Jesu O Fi Oriruo Omaurokpotọ H’otọ

“Mẹ kẹ owhai oriruo no, re wha ru epanọ me ru kẹ owhai na re.”—JỌN 13:15.

ẸVẸ WHỌ TE K’IYO ENỌ NANA?

Ẹvẹ Ọmọ Ọghẹnẹ o ro dhesẹ omaurokpotọ taure ọ tẹ te ze otọakpọ?

Ẹvẹ Jesu o ro dhesẹ omaurokpotọ evaọ okenọ ọ jọ otọakpọ?

Irere vẹ i no uzuazọ omaurokpotọ Jesu ze?

1, 2. Evaọ aso urere nọ Jesu ọ jọ otọakpọ, eme o wuhrẹ ikọ riẹ?

EVAỌ aso urere nọ Jesu ọ jọ otọakpọ, ọ jọ kugbe ikọ riẹ evaọ ubrukpẹ uwou ehru jọ evaọ Jerusalẹm. Nọ a jẹ re emu kugbe evaọ aso ọyena, Jesu ọ tẹ kpama jẹ ba ewu ehru riẹ no. Ọ tẹ rọ okpa mu eku. Kẹsena o te fi ame họ odhe, o te mu awọ ikọ riẹ họ ẹwozẹ, jẹ be rọ okpa na ririe awọ rai. Nọ o ru ere no, o te fi ewu ehru riẹ họ. Fikieme Jesu o ro ru oware omaurokpotọ nana?—Jọn 13:3-5.

² Jesu omariẹ ọ ta nọ: “Wha riẹ epanọ me ru kẹ owhai na? . . . Otẹrọnọ mẹ nọrọ Olori gbe owuhrẹ ọ wozẹ awọ rai, ufore whai ohwo ọ wozẹ awọ ohwo re. Keme mẹ kẹ owhai oriruo no, re wha ru epanọ me ru kẹ owhai na re.” (Jọn 13:12-15) Unevaze nọ Jesu ọ rọ wozẹ awọ ikọ riẹ na, u wuhrẹ i rai obọdẹ oware jọ nọ o rẹ thọrọ ae ẹro ho, nọ u ti fi obọ họ kẹ ai dhesẹ omaurokpotọ evaọ obaro.

 3. (a) Evaọ isiava jọ, ẹvẹ Jesu o ro dhesẹ epanọ omaurokpotọ u wuzou te? (b) Eme ma te ta kpahe evaọ uzoẹme nana?

³ Orọnikọ ẹdẹ nọ Jesu ọ wozẹ awọ ikọ riẹ na họ oke ọsosuọ nọ o bi wuhrẹ ai omaurokpotọ họ. Evaọ okejọ nọ u kpemu nọ ikọ riẹ jọ a jẹ vro avro kpahe ọnọ ọ mae rro evaọ udevie rai, Jesu ọ tẹ rehọ ọmaha jọ kẹle oma riẹ jẹ ta kẹ ikọ riẹ nọ: “Kohwo kohwo nọ ọ rẹ te rehọ odẹ mẹ rehọ ọmaha ọnana ọ rehọ omẹ, kohwo kohwo nọ ọ rẹ te rehọ omẹ ọ rehọ ọnọ o vi omẹ; keme ọnọ ọ mae kawo kpobi udevie rai ọye họ ọnọ ọ mae ro.” (Luk 9:46-48) Jesu ọ riẹ nọ ahwo Farisi a re ru oma oruoro, fikiere uwhremu na nọ ọ jọ iruo odibọgba riẹ ọ ta nọ: “Kohwo kohwo nọ o re ti ruẹ oma riẹ oruoro a re ti hrẹ i kpotọ, rekọ ohwo nọ ọ rehọ oma riẹ kpotọ a re ti rue i rua.” (Luk 14:11) O rrọ vevẹ inọ Jesu ọ gwọlọ nọ ilele riẹ a re wo omaurokpotọ, koyehọ a rẹ jọ wowolẹ ababọ omorro hayo omovia. Joma ta kpahe oriruo omaurokpotọ nọ o fihọ otọ re ma ruẹ epanọ ma sae rọ rehọ aro kele iei. Ma te jẹ ruẹ epanọ uruemu omaurokpotọ o sae rọ jọ erere kẹ ohwo nọ o bi dhesẹ uruemu yena gbe amọfa nọ o bi dhesẹ iẹe kẹ.

