Wuhrẹ Avọ Orimuo Gbe Ẹtẹzẹ

“Iroro ohwo nọ o wo areghẹ i re ru eme riẹ kiẹrẹe, ọ rẹ jẹ ta eme nọ e rẹ dhẹruọ ahwo oma.”—ITẸ 16:23.

 1. Fikieme ewuhrẹ Ẹme Ọghẹnẹ o jẹ gwọlọ vi ovuẹ orehọ kẹ ọvo?

UTE mai wọhọ iwuhrẹ Ẹme Ọghẹnẹ họ orọnikọ re ma fi elo họ iroro emọ-uwuhrẹ mai ọvo ho rekọ te idu rai. (Ahwo Ẹfẹsọs 1:18) Fikiere ewuhrẹ o gwọlọ vi ovuẹ nọ ma rẹ kẹ gheghe. Itẹ 16:23 o ta nọ: “Iroro ohwo nọ o wo areghẹ i re ru eme riẹ kiẹrẹe, ọ rẹ jẹ ta eme nọ e rẹ dhẹruọ ahwo oma.”

 2. (a) Eme u dhesẹ re a tẹzẹ? (b) Ẹvẹ o rọ lọhọ kẹ Ileleikristi kpobi re a jọ iwuhrẹ nọ e rẹ tẹzẹ?

² Avro ọ riẹ hẹ sọ Pọl ukọ na o fi ehri-uzi onana h’iruo evaọ iruo ewuhrẹ riẹ. Evaọ okenọ ọ jọ obọ Kọrint, ‘kẹdijala kẹdijala ọ rẹ jọ eva uwou-egagọ ta ẹme, duọ ahwo Ju gbe erọ Griki họ re a rẹriẹ.’ (Iruẹru 18:4) Wọhọ epanọ obe jọ o ta, ubiẹme Griki nọ a jọ etenẹ fa ‘ẹdohọ’ na u dhesẹ “ẹrẹriẹ iroro ohwo ẹkwoma obọ-uduhọ ẹjiroro riẹ.” Ẹkwoma avro ẹtẹzẹ, Pọl ọ sae wọ ahwo re a nwene edhere iroro rai. Ẹgba riẹ nọ ọ rẹ rọ tẹzẹ ahwo ọ ga te epanọ ewegrẹ riẹ e jẹ rọ dhozọ riẹ. (Iruẹru 19:24-27) Ghele na, ewuhrẹ Pọl o jọ edhesẹ ẹgba ohwo-akpọ họ. Ọ ta kẹ ahwo Kọrint nọ: “Eva ẹme unu mẹ jegbe ẹme ovuẹ mẹ, mẹ rehọ areghẹ iruo Ẹzi gbe ogaga via, re wha siọ ẹro ba ẹrọ suọ ereghẹ ahwo eva orọwọ rai, rekọ ajokpa ẹruọrọsuọ eva ogaga Ọghẹnẹ.” (1 Ahwo Kọrint 2:4, 5) Nọ Ileleikristi kpobi a wo obufihọ ẹzi Jihova Ọghẹnẹ na, aikpobi a rẹ sae jọ iwuhrẹ ẹtẹzẹ. Rekọ evaọ oghẹrẹ vẹ? Joma ruẹ ona iwuhrẹ obọdẹ jọ.

