Fi Obọ Họ Kẹ Amọfa Jẹ Ovuẹ Uvie Na Rehọ

‘Agripa ọ tẹ ta kẹ Pọl nọ, “U bi ti lehie re who te ru omẹ họ ohwo Kristi hi.” ’ —Iruẹru 26:28.

 1, 2. Eme ọ wọ Pọl ukọ na ziọ aro Fẹstọs Ọba na gbe ovie na Herọd Agripa II?

EVA Sisaria, 58 C.E., ovie na Herọd Agripa II avọ oniọvo-ọmọtẹ riẹ Benaisi a kpahe ọba Rom na Pokiu Fẹstọs. Fikinọ Fẹstọs Ọba na o zizie i rai a tẹ nyaze, “avọ ajiri diodi ruaro, a tẹ ruọ oria nọ a je yo ẹdhoguo, avọ ilou elọkọ gbe ahwo oride ẹwho na.” Wọhọ epanọ Fẹstọs ọ ta nnọ a ru, a tẹ rehọ Pọl ukọ Oleleikristi na ziọ aro rai. Eme ọ soriẹ nọ a rọ rehọ olele Jesu Kristi nana ziọ aro agbara ẹdhoguo Fẹstọs Ọba na?—Iruẹru 25:13-23.

² Ẹme nọ Fẹstọs ọ ta kẹ erara riẹ o kẹ uyo onọ yena. Ọ ta nọ: “Agripa ovie, avọ ahwo kpobi nọ ma gbẹrọ etenẹ, wha ruẹ ohwo ọnana, nọ ahwo Ju buobu a ti guẹdhọ [riẹ] kẹ omẹ, nọ a jobọ Jerusalem gbe obonẹ gu, je bo nọ ufo re ọ gbẹ jọ akpọ na ofa ha. Rekọ mẹ ruerẹ nọ o ru oware nọ ohwo o re ro whu uwhu ojihẹ hẹ; rekọ fiki epanọ ọ ye ọvo o tuẹdhọ kpobọ ovie-oride no na, me te roro no nọ me re ti viei nya. Whaọ mẹ gbẹjẹ jọ ẹme riẹ ruẹ epanọ me re kere se Olori mẹ hẹ. Fikiere mẹ jẹ rehọ iẹe ze aro rai na, tobọ whọ raro Agripa ovie, re nọ wha guọlọ otọ riẹ no, sọ, mẹ sae ruẹ omojọ nọ me re kere. Keme o rọ omẹ obọ rọ oware ugheghẹ, no me re ro vi ohwo uwou-odi, yọ mẹ ruẹ uzi ovo nọ a ro gu ei dhesẹ hẹ.”—Iruẹru 25:24-27.

 3. Fikieme isu egagọ a rọ wọ eku họ Pọl uzou?

³ Eme ọ Fẹstọs na i dhesẹ nnọ a gba eku họ Pọl uzou inọ ọ be kpare so egọmeti—uziothọ nọ a re ro bruoziẹ uwhu kpe ohwo. (Iruẹru 25:11) Dede na, obọ Pọl u te he. Ihri-eriọ erọ isu egagọ nọ e jọ Jerusalẹm oye o wha eku yena ze. A mukpahe iruo Pọl wọhọ owhowho Uvie jẹ be dheva gaga inọ o bi fi obọ họ ku ahwo rẹriẹ ruọ ilele Jesu Kristi. Iroiro nọ e wha ekwakwa ẹmo vọ oma a te su Pọl no Jerusalẹm kpohọ okpẹwho unueri ọ Sisaria, oria nọ ọ jọ kpare ẹdhọ riẹ bru Siza. A te rehọ iẹe no etẹe kpohọ Rom.

 4. Ẹme igbunu vẹ Agripa Ovie na ọ ta?

⁴ Dae rehọ iẹe nọ whọ be ruẹ Pọl nọ ọ rrọ uwou-uvie ọba na evaọ aro ogbotu nọ o kugbe osu ọ abọ ologbo jọ ọrọ Uvie-Ulogbo Rom. Agripa Ovie na ọ rẹriẹ ovao rri Pọl, ọ tẹ ta nọ: “Who wo uvẹ nọ who re ro gu ẹkẹ unu ra.” Nọ Pọl o mu ẹme riẹ họ, okpoware jọ o tẹ via. Ẹme nọ Pọl ọ ta i te je duobọte ovie na. Eva uzẹme, Agripa Ovie na ọ ta nọ: ‘U bi ti lehie re who te ru omẹ họ ohwo Kristi hi.’—Iruẹru 26:1-28.

