Wuhrẹ Ahwo Uzẹme Na

1, 2. (a) Iruo vẹ Jesu ọ rọ karo, kọ fikieme? (b) Eme ma re ru re ma sai wuhrẹ ahwo ziezi nọ ma rrọ “ibe iruiruo Ọghẹnẹ” na?

JESU KRISTI ọ jọ ekapenta gbe ọgbodibo. (Mak 6:3; Rom 15:8) Ọ riẹ iruo ivẹ nana ziezi. Wọhọ ọwena-ire, o wuhrẹ epanọ a rẹ rọ ekwakwa iruo na ru iruo ziezi, te epanọ o re ro zihe ete-ure ruọ emamọ oware nọ u wiruo kẹ ohwo. Wọhọ owuhrẹ, ọ jẹ rọ onaa rehọ eriariẹ Ikereakere na nọ o wo ziezi fiobọhọ kẹ ahwo wo otoriẹ Ẹme Ọghẹnẹ. (Mat. 7:28; Luk 24:32, 45) Nọ Jesu o te ikpe ọgba no, o te siobọno ekwakwa iruo ekapenta riẹ keme ọ riẹ nọ iruo odibọgba na họ enọ e mai wuzou. Ọ ta nọ ẹjiroro jọ nọ Ọghẹnẹ o ro vi ei ziọ otọakpọ họ, re ọ nyaze ti whowho emamọ usi Uvie Ọghẹnẹ. (Mat. 20:28; Luk 3:23; 4:43) Iruo odibọgba na Jesu ọ rọ karo nọ ọ jọ otọakpọ, yọ ọ gwọlọ nọ amọfa a kuomagbei evaọ iruo na.​—Mat. 9:35-38.

² O sae jọnọ mai yọ ekapenta ha, rekọ mae yọ egbodibo nọ i bi whowho emamọ usi na. Iruo nana i wuzou ga te epanọ Ọghẹnẹ o bi ro wobọ evaọ iruo na; a se omai “ibe iruiruo Ọghẹnẹ.” (1 Kọr. 3:9; 2 Kọr. 6:4) Ma riẹ vevẹ nọ “Unu ẹme [Jihova, NW] uzẹme.” (Ol. 119:159, 160) Oyejabọ nọ ma rọ gwọlọ ruẹ nọ ma “wuhrẹ jẹ fa otọ ẹme uzẹme na gbagba.” (Se 2 Timoti 2:15.) Re ma sai ru onana, noke toke ma be hai wuhrẹ epanọ ma sae gbẹ rọ rehọ onaa rọ Ebaibol na wuhrẹ ahwo ziezi, keme oye họ ugogo obe nọ ma bi ro wuhrẹ ahwo uzẹme na kpahe Jihova, Jesu, gbe Uvie Ọghẹnẹ. Re ma sai ru iruo odibọgba mai ziezi, ukoko Jihova o salọ ekwakwa efa jọ nọ o gwọlọ nọ ma rẹ riẹ kpahe ziezi. Eware nana e rrọ Ẹkpẹti Ekwakwa Ewuhrẹ mai.

 3. Eme u fo nọ ma rẹ tẹrovi evaọ umutho oke nọ u kiọkọ na, kọ ẹvẹ Iruẹru 13:48 o sai ro fiobọhọ kẹ omai ru ere?

³ O sai gbe owhẹ unu nọ, fikieme ma ro sei Ẹkpẹti Ekwakwa Ewuhrẹ viukpọ Ẹkpẹti Ekwakwa Usi Uwoma Ota? Re ma ta usi uwoma u wobọ kugbe ovuẹ nọ ma re whowho kẹ amọfa; rekọ re a wuhrẹ o kẹre te ovuẹ na nọ ma rẹ romakpotọ wuhrẹ ahwo na re o sai te ai udu avọ irẹro inọ a ti ru lele oware nọ a bi wuhrẹ na. Evaọ umutho oke nọ u kiọkọ na, o gwọlọ nọ ma rẹ tẹrovi epanọ ma re ro mu uwuhrẹ Ebaibol họ kugbe ahwo je ru ae riẹ uzẹme na. Onana u dhesẹ nọ ma rẹ romatotọ gwọlọ ahwo nọ “a wo emamọ eva nọ e gwọlọ uzuazọ ebẹdẹ bẹdẹ” re ma fiobọhọ kẹ ae zihe ruọ ilele Jesu.​—Se Iruẹru 13:44-48.

