A Riẹ Akpọ Yeri Kọ Whọ Sai Ru Epọvo Na?

EKỌMPENE jọ nọ o re ku erọbọto, koyehọ ijini nọ a rẹ rehọ kọmputa kpọ re i ru iruo nọ ohwo-akpọ o re ru a rehọ Marc, oniọvo jọ obọ Canada iruo. Ekọmpene nana o re ku erọbọto kẹ ekọmpene efa nọ i re vi ahwo kpobọ ọvẹre gbe eria efa evaọ obọ ehru. Marc o je ruiruo kẹ ai ubroke, ọ tẹ jẹ jọ ọkobaro oke-kpobi. Ọga-iruo riẹ ọ ta kẹe inọ a gwọlọ nnọ ọ hai ruiruo okpẹdẹ soso avọ igho buobu nọ a te hae hwae. Eme Marc o ru?

Amy, oniọvo-ọmọtẹ nọ ọ rrọ obọ Philippines, ọ jọ ọkobaro oke-kpobi taure o te ti nwrotọ no isukulu. Uwhremu na, a tẹ rehọ iẹe iruo nọ a jẹ jọ hwae igho buobu, rekọ iruo na e jẹ rehọ oke riẹ kpobi. Eme Amy o ru?

Oware nọ Marc o ru u wo ohẹriẹ no orọ Amy, yọ oware nọ u no iroro-ejẹ rai ze i dhesẹ areghẹ nọ o rrọ ohrẹ nọ a rọ kẹ Ileleikristi nọ e jọ obọ Kọrint anwae. Pọl ukọ na o kere nọ: “Enọ e be riọ erere akpọ na a ru wọhọ ẹsenọ a be riọ erere riẹ vọvọ họ.”—1 Kọr. 7:29-31, NW.

Whọ Re Erere Akpọ na Vọvọ Họ

Taure ma tẹ te t’ẹme kpahe oware nọ o via kẹ Marc avọ Amy, joma ta kpẹkpẹe kpahe otofa ẹme na “akpọ na” (hayo, koʹsmos evaọ Griki) onọ Pọl ọ rọ t’ẹme evaọ ileta riẹ se ahwo Kọrint. Evaọ oria Ebaibol yena, otofa koʹsmos họ uyerakpọ nọ ma be rria na, onana u kugbe eware wọhọ uwou, emuore, gbe emuẹgọ. Re ma sai wo eware itieye na, o gbahọ nọ ma re wo iruo. Ma rẹ jọ akpọ na ruiruo hrọ re ma rẹrote oma mai gbe uviuwou mai wọhọ epanọ Ebaibol e ta na. (1 Tim. 5:8) Rekọ, evaọ oke ovona, ma riẹ inọ ‘akpọ na ọ be vrẹ.’ (1 Jọn 2:17) Fikiere, ma rẹ riọ erere akpọ na, rekọ orọnọ “vọvọ họ.”—1 Kọr. 7:31.

Ohrẹ Ebaibol na inọ ma re erere akpọ na vọvọ họ u fiobọhọ kẹ inievo buobu kiẹ oma rai riwi no, gwọlọ iruo nọ e rẹ rehọ oke ohwo tere he, je si obọ no eware jọ nọ e roja tere he no. Nọ a ru ere no, a tẹ ruẹ inọ enẹna a be riẹ akpọ yeri keme a wo oke buobu nọ a be rọ gọ Jihova jẹ rẹrote uviuwou rai. Ofariẹ, umutho uzuazọ nọ a bi yeri u te ru nọ a be rọ rẹroso Jihova ukpenọ a rẹ rọ ẹro rai kpobi so akpọ na. Kọ whọ sai ru epọvo na, yeri umutho uzuazọ re whọ rehọ oke buobu ro ru iruo Uvie Ọghẹnẹ?—Mat. 6:19-24, 33.