 5. Fikieme ẹme nọ Pọl ọ ta kẹ Agripa o ro wo ẹgba te ere?

⁵ Dai roro iei! Fiki ona nọ Pọl o ro gu ẹkẹ unu riẹ, ẹgba nọ Ẹme Ọghẹnẹ ọ rẹ rọ nya ro ohwo oma o duobọte osu na. (Ahwo Hibru 4:12) Eme ọ jọ ẹme Pọl na wo ẹgba te ere? Kọ eme ma re wuhrẹ mi Pọl nọ o rẹ sai fi obọ họ kẹ omai evaọ iruo mai erọ ilele-iruo na? Ma tẹ kiẹ eme nọ o ro gu ẹkẹ unu riẹ na riwi ziezi, ugogo eware ivẹ jọ e viodẹ: (1) Pọl ọ ta ẹme riẹ avọ ẹtẹzẹ. (2) Ọ rehọ eriariẹ Ẹme Ọghẹnẹ nọ o wo ro ruiruo avọ ona, nwane wọhọ epanọ ọwena ọ rẹ rehọ okwakwa iruo ro ruiruo ziezi na.

Rehọ Ona Ẹtẹzẹ ro Ruiruo

 6, 7. (a) Wọhọ epanọ a rehọ e riẹ ruiruo evaọ Ebaibol na, eme “ẹtẹzẹ” o dhesẹ? (b) Abọ vẹ ẹtẹzẹ o wo evaọ obọ nọ ma re fihọ kẹ amọfa jẹ uwuhrẹ Ebaibol rehọ?

⁶ Evaọ obe Iruẹru na, a rehọ eme Griki nọ i wo otofa ẹtẹzẹ ro dhesẹ ẹmeọta Pọl unuẹse buobu. Eme onana u dhesẹ, nọ ma te roro kpahe iruo mai erọ ilele-iruo na?

⁷ Evaọ ẹvẹrẹ ọsosuọ Ikereakere Griki Ileleikristi na, “ẹtẹzẹ” o dhesẹ epanọ a rẹ “dẹ rehọ” hayo “rehọ ẹgba iroro-ejẹ hayo ẹkwoma eroro ru ohwo nọ o je nwene iroro riẹ,” ere Vine’s Expository Dictionary of New Testament Words o ta. Ọkiẹriwo ugogo otofa riẹ u re fi elo họ ẹme na. O wha iroro ọ evaifihọ. Fikiere nọ whọ tẹ tẹzẹ ohwo rọwo uwuhrẹ Ebaibol jọ, koyehọ whọ dẹ evaifihọ ohwo yena t’obọ no, onọ o rẹ lẹliẹe fi ẹrọwọ họ ẹgbagba ọrọ uwuhrẹ yena. U re vevẹ, re a vuẹ ohwo ẹme nọ Ebaibol na e ta ọvo, o rẹ nwane lẹliẹ ohwo rọwo ẹme na je ru lele iei hi. O gwọlọ nọ u re mu ohwo nọ ọ be gaviezọ kẹ owhẹ na ẹro inọ ẹme nọ whọ be ta na uzẹme, ohwo na ọ tẹ make rrọ ọmaha, ọrivẹ, ibe oruiruo, ibe ọmọ-isukulu, hayo omoni ra.—2 Timoti 3:14, 15.

