je roro kpahe. Eva oke yena ma riẹ epanọ iruo na e te kẹre te evaọ akpọ na soso ho. Makọ enẹna, eria buobu e gbẹ riẹ nọ iruo na i bi te obọ. Fikiere eva e be were omẹ nnọ Jihova o wo odiri.” Pọl ukọ na ọ kẹ omai imuẹro nnọ: “Akothiho, uruemu u re no tha; uruemu, ẹruore o re no tha. Ẹruore ọ rẹviẹ omai họ họ.”—Ahwo Rom 5:3-5.

15. Ẹvẹ uyoyou o rẹ rọ kẹ omai ọwhọ o tẹ make rrọ omai ẹro inọ ma hẹrẹ bẹ no?

¹⁵ Uyoyou Ileleikristi yọ okwakwa nọ u wo uzou gaga keme oye o rẹ wọ omai ru oware kpobi. Ma rẹ gọ Jihova fikinọ ma you rie, makọ oghẹrẹ kpobi nọ ọ ruẹrẹ oke riẹ họ. Uyoyou ọrivẹ o be wọ omai whowho emamọ usi Uvie na, makọ oghẹrẹ kpobi nọ o rrọ oreva Ọghẹnẹ nnọ iruo na i re kri te gbe unuẹse nọ ma re zihe kpohọ iwou evona kẹhẹ. Wọhọ epanọ Pọl o kere, eware nọ i kiọkọ họ “orọwọ, ẹruore, uyoyou, esa enana: rekọ onọ omae jọ enana ro kọ uyoyou.” (1 Ahwo Kọrint 13:13) Uyoyou o be wọ omai thihakọ je fi obọ họ kẹ omai jaja aro vi. “[Uyoyou] u re rẹro eware kpobi, avọ odiri eva eware kpobi. Uyoyou u re re he.”—1 Ahwo Kọrint 13:7, 8.

“Kru O nọ Who Wo Ga”

16. Ukpenọ obọ o rẹ lọhọ omai, uruemu vẹ u fo nọ ma re dhesẹ?

¹⁶ Ma be rria etoke nọ a rẹ ruẹ obọ riẹ hẹ, okenọ eware nọ e be via e be rọ kareghẹhọ omai kẹse kẹse nnọ ma rrọ abọ ekuhọ edẹ urere na. (2 Timoti 3:1-5) Enẹna ọ rrọ oke nọ obọ o rẹ rọ rrọ omai hi rekọ oke nọ ma re ro ‘kru onọ ma wo ga.’ (Eviavia 3:11) Ẹkwoma ‘aro ọjaja vi eva elẹ’ gbe ẹbọ ẹrọwọ, ẹruore, avọ uyoyou, ma ti dhesẹ nọ ma ruẹrẹ oma mai kpahe eva auwa odawọ na. (1 Pita 4:7) Ma wo iruo buobu nọ ma re ru evaọ iruo Olori na. Owhreze nọ ma re wo evaọ iruo omarọkẹ Ọghẹnẹ u re ti fi obọ họ kẹ omai jaja aro vi.—2 Pita 3:11.

17. (a) Fikieme irẹro nọ i te obọ ẹsejọ họ e gbẹ lẹliẹ udu whrehe omai hi? (Rri ẹkpẹti nọ ọ rrọ ẹwẹ-obe avọ 31 na.) (b) Ẹvẹ ma sae rọ raro kele Jihova, kọ didi eghale e be hẹrẹ otu nọ o ru ere?

