Iruo Ẹzi Ọfuafo Na Evaọ Erugba Ẹjiroro Jihova

“Ẹme nọ o no unu mẹ ze . . . o re ru epanọ mẹ ta gba je ru oware nọ mẹ rehọ fiki riẹ vi ei na gba.”—AIZ. 55:11.

 1. Dhesẹ ohẹriẹ nọ o rrọ udevie omaa gbe ẹjiroro.

DAE rehọ iẹe inọ ezae ivẹ a be jọ ọvuọ uwou riẹ ruẹrẹ oma kpahe re a rọ ọvuọ omoto riẹ kperẹ. Ọjọ ọ tẹ romatotọ jiroro edhere nọ ọ te dhẹ. Ọdekọ ọ riẹ oria nọ o bi kpohọ dẹẹ, yọ ọ riẹ idhere sa-sa nọ ọ rẹ sae dhẹ. Ọ ruẹrẹ oma kpahe inọ o re nwene edhere nọ ọ gwọlọ dhẹ na otẹrọnọ oware jọ o via. Evaọ oghẹrẹ jọ, iroro ivẹ nọ ezae nana a jẹ na i dhesẹ ohẹriẹ nọ o rrọ udevie omaa avọ ẹjiroro. Omaa avọ ẹjiroro e dina wo ohẹriẹ: A sae rọ omaa dhesẹ iroro nọ ohwo ọ be jẹ re o ru oware jọ, rekọ ẹjiroro u dhesẹ idhere sa-sa nọ ohwo ọ sai ro ru oware.

2, 3. (a) Eme ẹjiroro Jihova ọ kẹre te, kọ eme o ru okenọ Adamu avọ Ivi a raha uzi? (b) Fikieme ma re ro yeri uzuazọ nọ o rọwo kugbe ẹjiroro Jihova?

² Jihova o wo idhere sa-sa nọ o re ro ru ẹjiroro riẹ gba, orọnikọ edhere ọvo jọ họ. (Ẹf. 3:11) Ẹjiroro nana o kẹre te oware nọ o wo họ iroro evaọ oke ọsosuọ kẹ ahwo-akpọ gbe otọakpọ na—inọ otọakpọ na u ti zihe ruọ aparadase, oria nọ ahwo-akpọ egbagba a rẹ sae rria evaọ udhedhẹ gbe evawere bẹdẹ bẹdẹ. (Emu. 1:28) Okenọ Adamu avọ Ivi a raha uzi no, Jihova o ru ọruẹrẹfihotọ re ẹjiroro riẹ na o rugba. (Se Emuhọ 3:15.) Jihova ọ jiroro inọ aye ẹwoho riẹ o ti yẹ ‘ubi’ jọ, hayo Ọmọ, ọnọ o ti kpe Setan, o ve je si eyoma nọ Setan ọ wha ze kpobi no.—Hib. 2:14; 1 Jọn 3:8.

³ Ogaga ovuovo o rrọ odhiwu hayo otọakpọ họ nọ o rẹ sae whaha erugba ẹjiroro Ọghẹnẹ. (Aiz. 46:9-11) Fikieme ma sae rọ ta ere? Keme ẹzi ọfuafo Jihova ọ jariẹ wo obọ. Ẹzi ọfuafo na, onọ uvumọ ohwo ọ rẹ sae zadhe he na, ọ rẹ ruẹ inọ ẹjiroro Ọghẹnẹ o ‘rugba.’ (Aiz. 55:10, 11) U fo re ma yeri uzuazọ nọ o rọwo kugbe erugba ẹjiroro Ọghẹnẹ. Uzuazọ ebẹdẹ bẹdẹ mai o rehọ oma hwa erugba ẹjiroro na. Ofariẹ, o rẹ bọ ẹrọwọ ga re ma ruẹ epanọ Jihova ọ be rọ rehọ ẹzi ọfuafo na ru iruo. Fikiere, joma ta kpahe epanọ ẹzi ọfuafo na o ro ru ẹjiroro Jihova gba evaọ oke nọ u kpemu, epanọ o bi ro ru ere nẹnẹ, gbe epanọ o ti ro ru ere evaọ obaro.