 8. Eme o gwọlọ re a ru uzẹme Ikereakere jọ mu ohwo ẹro?

⁸ Ẹvẹ whọ sai ro ru ohwo rọwo inọ ẹme nọ whọ be ta no Ẹme Ọghẹnẹ ze na họ uzẹme na? Ẹkwoma iroro-ejẹ avọ ona, iroro egbagba, gbe ẹtẹzẹ, Pọl ọ daoma nwene iroro ahwo nọ ọ jẹ t’ẹme kẹ.a Fikiere, viukpenọ whọ rẹ ta ọvo nnọ oware jọ uzẹme, u fo nọ whọ rehọ obọdẹ imuẹro jọ rọ tha ẹme ra na uke. Ẹvẹ a sai ro ru onana? Jọ u mu owhẹ ẹro nọ ẹme ra o no Ẹme Ọghẹnẹ ze dẹe, orọnikọ iroro obọra ha. Ofariẹ, rehọ imuẹro efa tha ẹme Ikereakere nọ whọ be ta na uke. (Itẹ 16:23) Wọhọ oriruo, nọ whọ tẹ ta nọ ahwo-akpọ ẹmeoyo a te reawere uzuazọ evaọ otọakpọ aparadase, rehọ Ikereakere wọhọ Luk 23:43 hayo Aizaya 65:21-25 rọ tha ẹme ọyena uke. Ẹvẹ whọ sae rọ rehọ imuẹro efa tha ẹme nọ who se no Ikereakere na ze uke? Whọ sae rehọ eware nọ ohwo nọ ọ be gaviezọ kẹ owhẹ na ọ rọ ẹro ruẹ no kẹ oriruo. Whọ sae rehọ awere nọ ma bi wo no erru ọ ọre nọ o bi kie diwi, emamọ ore idodo, emamọ awere ubi-ure, hayo evawere nọ ma re wo nọ ma te bi rri oni ọvra nọ ọ be ko ọmọ riẹ rọ kẹe oriruo. Fi obọ họ kẹe vuhumu inọ evawere itieye na yọ imuẹro nnọ Ọnọma na ọ gwọlọ nọ ma reawere uzuazọ eva otọakpọ.—Ọtausiwoma Na 3:11, 12.

 9. Ẹvẹ ma sai ro dhesẹ iroro evaọ iruo usiuwoma ota mai?

⁹ Whọ tẹ be daoma tẹzẹ ohwo re ọ jẹ uwuhrẹ Ebaibol jọ rehọ, ruẹ nnọ ọwhọ ra o ru owhẹ wọhọ ẹsenọ who bi si ikẹ hẹ, keme o rẹ sai ru ohwo nọ whọ be ta ẹme kẹ na wuhu iroro riẹ di. Obe Isukulu Odibọgba na o kẹ unuovẹvẹ onana: “Ẹme uzẹme nọ a rẹ nwani zuehọ ro dhesẹ ẹthọthọ ọrọ orọwọ oghaghae omọfa, o tẹ make rọ nọ a rehọ eria Ikereakere sa-sa ro dhesẹ ẹthọthọ orọwọ na, o rẹ jọ bẹbẹ re ohwo na ọ jẹ ẹme na rehọ. Wọhọ oriruo, re a ta ọvo nọ ehaa jọ nọ e viodẹ i kiehọ họ fikinọ i no oma egedhọ ze, onana o sai ti nwene epanọ amọfa a rri ehaa na ha. Edhere iroro-ejẹ nọ a rẹ rọ t’ẹme oye o rẹ mae wha obokparọ ze.” Eme u je fo nọ ma daoma gaga re ma dhesẹ iroro evaọ ẹmeọta? Obe-uwuhrẹ na o ta nọ: “Edhere iroro-ejẹ nọ a rẹ rọ t’ẹme o rẹ lẹliẹ ẹmeọta-kugbe lọhọ, o rẹ kẹ ahwo oware nọ a re roro kpahe oke ofa, jẹ gbẹ edhere rọkẹ ẹmeọta-kugbe obaro. O rẹ sae tẹzẹ ohwo gaga.”—Ahwo Kọlọsi 4:6.

Ẹtẹzẹ nọ Ọ rẹ Nyate Ohwo Udu

10. Oghẹrẹ vẹ Pọl o ro mu ẹkẹ unu riẹ họ egu evaọ aro Agripa?

¹⁰ Joma nabe tẹrovi eme nọ Pọl o ro gu ẹkẹ unu riẹ evaọ Iruẹru uzou avọ 26 na. Muẹrohọ epanọ o ro mu ẹmeọta riẹ họ. Ro mu ẹme riẹ họ, Pọl ọ ruẹ emamọ oware nọ o ro jiri Agripa, dede nọ ovie na ọ jọ usu otọtọ kugbe Benaisi oniọvo-ọmọtẹ riẹ. Pọl ọ ta nọ: “Eva ewere omẹ gaga, Agripa ovie epanọ me bi ti ro gu ẹkẹunu mẹ kẹ owhẹ nẹnẹ na kpahọ eware nọ ahwo Ju a ro gu omẹ na, onọ omaero kọ fiki epanọ whọ [riẹ] uruemu gbe enanọ ahwo Ju; fikiere mẹ lẹ owhẹ re whọ rehọ oma totọ labi yo ẹme mẹ.”—Iruẹru 26:2, 3.

11. Ẹvẹ eme nọ Pọl ọ ta kẹ Agripa i ro dhesẹ adhẹwẹ, kọ didi erere o no rie ze?