 4. Ẹvẹ ma sae rọ riẹ ahwo nọ a “wo emamọ eva nọ e gwọlọ uzuazọ ebẹdẹ bẹdẹ,” kọ ẹvẹ ma sae rọ gwọlọ ae?

⁴ Ẹvẹ ma sae rọ riẹ ahwo nọ a “wo emamọ eva nọ e gwọlọ uzuazọ ebẹdẹ bẹdẹ”? Wọhọ epanọ o jọ evaọ ukpe udhusoi ọsosuọ, edhere ọvuọvo nọ ma sae rọ gwọlọ ahwo nana họ, usi uwoma nọ ma rẹ ta. Fikiere, ma re ru oware nọ Jesu ọ ta kẹ omai inọ: “Evaọ ẹwho hayo iwhre kpobi nọ wha te, wha jariẹ gwọlọ ọnọ o te.” (Mat. 10:11) O rọ irẹro mai hi inọ ahwo nọ a wo emamọ eva ha, ahwo omorro hayo otu nọ o wo isiuru kpahe ẹme Ọghẹnẹ hẹ a gaviezọ kẹ ovuẹ mai. Ahwo nọ a wo emamọ eva, omaurokpotọ gbe otu nọ ohọo uzẹme na u bi kpe ma be gwọlọ. Ma sae rọ onana dhesẹ oware nọ o rẹ sae jọnọ Jesu o ru evaọ okenọ ọ jọ ekapenta, ẹsejọhọ ọ jẹ hae gwọlọ uzedhe ure nọ u fo nọ o re ro ru ekpala, ethẹ uwou, ewhowha hayo eware itieye efa. Nọ ọ tẹ ruẹ ure utioye no, ọ vẹ wọ ẹkpẹti iruo riẹ jẹ rehọ onaa riẹ ru oware nọ ọ gwọlọ na. Ere ọvona ma re ru re nọ ma be gwọlọ nọ ahwo nọ a wo emamọ eva a zihe ruọ ilele Jesu na.​—Mat. 28:19, 20.

 5. Eme u fo nọ ma rẹ riẹ kpahe eware nọ e rrọ ẹkpẹti ekwakwa ewuhrẹ mai na? Kẹ oriruo. (Rri iwoho nọ e rrọ emuhọ uzoẹme na.)

⁵ Evaọ ekpẹti ekwakwa iruo kpobi, duọ okwakwa duọ ọvuọ iruo riẹ. Wọhọ oriruo, dai roro kpahe ekwakwa ekapenta nọ o rẹ sae jọnọ Jesu o ro ru iruo.a O gwọlọ nọ o re wo ekwakwa nọ ọ rẹ rọ ma je kpokahọ oria evaọ ete-ure; onọ o re ro bru, zahiẹ eghogho fihọ jẹ kare ure na; gbe onọ ọ rẹ rọ ma ire nọ o bru nọ o je ru ai kiehọ ẹrẹrẹe kẹsena ọ vẹ tehe ai kugbe. Epọvo na re, ekwakwa kpobi nọ e rrọ Ẹkpẹti Ekwakwa Ewuhrẹ mai na i wo ọvuọ ẹjiroro riẹ. Fikiere joma ta kpahe ẹkpẹti mai na gbe epanọ ma sae rọ rehọ obọdẹ ekwakwa nọ e riẹ na ru iruo.

6, 7. (a) Ẹvẹ whọ rọ rehọ ekade jw.org na ro ru iruo no? (b) Eware ivẹ vẹ omobe uzizie na u bi rugba?

⁶ Ekade jw.org. Ekade nana ọ rrọ kakao, rekọ o wiruo gaga. U re fiobọhọ kẹ omai dhesẹ oghẹrẹ ahwo nọ ma rrọ kẹ amọfa je si iroro rai kpohọ oria evuẹ itanẹte mai. Nọ a te kpohọ oria itanẹte na, a rẹ sai wuhrẹ eware efa kpahe iruẹru mai jẹ tubẹ yare nọ jọ ma wuhrẹ Ebaibol kugbe ai. Ahwo nọ a jọ oria evuẹ jw.org mai na yare nọ a gwọlọ ohwo nọ o re wuhrẹ Ebaibol kugbe ai a bu vi idu egba ene (400,000) no, yọ amọfa buobu a gbẹ be yare kẹdẹ kẹdẹ! Whọ sae hae wha ekade nana jọ lele oma kẹdẹ kẹdẹ re whọ rọ uvẹ kpobi se isẹri kẹ ahwo nọ whọ nyaku.

