Ono Họ Jesu?

Jesu yọ ohwo jọ nọ a riodẹ ziezi evaọ ikuigbe. Rekọ odẹ riẹ ọvo ahwo buobu a riẹ, a riẹ ohwo nọ ọ rrọ dẹẹ hẹ. Yọ ahwo buobu a re dhesẹ Jesu oghẹrẹ sa-sa. Kọ eme Ebaibol na ọ ta kpahe iẹe?

1. Ono họ Jesu?

Jesu yọ omama ẹzi nọ o wo ogaga nọ ọ be rria obọ odhiwu. Ọye Jihova ọ kake ma taure ọ tẹ te ma oware ofa jọ kpobi. Oyejabọ nọ a ro sei “ọmọ ọsosuọ evaọ emama kpobi.” (Ahwo Kọlọsi 1:15) Ebaibol na o se Jesu “Ọmọ ọvo” Ọghẹnẹ keme ọye ọvo Jihova ọ rọ obọ riẹ ma. (Jọn 3:16) Jesu o lele Jihova, Ọsẹ riẹ ru iruo, o fiobọhọ kẹe ma eware efa kpobi. (Se Itẹ 8:30.) Jesu avọ Jihova a gbẹ rrọ kpekpekpe gaga. A se rie “Ẹme na” keme ọye họ ọtota Ọghẹnẹ nọ ọ rẹ vuẹ ahwo oware nọ Ọghẹnẹ ọ gwọlọ gbe izi riẹ.​—Jọn 1:14.

2. Fikieme Jesu ọ rọ ziọ otọakpọ?

Oware wọhọ ikpe idu ivẹ (2,000) nọ i kpemu, Jihova o ru oware igbunu jọ nọ ọ rọ ẹzi ọfuafo riẹ kpeze uzuazọ Jesu no obọ odhiwu ze fihọ edhede ọmọtẹ-kọkọ jọ nọ a re se Meri. Enẹ a ro yẹ Jesu wọhọ ohwo-akpọ. (Se Luk 1:34, 35.) Jesu ọ ziọ otọakpọ re ọ jọ Mesaya hayo Kristi nọ a ya eyaa riẹ na, re o je siwi ahwo-akpọ.a Eruẹaruẹ kpobi nọ e ta kpahe Mesaya na evaọ Ebaibol na i rugba evaọ oma riẹ, yọ onana u fiobọhọ kẹ ahwo riẹ nọ Jesu họ “Kristi na, Ọmọ Ọghẹnẹ nọ ọ rrọ uzuazọ na.”​—Matiu 16:16.

3. Bovẹ Jesu ọ rrọ obọnana?

Nọ Jesu o whu no, Ọghẹnẹ ọ tẹ kpare iẹe ze avọ oma ẹzi, Jesu o te zihe kpobọ odhiwu. Nọ o te obei, “Ọghẹnẹ ọ kpare riẹ fihọ ọkwa nọ o kpehru vi onọ ọ jọ vẹre.” (Ahwo Filipai 2:9) Ma be ta ẹme na, Jesu o wo ọkwa ologbo. U te no Jihova no, ọye họ ohwo avivẹ nọ ọ mae ga evaọ ehrugbakpọ na.

4. Jesu họ Ọghẹnẹ Erumeru na ha

Ebaibol na ọ vuẹ omai nọ dede nọ Jesu yọ omama ẹzi nọ o wo ogaga evaọ obọ odhiwu, ọ rrọ otọ Jihova nọ ọ rrọ Ọghẹnẹ gbe Ọsẹ riẹ na. Fikieme ma sae rọ ta ere? Kporo IVIDIO na re whọ ruẹ oware nọ Ebaibol na o wuhrẹ kpahe ohẹriẹ nọ o rrọ Jesu avọ Ọghẹnẹ erumeru na.

IVIDIO: Kọ Jesu Kristi Họ Ọghẹnẹ? (3:22)

Eria Ebaibol nọ whọ be te ruẹ na i fiobọhọ kẹ omai riẹ ohẹriẹ nọ o rrọ Jihova avọ Jesu. Se eria Ebaibol na ọvuọvo, kẹsena wha vẹ ta ẹme kpahe enọ nọ i lele i rai na:

Se Luk 1:30-32.

• Eme ukọ-odhiwu na ọ ta nọ u dhesẹ nọ Jesu o wo ohẹriẹ no Jihova Ọghẹnẹ “Ọnọ Ọ Mai Kpehru na”?

Se Matiu 3:16, 17.

• Okenọ a họ Jesu ame, eme urru nọ u do no obọ odhiwu ze na o ta?

• Kọ ono who roro nọ ọ ta ẹme na?

Se Jọn 14:28.

• Te ọsẹ te ọmọ, ono ọ mae kpako jẹ mai wo udu-esuo?

• Nọ orọnọ Jesu o se Jihova Ọsẹ riẹ na, eme oyena u dhesẹ?

Se Jọn 12:49.

• Kọ who roro nọ Jesu ọ rehọ omobọ riẹ avọ Ọsẹ riẹ fihọ omọvo na?

5. Jesu o dhesẹ via nọ ọye họ Mesaya na

IVIDIO: Eruẹaruẹ I Rugba Evaọ Oma Jesu (3:03)

EME WHO WUHRẸ NO?

Jesu yọ omama ẹzi nọ o wo ogaga. Ọye họ Ọmọ Ọghẹnẹ gbe Mesaya na.

Ọkiẹkpemu

• Fikieme a ro se Jesu “ọmọ ọsosuọ evaọ emama kpobi”?

• Eme Jesu o ru taure ọ tẹ te ziọ otọakpọ?

• Ẹvẹ ma rọ riẹ nọ Jesu họ Mesaya na?

KIẸ KPAHE EFA

Gbe wuhrẹ kpahe epanọ Jesu ọ rọ rrọ Mesaya na.

“Kọ Eruẹaruẹ nọ I Kiekpahe Mesaya na I Dhesẹ nọ Jesu Họ Mesaya Na?” (Uzoẹme nọ o rrọ itanẹte)

Se re whọ ruẹ sọ Ebaibol na ọ ta nọ Ọghẹnẹ o yẹ Jesu evaọ oghẹrẹ ovona nọ ahwo-akpọ a re ro yẹ emọ na.

“Fikieme A ro Se Jesu Ọmọ Ọghẹnẹ?” (Uzoẹme nọ o rrọ itanẹte)

Wuhrẹ oware nọ uwuhrẹ Esanerọvo o gbẹ rrọ uwuhrẹ Ebaibol ho.

“Kọ Jesu Họ Ọghẹnẹ?” (Uwou-Eroro Na, Ane 1, 2009)

Se kpahe epanọ uzuazọ aye jọ u ro nwene nọ o wuhrẹ oware nọ Ebaibol na ọ ta kpahe Jesu no.

“Aye Ju Jọ Ọ Ta Oware nọ Ọ rọ Wariẹ Kiẹ Eware nọ Ọ Rọwo Riwi” (Awake!, Asoi 2013)