Jọ Emamọ Ọkezọ

 3. Fikieme o jẹ gwọlọ orimuo nọ ma te bi wuhrẹ amọfa, kọ ẹvẹ ma sae rọ rehọ ẹme t’udu emọ-uwuhrẹ Ebaibol mai?

³ Ona uwuhrẹ ọsosuọ o gwọlọ, orọnikọ ẹmeọta ha, rekọ ezọgaviẹ. Wọhọ epanọ ma jọ Itẹ 16:23 muẹrohọ na, re ma tẹzẹ ahwo ma re wo areghẹ. Jesu ọ riẹ kpahe ahwo nọ o je wuhrẹ. Jọn 2:25 o ta nọ: “Ọ riẹ epanọ o rọ evaọ ohwo.” Rekọ ẹvẹ ma sae rọ riẹ eware nọ e rọ idu enọ ma bi wuhrẹ? Edhere jọ họ ma rẹ jọ obọdẹ ekezọ. Jemis 1:19 o ta nọ: “Jọ kohwo kohwo o he yo vẹrẹ, ọ vẹ rọ ẹrera ruọ ẹme-ọta.” Uzẹme, orọnikọ ahwo kpobi a rẹ t’eva rai hi. Nọ emọ-uwuhrẹ Ebaibol mai a be ruẹ imuẹro viere ọrọ obọdẹ isiuru mai kpahe ai na, oma o rẹ wọ ai re a t’eva rai. Enọ ẹwo avọ orimuo e rẹ sai fiobọhọ k’omai nyate udu na jẹ kiẹ iroro itieye na “via.”—Itẹ 20:5.

 4. Fikieme ekpako Ileleikristi a jẹ gaviezọ ziezi hrọ?

⁴ O mai wuzou re ekpako Ileleikristi a jọ emamọ ekezọ. Ere ọvo a sae rọ riẹ epanọ a re ro “yo kẹ ohwo.” (Ahwo Kọlọsi 4:6) Itẹ 18:13 o vẹvẹ unu nọ: “Ọnọ o ri yo ẹme he ọ vẹ kẹ uyo, yọ ugheghẹ gbe omovuọ obọ riẹ.” Inievo ivẹ jọ avọ udu ezi a hrẹ oniọvo-ọmọtẹ jọ kpahe uruemu akpọ fikinọ iwuhrẹ jọ i vo rie. Eva e tẹ dha oniọvo na gaga inọ a nọ riẹ oware nọ iwuhrẹ i je voi hi. O kpohọ omobẹrọ vẹre, yọ ola na u ri kpo ho. Fikiere, ẹvẹ o r’oja te re ma gaviezọ taure ma tẹ k’ohrẹ!

 5. Ẹvẹ ekpako a re ro ku ẹwhọ nọ ọ rọ udevie inievo họ?

⁵ Rọ kẹ ekpako, ewuhrẹ u kugbe ohrẹ nọ a rẹ kẹ amọfa. O gwọlọ nọ a rẹ jọ etenẹ gaviezọ ziezi re. Ezọgaviẹ u wuzou okenọ ẹwhọ ọ tẹ rọ udevie Ileleikristi. A tẹ gaviezọ ziezi ọvo ekpako a jẹ sae raro kele ‘Ọsẹ nọ o re bruoziẹ ababọ-ọriẹwẹ.’ (1 Pita 1:17) Udu ohwo kpobi o rẹ roro evaọ etoke ọyena, yọ u re fo re ọkpako o roro kpahe ohrẹ nọ o rọ Itẹ 18:17 na: “Ohwo nọ ọ kake i guẹdhọ o re roro nọ ọ rease, bẹsenọ amọfa a rẹte kiẹ otọ riẹ.” Emamọ owuhrẹ ọ rẹ gaviezọ kẹ unu imava na. Nọ ọ tẹ lẹ, yọ o bi fiobọhọ lẹliẹ udu kie ohwo kpobi vi. (Jemis 3:18) Otẹrọnọ udu u muhọ ẹroro, ọ sae ta nọ omomọvo ọ r’ovao dhe ọye omariẹ t’ẹme, ukpenọ a re duobọhọ ohwohwo ovao. Ẹkwoma emamọ enọ, ọkpako na ọ rẹ sai ru ẹme na vẹ. Evaọ ẹsibuobu, a rẹ ruẹ nọ ẹbẹbẹ na kpobi họ a yo ẹme jọ thọ, orọnikọ a mukpahe ohwohwo ho. Rekọ otẹrọnọ a lavrẹ ehri-izi Ebaibol jọ, owuhrẹ oyoyou ọ rẹ sae rehọ orimuo hrẹ, nọ o yo unu rai aimava no na.