⁷ Omobe Uzizie. Omobe nọ ma be hai ro zizie ahwo kpohọ iwuhrẹ mai na u wo ẹjiroro ivẹ. Uzoẹme riẹ o ta nọ: “Ma zizie owhẹ nọ who lele Isẹri Jihova wuhrẹ Ebaibol.” Kẹsena o tẹ fodẹ idhere ivẹ nọ whọ sai ro ru ere, inọ u te je owhẹ whọ sai ru onana “evaọ obọ iwuhrẹ mai” “hayo kugbe Osẹri Jihova jọ.” Fikiere orọnikọ omobe nana u bi fiobọhọ dhesẹ oghẹrẹ ahwo nọ ma rrọ ọvo ho, u bi je zizie “enọ e riẹ nọ u fo re a riẹ Ọghẹnẹ” re a lele omai wuhrẹ Ebaibol. (Mat. 5:3) Dede na, ma bi zizie ahwo kpobi ziọ ewuhrẹ mai, te a make rọwo nọ ma wuhrẹ Ebaibol kugbe ai hayo a rọwo ho. A tẹ nyaze, a te rọ ẹro ruẹ je yo eware nọ ma bi wuhrẹ no Ebaibol ze.

 8. Fikieme u ro wuzou re ahwo a ziọ ewuhrẹ mai, o tẹ make rrọ ẹsiẹvo dede? Kẹ oriruo.

⁸ U wuzou re ma gbẹ hai zizie ahwo ziọ iwuhrẹ mai, o tẹ make rọnọ ẹsiẹvo a nyaze dede. Fikieme? Keme a te jọ ẹsiẹvo yena ruẹ ohẹriẹ ulogbo nọ o rrọ udevie mai otu nọ ọ be reawere iwuhrẹ Ọghẹnẹ avọ ukoko egagọ erue akpọ soso nọ i wo oware ovo nọ u re ru ai wo usu okpekpe kugbe Ọghẹnẹ hẹ. (Aiz. 65:13) Ikpe jọ nọ i kpemu, ọzae-avọ-aye jọ evaọ obọ America nọ a re se Ray avọ Linda a ruẹ nọ ere o ginẹ rrọ. A je kpohọ uvumọ egagọ vẹre he, rekọ ẹdẹjọ a tẹ gbaemu nọ a re kuomagbe egagọ jọ. A rọwo nọ Ọghẹnẹ ọ rrọ jẹ gwọlọ nọ a re wuhrẹ kpahe iẹe, fikiere a te mu egagọ kpobi nọ e jọ okogho rai họ ẹnya unọjọ utọjọ. Egagọ na e jọ buobu, te esese te ilogbo. Taure a te ti muhọ, ọzae-avọ-aye na a tẹ gbaemu inọ otẹrọnọ a ti kuomagbe egagọ jọ uwhremu na, kiyọ a rẹ jọ egagọ na ruẹ eware ivẹ jọ. Orọ ọsosuọ, a re wuhrẹ oware jọ evaọ ẹdẹ ọsosuọ nọ a ro kpohọ egagọ na. Orọ avivẹ, ahwo egagọ na a rẹ jọ wọhọ ahwo nọ a be ginẹ gọ Ọghẹnẹ. A kpohọ egagọ nọ e jọ okogho rai na kpobi evaọ etoke ikpe jọ, rekọ oware nọ a ruẹ o vọ rai eva ha. A sai wuhrẹ oware ovo ho, yọ osẹ ahwo egagọ na ọvuọvo u dhesẹ i rai fihọ ahwo nọ a be ginẹ gọ Ọghẹnẹ hẹ. Ẹdẹ urere nọ a nya no egagọ urere nọ a kere fihọ obe rai no, Linda ọ tẹ wẹriẹ kpohọ oria iruo riẹ, kẹsena Ray ọ tẹ rọ ovao rri obọ uwou. Nọ o je kpo, ọ tẹ dhẹ aro Ọgwa Uvie vrẹ, kẹsena ọ tẹ nọ omariẹ nọ, ‘Kọ mẹ gbẹ tubẹ rueva re mẹ ruẹ oware nọ a bi ru?’ Ọ wẹriẹ rueva, yọ oware nọ ọ ruẹ o vọ riẹ eva kiọkọ! Ahwo kpobi nọ a rrọ Ọgwa Uvie na a jẹ whẹtiẹ ohwohwo homa, a jọ sasasa, yọ osẹ rai kpobi o jọ kpatiẹ. Uhie obaro Ray ọ keria yọ eware nọ o wuhrẹ e were riẹ gaga! O nwane jọ epanọ Pọl ukọ na ọ ta kpahe ohwo nọ o kpohọ ewuhrẹ Ileleikristi evaọ orọ ọsosuọ, ọnọ ọ ta nọ: “Ọghẹnẹ ọ ginẹ rrọ udevie rai.” (1 Kọr. 14:23-25) Ray ọ tẹ jẹ hai kpohọ ewuhrẹ Ẹdoka kpobi no umuo ẹdẹ yena vrẹ; o te je mu ewuhrẹ udevie oka họ ẹnya koka koka. Aye riẹ Linda o te kuomagbei, kẹsena a tẹ jẹ uwuhrẹ Ebaibol rehọ, roma mudhe jẹ họ-ame nọ a jọ ikpe udhosa gbe ikpegbọ.