“ME ZIHE OMA KPEMU HU”

 4. Ẹvẹ Jesu o ro dhesẹ omaurokpotọ taure ọ tẹ te ze otọakpọ?

⁴ Jesu o wo omaurokpotọ no taure ọ tẹ te ze otọakpọ. Taure Jesu ọ tẹ te ze otọakpọ, ọ jọ kugbe Ọsẹ obọ odhiwu riẹ ikpe buobu gbidi gbidi. Obe Aizaya o ta kpahe usu okpekpe nọ Ọsẹ na avọ Ọmọ na a wo, inọ: “Ọnowo ỌGHẸNẸ ọ kẹ omẹ ẹrọwo-unu otu nọ a wuhrẹ, re mẹ riẹ epanọ mẹ sae rọ ẹme-unu ta udu họ awọ ọnọ oma o rọ no. Kohiohiẹ kohiohiẹ nọ ọ rọwo ze, o re rovie ezọ mẹ, re me yo wọhọ enọ a wuhrẹ. Ọnowo ỌGHẸNẸ o rovie ezọ mẹ no, fikiere me gbe wudu hu, me zihe oma kpemu hu.” (Aiz. 50:4, 5) Ọmọ Ọghẹnẹ o dhesẹ uruemu omaurokpotọ jẹ gaviezọ ziezi kẹ eware nọ Jihova o je wuhrẹ iẹe. O jọ isiuru riẹ gaga re o wuhrẹ mi Ọghẹnẹ uzẹme na. Ababọ avro, Jesu ọ romatotọ muẹrohọ oghẹrẹ nọ Jihova ọ rọ rehọ omaurokpotọ reohrọ ahwo-akpọ nọ a gba ha.

 5. Ẹvẹ Jesu nọ ọ rrọ Maekẹl ukọ-odhiwu oride na o ro dhesẹ nọ o wo omaurokpotọ jẹ riẹ ọnyaba riẹ okenọ avọ Ẹdhọ a wo avro?

⁵ Orọnikọ emama obọ odhiwu kpobi a wo ọkpọ omaurokpotọ Jesu hu. Ukpenọ ẹnjẹle nọ o zihe ruọ Setan Ẹdhọ na o wuhrẹ mi Jihova, ọ tẹ kuvẹ re ẹzi omorro o ro ẹe udu, ọ tẹ wọso Jihova. Wo ohẹriẹ, ọkwa nọ Jesu o wo evaọ obọ odhiwu o da riẹ ẹro yọ ọ rehọ ọkwa riẹ ru iruo thọthọ họ. Jesu nọ ọ rrọ Maekẹl, ukọ-odhiwu oride na, o ru oware nọ u vi ọkwa riẹ hẹ okenọ ‘o je lele ukumuomu na vro avro kpahe ugboma Mosis.’ Ukpoye, Ọmọ Ọghẹnẹ o dhesẹ omaurokpotọ jẹ riẹ ọnyaba riẹ. O were riẹ re Jihova, Oguẹdhọ Ologbo ọrọ ehrugbakpọ na o bruoziẹ epanọ o were Riẹ evaọ ẹruoke Riẹ.—Se Jud 9.

 6. Ẹvẹ Jesu o ro dhesẹ omaurokpotọ evaọ otọakpọ nọ ọ rọwo nọ ọ rẹ nyaze re ọ jọ Mesaya na?