Iruo Ẹzi Ọfuafo na Evaọ Oke nọ U Kpemu

 4. Ẹvẹ Jihova o ro dhesẹ ẹjiroro riẹ via ẹmẹrera?

⁴ Evaọ etoke emọ Izrẹl, Jihova o dhesẹ ẹjiroro riẹ via ẹmẹrera. Ohwo nọ Ubi nọ a ya eyaa riẹ na o te jọ o kake jọ oware “odidi.” (1 Kọr. 2:7) Ikpe idu ivẹ (2,000) e vrẹ taure Jihova ọ tẹ te wariẹ ta ẹme fodẹ ubi na. (Se Emuhọ 12:7; 22:15-18.) Jihova ọ ya eyaa nọ u ti wo orugba ologbo kẹ Abraham. Ẹme na ‘evaọ ubi ra’ u dhesẹ inọ Ubi na o te jọ ohwo-akpọ, u ti no uyẹ Abraham ze. O rẹ sai mu omai ẹro inọ Setan ọ rọ ezọ kpẹ nọ Jihova o je dhesẹ eware nana via. Oware nọ ọwegrẹ yena ọ gwọlọ kpobi họ epanọ ọ rẹ rọ raha hayo gbe uyẹ Abraham ku, ọ vẹ rọ ere raha ẹjiroro Ọghẹnẹ. Rekọ oyena o rẹ sae via ha keme ẹzi Ọghẹnẹ nọ a rẹ ruẹ hẹ o bi ru iruo. Evaọ idhere vẹ?

5, 6. Ẹvẹ Jihova ọ rọ rehọ ẹzi riẹ thọ ahwo nọ a rrọ uyẹ nọ Ubi na u ti no ze?

⁵ Jihova ọ rọ ẹzi riẹ thọ ahwo nọ a rrọ uyẹ nọ Ubi na u ti no ze. Jihova ọ ta kẹ Abraham nọ: “Mẹ họ ojese ra.” (Emu. 15:1) Orọnọ Jihova o mu ta ha. Wọhọ oriruo, roro kpahe oware nọ o via evaọ oware wọhọ ukpe 1919 B.C.E. okenọ Abraham avọ Sera a jẹ rria Gera evaọ omoke jọ. Fikinọ Abimẹlẹk, ovie Gera ọ riẹ hẹ inọ Sera yọ aye Abraham, ọ tẹ gwọlọ inọ ọ rẹ rehọ Sera re ọ jọ aye riẹ. Kọ Setan ọ jẹ wha onana ze, be gwọlọ re Sera ọ siọ emọ ba eyẹ kẹ Abraham? Ebaibol e ta ha. Oware nọ Ebaibol e ta họ Jihova o dhomahọ ẹme na. Ọ jọ ewezẹ vẹvẹ Abimẹlẹk unu inọ o dhobọte Sera ha.—Emu. 20:1-18.

⁶ Orọnikọ ẹsiẹvo yena ọvo Jihova ọ thọ rai hi. Jihova ọ thọ Abraham avọ ekru riẹ unuẹse buobu. (Emu. 12:14-20; 14:13-20; 26:26-29) Fiki onana ọso-ilezi na o ro kere kpahe Abraham avọ uyẹ riẹ nọ: “[Jihova] ọ rọwo nọ ohwo ọvo o kpokpo ai hi; ọ whọku ivie fiki rai, anọ, ‘Whọ rehọ obọ te e mẹ nọ a wholo na ha wha nwa eruẹaro mẹ oma ha!’”—Ol. 105:14, 15.

 7. Idhere vẹ Jihova ọ rọ thọ orẹwho Izrẹl?

⁷ Jihova ọ rehọ ẹkwoma ẹzi riẹ thọ orẹwho Izrẹl nọ a te jọ yẹ Ubi nọ a ya eyaa riẹ na. Jihova ọ rehọ ẹkwoma ẹzi riẹ kẹ Izrẹl Uzi riẹ, onọ u fi obọ họ yọrọ egagọ uzẹme jẹ thọ emọ Izrẹl no ogbekuo abọ-ẹzi gbe ọrọ abọ-iwo. (Ọny. 31:18; 2 Kọr. 3:3) Evaọ etoke Ibruoziẹ na, ẹzi Jihova ọ kẹ ezae jọ ẹgba nọ a rọ thọ Izrẹl no obọ ewegrẹ rai. (Ibr. 3:9, 10) Etoke ikpe buobu taure a te ti yẹ Jesu, ọnọ ọ rrọ ugogo ubi Abraham na, ẹzi ọfuafo o fi obọ họ thọ Jerusalẹm, Bẹtlẹhẹm, gbe etẹmpol na, keme enana kpobi i ti wo obọ evaọ erugba eruẹaruẹ nọ i kie kpahe Jesu.