9, 10. (a) Fikieme o gbẹ rọ bẹ hẹ rẹ whọ rọ emebe-evẹvẹ mai ta usiuwoma? (b) Ta epanọ ma rẹ rọ rehọ omobe-ovẹvẹ na, Eme họ Uvie Ọghẹnẹ? mu ẹme họ kugbe ohwo?

⁹ Emebe-Evẹvẹ. Ma wo emebe-evẹvẹ eree nọ ma re ro mu ẹme họ kugbe ahwo lọlọhọ. Anwọ 2013 nọ a bi ro siobọno emebe-evẹvẹ nana, a printi rai bu te oware wọhọ ima iso (5,000,000) no! Oware jọ nọ u woma gaga kpahe emebe-evẹvẹ nana họ, ohwo ọ tẹ riẹ epanọ a rẹ rọ ọjọ lele ohwo ta ẹme no yọ ọ riẹ epanọ a rẹ rehọ edekọ lele ohwo ta ẹme no re keme oghẹrẹ ovona a ruẹrẹ e rai kpobi họ. Ẹvẹ whọ sae rọ rehọ omobe-ovẹvẹ mu ẹme họ kugbe ohwo?

¹⁰ Ma rehọ iẹe nọ omobe-ovẹvẹ na Eme họ Uvie Ọghẹnẹ? whọ gwọlọ ro mu ẹme họ kugbe ohwo. Dhesẹ onọ nọ o rrọ aro omobe na kẹe, kẹsena whọ vẹ nọe inọ: “Kọ whọ sai roro kpahe oware nọ Uvie Ọghẹnẹ o rrọ no ẹdẹjọ? Kọ whọ te ta nọ . . . ?” Whọ vẹ ta kẹe re ọ salọ uyo jọ evaọ usu iyo esa na. Who du vuẹe he sọ uyo riẹ o gba hayo ogba ha, kẹsena who ve kpohọ abọdekọ omobe na re who dhesẹ “Oware nọ Ebaibol na Ọ Ta” kẹe je lele iei ta kpahe ikereakere ivẹ na, Daniẹl 2:44 gbe Aizaya 9:6. Wha sae gbẹ ta ẹme na haro nọ o tẹ lọhọ. Who ve dhesẹ oria “Roro Kpahe Onọ Nana” kẹe, yọ onọ nọ o rrọ otọ riẹ o ta nọ: “Ẹvẹ eware e te jọ nọ Uvie Ọghẹnẹ o tẹ ze no?” Onana o vẹ te jọ oware nọ who ti ro mu ẹme họ kugbe ohwo na okiofa. Nọ wha tẹ wariẹ ruẹro, whọ sai dhesẹ uwuhrẹ avọ 7 ọrọ ibroshọ na, Emamọ Usi nọ U No Obọ Ọghẹnẹ Ze! kẹe, yọ ibroshọ nana ọ rrọ usu ebe nọ ma re ro mu uwuhrẹ Ebaibol họ kugbe ahwo.