⁶ Ababọ avro, taure Jesu ọ tẹ te ze otọakpọ, usu eware nọ o wuhrẹ evaọ obọ odhiwu họ, eruẹaruẹ nọ e ta kpahe uzuazọ nọ o ti yeri evaọ otọakpọ nọ o te zihe ruọ Mesaya no. Fikiere o sae jọnọ ọ riẹ kpahe eware iyoma nọ e te via kẹe evaọ otọakpọ. Ghele na, Jesu ọ rọwo nọ ọ rẹ ze otọakpọ re ọ jọ Mesaya nọ a ya eyaa riẹ na, o ve ti je whu. Fikieme? Pọl o kere kpahe omaurokpotọ Ọmọ Ọghẹnẹ na, inọ: “Ọnọ avọ Ọghẹnẹ a gbẹjọ ẹruọvo, dede na o kele i rie gbe odẹ-oro nọ avọ Ọghẹnẹ a rẹ jọ ẹrẹe he, rekọ o se omariẹ gbe oware ovo ho, ọ tẹ rehọ oghẹrẹ oma odibo, a te je yẹi wọhọ ohwo.”—Fil. 2:6, 7.

NỌ Ọ ZIỌ OTỌAKPỌ, “O HRẸ OMA RIẸ KPOTỌ”

7, 8. Idhere vẹ Jesu o ro dhesẹ omaurokpotọ evaọ oke emaha gbe etoke iruo odibọgba riẹ evaọ otọakpọ?

⁷ Pọl o kere nọ: “A tẹ jẹ ruẹ uruemu [Jesu, inọ ọye yọ] ohwo nọ o hrẹ oma riẹ kpotọ ọ tẹ rọwo whu, whu uwhu [ure oja, NW].” (Fil. 2:8) No emaha ze, Jesu o fi oriruo omaurokpotọ h’otọ. Dede nọ Josẹf avọ Meri, ọsẹgboni nọ a gba ha a yọrọ e riẹ, Jesu ọ roma kpotọ “yo ẹme rai.” (Luk 2:51) Oriruo nọ Jesu o fihọ otọ o woma gaga kẹ izoge nọ i ti wo eghale Ọghẹnẹ fiki oma nọ a bi ro kpotọ kẹ esẹgbini rai.

⁸ Nọ Jesu ọ kpako no, o dhesẹ omaurokpotọ ẹkwoma oreva Jihova nọ ọ jẹ rọ karo viukpọ oriẹ. (Jọn 4:34) Evaọ etoke usiuwoma ota riẹ, Jesu Kristi ọ rehọ odẹ Ọghẹnẹ ruiruo, je fi obọ họ kẹ ahwo evezi wo eriariẹ egbagba kpahe Jihova gbe ẹjiroro Riẹ kẹ ahwo-akpọ. Jesu o te je yeri uzuazọ riẹ lele eware nọ o je wuhrẹ amọfa kpahe Jihova. Wọhọ oriruo, evaọ olẹ nọ o wuhrẹ ilele riẹ, oware ọsosuọ nọ ọ fodẹ họ: ‘Ọsẹ mai nọ ọ rọ obọ odhiwu, odẹ ra o jọ ọrẹri.’ (Mat. 6:9) Jesu ọ rọ onana dhesẹ kẹ ilele riẹ inọ erufuọ odẹ Jihova o rẹ jọ oware ọsosuọ evaọ uzuazọ rai. Oyena ọyomariẹ ọ rọ karo evaọ uzuazọ riẹ. Evaọ ubrobọ ekuhọ odibọgba riẹ evaọ otọakpọ, Jesu ọ lẹ se Jihova nọ: “Me dhesẹ odẹ ra kẹ [ikọ na], me re dhesẹ i.” (Jọn 17:26) Ofariẹ, evaọ etoke iruo odibọgba riẹ kpobi, ọ rọ oruaro kẹ Jihova evaọ eware kpobi nọ o ru evaọ otọakpọ.—Jọn 5:19.