 8. Eme o dhesẹ inọ ẹzi ọfuafo o fi obọ họ evaọ uzuazọ gbe odibọgba Ọmọ Ọghẹnẹ?

⁸ Ẹzi ọfuafo o fi obọ họ gaga evaọ uzuazọ gbe odibọgba Jesu. Ẹzi ọfuafo ọ jọ edhede Meri nọ ọ riẹ ọzae he na ru oware igbunu jọ. U ru nọ Meri nọ ọ gba ha o ro dihọ je yẹ Ọmọ nọ ọ kare uzioraha, ọnọ ọ riosa uwhu hu. (Luk 1:26-31, 34, 35) Uwhremu na ẹzi na o te fi obọ họ nọ a gbe ro kpe Jesu hu evaọ okenọ ọ jọ ọmaha. (Mat. 2:7, 8, 12, 13) Okenọ Jesu ọ kpako te oware wọhọ ikpe 30 no, Ọghẹnẹ ọ tẹ rọ ẹzi ọfuafo wholo iei re ọ jọ ọreuku ọrọ agbara-uvie Devidi, re ọ jẹ ta usiuwoma. (Luk 1:32, 33; 4:16-21) Ẹzi ọfuafo ọ kẹ Jesu ẹgba ru eware igbunu, je siwi ahwo, rọ emu ko ogbotu, jẹ kpare iwhuowhu. Eware igbunu yena yọ ẹmẹvo ọrọ eghale nọ ma rẹ sai rẹro rai evaọ etoke esuo Jesu.

9, 10. (a) Ẹvẹ ẹzi ọfuafo o je ro ru iruo evaọ oma ilele ikpe-udhusoi ọsosuọ Jesu? (b) Eme iruo nọ ẹzi ọfuafo o je ru evaọ ikpe-udhusoi ọsosuọ na u dhesẹ via kpahe ẹjiroro Jihova?

⁹ Muhọ evaọ Pẹntikọst 33 C.E., Jihova ọ rehọ ẹzi riẹ ro wholo abọ avivẹ ọrọ ubi Abraham na, ibuobu rai enọ i no uyẹ Abraham ze he. (Rom 8:15-17; Gal. 3:29) Ẹzi ọfuafo ọ jọ oma ilele ikpe-udhusoi ọsosuọ Jesu ru iruo, o kẹ rai ẹgba rọ ọwhọ ta usiuwoma je ru iruo igbunu. (Iruẹru 1:8; 2:1-4; 1 Kọr. 12:7-11) Ẹzi ọfuafo na ọ rọ ẹkwoma iruo igbunu yena dhesẹ oware jọ via kpahe orugba ẹjiroro Jihova. U dhesẹ inọ Jihova ọ gbẹ be rehọ edhere nọ a jẹ rọ gọe anwẹdẹ evaọ etẹmpol Jerusalẹm ro ru iruo ho. Obọnana ukoko Ileleikristi nọ a ro mu obọ na o bi ro ru iruo. No anwọ oke yena ze, Jihova ọ be rehọ ukoko yena nọ ọ rọ ẹzi wholo na ro ru ẹjiroro riẹ gba.

¹⁰ Evaọ etoke emọ Izrẹl gbe oke Jesu, Jihova ọ rehọ ẹzi ọfuafo na rọ thọ ahwo riẹ, kẹ ai ẹgba, je wholo otujọ, enana kpobi re ẹjiroro riẹ ọ sai rugba. Kọ ẹvẹ kpahe oke mai na? Ẹvẹ Jihova ọ be rọ rehọ ẹzi riẹ rọ wha ẹjiroro riẹ haro? U fo re ma riẹ keme ma gwọlọ ru iruo lele ẹzi na. Joma ta kpahe idhere ene nọ Jihova ọ be rọ rehọ ẹzi riẹ ru iruo nẹnẹ.