11. Ẹjiroro vẹ a bi ro kere emagazini mai, rekọ eme u fo nọ ma rẹ riẹ kpahe ae?

¹¹ Emagazini. Emagazini Uwou-Eroro Na gbe Awake! họ ebe nọ a mai printi bu jẹ fa fihọ evẹrẹ sa-sa no evaọ akpọ na soso! Fikinọ akpọ na soso a be jọ se ai, a be hai ru izoẹme uke na evaọ oghẹrẹ nọ i re ro si ahwo urru ghelọ oria kpobi nọ a rrọ evaọ akpọ na kẹhẹ. Ajọ ma hae rọ ekwakwa nana ru ahwo wo isiuru kẹ eware nọ i gine wuzou evaọ uzuazọ nẹnẹ. Rekọ re ma sae rọ emagazini nana kẹ ahwo nọ i ti gine wo iruo kẹ, o gwọlọ nọ ma riẹ ugogo ahwo nọ a rọ fiki rai kere ai.

12. (a) Amono a be mae rọ fiki rai kere Awake!, kọ eme họ ẹjiroro riẹ? (b) Ẹvẹ who rọ rehọ Awake!, lele ohwo ta ẹme no kẹle na?

¹² Awake! A bi kere emagazini nana fiki ahwo nọ a wo umutho eriariẹ kpahe Ebaibol na hayo otu nọ ọ riẹ oware ovo kpahe iẹe he. O sae jọnọ a riẹ oware ovo kpahe iwuhrẹ Ileleikristi hi, a fievahọ egagọ tere he, hayo a tubẹ riẹ nọ Ebaibol na o wo ithubro nọ i re fiobọhọ kẹ ohwo ho. Ugogo ẹjiroro nọ a bi ro kere Awake! họ, re u mu ahwo nọ a bi sei ẹro inọ Ọghẹnẹ ọ rrọ. (Rom 1:20; Hib. 11:6) Re u je fiobọhọ kẹ ahwo nọ a bi sei fi ẹrọwọ họ Ebaibol na inọ “wọhọ epanọ o ginẹ rrọ, ẹme Ọghẹnẹ.” (1 Tẹs. 2:13) Izoẹme uke Awake! esa nọ a ruẹrẹhọ kẹ ukpe 2018 họ: “The Way of Happiness,” “12 Secrets of Successful Families,” gbe “Help for Those Who Grieve.”

13. (a) Fiki amono a be mai ro kere uvitha ẹgbede orọ Uwou-Eroro Na? (b) Ẹvẹ whọ rọ rehọ iẹe lele ohwo ta ẹme ziezi no kẹle na?

¹³ Uwou-Eroro Na. A bi kere orọ ẹgbede na evaọ oghẹrẹ nọ u re ro fiobọhọ kẹ ahwo nọ a wo umutho adhẹẹ kẹ Ọghẹnẹ gbe Ebaibol na wo emamọ usu kugbe Ọghẹnẹ. Dede nọ a wo umutho eriariẹ Ebaibol na, a re te riẹ eware nọ Ebaibol na o bi gine wuhrẹ gbagba ha. (Rom 10:2; 1 Tim. 2:​3, 4) Izoẹme uke Uwou-Eroro ẹgbede esa erọ ukpe 2018 na e kuyo enọ nana: “Kọ Ebaibol na O gbe Wo Iruo kẹ Omai Nẹnẹ?,” “Ẹvẹ Obaro na Ọ te Jọ?,” gbe “Kọ Ọghẹnẹ Ọ be Daezọ Ra?”

14. (a) Eme ividio ene nọ e rrọ Ẹkpẹti Ekwakwa Ewuhrẹ mai na i re fiobọhọ kẹ ahwo ru? (b) Emamọ iyẹrẹ vẹ who wo nọ who dhesẹ ividio nana jọ kẹ ohwo?