 9. Eme Zekaraya ọ ruẹaro riẹ kpahe Mesaya na, kọ ẹvẹ onana o rọ jọ oma Jesu rugba?

⁹ Zekaraya ọ ruẹaro kpahe Mesaya na inọ: “Ghọghọ gaga, O ọmọtẹ Zayọn! Do edo oghọghọ, O ọmọtẹ Jerusalem! Ri, Ovie ra o bi bru owhẹ tha; avọ ogaga gbe obọokparọ, ọ be rọ oma urokpotọ dhẹ eva ehru eketekete, gbe ehru ọmọ eketekete ọzae.” (Zek. 9:9) Onana u rugba evaọ oke nọ Jesu ọ dhẹ ruọ Jerusalẹm taure oke Ehaa Ọnyavrẹ ọrọ ukpe 33 C.E. o te ti te. Ogbotu na a tẹ riẹ iwu gbe egha ire fihọ edhere. Evaọ uzẹme, edo oghọghọ o tẹ vọ okpẹwho na. Dede nọ ogbotu na kpobi a jẹ koyẹ kẹe bi sei Ovie, Jesu o dhesẹ omaurokpotọ ghele.—Mat. 21:4-11.

10. Eme ẹme nọ Jesu o yo rite uwhu na u dhesẹ via?

¹⁰ Jesu o dhesẹ omaurokpotọ gbe ẹmeoyo rite oke uwhu evaọ ure-oja. Ọ tẹ rọ ere dhesẹ nọ ohwo-akpọ ọ rẹ sae gbẹ jọ abọ Jihova ọ tẹ make rẹriẹ ovao dhe edawọ egaga. Jesu o te je dhesẹ eme nọ Setan ọ ta na fihọ ọrue, inọ fiki eware nọ Jihova o bi ru kẹ ahwo-akpọ a be rọ gọe. (Job 1:9-11; 2:4) Abọ Ọghẹnẹ nọ Kristi o dikihẹ gaga ghelọ ebẹbẹ sa-sa nọ i te rie na u dhesẹ re inọ esuo Jihova họ onọ o mai woma gbe nnọ ọye o gine te ọnọ o re su ehrugbakpọ na. Ababọ avro, eva e were Jihova gaga nọ o muẹrohọ Ọmọ riẹ nọ o wo omaurokpotọ na nọ o dikihẹ abọ riẹ ababọ enuho.—Se Itẹ 27:11.

11. Didi uvẹ idhe ẹtanigbo Jesu Kristi na u rovie fihọ kẹ ahwo-akpọ nọ a yoẹme?

¹¹ Jesu ọ rehọ uwhu nọ o whu evaọ ure-oja na ta ahwo-akpọ no igbo re. (Mat. 20:28) Onana u rovie uvẹ fihọ kẹ ahwo nọ a gba ha nọ a te rọ rria bẹdẹ bẹdẹ a ve ti je ru oreva Ọghẹnẹ gbagba. Pọl o kere nọ: “Iruo ẹrẹreokie omọvo o rẹ wha okẹ ọvọvẹ se ahwo kpobi nya eruọ ẹrẹreokie uzuazọ.” (Rom 5:18) Uwhu Jesu u rovie uvẹ uzuazọ seba-ewhuo evaọ obọ odhiwu rọkẹ Ileleikristi nọ a rọ ẹzi wholo na gbe uzuazọ ebẹdẹ bẹdẹ evaọ otọakpọ rọkẹ “igodẹ efa” na.—Jọn 10:16; Rom 8:16, 17.

“ME RE WOWOLẸ”

12. Ẹvẹ Jesu o ro dhesẹ ẹwolẹ gbe omaurokpotọ evaọ oghẹrẹ nọ o ro yeri kugbe ahwo-akpọ nọ a gba ha?