Aghare ọ Eware I ru Lọhọ

 6. Ẹvẹ Pọl avọ Jesu a rọ kẹ oriruo ọrọ ewuhrẹ ọlọlọhọ?

⁶ Re a ru eware fihọ lọlọhọ yọ ona uwuhrẹ oghaghae ọfa. Uzẹme, ma gwọlọ re emọ-uwuhrẹ Ebaibol mai a “riẹ epa okẹkẹe, gbe uthethei, [gbe] ekpehru gbe ekodo” uzẹme na ziezi. (Ahwo Ẹfẹsọs 3:18) Ma wo abọ iwuhrẹ Ebaibol jọ nọ i re siuru jẹ rọ use-abọ. (Ahwo Rom 11:33) Ghele na, okenọ Pọl ọ ta usiuwoma kẹ ahwo Griki, ọ t’ovao riwi ovuẹ olọlọhọ orọ “Kristi nọ a kare.” (1 Ahwo Kọrint 2:1, 2) Epọvo na, Jesu ọ ta usiuwoma evaọ edhere ọlọlọhọ, ovevẹ. Ọ t’eme nọ ahwo kpobi a wo otoriẹ rai evaọ Ovuẹ obọ Ugbehru riẹ. Ghele na, eme enana e wha uzẹme nọ e mae gbẹdẹ kpobi.—Matiu, izou 5-7.

 7. Ẹvẹ ma sai ro ru ẹme lọlọhọ nọ ma te bi ru iwuhrẹ Ebaibol?

⁷ Okenọ ma te bi wuhrẹ evaọ iwuhrẹ Ebaibol, ma rẹ sai ru eware lọlọhọ re. Evaọ oghẹrẹ vẹ? Ẹkwoma ẹro ọtọvi ‘eware nọ i wuzou.’ (Ahwo Filipai 1:10) Okenọ ma te bi dhesẹ uzoẹme nọ o re gaga, ma rẹ daoma ru ẹme na vevẹ. Ma rẹ t’ẹrovi igogo ikereakere ukpenọ ma rẹ gwọlọ se jẹ t’ẹme kpahe oria Ebaibol kpobi nọ a jọ obe na fodẹ. Onana o gwọlọ nọ ma ruẹrẹ oma kpahe ziezi. U du fo re ma rehọ eme buobu da ọmọ-uwuhrẹ na oma fia ha, yọ ma rẹ kẹ oma mai uvẹ re eware esese i si iroro mai vrẹ hẹ. Otẹrọnọ ọmọ-uwuhrẹ na o wo onọ jọ nọ o nwani kpomahọ uzoẹme na ha, ma rẹ sae rọ areghẹ jiroro inọ ma te t’ẹme kpahe iẹe okenọ uwuhrẹ na u te kuhọ no.

Eroruiruo Emamọ Enọ

 8. Ẹvẹ Jesu ọ rọ rehọ enọ ruiruo ziezi?

⁸ Emamọ ona uwuhrẹ ofa họ ẹnọ emamọ enọ. Jesu Kristi ọ n’enọ gaga evaọ uwuhrẹ riẹ. Wọhọ oriruo, Jesu ọ nọ Pita nọ: “ ‘Saimọn, ẹvẹ who roro? Ivie akpọ na abọ amono a je miẹ igho gbe azọhọ? Abọ emọ rai orẹ abọ erara?’ Nọ ọ ta kẹ e [no] nọ, ‘Abọ erara,’ Jesu ọ tẹ ta kẹ e nọ, ‘Koyehọ emọ na emuyẹ.’ ” (Matiu 17:24-26) Wọhọ Ọmọ ọvo Ọnọ a be jọ etẹmpol na gọ na, o ghinẹ gba Jesu họ re ọ jẹ azọhọ etẹmpol na ha. Rekọ Jesu o dhesẹ uzẹme onana ẹkwoma uvi onọ. Fikiere Jesu o fiobọhọ kẹ Pita ziọ ekuhọ ọgbagba ọnana ẹkwoma ovuẹ nọ ọ riẹ no vẹre.