¹¹ Kọ who muẹrohọ nọ Pọl o vuhu ọkwa okpehru Agripa mu, nọ o ro sei nọ Ovie? Onana u dhesẹ adhẹwẹ, yọ ẹkwoma eme riẹ nọ ọ riẹ salọ, Pọl o bru ọghọ họ Agripa oma. (1 Pita 2:17) Ukọ na o vuhumu inọ Agripa ọ riẹ kpahe iruemu ẹwho gbe izi ekpakpakre erọ ahwo Ju nọ e rrọ otọ esuo riẹ jẹ ta inọ eva e were riẹ nọ o bi ti ro gu ẹkẹ unu riẹ eva aro osu otiọye nọ o wo eriariẹ na. Pọl, ọnọ ọ rrọ Oleleikristi, o ru oma riẹ wọhọ ẹsenọ o kpehru vi Agripa ha, ọnọ ọ rrọ Oleleikristi hi. (Ahwo Filipai 2:3) Ukpoye, Pọl ọ lẹ ovie na re ọ rehọ oma totọ nabi yo ẹme riẹ. Pọl ọ tẹ rehọ ere ruẹrẹ otọ họ ziezi nọ Agripa, kugbe amọfa nọ a jẹ gaviezọ a te sae rọ jẹ ẹme nọ ọ be te ta rehọ. O je fi otọhotọ họ, oware nọ aikpobi a jọ rọwo kugbe re ọ ruẹse rọ ere mu ẹme riẹ họ.

12. Evaọ iruo usiuwoma ota Uvie na, ẹvẹ ma sae rọ nyate udu enọ ma be ta ẹme kẹ?

¹² Wọhọ epanọ Pọl o ru eva okenọ ọ jọ aro Agripa, no emuhọ rite ekuhọ ẹmeọta mai kpahe ovuẹ Uvie na, jọ ma nyate udu enọ e be gaviezọ k’omai. Ma rẹ sai ru onana ẹkwoma uvi adhẹwẹ nọ ma rẹ rọ kẹ ohwo nọ ma be ta usiuwoma kẹ gbe ẹkwoma uvi isiuru nọ ma re wo kpahe uyero-akpọ gbe iroro riẹ.—1 Ahwo Kọrint 9:20-23.

Rehọ Ẹme Ọghẹnẹ Ruiruo avọ Ona

13. Wọhọ Pọl, ẹvẹ whọ sae rọ kpare ọwhọ enọ e be gaviezọ kẹ owhẹ?

¹³ O jọ ẹgwọlọ Pọl re ọ kpare ọwhọ enọ e jẹ gaviezọ kẹe re a j’owọ kpahe emamọ usi na. (1 Ahwo Tẹsalonika 1:5-7) Fikiere, ọ jẹ nyate udu rai, oria nọ o rẹ kpare ọwhọ ohwo. Re ma zihe kpohọ eme nọ Pọl o ro gu ẹkẹ unu riẹ eva aro Agripa na, muẹrohọ epanọ Pọl ọ rọ ‘yọrọ ẹme Ọghẹnẹ gbagba’ ẹkwoma ẹta kpahe eware nọ Mosis gbe eruẹaro na e ta.—2 Timoti 2:15.

14. Dhesẹ oghẹrẹ nọ Pọl ọ rọ rehọ ẹtẹzẹ ruiruo eva okenọ ọ jọ aro Agripa.

¹⁴ Pọl ọ riẹ nnọ odẹ ọvo Agripa ọ rọ rrọ ohwo Ju. Re ọ ruẹsi ru udu Agripa lọhọ fiki eriariẹ egagọ ahwo Ju nọ o wo, Pọl ọ tẹ ta nnọ usiuwoma ota riẹ u kie kpahe “oware ofa ha rekọ ajokpa onọ eruẹaro avọ Mosis a ta nọ e rẹ te via” kpahe uwhu gbe ekparomatha Mesaya na. (Iruẹru 26:22, 23) Nọ ọ rẹriẹ ovao ku Agripa, Pọl ọ tẹ nọe nọ: “Agripa ovie, whọ rọwo eruẹaro na?” Agripa ọ gbẹ riẹ onọ ọ rẹ ta ha. Ọ tẹ ta nọ ọ rọwo eruẹaro na ha, kiyọ odẹ riẹ wọhọ ohwo egagọ Ju o te raha no. Rekọ ọ tẹ rọwo kugbe ẹme Pọl na, kiyọ ọ jọ iraro ahwo na kpobi ruọ abọ ukọ na no, yọ o rrọ ọza kẹe inọ a ti sei Oleleikristi. Avọ areghẹ, Pọl ọvo ọ tẹ za onọ na, inọ: ‘Mẹ riẹ nọ whọ rọwo.’ Eme udu Agripa o wọ riẹ kpahe? Ọ ta nọ: ‘U bi ti lehie re who te ru omẹ họ ohwo Kristi hi.’ (Iruẹru 26:27, 28) Dede nọ Agripa o zihe ruọ Oleleikristi hi, u muẹro inọ ovuẹ Pọl na u duobọ tei udu.—Ahwo Hibru 4:12.