¹⁴ Ividio. Evaọ oke Jesu, ekwakwa nọ a rẹ rọ rehọ obọ hayo ẹgba ohwo ro ru iruo ọvo ekapenta a jẹ hai wo. Rekọ enẹna, u wo ekwakwa ijini sa-sa nọ ekapenta a be hai ro ru iruo, wọhọ esọ, ekwakwa nọ i re zue ighogho họ ure, enọ i re ru ure riẹriẹ, enọ e rẹ nyẹ ibibẹ họ ire, gbe efa. U te no ebe mai no, ma wo emamọ ividio sa-sa nọ ma re dhesẹ kẹ ahwo, yọ ene rai e rrọ ẹkpẹti ekwakwa ewuhrẹ mai na. Eye họ: Fikieme Who re ro Wuhrẹ Ebaibol Na?, Ẹvẹ A re Ru Obe-Uwuhrẹ Ebaibol?, Eme A rẹ Jọ Ọgwa Uvie Ru?, gbe Oghẹrẹ Ahwo Vẹ Isẹri Jihova A Rrọ? U re fiobọhọ gaga nọ ma te dhesẹ ividio nọ e kpẹre vi iminiti ivẹ kẹ ohwo evaọ orọ ọsosuọ nọ ma rọ nya ku ei. Ma sai dhesẹ enọ e dina theri kẹ ohwo evaọ ozihebro hayo nọ ma tẹ nyaku ohwo nọ ọ gwọlọ gbẹ gaviezọ. Obọdẹ ekwakwa nana e rẹ sai ru ahwo mu Ebaibol na họ ewuhrẹ jẹ ziọ ewuhrẹ mai.

15. Nọ ohwo o te rri ividio mai evaọ ẹvẹrẹ riẹ, eme o rẹ sae wọ ohwo ru? Kẹ oriruo.

¹⁵ Wọhọ oriruo, ẹdẹjọ oniọvo-ọmọtẹ jọ ọ jọ usiuwoma nyaku aye jọ nọ ọ kwa no obọ Micronesia ze, yọ ẹvẹrẹ Yapese aye na ọ mae riẹ. Oniọvo na o te dhesẹ ividio na, Fikieme Who re ro Wuhrẹ Ebaibol Na? kẹe evaọ ẹvẹrẹ yena. Nọ ividio na o muhọ ekporo no, aye na ọ tẹ ta nọ: “Nọ ẹvẹrẹ mẹ. Whai na! Nọ ẹrọunu ukoliko nọ me no ze. Ẹvẹrẹ mẹ ọ be ta na!” Kẹsena ọ tẹ ta nọ o ti se ebe ẹvẹrẹ riẹ je rri ividio ẹvẹrẹ riẹ kpobi nọ e rrọ jw.org. (Je rri Iruẹru 2:​8, 11.) Joma ta kpahe oriruo ọfa. Oniọvo-ọmọtẹ jọ evaọ obọ America o vi oria jw.org nọ ividio nana ọ rrọ evaọ ẹvẹrẹ ọmọ oniọvo riẹ jọ ro sei, dede nọ orẹwho ọfa ọ jẹ rria. Nọ ọmọ na o rri rie no, o kere se oniọvo na nọ: “Oria nọ o ta nọ ohwo omuomu jọ o bi su akpọ na u gbe omẹ unu gaga. Me fi odẹ hotọ no re a wuhrẹ Ebaibol kugbe omẹ.” Ọmọ oniọvo riẹ na ọ be rria orẹwho nọ a jọ fi awhaha họ iruo mai.

16. Ta kpahe ẹjiroro nọ a ro kere ibroshọ nana: (a) Gaviezọ kẹ Ọghẹnẹ re Whọ Rria Bẹdẹ Bẹdẹ. (b) Emamọ Usi nọ U No Obọ Ọghẹnẹ Ze! (c) Amono A bi Ru Oreva Jihova Nẹnẹ?