Iruo Ẹzi Ọfuafo na Nẹnẹ

11. Eme u dhesẹ nọ ẹzi ọfuafo na o re fi obọ họ kẹ ahwo Ọghẹnẹ jọ fuafo, kọ ẹvẹ whọ sai ro dhesẹ inọ whọ be kẹ ẹzi na uvẹ ru iruo evaọ uzuazọ ra?

¹¹ Orọ ọsosuọ, ẹzi ọfuafo o bi fi obọ họ kẹ ahwo Ọghẹnẹ jọ fuafo. Enọ e be gọ Jihova a rẹ jọ fuafo evaọ uruemu. (Se 1 Ahwo Kọrint 6:9-11.) Taure ejọ i te ti zihe ruọ Ileleikristi, a jọ ibruẹnwae, igberedha, ezae nọ i je duezae. O rrọ bẹbẹ re ohwo o siobọno isiuru nọ e rẹ wọe ru eware iyoma. (Jem. 1:14, 15) Ghele na, a ru ahwo itieye na “fo” no, onọ u dhesẹ inọ a jọ uzuazọ rai ru inwene no re a sai ru Ọghẹnẹ eva were. Eme o rẹ lẹliẹ ọnọ o you Ọghẹnẹ siobọno uruemu uyoma? “Ẹzi Ọghẹnẹ mai,” ere 1 Ahwo Kọrint 6:11 o ta. Whọ tẹ rrọ fuafo evaọ uruemu, yọ who bi dhesẹ inọ whọ kẹ ẹzi na uvẹ re ọ jọ uzuazọ ra ru iruo.

12. (a) Wọhọ epanọ eruẹaruẹ Izikiẹl e ta, ẹvẹ Jihova o bi ro su ukoko riẹ? (b) Ẹvẹ whọ sai ro dhesẹ inọ whọ be nya lele ekpakpọ ẹzi na?

¹² Orọ avivẹ, Jihova ọ be rehọ ẹzi riẹ kpọ ukoko riẹ evaọ oghẹrẹ nọ ọ gwọlọ. Evaọ eruẹaruẹ Izikiẹl, a dhesẹ abọ obọ odhiwu ọrọ ukoko Jihova wọhọ akẹkẹ nọ ọ be dhẹ haro re o ru ẹjiroro Jihova gba. Eme ọ be wọ akẹkẹ na dhẹ kpohọ ofẹ nọ u fo inọ ọ rẹ dhẹ kpohọ? Ẹzi ọfuafo. (Izik. 1:20, 21) Joma kareghẹhọ inọ abọ ivẹ i ru ukoko Jihova via, ọjọ evaọ obọ odhiwu, ọdekọ kọ otọakpọ. Otẹrọnọ ẹzi ọfuafo na ọ be kpọ abọ obọ odhiwu, kiyọ ẹzi ọvona ọ be kpọ ọrọ otọakpọ. Who te bi yoẹme kẹ ọkpọvio nọ o bi no abọ otọakpọ ọrọ ukoko Ọghẹnẹ ze, yọ who bi dhesẹ inọ who bi lele akẹkẹ Jihova jẹ be nya lele ekpakpọ ẹzi ọfuafo riẹ.—Hib. 13:17.

13, 14. (a) Ono o ru “oge ọnana” nọ Jesu ọ fodẹ na via? (b) Fodẹ oriruo jọ nọ u dhesẹ inọ ẹzi ọfuafo o bi fi obọ họ ru otoriẹ Ebaibol vẹ. (Rri ẹkpẹti na “Kọ Who Bi Lele Elo nọ O Bi Lo Gahọ Na?”)