 9. Ẹvẹ ma sae rọ rehọ enọ ruiruo evaọ iwuhrẹ Ebaibol?

⁹ Ma rẹ sae fi enọ họ emamọ iruo evaọ etoke iwuhrẹ Ebaibol. Otẹrọnọ ọmọ-uwuhrẹ ọ kẹ uyo nọ o thọ, oma o sae kpakpa omai re ma k’uyo ogbagba na, rekọ ọ te ghinẹ kareghẹhọ ovuẹ na? Ẹsebuobu, o rẹ mai woma re ma rehọ enọ daoma kpọ ọmọ-uwuhrẹ na kpohọ uyo na. Wọhọ oriruo, otẹrọnọ o rọ bẹbẹ kẹe re ọ riẹ oware nọ ọ jẹ rehọ odẹ ofuafo na ruiruo, ma rẹ sae nọ inọ, ‘Kọ odẹ ra o r’oja k’owhẹ? . . . Fikieme? . . . Ẹvẹ o rẹ j’owhẹ oma otẹrọnọ ohwo jọ ọ se nọ ọ rẹ fodẹ odẹ ra? . . . Kọ o gbẹ rọ oware iroro kẹ Ọghẹnẹ re ọ gwọlọ nọ ma rehọ odẹ oma riẹ ruiruo?’

10. Ẹvẹ ekpako e sae rọ rehọ enọ ruiruo okenọ a te bi fiobọhọ kẹ ahwo nọ akpọ o kienyẹ?

¹⁰ Ekpako a sae jẹ rehọ enọ ruiruo ziezi okenọ a tẹ be rẹro te uthuru na. Akpọ Setan o gboja iroro kẹ ibuobu nọ e rọ ukoko na no, fikiere a re roro nọ a fo ho jegbe nọ a you rai hi. Ọkpako ọ rẹ sae jiroro kugbe ohwo otiọye na ta nọ: ‘Dede nọ whọ ta nọ abọ ra ọ fo ho, ẹvẹ Jihova o roro kpahe owhẹ? Otẹrọnọ Ọsẹ obọ odihwu mai ọ kẹ Ọmọ riẹ uvẹ re o whu jẹ k’owhẹ ẹtanigbo na, kọ oyena u gbe dhesẹ nọ Ọghẹnẹ o you owhẹ?’—Jọn 3:16.

11. Eme họ ẹjiroro enọ iroro, kọ ẹvẹ a sae rọ rehọ ai ruiruo evaọ ẹmeọta ẹgbede?

¹¹ Enọ iroro yọ ona uwuhrẹ ofa nọ u wuzou re. U du gwọlọ nọ enọ e be gaviezọ a rẹ kuyo rai do via ha, rekọ u re fiobọhọ kẹ ai roro kpahe ẹme na. Eruẹaro anwae a nọ enọ itieye na re a ru enọ e be gaviezọ kẹ ae roro didi. (Jerimaya 18:14, 15) Jesu ọ rehọ enọ iroro ruiruo ziezi. (Matiu 11:7-11) Enọ itieye na e rẹ mai w’iruo evaọ ẹmeọta ẹgbede. Ukpenọ ma rẹ ta kẹ ogbotu nọ a rẹ rehọ udu rai kpobi gọ re a sai ru Jihova eva were, o rẹ mai wo ẹgba re ma nọ inọ, ‘Ma gbẹ ghinẹ rọ ẹwẹ kpobi gọ họ, kọ egagọ mai e rẹ were Jihova?’

