Si Kẹle Ọghẹnẹ

“Otheri Omai Ọvuọvo Abọ Họ”

Iruẹru Ikọ Na 17:24-27

NỌ MA te roro te epanọ ehrugbakpọ na ọ rro te, ohwo-akpọ o te oware ovo ho. Ẹsejọhọ u gb’owhẹ unu no ẹdẹjọ inọ, ‘Kọ ahwo-akpọ gheghe a rẹ sai gine mu usu okpekpe kugbe Ọghẹnẹ Erumeru na?’ Edhere ọvo nọ onana o sae rọ lọhọ họ, otẹrọnọ Ọghẹnẹ omariẹ, nọ odẹ riẹ o rrọ Jihova na, ọ gwọlọ nọ ma mu usu utioye kugbei. Kọ ọ gwọlọ ere? Ma rẹ sae jọ eme nọ Pọl ukọ na ọ ta kẹ ahwo Athẹns nọ a riẹ ikpebe nọ a kere fihọ Iruẹru Ikọ Na 17:24-27 ruẹ uyo onọ yena nọ o rẹ sasa oma. Muẹrohọ eware ene jọ nọ Pọl ọ ta kpahe Jihova.

Orọ ọsosuọ, Pọl ọ ta nọ Ọghẹnẹ “ọ ma akpọ na gbe eware nọ eriẹ eva kpobi.” (Owọ avọ 24) Eware sa-sa nọ Ọghẹnẹ ọ ma gbe erru rai nọ i ru nọ ma be rọ reawere uzuazọ e kẹ imuẹro uyoyou Ọmemama na gbe isiuru nọ o wo kpahe ewoma mai. (Ahwo Rom 1:20) O kare iroro re a ta nọ Ọghẹnẹ otiọye na ọ rẹ ko oma dhere no ahwo-akpọ nọ ọye omariẹ o dhesẹ uyoyou ulogbo utioye kẹ na.

Orọ avivẹ, Jihova “ọ rẹ kẹ ahwo kpobi uzuazọ, gbe ẹwẹ, jegbe eware kpobi.” (Owọ avọ 25) Jihova họ Ọnọ ọ be sẹro uzuazọ ahwo-akpọ. (Olezi 36:9) Ofou-ẹwẹ, ame, gbe emu nọ i wuzou gaga kẹ uzuazọ na yọ ekẹ nọ i no obọ riẹ ze. (Jemis 1:17) Kọ o rrọ oware iroro re ma ta nọ Ọghẹnẹ mai nọ ọ rẹ kẹ ekẹ iwoma kpobi na ọ te jọ oriẹ sa jẹ gbọ omai uvẹ nọ ma rẹ rọ riẹe je si kẹle iẹe?

Orọ avesa, Ọghẹnẹ “ọ rehọ oghẹrẹ ovo na ma ahwo kpobi.” (Owọ avọ 26) Jihova ọ rẹ jẹ ahwo jọ ọvo rehọ siọ amọfa ba ha yọ o wo ọriẹwẹ hẹ. (Iruẹru Ikọ Na 10:34) Eme o gbẹ jọ ere he? Ọ ma ahwo erẹwho gbe ovioma kpobi no oma omọvo ze, Adamu. Yọ Ọghẹnẹ “ọ guọlọ re ahwo kpobi a wo usiwo.” (1 Timoti 2:4) Fikiere uvẹ nọ ma re ro mu usu okpekpe kugbei u rovie fihọ kẹ omai kpobi, ghelọ oghẹrẹ ovioma mai, gbe orẹwho hayo uyẹ kpobi nọ ma noze.

Orọ urere, Pọl ọ ta ugogo uzẹme jọ nọ o kẹ omai uduotahawọ gaga: Jihova “otheri omai ọvuọvo abọ họ.” (Owọ avọ 27) Dede nọ o kpehru gaga, Jihova o ru omariẹ evaọ edhere nọ ohwo kpobi nọ u no eva ze ọ sai ro si kẹle iẹe. Ẹme riẹ ọ ta udu họ omai awọ inọ o theri omai abọ họ, ukpoye, “ọ kẹle enọ i bo se ei kpobi.”—Olezi 145:18.

Eme ọ Pọl na i dhesẹ vevẹ nọ Ọghẹnẹ ọ gwọlọ nọ ma si kẹle iẹe. Dede na, Pọl o ru rie vẹ inọ ahwo nọ u no eva ze nọ a be “guọlọ” iẹe, je bi “kie lele iei” ọvo Ọghẹnẹ ọ rẹ kẹ uvẹ usu okpekpe utioye na. (Owọ avọ 27) Obe jọ nọ a kere nọ u re fi obọ họ kẹ enọ e be fa Ebaibol o ta nọ “eme ivẹ na i dhesẹ oware nọ ohwo ọ rẹ sai wo tobọ . . . hayo irẹro nọ ohwo ọ rẹ sai wo tobọ.” Wọhọ oriruo: Nọ uwou nọ whọ rria reria no u te muebi, whọ rẹ sae robọ rara gwọlọ oria nọ ẹthẹ hayo ukpẹ o rrọ, rekọ whọ rẹ riẹ k’oma ra nọ whọ te siọ eware nana ba ẹruẹ hẹ. Epọvo na re, ma tẹ be ginẹ gwọlọ Ọghẹnẹ je bi kie lele iei, u re mu omai ẹro nọ ma te se iẹe ba ẹruẹ hẹ.

Kọ whọ gwọlọ si kẹle Ọghẹnẹ? Whọ tẹ be “guọlọ” iẹe je bi “kie lele iei,” whọ te siẹe ba ẹruẹ hẹ. O bẹ hẹ re a mu usu kugbe Ọghẹnẹ keme “otheri omai ọvuọvo abọ họ.”