Kọ Ẹruore jọ Ọ Rrọ kẹ Esẹ-Anwae Mai nọ I Whu No?

EVAỌ oke jọ nọ u kpemu, a jọ obe-usi ahwo Korea jọ nọ a re se The Chosun Ilbo ta kpahe aye jọ nọ a re se Shim Cheong. A jọ obe-usi na nọ inọ: “Nọ orọnọ Shim Cheong ọ riẹ kpahe Jesu taure o te whu hu na, kọ ehẹle ọ nya?”

Ẹme nana nọ a kere fihọ aro obe-usi na o kẹ ahwo uye gaga keme Shim Cheong yọ emamọ ọmọtẹ nọ o gbobọnẹ eware buobu evaọ uzuazọ re ọ sai fiobọhọ kẹ ọsẹ riẹ nọ o tuaro. Fiki onana ahwo a rẹ ta eme iwoma riẹ gaga. Evaọ orẹwho Korea soso, a riẹ Shim Cheong fihọ emamọ ọmọtẹ nọ u fo nọ emetẹ efa a rẹ rọ aro kele emamọ uruemu riẹ.

O rẹ dha ahwo buobu eva nọ a tẹ be ta nọ oghẹrẹ ohwo otioye na ọ be ruẹ uye evaọ erae ehẹle fikinọ ọ họ-ame wọhọ Oleleikristi hi. Ọ sae họ-ame he keme o whu no taure a tẹ te wha usiuwoma Jesu te ẹwho rai.

A jọ obe-usi na kiẹ osu ichọche jọ riwi kpahe onana. A nọ riẹ sọ ahwo buobu nọ a riẹ kpahe Jesu taure a te ti whu hu a kpohọ erae ehẹle no. Uyo nọ ọ kẹ họ: “Ma sae riẹ hẹ. Rekọ ma re woi họ iroro nọ Ọghẹnẹ o ti ru oware jọ kpahe ahwo otiọye na.”

Obe na The New Catholic Encyclopedia o ta nọ: “Ohwo ọ rẹ họ-ame taure o te wo esiwo. Keme Jesu ọ ta nọ, a gbẹ rehọ ame gbe Ẹzi Ọfuafo yẹ ohwo ho, ọ sae ruọ Uvie Ọghẹnẹ hẹ (Jọn 3:5).” Fiki onana, ahwo buobu a roro nọ ohwo ọ gbẹ họ-ame taure o te whu hu, a re gbolo iei fihọ erae ehẹle hayo ọ vẹ ruẹ uye evaọ oghẹrẹ edhere ọfa jọ.

Rekọ u wo amọfa jọ nọ onana o rẹ dha eva. Keme ahwo buobu a riẹ nọ a whu no rekọ a wuhrẹ kpahe Ọghẹnẹ taure a te whu hu. Kọ a te reoja evaọ erae ehẹle bẹdẹ bẹdẹ? Kọ eme Ebaibol na ọ ta kpahe onana?

Ahwo nọ a whu no nọ a wuhrẹ kpahe Ọghẹnẹ taure a te whu hu, Ebaibol na ọ ta nọ Ọghẹnẹ ọ te kpairoro vrẹ ae vievie he. Obe Iruẹru Ikọ 17:30 o ta nọ: “Ọghẹnẹ o ri oke ogbori oyena vo no.” Didi ẹruore Ebaibol na ọ ta nọ ahwo nọ a whu no nọ a wuhrẹ kpahe Ọghẹnẹ taure a te whu hu a wo?

Ma rẹ ruẹ uyo onọ na evaọ ẹme nọ Jesu ọ ta kẹ oji nọ a kare kugbei na. Oji na ọ ta kẹ Jesu nọ: “Roro omẹ, okenọ whọ ze ogaga uvie ra.” Jesu ọ tẹ ta kẹe nọ: “Uzẹme mẹ ta kẹ [owhẹ nẹnẹ na], who re ti lele omẹ jọ obọ Paradais.”—Luk 23:39-43.

Kọ Jesu ọ be ta kẹ ozae nana nọ o ti kpohọ odhiwu? Ijo. Keme ohwo nọ a rọ ame gbe ẹzi wariẹ yẹ ọvo ọ rẹ ruo Uvie odhiwu, rekọ a re rọ ame gbe ẹzi wariẹ yẹ ozae na ha. (Jọn 3:3-6) Ukpoye, Jesu ọ be ta kpahe Aparadase otọakpọ. Fikinọ ozae na ohwo Ju, ọ riẹ kpahe Aparadase otọakpọ na, koyehọ ọgbọ Idẹn nọ a ta kpahe evaọ obe ọsosuọ Ebaibol na. (Emuhọ 2:8) Ẹme Jesu na o ru ọzae na wo ẹruore nọ a te kpare iẹe ze nọ otọakpọ na o tẹ wariẹ zihe ruọ Aparadase no.

