Iruo Odibọgba Jesu Evaọ Pẹria

Anwọ oke jọ ze na, Jesu o bi wuhrẹ je bi siwi ahwo evaọ Judia gbe Jerusalẹm. Kẹsena, ọ tẹ fa kpohọ abọdekọ Ethẹ Jọdan re o wuhrẹ evaọ ewho sa-sa nọ e rrọ ubrotọ Pẹria. Rekọ, kẹle na o bi ti zihe kpobọ Jerusalẹm.

Nọ Jesu ọ rrọ Pẹria na, ọzae jọ ọ tẹ nọe nọ: “Olori, kọ ahwo nọ a ti siwi a rrọ kakao?” Ẹsejọhọ ọzae nana ọ riẹ kpahe avro nọ ọ rrọ udevie isu egagọ na, sọ ahwo nọ a ti siwi a te jọ buobu hayo a ti tulo ho. Jesu ọ kuyo onọ yena ha, ukpoye ọ ta kpahe oware nọ ohwo o re ru re ọ sai wo esiwo. Ọ ta nọ: “Wha dawo ẹgba rai kpobi re wha rehọ unuẹthẹ ohwahwa na ruọ eva.” Ẹhẹ, o gwọlọ iruo, koyehọ omodawọ re ohwo ọ sai wo esiwo. Fikieme? Jesu o ru ẹme na vẹ nọ: “Mẹ be ta kẹ owhai nọ, ibuobu e te gwọlọ ruọ eva rekọ a te sae ruọ eva ha.”—Luk 13:23, 24.

Jesu ọ tẹ rọ ọtadhesẹ jọ ta ẹme re ahwo na a riẹ oware nọ o rọ gwọlọ omodawọ, inọ: “Nọ ọnọ o wo uwou na ọ tẹ kpama nyae kare ẹthẹ na no, wha ve ti dikihẹ otafe bi kporo ẹthẹ na be ta nọ, ‘Olori, rovie kẹ omai.’ . . . Rekọ ọ vẹ te ta kẹ owhai nọ, ‘Mẹ riẹ obonọ wha no ze he. Wha no etenẹ no, whai irumuomu!’”—Luk 13:25-27.

Onana u dhesẹ oware nọ o rẹ via kẹ ohwo nọ ọ nya leti, koyehọ ọnọ ọ nya oke nọ u je rie, jẹ ruẹ nọ a kare ẹthẹ dhei no. U fo nọ ọ hae kake nya, dede nọ oke na u kiehọ iẹe oma tere he. Ere o rrọ kẹ ahwo buobu nọ a hai ti wo erere no iwuhrẹ Jesu nọ ọ rrọ kugbe ai na ze. A gbabọkẹ uvẹ nana nọ a wo na, onọ a hae rọ rehọ egagọ uzẹme karo evaọ uzuazọ. Ibuobu ahwo nọ a vi Jesu bru ze, a jẹ uvẹ esiwo nọ Ọghẹnẹ ọ kẹ rai na rehọ họ. Jesu ọ ta nọ a te “vioja jẹ reakọ” okenọ a ti gbolo ai fihọ otafe na. Rekọ ahwo “a ti no obọ ovatha-ọre gbe ukiediwo-ọre gbe ẹkpẹlobọ ovatha-ọre gbe obọze ovatha-ọre ze,” koyehọ erẹwho kpobi, “a vẹ te keria wariẹ emẹjẹ họ evaọ Uvie Ọghẹnẹ.”—Luk 13:28, 29.

Jesu o ru ẹme na vẹ nọ: “Otujọ nọ e rrọ erọ urere [koyehọ ahwo Ju nọ a bi kienyẹ gbe enọ e rrọ ahwo Ju hu] e te jọ erọ ọsosuọ, ejọ nọ e rrọ erọ ọsosuọ [koyehọ isu egagọ ahwo Ju nọ i bi fu uke inọ ae yọ emọ Abraham] e te jọ erọ urere.” (Luk 13:30) Erọ “urere” nọ a te jọ na u dhesẹ nọ enana nọ i rri uvẹ nana vo na a te ruọ Uvie Ọghẹnẹ vievie he.