¹⁶ Ibroshọ. Ẹvẹ whọ sai ro wuhrẹ ohwo uzẹme na nọ ọ gbẹ make riẹ obe ese tere he hayo nọ ma gbe wo obe ovuọvo evaọ ẹvẹrẹ riẹ hẹ? Ibroshọ Gaviezọ kẹ Ọghẹnẹ re Whọ Rria Bẹdẹ Bẹdẹ na yọ obọdẹ obe jọ nọ o rẹ sai fiobọhọ kẹ omai ru onana.b Yọ whọ rẹ sae rọ ibroshọ Emamọ Usi nọ U No Obọ Ọghẹnẹ Ze! na mu obe-uwuhrẹ Ebaibol họ kugbe ohwo. Whọ sai dhesẹ izoẹme 14 nọ e rrọ obọ uke obe na kẹe jẹ vuẹe re ọ salọ onọ o mae were iẹe. Kẹsena whọ vẹ rọ uwuhrẹ yena muhọ kugbei. Kọ whọ dawo onana no ẹdẹjọ nọ who zihe bru ohwo nọ whọ ta usiuwoma kẹ no vẹre? Ibroshọ avesa nọ o rrọ ẹkpẹti ekwakwa ewuhrẹ na họ Amono A bi Ru Oreva Jihova Nẹnẹ? A kere ibroshọ nana evaọ oghẹrẹ nọ o rẹ rọ kpọ ovao ọmọ-uwuhrẹ rri ukoko Ọghẹnẹ. Whọ tẹ gwọlọ riẹ epanọ a rẹ rọ rehọ ibroshọ nana ru iruo, rri Obe Ewuhrẹ Uzuazọ Oleleikristi gbe Usiuwoma Ota Mai ọrọ Asa 2017.

17. (a) Ugogo ẹjiroro vẹ ma ro wo ebe ivẹ nọ ma re ro wuhrẹ ahwo Ebaibol na? (b) Eme o gwọlọ nọ ahwo nọ a be họ-ame kpobi a re ru, kọ fikieme?

¹⁷ Ebe. Whọ tẹ rọ ibroshọ mu uwuhrẹ Ebaibol họ kugbe ohwo no, whọ rẹ sai nwene kpohọ obe Eme Ebaibol na O Gine Wuhrẹ? na oke kpobi nọ whọ tẹ gwọlọ. Obe nana u ti fiobọhọ kẹ ohwo na riẹ iwuhrẹ Ebaibol viere. Wha te wuhrẹ obe na re no, yọ whọ ruẹ nọ ohwo na o bi wo ẹnyaharo, who ve mu Daji Uyoyou Ọghẹnẹ họ ewuhrẹ kugbei.c Obe nana o ti fiobọhọ kẹe riẹ epanọ ọ sai ro ru lele ehri-izi Ebaibol evaọ uzuazọ riẹ kẹdẹ kẹdẹ. Kareghẹhọ nọ ohwo ọ tẹ make họ-ame no, o gwọlọ nọ ma ruabọhọ uwuhrẹ na bẹsenọ ebe ivẹ na i re re. Onana u ti fiobọhọ kẹ ohwo na dowọ muotọ ziezi evaọ uzẹme na.​—Se Ahwo Kọlọsi 2:6, 7.

18. (a) Nọ ma bi wuhrẹ ahwo uzẹme na, eme 1 Timoti 4:16 o tuduhọ omai awọ nọ ma ru, kọ eme u ti noi ze? (b) Nọ ma be rọ Ẹkpẹti Ekwakwa Ewuhrẹ mai ru iruo na, eme o rẹ jọ utee mai?

¹⁸ Mai Isẹri Jihova ma wo owha-iruo nọ ma rẹ rọ vuẹ ahwo “ovuẹ uzẹme orọ usi uwoma” nọ o rẹ sai ru ahwo wo uzuazọ ebẹdẹ bẹdẹ na. (Kọl. 1:5; se 1 Timoti 4:16.) Re ma sai ru onana ziezi, a kẹ omai Ẹkpẹti Ekwakwa Ewuhrẹ nọ eware nọ ma gwọlọ kpobi e rrọ eva. (Rri “Ẹkpẹti Ekwakwa Ewuhrẹ.”) Joma rọ ekwakwa nana ru iruo avọ onaa. Owhowho-uvie kpobi ọ rẹ sae jiroro obe hayo ividio nọ ọ gwọlọ dhesẹ kẹ ohwo nọ ọ nyaku gbe okenọ ọ gwọlọ ro ru onana. Dede na, orọnikọ ebe ọvo ma gwọlọ kẹ ahwo ho; yọ ma gwọlọ rọ ebe mai kẹ ahwo nọ a wo isiuru hu gbe he. Utee mai họ re ma wuhrẹ ahwo nọ a wo emamọ eva, omaurokpotọ, jẹ gwọlọ riẹ uzẹme na re a zihe ruọ ilele Jesu; enọ “e gwọlọ uzuazọ ebẹdẹ bẹdẹ.”​—Iruẹru 13:48; Mat. 28:19, 20.