“Ma Kẹle Jihova Vi Epaọ Ọsosuọ No”

Marc, ọnọ ma jọ obọ emuhọ fodẹ na, o fi ohrẹ Ebaibol na h’iruo inọ ma re erere akpọ na vọvọ họ. Ọ se ọkwa ologbo nọ a gwọlọ fi ei họ na. Nọ edẹ jọ e vrẹ no, ọga-iruo riẹ ọ tẹ ta nọ o re fi igho buobu họ osa na re ọ tẹzẹ iẹe rehọ iruo na. Marc ọ ta nọ: “Onana o jọ odawọ, rekọ mẹ siọ iruo na ghele.” Ọ ta oware nọ o ro ru ere: “Mẹ avọ aye mẹ, Paula, ma gwọlọ rehọ oma mai kpobi kẹ egagọ Jihova. Fikiere, ma tẹ jiroro inọ ma re si obọ no eware nọ e roja tere he evaọ uzuazọ mai. Ma tẹ lẹ inọ Jihova ọ k’omai areghẹ re ma sae nyate ute mai, ma te fi ẹdẹ họ nọ ma ti ro muọ oke buobu họ eroruiruo kẹ Jihova.”

Paula ọ ta nọ: “Edẹ esa ẹkpoka me je ruiruo okere-obe eva ẹsipito, yọ osa mẹ ọ jọ ziezi. Mẹ jọ ọkobaro oke-kpobi re. Rekọ, wọhọ Marc ọzae mẹ, mẹ gwọlọ rehọ oma kẹ iruo Jihova re mẹ kwa kpohọ oria nọ a jọ mae gwọlọ etausiuwoma. Nọ me fi obe họ inọ mẹ gwọlọ no iruo na, ọga-iruo mẹ ọ tẹ ta nọ ọkwa ọnọ o re wuzou ikere-obe na kpobi o rovie fihọ no nọ a gwọlọ fi omẹ họ. Ọkwa okere-obe nana osa riẹ o mae rro evaọ ẹsipito na, rekọ me nwene iroro mẹ hẹ. Nọ mẹ ta kẹ ọga-iruo mẹ oware nọ mẹ rọ gwọlọ no iruo na, o te jiri omẹ kẹ ẹrọwọ mẹ.”

U kri hi, a te vi Marc avọ Paula wọhọ ekobaro obọdẹ kpohọ ukoko osese jọ evaọ ẹmẹwho jọ evaọ Canada. Eme u no ẹkwa rai ze? Marc ọ ta nọ: “Nọ me no iruo nọ a jẹ jọ hwa omẹ igho buobu no, iruo nọ mẹ rehọ enwenọ abọvo ikpe uzuazọ mẹ ru no, udu o jẹ dina bru omẹ, rekọ Jihova ọ ghale odibọgba mai. Eva e jẹ were omai gaga fikinọ ma je fiobọhọ kẹ amọfa gọ Ọghẹnẹ. Iruo odibọgba oke-kpobi o wha evawere ziọ orọo mai re. Eware nọ i kiekpahe egagọ Jihova ọvo ma jẹ hae ta kpahe. Ma kẹle Jihova vi epaọ ọsosuọ.” (Iruẹru 20:35) Paula o fibae nọ: “Who te no iruo ra gbe uwou nọ whọ ria reria no, kọ Jihova who re fi eva ra kpobi họ. Ere ma ru, yọ Jihova ọ ghale omai. Inievo eghaghae nọ ma nyaku evaọ ukoko okpokpọ mai a dede omai rehọ ziezi. Enẹna mẹ be rehọ ẹgba nọ me je ro ruiruo vẹre ro fiobọhọ kẹ ahwo te gọ Ọghẹnẹ. Iruo nana e be wha evawere s’omẹ gaga.”

‘Me Fe Rekọ Eva e jẹ Were Omẹ Hẹ’

Amy, ọnọ ma fodẹ vẹre na, ọ j’owọ nọ o wo ohẹriẹ no orọ Marc. Ọ rehọ iruo nọ a jẹ jọ hwae igho buobu na. Amy ọ ta nọ: “Evaọ ukpe ọsosuọ na, mẹ jẹ ta usiuwoma jẹ niyẹrẹ kamara kamara, rekọ mẹ tẹ te ruẹ inọ epanọ me re ro wo ọkwa ologbo ọvo me je roro kpahe ẹsikpobi. Uvẹ sa-sa u je rovie fihọ k’omẹ evaọ iruo na, yọ mẹ tẹ jẹ raha ẹgba mẹ kpobi fihọ epanọ me re ro te ọkwa ologbo. Epanọ me je kparo te evaọ iruo na, ere oke nọ mẹ jẹ raha evaọ usiuwoma ota o jẹ kawo te. Ukuhọ riẹ mẹ tẹ siọ usiuwoma ota ba.”