¹⁷ Jerimaya o kere nnọ: “ỌNOWO na họ ẹkẹ mẹ, . . . fikiere mẹ rẹ rọ ẹro kpahe iẹe. Ọnowo na o woma kẹ otu nọ ọ be hẹrẹ iẹ, rọ kẹ ohwo nọ ọ gwọlọ e riẹ. [U woma] re ohwo ọ hẹrẹ usiwo Ọnowo na ẹrera.” (Enuobro 3:24-26) Otu mai jọ a re hẹrẹ kri hi. Efa a hẹrẹ ikpe buobu no re a ruẹ usiwo Jihova. Ghele na, ẹvẹ oke ohẹrẹ nana o kpẹre te a tẹ rehọ iẹe wawo ebẹdẹ bẹdẹ nọ ọ rrọ omai aro! (2 Ahwo Kọrint 4:16-18) Yọ nọ ma be hẹrẹ ẹruoke Jihova na, ma rẹ sae bọ emamọ ekwakwa Ileleikristi je fi obọ họ kẹ amọfa re a rehọ uvẹ odiri Jihova na ro dede uzẹme na rehọ. Fikiere, ajọ mai kpobi ma mu ẹro họ otọ. Jọ ma raro kele Jihova re ma wo odiri, avọ uyere kẹ ẹruore nọ ọ kẹ omai na. Yọ nọ ma be jaja aro vi avọ ẹrọwọ na, jo oma gbe kru ẹruore uzuazọ ebẹdẹ bẹdẹ na whawha. Eyaa eruẹaruẹ enana i ve ti rugba evaọ oma mai: “[Jihova] ọ rẹ te kpare owhẹ kpehru re whọ reuku otọ na; nọ a te guọghọ oru-umuomu, whọ te rue riẹ.”—Olezi 37:34.

[Oruvẹ-obotọ]

Ẹvẹ Whọ te k’Uyo?

• Ẹvẹ ma sai ro ru imuẹro mai ga inọ urere eyero eware nana ọ kẹle ino?

• Eme ma rẹ sai wuhrẹ no iriruo Pita, Jemis, gbe Jọn ze?

• Ekwakwa esa vẹ i re fi obọ họ kẹ omai jaja aro vi evaọ abọ-ẹzi?

• Fikieme onana o jẹ rrọ oke nọ ma rẹ rọ ‘yọrọ onọ ma wo no na whawha’?

[Ẹkpẹti/Uwoho nọ o rrọ ẹwẹ-obe avọ 31]

‘Oghale U te Ọnọ Ọ be Hẹrẹ.’—Daniẹl 12:12

Dae rehọ iẹe nọ ororoke o vi ẹro nnọ oji ọ gwọlọ tho evaọ oria nọ o bi rroro na. Oke u te kpo no, ororoke na ọ rẹ vẹvẹ ezọ kẹ edo kpobi nọ ọ rẹ sai dhesẹ nọ oji na ọ nya ze no. No auwa rite auwa o re fi ezọ họ otọ yọ o bi rri wariẹ. Ma sae ruẹ epanọ o lọhọ te re edo gheghe ọ viẹe họ—edo ofou nọ o bi fou ire hayo ubusu nọ o bi gele eware kie.—Luk 12:39, 40.

Eware itieye evona e rẹ sae via kẹ ahwo nọ a be “rọ [ọwhọ] hẹrẹ odhesẹ via Ọnowo mai Jesu Kristi.” (1 Ahwo Kọrint 1:7) Ikọ na a roro nnọ Jesu o ti ‘zihe uvie na se Izrẹl’ nọ ọ tẹ nwane kpare oma no. (Iruẹru 1:6) Ikpe buobu nọ i lele i rie, a wariẹ jẹ kareghẹhọ Ileleikristi nọ e jọ Tẹsalonika inọ ọzino Jesu ọ gbẹ rrọ obaro thethei. (2 Ahwo Tẹsalonika 2:3, 8) Ghele na, irẹro ẹdẹ Jihova nọ i te rai obọ họ o lẹliẹ ilele ọsosuọ Jesu si oma no edhere nọ o bi su kpohọ uzuazọ na ha.—Matiu 7:13.

Evaọ edẹ mai na, ẹro nọ a re bẹ no kpahe epanọ ekuhọ uyero akpọ na o je kri te enẹ, o rẹ lẹliẹ omai fi oma họ otọ họ. Edo ọrue ọ rẹ sae viẹ ororokẹ nọ o bi mu ẹro họ otọ họ, rekọ o gbahọ nọ o re gbe mu ẹro họ otọ ghele! Onana yọ iruo riẹ. Ere ọvona o rrọ kẹ Ileleikristi re.

[Uwoho nọ o rrọ ẹwẹ-obe avọ 28]

Kọ u mu owhẹ ẹro nnọ ẹdẹ Jihova ọ kẹle ino?

[Iwoho nọ e rrọ ẹwẹ-obe avọ 29]

Iwuhrẹ, olẹ, gbe emamọ uruemu uwuhrẹ i re fi obọ họ kẹ omai mu ẹro họ otọ

[Uwoho nọ o rrọ ẹwẹ-obe avọ 32]

Wọhọ Margaret, jo ma thihakọ jẹ ruẹ abọ họ erroro