15. Ẹvẹ Pọl ọ sae rọ to ukoko họ evaọ obọ Tẹsalonika?

¹⁵ Kọ who muẹrohọ nọ Pọl o ku ẹtẹzẹ kugbe ewhowho emamọ usi na? Fikinọ Pọl ọ rehọ ona utioye na ruiruo eva ‘ẹyọrọ ẹme Ọghẹnẹ gbagba,’ ahwo jọ nọ a yo ẹme riẹ a gbẹ jọ egaviezọ ọvo ho rekọ a zihe ruọ enọ e rọwo. Enẹ o via evaọ obọ Tẹsalonika, oria nọ Pọl ọ jọ duku ahwo Ju gbe ahwo orẹwho Egedhọ nọ e be dhozọ Ọghẹnẹ eva uwou-egagọ na. Ikuigbe nọ e rrọ Iruẹru 17:2-4 na e ta nọ: “Wọhọ epanọ uruemu Pọl ojọ, ọ tẹ ruọ eva bru ai, edijala esa gbagba a vọ ae a rọ rehọ ikerakere na jẹ vro-avro. Yọ o dhesẹ jẹ hẹ fa otọ rai vevẹ kẹ ae nọ, ufo kẹ Kristi na re ọ ruẹ uye, re ọ jẹ kparoma no iwhuowhu . . . Ẹme na ọ tẹ ruọ otu rai jọ.” Pọl ọ rehọ ẹtẹzẹ ruiruo. O lele i rai jẹ iroro, ru eme riẹ vẹ, jẹ rehọ ẹkwoma Ikereakere na dhesẹ nnọ Jesu họ Mesaya nọ a yeyaa riẹ anwẹdẹ na. Eme o no rie ze? A tẹ rehọ ukoko Ileleikristi mu.

16. Ẹvẹ whọ sai ro wo oghọghọ viere evaọ usiuwoma ota Uvie na?

¹⁶ Kọ whọ sai ru ona ẹtẹzẹ ra woma viere evaọ eruvẹ Ẹme Ọghẹnẹ? Otẹrọ ere, kiyọ whọ te ruẹ oghọghọ gbe evevọwẹ viere evaọ iruo usiuwoma ota ra gbe ewuhrẹ ahwo kpahe Uvie Ọghẹnẹ. Iwhowho-uvie emamọ usi na nọ a fi iroro-ejẹ nọ a rẹ rọ rehọ Ebaibol na ruiruo viere eva usiuwoma ota na h’iruo a ruẹ onana vuhumu no.

17. Rehọ oware nọ o via kẹ owhẹ no ro dhesẹ epanọ o rẹ rọ kẹ erere re ma rehọ Ebaibol na ruiruo evaọ odibọgba mai, hayo ta kpahe onọ o rrọ edhe-ẹme nana.

¹⁷ Wọhọ oriruo, ọsẹro ọnyawariẹ Isẹri Jihova jọ o kere nọ: “Enẹna inievo buobu a bi kru Ebaibol họ obọ eva okenọ a bi se isẹri no uwou ruọ uwou. Onana u fi obọ họ kẹ iwhowho-uvie na nọ a be sai ro se eria ikereakere jọ kẹ ibuobu ahwo nọ a nyaku. Eva odibọgba mai, onana u fi obọ họ kẹ enọ i wo uwou gbe iwhowho-uvie si iroro kpohọ Ebaibol na no orọnikọ ebe gbe emagazini ọvo ho.” Evaọ uzẹme, sọ ma re kru Ebaibol mai h’obọ evaọ usiuwoma ota hayo ma re ru ere he o roma hwa eware buobu, ojọ rai họ uruemu ẹwho na. Oghẹrẹ nọ o rrọ kpobi, o rẹ jọ uruemu mai re ma hae rehọ Ẹme Ọghẹnẹ tẹzẹ amọfa re a jẹ ovuẹ Uvie na rehọ.