Nọ ọ kareghẹhọ uzuazọ nọ o je yeri evaọ oke yena, Amy ọ ta nọ: “Me fe, ugho o jọ ẹbẹbẹ k’omẹ hẹ. Me je kperẹ gaga, yọ a jẹ k’omẹ ọghọ fiki ọkwa nọ mẹ jọ. Rekọ eva e jẹ were omẹ hẹ. Epanọ me wo ugho te ere ebẹbẹ mẹ i bu te. U gb’omẹ unu oware nọ o rọ jọ ere. Mẹ tẹ te ruẹ inọ fikinọ me bi le efe akpọ na, mẹ whoma ‘vru no ẹrọwọ na no.’ Fiki onana, mẹ ruẹ uye ‘edada buobu’ nwane wọhọ epanọ Ebaibol e ta na.”—1 Tim. 6:10.

Eme Amy o ru? Ọ ta nọ: “Me bo bru ekpako na re a fiobọhọ k’omẹ wariẹ mu Ọghẹnẹ họ ẹgọ, mẹ tẹ wariẹ mu iwuhrẹ họ ẹnya. Nọ a jẹ so ole jọ, me te muhọ ẹviẹ. Mẹ kareghẹhọ epanọ eva e jẹ were omẹ te evaọ ikpe isoi nọ mẹ jọ ọkobaro na, dede nọ evaọ oke yena me fe he. Mẹ riẹ inọ mẹ rẹ siọ oke mẹ ba ẹraha kufiẹ ro le igho re mẹ rehọ isiuru Uvie na karo. Mẹ tẹ ta nọ a si omẹ no ọkwa ologbo na re a fi omẹ họ ọsese, kẹsena a tẹ jẹ hwa omẹ abọvo osa nọ a jẹ hwa omẹ vẹre, mẹ tẹ wariẹ mu usiuwoma ota họ.” Avọ evawere Amy ọ tẹ ta nọ: “Mẹ rehọ evawere ruiruo ọkobaro imikpe jọ. Rekọ enẹna eva e be were omẹ vi okenọ mẹ jẹ rehọ oke mẹ kpobi ruiruo kẹ akpọ na.”

Kọ whọ sai ru inwene evaọ uzuazọ ra re who si obọ no eware jọ nọ e roja tere he? Who te ru ere, re who fiba oke nọ whọ rẹ rọ wha isiuru Uvie na haro, eva e te were owhẹ re.—Itẹ 10:22.

[Eme nọ a fi ẹgba họ nọ e rrọ ẹwẹ-obe avọ 19]

Kọ whọ sai ru inwene evaọ uzuazọ ra re who si obọ no eware jọ nọ e roja tere he?

[Etehe/Uwoho nọ e rrọ ẹwẹ-obe avọ 19]

“O be Were Omẹ Oma!”

David, ọkpako ukoko jọ evaọ obọ America, ọ gwọlọ lele aye gbe emọ riẹ ru iruo ọkobaro. Ọ tẹ rehọ iruo ubroke evaọ ekọmpene nọ o je jo ruiruo, o te mu iruo ọkobaro oke-kpobi họ. Kọ onana o wha evawere sei? Emerae jọ e vrẹ no, David o te kere se ogbẹnyusu riẹ jọ nọ: “Re ohwo avọ uviuwou riẹ a kuomagbe rehọ oke rai kpobi gọ Jihova, a rẹ ruẹ oware nọ u woma tei hi. Me roro nnọ o te rehọ oke krẹkri re iruo ọkobaro na o tẹ te reria omẹ oma, rekọ ma be t’ẹme na o be were omẹ oma! A re gbiku evawere riẹ hẹ.”

[Uwoho nọ e rrọ ẹwẹ-obe avọ 18]

Marc avọ Paula nọ a be ta usiuwoma