12. Eme họ erere enọ kpahe eriwo ohwo?

¹² Enọ iroro-udu i wuzou re evaọ ẹriẹ sọ ọmọ-uwuhrẹ Ebaibol na ọ ghinẹ rọwo oware nọ o bi wuhrẹ na. (Matiu 16:13-16) Ọmọ-uwuhrẹ ọ sae kuyo gbagba nọ ọfariẹ-ogbe ọ thọ. Rekọ eme jabọ whọ gbẹ nọ enọ enana lele iei hi wọhọ, Ẹvẹ izi Ọghẹnẹ kpahe ẹfuọ e r’owhẹ oma? Kọ who roro nọ e ga hrọ? Kọ whọ sae ta nọ u ghine muẹme sọ who lele ute Ọghẹnẹ hayo who lele he?

Etadhesẹ nọ I re Duobọte Udu Na

13, 14. (a) Eme u dhesẹ re a dhesẹ oware? (b) Fikieme emamọ etadhesẹ e jẹ r’oja?

¹³ Edhere ọfa nọ a re ro duobọte udu enọ e be gaviezọ gbe emọ-uwuhrẹ Ebaibol họ ẹkwoma obọdẹ etadhesẹ. Ubiẹme Griki nọ a fa “ọtadhesẹ” no ze u dhesẹ “efihọ kẹle hayo kugbe.” Who te dhesẹ oware, yọ who bi ru oware vẹ ẹkwoma “efihọ kẹle” oware nọ u tho rie. Wọhọ oriruo, Jesu ọ nọ nọ: “Eme ma re ro dhesẹ uvie Ọghẹnẹ, hayo didi ohare ma rẹ rọ tae?” Evaọ uyo, Jesu ọ tẹ fodẹ ubi ahe nọ a riẹ ziezi na.—Mak 4:30-32.

¹⁴ Ahwo Ọghẹnẹ a rẹ rehọ obọdẹ etadhesẹ buobu ruiruo. Okenọ ahwo Asiria, enọ Ọghẹnẹ ọ jẹ rọ kẹ emọ Izrẹl uye, a mu ai họ ẹlahiẹ, Aizaya ọ tẹ rehọ ọtadhesẹ ọnana dhesẹ omovia rai: “Kọ ewhe ọ sai seha kẹ ohwo nọ ọ be rehọ iẹe kie ure, hayo kọ osara o rẹ gavi ohwo nọ ọ be rehọ iẹe bẹre ure?” (Aizaya 10:15) Okenọ o je wuhrẹ amọfa, Jesu omariẹ ọ rehọ etadhesẹ ruiruo gaga. A n’iyẹrẹ na nọ “ọ jẹ ta eme kẹ ae ababọ ohare he.” (Mak 4:34) Emamọ etadhesẹ e rọ ziezi keme i re duobọte iroro gbe udu na. E rẹ lẹliẹ evuẹ ekpokpọ daruọ enọ e be gaviezọ oma vẹrẹ vẹrẹ ẹkwoma oware jọ nọ a rẹ rọ wawo ofa nọ a jọ eva rai riẹ no vẹre.

15, 16. Eme u re ru etadhesẹ w’iruo ziezi? Kẹ iriruo.

¹⁵ Ẹvẹ ma sae rọ rehọ etadhesẹ nọ i re ghine duobọte udu na ruiruo? Orọ ọsosuọ, ọtadhesẹ o re kiehọ oware nọ ma bi dhesẹ na. U gbe fo ẹme na ha, ọtadhesẹ na o re reghe enọ e be gaviezọ na ukpenọ o rẹ kẹ ai otoriẹ. Ọtẹme jọ nọ o wo eva-ezi ọ jẹ daoma rehọ ọmọ-arakọ omarokpotọ dhesẹ epanọ okiọkotọ nọ a wholo na a be roma kpotọ kẹ Jesu Kristi. Rekọ, kọ ọtadhesẹ orivo otiọye na o ghine fo? Ebaibol na o dhesẹ ẹjiroro ọvo na evaọ edhere jọ nọ ọ mai siuru je wo adhẹẹ. Ọ rehọ “ọva nọ ọ be hẹrẹ ọzae riẹ” ro dhesẹ ilele 144,000 Jesu nọ a wholo na.—Eviavia 21:2.