Otu Farisi jọ a tẹ nya bru Jesu jẹ kẹe ohrẹ nọ: “Nyavrẹ, no etenẹ no keme Herọd [Antipas] ọ be gwọlọ owhẹ kpe.” Ẹsejọhọ Herọd ovie na ọ be ta onana re ọ rọ ere le Jesu no ẹkwotọ na. O sae jọnọ ozọ u bi mu Herọd inọ ọ gbẹ yọroma ha, o bi ti wobọ evaọ uwhu ọruẹaro ọfa, wọhọ epanọ o wobọ kpahe uwhu Jọn Ọhọahwo-Ame na. Rekọ Jesu ọ tẹ ta kẹ otu Farisi na nọ: “Wha nyae vuẹ uruakọ yena nọ, ‘Rri! Me bi le idhivẹri no ahwo oma je bi siwi ahwo nẹnẹ gbe odẹnotha, evaọ ẹdẹ avọ esa yọ me ru no.’” (Luk 13:31, 32) Ẹsejọhọ Jesu o se Herọd “uruakọ” fikinọ o bi dhesẹ uruemu ẹghẹ wọhọ epanọ iruakọ i re ru na. Rekọ Jesu ọ kuvẹ hẹ re Herọd hayo omọfa jọ ọ viẹe họ hayo kpakpa iẹe oma evaọ oware nọ ọ gwọlọ ru. Ọ gba riẹ mu nọ o re ru iruo nọ Ọsẹ riẹ ọ kẹ riẹ na evaọ oke gbe oghẹrẹ nọ Ọghẹnẹ ọ gwọlọ, orọnikọ oghẹrẹ nọ ohwo-akpọ ọ gwọlọ họ.

Nọ Jesu o ru no, ọ tẹ ruọ edhere be nya rri obọ Jerusalẹm, keme wọhọ epanọ ọ ta, “o rẹ sae via ha inọ a rẹ jọ oria ofa kpe ọruẹaro u te no evaọ Jerusalẹm no.” (Luk 13:33) Eruẹaruẹ Ebaibol ọvo e ta ha inọ okpẹwho yena Mesaya na ọ rẹ jọ whu, rekọ fikieme Jesu ọ be rọ ta nọ etẹe a re jo kpei? Keme Jerusalẹm họ okpẹwho esuo, oria nọ ahwo 71 nọ i ru ogbẹgwae Sanhẹdrin via a rrọ, yọ etẹe a rẹ jọ rehọ ahwo nọ a se eruẹaro erue guẹdhọ. U te no ere no, etẹe a rẹ jọ rehọ erao dhe idhe. Fikiere Jesu ọ riẹ nọ u fo vievie he re a jọ oria ofa kpei.

Jesu o bo nọ: “Jerusalẹm, Jerusalẹm, ọnọ o re kpe eruẹaro na jẹ rọ itho fi enọ a vi sei; unuẹse buobu mẹ jẹ gwọlọ koko emọ ra họ epanọ ovu o re koko emọ riẹ họ otọ ibekpe riẹ! Rekọ wha rọwo ho. Rri! A siọ uwou rai ba kẹ owhai no.” (Luk 13:34, 35) Ọmọ Ọghẹnẹ họ ọnọ ahwo orẹwho na a se na, yọ uye u ti noi ze.

Taure Jesu o te ti te Jerusalẹm, omọvo isu otu Farisi na o te zizie ei kpobọ uwou riẹ nyae re emu evaọ Ẹdijala. Amọfa jọ nọ a zizie a te bi rri Jesu kiọkiọkiọ re a ruẹ oware nọ o ti ru kpahe ọzae jọ nọ o wo ẹyao ọsa (ẹyao nọ o re ru awọ ohwo fu hayo so họ). Jesu ọ tẹ nọ otu Farisi na gbe enọ e riẹ Uzi na lafi nọ: “Kọ u fo re a siwi ohwo evaọ Ẹdijala manikọ u fo ho?”—Luk 14:3.

Ohwo ọvo ọ kpahe ẹme he. Jesu o te siwi ọzae na, kẹsena ọ tẹ nọ ahwo na nọ: “Ono evaọ usu rai nọ ọmọ riẹ hayo eruẹ riẹ o re kie fihọ ozae nọ o re si ei noi ze vẹrẹ vẹrẹ hẹ evaọ Ẹdijala?” (Luk 14:5) Ohwo ọvo ọ kpahe ẹme fihọ onọ riẹ nana gbe he.