¹² Jesu o zizie enọ “e wha owha ogbẹgbẹdẹ kpobi” inọ a nya bru rie ze. Ọ ta nọ: “Rehọ owhowha mẹ wha, wha wuhrẹ mi omẹ, keme me re wowolẹ jegbọ eva i ro kpotọ, wha rẹ te ruẹ udhedhẹ kẹ izi rai.” (Mat. 11:28, 29) Fikinọ Jesu ọ jọ wowolẹ avọ omaurokpotọ, ọ jẹ rọ ẹwo yeri kugbe ahwo-akpọ nọ a gba ha ọ tẹ jẹ kare ọriẹwẹ. O je rẹro oware nọ ilele riẹ a rẹ sai ru hu mi ai hi. O jiri rai jẹ tuduhọ ai awọ. Jesu o ru rai re a rri omarai wọhọ ahwo nọ a fioka ha hayo eyẹlẹ hẹ. O kienyẹ ae he yọ ọ dhuaro kẹ ae vievie he. Ukpoye, ọ tuduhọ ilele riẹ awọ inọ a te si kẹle iẹe je ru lele eware nọ o bi wuhrẹ ai, oma u ti voro ai keme owhowha riẹ u re wowolẹ yọ owha riẹ u re vovori. Nọ t’ezae t’eyae, emaha gbe ekpako a tẹ rrọ kugbei, oma o jẹ hae were ae.—Mat. 11:30.

13. Ẹvẹ Jesu o ro dhesẹ ohrọ kẹ iwhrori?

¹³ Jesu o dhesẹ ohrọ kẹ iwhrori nọ e jọ Izrẹl keme a jẹ ruẹ uye, yọ ọ jẹ daoma re o fi obọ họ kẹ ae. Ẹdẹjọ nọ Jesu ọ kẹle Jẹriko no, ọ ruẹ ọzae jọ nọ o tuaro nọ a re se Batimiọs, gbe ọrivẹ riẹ nọ o tuaro re nọ a fodẹ odẹ riẹ hẹ. Aimava a ruabọhọ be lẹ nọ Jesu o fi obọ họ kẹ ae, rekọ ogbotu na a te do ku ai inọ jọ a fibo. O hae jọ lọlọhọ re Jesu o gbolaro kẹ ezae ivẹ nana, rekọ o ru ere he. Ukpoye ọ tẹ ta nọ jọ a rehọ ezae ivẹ na bru rie ze, avọ ohrọ, o te rovie ae aro. Ẹhẹ, Jesu ọ rọ aro kele Jihova Ọsẹ riẹ ẹkwoma omaurokpotọ riẹ gbe ohrọ nọ o dhesẹ kẹ iwhrori nọ e rrọ erahaizi na.—Mat. 20:29-34; Mak 10:46-52.

“OHWO NỌ Ọ RỌ OMA KPOTỌ A RE RU EI RUA”

14. Didi irere uzuazọ omaurokpotọ Jesu o wha ze?

¹⁴ Uzuazọ omaurokpotọ nọ Jesu Kristi o yeri o wha oghọghọ gbe irere buobu ze. Eva e were Jihova nọ ọ jẹ ruẹ Ọmọ oyoyou riẹ nọ ọ be rọ omaurokpotọ ru oreva riẹ. Ẹwolẹ gbe omaurokpotọ Jesu o jọ oware omosasọ kẹ ikọ gbe ilele riẹ. Oriruo nọ o fihọ otọ, eware nọ o wuhrẹ i rai, gbe oghẹrẹ nọ o je ro jiri ai u ru nọ a ro wo ẹnyaharo evaọ egagọ Ọghẹnẹ. Iwhrori a wo erere no omaurokpotọ Jesu ze keme o je fi obọ họ kẹ ae, wuhrẹ ai, jẹ tuduhọ ae awọ. Evaọ uzẹme, ahwo-akpọ nọ a yoẹme kpobi a ti wo irere no idhe ẹtanigbo Jesu ze bẹdẹ bẹdẹ.