¹⁶ Etadhesẹ e rẹ mai w’iruo nọ i te kie kpahe izuazọ ahwo. Ọtadhesẹ Netan ọrọ omogodẹ nọ a kpe u duobọte udu Devidi ovie na keme o you igodẹ, ọ jọ othuru-igodẹ vẹre evaọ uzoge riẹ. (1 Samuẹle 16:11-13; 2 Samuẹle 12:1-7) Otẹrọnọ a rehọ eruẹ ru ọtadhesẹ na, ẹsejọhọ o hai w’iruo tere he. Epọvo na, etadhesẹ nọ a rẹ kẹ ẹkwoma eka otokiẹ-eriariẹ hayo eware nọ e via kpemu no nọ i vẹ hẹ e rẹ ruoma w’iruo kẹ ahwo nọ a be gaviezọ k’omai hi. Jesu ọ rehọ eware nọ a rẹ ruẹ esikpobi rọ kẹ etadhesẹ riẹ. Ọ t’ẹme kpahe eware nọ e jọ eria kpobi wọhọ ukpẹ, evra obọ odhiwu, gbe idodo obọ ẹwọ. (Matiu 5:15, 16; 6:26, 28) Enọ e jẹ gaviezọ kẹ Jesu a riẹ kpahe eware itieye na ziezi.

17. (a) Eme ma rẹ sae rọ kẹ etadhesẹ? (b) Ẹvẹ ma sae rọ rẹriẹ etadhesẹ nọ a jọ ebe mai fodẹ kiehọ emọ-uwuhrẹ mai?

¹⁷ Evaọ odibọgba mai, ma wo uvẹ buobu nọ ma rẹ rọ rehọ emamọ etadhesẹ elọlọhọ ruiruo. Muẹro h’otọ. (Iruẹru 17:22, 23) Ẹsejọhọ whọ rẹ sae rehọ emọ ohwo nọ ọ be gaviezọ k’owhẹ na, uwou riẹ, iruo, hayo arozaha riẹ ru ọtadhesẹ. Hayo, fiki eriariẹ nọ ma wo no kpahe ọmọ-uwuhrẹ Ebaibol na, ma rẹ sai fielo họ ọtadhesẹ nọ o rọ obe nọ ma bi wuhrẹ na. Wọhọ oriruo, roro kpahe ọtadhesẹ nọ ọ rọ edhe-ẹme avọ 14 ọrọ uzoẹme avọ 8 evaọ obe Eriariẹ Nọ I Re Su Kpohọ Uzuazọ Ebẹdẹ Bẹdẹ na. O ta kpahe ọyewọ oyoyou nọ ọrivẹ o bi gu erue fihọ uzou. Ma rẹ sai roro kpahe oghẹrẹ nọ ma rẹ sae rẹriẹ ọtadhesẹ ọyena re u kiekpahe uyero ọmọ-uwuhrẹ Ebaibol na nọ ọ rọ ọyewọ.

Ese Ikereakere avọ Ona

18. Ẹvẹ ma rẹ rọ daoma jọ isisase eliọliọ?

¹⁸ Pọl ọ tuduhọ Timoti awọ nọ: “He kuomagbe ogbotu na se ikereakere ẹri na, hẹ ta usiuwoma, he wuhrẹ ahwo.” (1 Timoti 4:13) Nọ Ebaibol na o rọ ehri uwuhrẹ mai na, o rọ oware erere re ma sai sei liọliọ. Ahwo Livai a wo uvẹ-ọghọ ese Uzi Mosis kẹ ahwo Ọghẹnẹ. Kọ a je se eme na guakugbe evaọ isase itieye na hayo a je se ai kpimẹ kpimẹ? Ijo, Ebaibol na e ta eva Nehemaya 8:8 nọ: “Koyehọ a te se obe na, ro no obe Izi Ọghẹnẹ ze vevẹ; a te dhesẹ iẹ ziezi.”