Wo Eriwo Ọghẹnẹ Kpahe Odibọgba Na

18, 19. (a) Ẹvẹ Ọghẹnẹ o rri odibọgba mai, kọ fikieme ma je wo eriwo riẹ? (b) Eme o ti fi obọ họ k’omai kparobọ eva eruo izihebro? (Rri etehe nọ uzoẹme riẹ o tanọ “Epanọ A Sae rọ Kparobọ Evaọ Eruo Izihebro,” eva ẹwẹ obe avọ 12 na.)

¹⁸ Edhere ọfa nọ ma rẹ rọ nyate udu enọ e be gaviezọ k’omai u w’obọ kpahe eriwo Ọghẹnẹ nọ ma re wo kpahe odibọgba na je wo akothiho. Oreva Ọghẹnẹ họ re oghẹrẹ ahwo kpobi “a ze te riẹ uzẹme na.” (1 Timoti 2:3, 4) Kọ o gbẹ rrọ nọ ere ma gwọlọ? Jihova o wo odiri re, yọ odiri riẹ ọ k’uvẹ kẹ ahwo buobu re a te ekurẹriẹ. (2 Pita 3:9) Fikiere, nọ ma tẹ nyaku ohwo jọ nọ ọ gwọlọ yo ovuẹ Uvie na, o rẹ sai fo re ma dhe eziezihe re ma ruẹse bọ isiuru yena. O rẹ rehọ oke gbe odiri re ibi uzẹme e tẹ rro. (1 Ahwo Kọrint 3:6) Etehe nọ o lele i rie na, onọ uzoẹme riẹ o rrọ “Epanọ A Sae rọ Kparobọ Evaọ Eruo Izihebro” o kẹ iroro-ejẹ nọ a rẹ rọ bọ isiuru itieye na. Kareghẹhọ nọ uzuazọ ahwo—ebẹbẹ gbe iyero rai—i bi dhe enwenwene. O sae rehọ omodawọ ikẹse kẹse re a sai di ai họ uwou rekọ irere nọ i re noi ze i te omodawọ na. Ma gwọlọ kẹ ai uvẹ nọ a re ro yo ovuẹ usiwo Ọghẹnẹ. Fikiere, lẹ se Jihova Ọghẹnẹ re ọ kẹ owhẹ ereghẹ nọ whọ sae rọ bọ ona ẹtẹzẹ ra evaọ iruo nọ who bi ro fi obọ họ kẹ amọfa jẹ ovuẹ Uvie na rehọ na.

¹⁹ Nọ ma te duku ohwo nọ ọ gwọlọ gbe yo ovuẹ Uvie na no, eme ọfa ma rẹ sai ru wọhọ iruiruo Ileleikristi? Uzoẹme mai nọ o rrọ aro na u ti fi obọ họ k’omai riẹ.

[Oruvẹ-obotọ]

Kọ Whọ Kareghẹhọ?

• Eme o ru nọ ẹme Pọl eva aro Agripa Ovie na o ro wo ẹgba?

• Ẹvẹ ovuẹ mai o sai ro te ahwo udu?

• Eme o ti fi obọ họ kẹ omai rehọ Ẹme Ọghẹnẹ nyate ahwo udu ziezi?

• Ẹvẹ ma sai ro wo eriwo Ọghẹnẹ kpahe odibọgba na?

[Ẹkpẹti/Iwoho nọ e rrọ ẹwẹ-obe avọ 12]

Epanọ A Sae rọ Kparobọ Evaọ Eruo Izihebro

• Wo uvi isiuru kpahe ahwo.

• Salọ uzoẹme isiuru no Ebaibol na ze nọ whọ rẹ ta ẹme kpahe.

• Jọ iweze kpobi fi otọhotọ họ nọ whọ rẹ rọ wariẹ zihe.

• Gbẹ hai roro kpahe ohwo na nọ who te no etẹe no.

• Kaki zihe, o sae jọ okiokiọ riẹ hayo nọ edẹ ivẹ e tẹ ruọ emu no re whọ ruẹse bọ isiuru na h’aro.

• Woi họ iroro inọ ẹjiroro ra họ re who mu uwuhrẹ Ebaibol họ.

• Lẹ inọ Jihova o ru isiuru na rro.

[Uwoho nọ o rrọ ẹwẹ-obe avọ 11]

Pọl ọ rehọ ẹtẹzẹ ruiruo eva okenọ ọ jọ aro Fẹstọs Ọba na gbe Agripa Ovie na