¹³ Orọ avesa, Jihova ọ be rọ ẹzi ọfuafo na fi obọ họ kẹ omai wo otoriẹ Ebaibol na. (Itẹ 4:18) U kri no nọ ‘ọrigbo nọ o wo ẹrọwọ avọ areghẹ na’ ọ be rọ rehọ emagazini nana dhesẹ uzẹme Ebaibol via. (Mat. 24:45) Wọhọ oriruo, roro kpahe otoriẹ mai ọrọ “oge ọnana,” nọ Jesu ọ ta kpahe. (Se Matiu 24:32-34.) Oge vẹ Jesu o wo họ iroro? Uzoẹme na “Ọzino Kristi—Didi Otofa U Wo Kẹ Owhẹ?” u dhesẹ inọ orọnikọ otu omuomu na Jesu o wo họ iroro ho, rekọ ilele riẹ nọ a be te rehọ ẹzi ọfuafo wholo evaọ ẹdẹ Pẹntikọst na.a Ilele Jesu nọ a rọ ẹzi wholo evaọ ikpe-udhusoi ọsosuọ gbe erọ ẹdẹ mai na họ enọ e be te ruẹ oka na je wo otoriẹ oka na, inọ Jesu ọ ‘kẹle unuẹthẹ no.’

¹⁴ Otofa vẹ onana u wo kẹ omai? Dede nọ ma riẹ uzedhe epanọ “oge ọnana” o theri te he, eware buobu e riẹ nọ ma rẹ riẹ kpahe ẹme na “oge”: U re dhesẹ ahwo unuikpe sa-sa nọ e rria enwenọ etoke ọvona; u re theri ga hrọ họ; yọ u wo ekuhọ. (Ọny. 1:6) Kọ eme họ otofa “oge ọnana” nọ Jesu ọ ta kpahe na? O wọhọ nọ ọ be ta nọ otujọ nọ a rọ ẹzi wholo nọ e te ruẹ emuhọ uye ulogbo na a te riẹ otujọ nọ a rọ ẹzi wholo nọ e jariẹ evaọ okenọ oka na u muhọ evaọ 1914. Oge ọyena o wo emuhọ, yọ o ti wo ekuhọ. Orugba abọ sa-sa ọrọ oka yena u dhesẹ vevẹ inọ uye ulogbo na o ginẹ kẹle no. Whọ tẹ be jaja aro vi ẹsikpobi, yọ who bi dhesẹ inọ who bi lele inwene nọ ẹzi ọfuafo na o ru jẹ be nya lele ekpakpọ riẹ.—Mak 13:37.

15. Eme o dhesẹ inọ ẹzi ọfuafo ọ be kẹ omai ẹgba whowho emamọ usi na?

¹⁵ Orọ avene, ẹzi ọfuafo ọ be kẹ omai ẹgba whowho emamọ usi na. (Iruẹru 1:8) Ogbẹrọ ẹzi ọfuafo na ha, ẹvẹ ma hẹ sai ro whowho emamọ usi na evaọ akpọ na soso? Roro ei. Ẹsejọhọ fiki omovuọ gbe ozọ, whọ jọ usu enọ e jẹ hae ta nọ, ‘Mẹ sae ta usiuwoma no uwou ruọ uwou vievie he!’ Rekọ enẹna whọ be ta usiuwoma na ziezi.b Isẹri Jihova buobu a gbẹ be ta usiuwoma ghelọ ọwọsuọ gbe ukpokpoma. Ẹzi ọfuafo Ọghẹnẹ ọvo ọ be kẹ omai ẹgba dadamu kẹ ezadhe je ru eware nọ ma hae sae rọ ẹgba obọ mai ru hu. (Mae. 3:8; Mat. 17:20) Who te bi wo obọ vọvọ evaọ iruo usiuwoma ota na, yọ who bi dhesẹ inọ whọ be roma kpotọ kẹ ẹzi na.

Iruo nọ Ẹzi Ọfuafo O ti Ru Evaọ Obaro

16. Fikieme o sai ro mu omai ẹro inọ Jihova ọ te thọ ahwo riẹ evaọ etoke uye ulogbo na?

¹⁶ Evaọ obaro, Jihova ọ te rọ ẹzi ọfuafo riẹ ru iruo igbunu sa-sa re ọ sai ru ẹjiroro riẹ gba. Kaki roro kpahe epanọ Jihova ọ rọ thọ ahwo riẹ. Wọhọ epanọ ma wuhrẹ no na, ọ rọ ẹzi riẹ thọ ahwo jọ gbe orẹwho Izrẹl soso evaọ oke anwae. Fikiere, u mu omai ẹro inọ ere ọvona ọ te rọ ẹzi ọgaga riẹ na thọ ahwo riẹ evaọ etoke uye ulogbo nọ o be tha na. Ma re du ruawa kpahe epanọ Jihova ọ te rọ sẹro mai evaọ oke yena ha. Ukpoye, ma re fievahọ Jihova keme ma riẹ inọ, makọ oria nọ ma rrọ kẹhẹ, ẹzi ọfuafo riẹ ọ rẹ sae thọ omai.—2 Irv. 16:9; Ol. 139:7-12.