19. Ẹvẹ ma sai ro ru ẹnyaharo evaọ isase Ikereakere na?

¹⁹ Ezae Ileleikristi jọ nọ e rẹ riẹme ta ziezi a riẹ ese tere he. Ẹvẹ a sai ro ru ẹnyaharo? Ẹkwoma ewuhrẹ. Ẹhẹ, ẹkwoma eme nọ a re se do via ẹsikpobi bẹsenọ a rẹ riẹ ese ziezi. Whọ tẹ jọ ẹvẹrẹ ra wo ekasẹte nọ a se Ebaibol fihọ, o rẹ jọ oware areghẹ re whọ gaviezọ kẹ eme nọ osisase na o fiẹgba họ gbe edo uvo riẹ, who ve je muẹrohọ epanọ o bi se edẹ na gbe eme nọ whọ riẹ vẹre he. Ahwo nọ a wo New World Translation na evaọ ẹvẹrẹ rai a rẹ sae rehọ obufihọ ese edẹ nọ e rọ eva riẹ na. Ẹkwoma ewuhrẹ, whọ rẹ sai tube se odẹ wọhọ Maha-shalal-hash-baz vrẹrẹrẹ.—Aizaya 8:1.

20. Ẹvẹ ma sai ro ‘muẹrohọ uwuhrẹ mai’?

²⁰ Wọhọ ahwo Jihova, ẹvẹ uvẹ riẹ o rro te re a rehọ omai ruiruo wọhọ iwuhrẹ! Fikiere, jọ omomọvo mai o se owha-iruo na gboja. Joma ‘muẹrohọ oma mai gbe uwuhrẹ mai.’ (1 Timoti 4:16) Ma rẹ sae jọ emamọ iwuhrẹ ẹkwoma ezọgaviẹ, ẹkwoma eware nọ ma re ru lọlọhọ, jẹ nọ enọ orimuo, ẹkwoma etadhesẹ nọ i w’iruo, gbe ẹkwoma ese ikereakere avọ ona. Jomai kpobi ma wo erere no ewuhrẹ nọ Jihova ọ be k’omai ẹkwoma ukoko riẹ ze, keme onana o rẹ sai fiobọhọ k’omai wo “ẹrọwo-unu otu nọ a wuhrẹ.” (Aizaya 50:4) Ẹkwoma efihiruo ekwakwa nọ a k’omai kpobi kẹ odibọgba mai na, kugbe ibroshọ, ekasẹte itepu, gbe ekasẹte ividio, ma rẹ sae riẹ epanọ ma rẹ rehọ orimuo gbe ẹtẹzẹ wuhrẹ amọfa.

Kọ Whọ Kareghẹhọ?

◻ Ẹvẹ emamọ ezọgaviẹ u re ro fiobọhọ k’omai evaọ uwuhrẹ mai?

◻ Ẹvẹ ma sae rọ raro kele Pọl gbe Jesu evaọ ewuhrẹ amọfa lọlọhọ?

◻ Didi enọ ma rẹ sae nọ okenọ ma te bi wuhrẹ amọfa?

◻ Didi etadhesẹ e rẹ mai w’iruo?

◻ Ẹvẹ ma sai ro ru ẹnyaharo evaọ ona mai wọhọ isisase ẹgbede?

[Picture on page 14]

Emamọ owuhrẹ ọ rẹ kezọ re o wo orimuo

[Pictures on page 16]

Jesu ọ rehọ eware ekẹdẹ kẹdẹ ru etadhesẹ riẹ