Ebaibol na ọ ya eyaa “ẹkparomatha enọ ikiete avọ enọ ikiete he.” (Iruẹru Ikọ 24:15) “Enọ ikiete he” na họ enọ i wuhrẹ kpahe izi Ọghẹnẹ taure a te ti whu hu. Jesu ọ te kpare oji na gbe ima ahwo buobu efa nọ a wuhrẹ kpahe Ọghẹnẹ taure a te whu hu ze uzuazọ. Kẹsena a ve ti wuhrẹ ae izi Ọghẹnẹ evaọ Aparadase otọakpọ na, re a salọ sọ a gwọlọ ru oreva Ọghẹnẹ hayo a gwọlọ ru ere he.

Nọ a tẹ kpare enọ i kiete he na ze no, kọ izi nọ a raha taure a te ti whu a ti ro gu ae ẹdhọ? Vievie. Obe Ahwo Rom 6:7 o ta nọ: “Ọnọ o whu no na o no abọ uzioraha no.” Enọ i kiete he na a rehọ uwhu nọ a whu na hwosa uzioraha rai no. Fikiere, eware nọ a ti ru nọ a tẹ kpare ae ze no a ti ro gu ai ẹdhọ, orọnikọ eware nọ a rọ ogbori ru taure a te ti whu hu. Kọ ẹvẹ onana u ti ro fiobọhọ kẹ ae?

Nọ a tẹ kpare enọ i kiete he na ze no, a ve ti wuhrẹ ai izi Ọghẹnẹ nọ e te jọ iko-ebe nọ a ti rovie na. Eware nọ e rrọ iko-ebe na a ti ro gu ae ẹdhọ wọhọ “epanọ iruo” rai erọ, sọ a ru oreva Ọghẹnẹ hayo a ghẹmeeyo. (Eviavia 20:12, 13) Rọkẹ ibuobu evaọ usu enọ i kiete he na, onana o te jọ uvẹ ọsosuọ nọ a ti ro wuhrẹ kpahe Ọghẹnẹ je ru oreva riẹ re a sae rria bẹdẹ bẹdẹ evaọ otọakpọ na.

Eware nana nọ Ebaibol na o wuhrẹ na, u ru ẹrọwọ nọ ahwo buobu a fihọ Ọghẹnẹ ga viere no. Ọmọtẹ jọ nọ a re se Yeong Sug, yọ ohwo otiọye na jọ. Ichọche Kathọlik ọsẹ gbe oni riẹ a jọ yọrọ iẹe. Ahwo uviuwou riẹ jọ a jọ efada ichọche na. Fikinọ ọ gwọlọ nọ ọ rẹ jọ rẹvrẹn sista ichọche na, ọ tẹ kwa kpohọ oria nọ ahwo otioye na a rẹ rria. Uwhremu na, o te zihe kpo fiki eware nọ a je ru evaọ etẹe nọ e jẹ were iẹe he. Uwuhrẹ erae ehẹle nọ a jẹ jọ etẹe wuhrẹ na o jẹ kẹe uye gaga, keme u dhesẹ uyoyou vievie he re a lahiẹ ahwo evaọ erae ehẹle.

Evaọ ẹdẹjọ, Osẹri Jihova jọ ọ tẹ ta usiuwoma kẹ Yeong Sug, je dhesẹ oria Ebaibol nana kẹe: “Enọ e rọ uzuazọ a riẹ nọ a reti whuẹ, rekọ iwhuowhu e riẹ oware ovo ho, a gbe wo osa ovo ho.” (Ọtausiuwoma Na 9:5) Osẹri Jihova na o te fiobọhọ kẹe ruẹ vuhumu nọ esẹ-anwae riẹ a be reoja evaọ erae ehẹle vievie he. Rekọ a rrọ owezẹ evaọ uki be hẹrẹ ẹkparomatha.

Ẹme Jesu nọ o rrọ obe Matiu 24:14, nọ o ta nọ: “A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi; kẹsena urere u te zi te,” u duobọte Yeong Sug udu gaga, keme ahwo buobu a riẹ nọ a ri yo kpahe eware nana nọ Ebaibol na o wuhrẹ na ha. Enẹna ọ be ta usiuwoma eware nọ o wuhrẹ no Ebaibol na ze kẹ amọfa.

Ebaibol na ọ ta nọ Ọghẹnẹ o wo ọriẹwẹ hẹ, “rekọ evaọ korẹwho korẹwho ọnọ ọ jarae dhẹe o je ru onọ ukiẹrẹe ọ rẹ rehọ iẹe.” (Iruẹru Ikọ 10:34, 35) Onana yọ emamọ oware nọ Ọghẹnẹ o ti ru, keme “ẹruoziẹ gbe ẹrẹreokie ọ rẹ were iẹe.”—Olezi 33:5.