17. Ẹvẹ Jihova ọ te rọ ẹzi ọfuafo riẹ ru iruo evaọ akpọ ọkpokpọ na?

¹⁷ Ẹvẹ Jihova ọ te rọ ẹzi ọfuafo riẹ ru iruo evaọ akpọ ọkpokpọ na? Ẹkwoma ẹzi yena a ti ro rovie iko-ebe ekpokpọ na. (Evia. 20:12) Eme ọ te jọ iko-ebe na? Ẹsejọhọ, eware nọ Jihova ọ te gwọlọ mi omai evaọ etoke esuo odu ikpe na. Kọ who bi rẹro ese eme nọ e rrọ iko-ebe na? Ma be rọ ọwhọ hẹrẹ akpọ ọkpokpọ na. Ma sai wo otoriẹ epanọ oke yena u ti woma te he nọ Jihova ọ te rọ ẹzi ọfuafo riẹ ru ẹjiroro riẹ gba kpahe otọakpọ na gbe ahwo nọ e te jọ eva riẹ.

18. Eme họ ọtamuo ra?

¹⁸ Jọ o thọrọ omai ẹro ho inọ ẹjiroro Jihova o ti rugba hrọ, keme ọ te rehọ ẹzi ọfuafo riẹ—ogaga nọ a rẹ ruẹ ibe riẹ hẹ—rọ wha ẹjiroro riẹ haro. Ẹjiroro yena o te owhẹ re. Fikiere, jọ o jọ ọtamuo ra re whọ yare Jihova kẹ ẹzi riẹ re whọ jẹ roma kpotọ kẹ ekpakpọ riẹ. (Luk 11:13) Who ve ti rẹro ẹrria uzuazọ nọ Jihova ọ jiroro riẹ kẹ ahwo-akpọ—uzuazọ ebẹdẹ bẹdẹ evaọ Aparadase otọakpọ.

[Oruvẹ-obotọ]

Kọ Whọ Kareghẹhọ?

• Idhere vẹ Jihova ọ rọ rehọ ẹzi ọfuafo na wha ẹjiroro riẹ haro evaọ oke emọ Izrẹl?

• Ẹvẹ Jihova ọ be rọ ẹzi riẹ ru iruo nẹnẹ?

• Ẹvẹ Jihova ọ te rọ rehọ ẹzi riẹ ru ẹjiroro riẹ gba evaọ obaro?

[Ẹkpẹti o rrọ ẹwẹ-obe avọ 10]

Kọ Who Bi Lele Elo nọ O Bi Lo Gahọ Na?

Jihova o gbe bi rovie otoriẹ uzẹme Ebaibol na vẹ kẹ ahwo riẹ. Inwene ekpokpọ jọ vẹ evaọ iwuhrẹ mai e roma via no evaọ Uwou-Eroro Na?

▪ Ẹvẹ ọtadhesẹ Jesu kpahe ẹvi u ro dhesẹ epanọ ohwo o re wo ẹnyaharo abọ-ẹzi? (Mat. 13:33)—July 15, 2008, ẹwẹ-obe avọ 19-20.

▪ Oke vẹ use Ileleikristi kpobọ odhiwu u ro kuhọ?—May 1, 2007 (ọrọ Oyibo), ẹwẹ-obe avọ 30-31.

▪ Eme u dhesẹ re a rọ “ẹzi” gọ Jihova? (Jọn 4:24)—August 1, 2002, ẹwẹ-obe avọ 9.

▪ Uwou egagọ-ode vẹ ogbotu obuobu na a be jọ gọ? (Evia. 7:15)—May 1, 2002 (ọrọ Oyibo), ẹwẹ-obe avọ 30-31.

▪ Oke vẹ a te rọ hẹriẹ igodẹ no ewe? (Mat. 25:31-33)—October 15, 1995 (ọrọ Oyibo), pẹwẹ-obe avọ 18-28.