15. Didi erere Jesu o wo rono omaurokpotọ riẹ ze?

¹⁵ Kọ Jesu omariẹ? Kọ omaurokpotọ riẹ na o wha erere sei? Ee, keme Jesu ọ ta kẹ ilele riẹ nọ: “Ohwo nọ ọ rọ oma kpotọ a re ru ei rua.” (Mat. 23:12) Eme yena i rugba evaọ oma riẹ. Pọl ọ ta nọ: “Ọghẹnẹ o [ru Jesu] kpo-ehru gaga ọ jẹ kẹe odẹ nọ o ro vi edẹ kpobi, a nọ ighilawọ kpobi i re diguẹ kẹ odẹ Jesu, erọ eware nọ erọ obọ ehru, gbe eware nọ erọ akpọ, gbe enọ erọ otọ akpọ, jegbe nọ kunu kunu kpobi o rẹ rọwo nọ Jesu Kristi họ Ọnowo, rọ kẹ oruaro Ọghẹnẹ Ọsẹ na.” Fikinọ Jesu ọ roma kpotọ je kru ẹgbakiete riẹ okenọ ọ jọ otọakpọ, Jihova Ọghẹnẹ ọ tẹ kpare Ọmọ riẹ kpehru, ọ tẹ kẹe udu re o wuzou emama kpobi nọ e rrọ obọ odhiwu gbe otọakpọ.—Fil. 2:9-11.

JESU Ọ TE DHẸ AVỌ UZẸME, OMAUROKPOTỌ GBE ẸRẸREOKIE

16. Eme o dhesẹ nọ Ọmọ Ọghẹnẹ o ti gbe wo omaurokpotọ?

¹⁶ Ọmọ Ọghẹnẹ o ti gbe wo omaurokpotọ evaọ iruẹru riẹ. Ọso-ilezi na ọ ruaro kpahe oghẹrẹ nọ Jesu ọ te rọ họre ewegrẹ riẹ inọ: “Eva idudu ra dhẹ avọ obọokparọ [gbe omaurokpotọ, NW], fiki uzẹme whọ jẹ te thọ enọ ikiẹrẹe.” (Ol. 45:4) Evaọ Amagẹdọn, Jesu Kristi ọ te dhẹ avọ uzẹme, ẹrẹreokie, gbe omaurokpotọ. Kọ eme ọ te via evaọ ekuhọ Esuo Odu Ikpe riẹ nọ Mesaya Ovie na ọ tẹ “raha isuẹsu, udu-ogaga gbe ogaga kpobi no”? Kọ o ti wo omaurokpotọ? Ee, keme ọ te “rehọ uvie na kẹ Ọghẹnẹ Ọsẹ na.”—Se 1 Ahwo Kọrint 15:24-28.

17, 18. (a) Fikieme u ro wuzou re idibo Jihova a rọ aro kele oriruo omaurokpotọ Jesu? (b) Eme ma te ta kpahe evaọ uzoẹme nọ o rrọ aro na?

¹⁷ Kọ omai? Kọ ma te rọ aro kele Jesu dhesẹ omaurokpotọ? Eme ọ te via kẹ omai nọ Jesu Kristi ovie na ọ te nyaze ti fi ẹmo Amagẹdọn? Oghẹrẹ nọ ọ te dhẹ u dhesẹ nọ ahwo nọ a roma kpotọ je kiẹrẹe ọvo o ti siwi. Fikiere, re ma sae zọ ma re dhesẹ omaurokpotọ. Ofariẹ, wọhọ epanọ uzuazọ omaurokpotọ Jesu Kristi o wha irere sei gbe amọfa na, nọ ma te wo omaurokpotọ o te wha irere sa-sa ze re.

¹⁸ Eme ọ sai fi obọ họ k’omai rọ aro kele ọkpọ omaurokpotọ Jesu? Ẹvẹ ma sae rọ daoma dhesẹ omaurokpotọ nọ ma tẹ rẹriẹ ovao dhe ebẹbẹ sa-sa? Ma te k’iyo enọ nana evaọ uzoẹme nọ o rrọ aro na.

[Uwoho nọ e rrọ ẹwẹ-obe avọ 12]

Ẹvẹ omaurokpotọ Jesu o sae rọ kẹ omai erere?

[Uwoho nọ o rrọ ẹwẹ-obe avọ 13]

Ohrọ nọ Jesu o dhesẹ yọ obọdẹ oriruo rọkẹ omai