Ezae Uwou-orọo, Wha Raro Kele Uyoyou Kristi!

EVAỌ aso urere riẹ evaọ otọakpọ, Jesu ọ ta kẹ ikọ 11 riẹ nọ: “Mẹ kẹ owhai uzi okpokpọ, nọ, whai ohwo o you ohwo wọhọ epanọ me you owhai, re whai ohwo o you ohwo. Fiki onana ahwo kpobi a jẹ riẹ nọ whai ilele mẹ re whai ohwo o te you ohwo.” (Jọn 13:34, 35) Evaọ uzẹme, uvi Ileleikristi a re you ohwohwo.

Pọl ukọ na ọ ta kẹ ezae uwou-orọo nọ e rrọ ukoko na nọ: “Whai ezae na, wha you eyae rai, wọhọ epanọ Kristi o you [ukoko] riẹ, ọ jẹ rehọ oma obọriẹ kẹe.” (Ẹf. 5:25) Ẹvẹ ọzae nọ ọ rrọ Oleleikristi ọ sai ro fi ohrẹ nana họ iruo evaọ orọo riẹ, maero otẹrọnọ aye riẹ yọ odibo Jihova?

Kristi Ọ Rẹrote Ukoko Na

Ebaibol e ta nọ: “Ezae na i re you eyae rai wọhọ oma obọrai. Ọnọ o you aye riẹ o you oma obọriẹ. Keme ohwo ọvo o re mukpahe oma obọriẹ hẹ, rekọ ọ rẹ hẹ kuọ oma riẹ jẹ sẹro riẹ, wọhọ epanọ Kristi o ru [ukoko] na.” (Ẹf. 5:28, 29) Jesu o you ilele riẹ o te je rri rai ghaghae. Dede nọ a gba ha, ọ jẹ dhuaro kẹ ae he. Fikinọ o jọ isiuru riẹ re o ‘ru ukoko na họ uvi ukoko,’ ọ tẹrovi ewoma ilele riẹ.—Ẹf. 5:27.

Wọhọ epanọ Kristi o you ukoko na, ere ọzae o re you aye riẹ, evaọ ẹmeunu gbe uruemu. Eva e rẹ were aye nọ ọzae o bi dhesẹ uyoyou kẹ ẹsikpobi. Evaọ abọdekọ riẹ, aye nọ ọ maki w’otọ w’ehru ọ rẹ wereva ghele he otẹrọnọ ọzae riẹ ọ be daezọ riẹ hẹ.

Ẹvẹ ọzae o re ro dhesẹ nnọ o rri aye riẹ ghaghae? Ọ rẹ jọ ogbotu rọ ọghọ dhesẹ iẹe kẹ amọfa o ve je jiri ei kẹ obọ nọ o bi fihọ kẹe. Otẹrọnọ fiki obufihọ aye riẹ uviuwou na o sai ro wo oware jọ t’obọ, ọ rẹ tae via kẹ amọfa ududu. Aye na ọ rẹ jẹ jọ obọ uwou riẹ nnọ ọzae riẹ o you rie. Omobọ nọ ọ rẹ rọ kpahe iẹe, ovao nọ o re ru sasasa, ẹgbalọ, gbe ujiro e rẹ sae jọ eware esese, rekọ i re duobọte udu aye gaga.

‘Oma O Vo Riẹ hẹ Re O Se Ai Inievo Riẹ’

Oma o vo Jesu Kristi hi ‘re o se [ilele riẹ nọ a rọ ẹzi wholo na] inievo riẹ.’ (Hib. 2:11, 12, 17) Whọ tẹ rrọ ọzae Oleleikristi, kareghẹhọ inọ evaọ ukoko na, aye ra yọ oniọvo-ọmọtẹ ra re. Oma nọ o ro mudhe kẹ Jihova o rro vi eyaa orọo nọ wha ya kẹ ohwohwo, makọ ọ họ-ame no whọ tẹ te rehọ iẹe hayo uwou ra ọ jọ họ-ame. Aye ra ọ tẹ kpare obọ re ọ kuyo evaọ obọ Ọgwa Uvie, oniọvo nọ o bi ru ẹme na o re sei “Sista—.” Orọnikọ evaọ obọ Ọgwa Uvie ọvo aye ra ọ jọ rrọ sista hayo oniọvo ra ha rekọ te obọ uwou te. Who re tete aye na evaọ obọ uwou wọhọ epanọ who bi ru ei evaọ obọ Ọgwa Uvie na.

Otẹrọnọ who wo ewha-iruo buobu evaọ ukoko na, ẹsejọ o rẹ sae jọ bẹbẹ re whọ wọ ewha-iruo ra evaọ ukoko na re whọ jẹ rẹrote uviuwou ra ziezi. Ekpako na gbe idibo iruiruo na a te bi ru iruo kugbe ziezi je siobọno ewha-iruo jọ kẹ inievo efa nọ i te, o rẹ sae lẹliẹ owhẹ wo oke ziezi kẹ oniọvo-ọmọtẹ nọ ọ mae gwọlọ owhẹ, koyehọ aye ra. Kareghẹhọ, inievo e vọ ukoko na nọ e rẹ sai ru iruo nọ who bi ru na, rekọ whẹ ọvo ọ rẹ sai ru ẹgwọlọ aye ra gba.

Ofariẹ, whẹ o wo uzou aye ra. Ebaibol e ta nọ: “Kristi họ ọ nọ o wo uzou ohwo kpobi, ọzae ọye o wo uzou aye riẹ.” (1 Kọr. 11:3) Nọ o rọnọ whẹ o wuzou aye ra na, oghẹrẹ obọ vẹ who re ro yeri kugbei? Evaọ edhere uyoyou, orọnikọ whọ rẹ rọ eme ikere obehru na rọ so ole kẹe ẹsikpobi hi inọ ọ kẹ owhẹ adhẹẹ fikinọ Ebaibol e ta nnọ whẹ o wuzou riẹ. Re whọ wọ owha-iruo ra ziezi evaọ uwou na, whọ rẹ raro kele Jesu Kristi evaọ oghẹrẹ nọ who re yeri kugbe aye ra.—1 Pita 2:21.

“Whai Họ Ezọ Mẹ”

Jesu o se ilele riẹ ezọ riẹ. Ọ ta kẹ ae nọ: “Me gbe se owhai idibo ofa ha, keme na odibo ọ rẹ riẹ epanọ olori riẹ o re ruo ho; rekọ me se owhai ezọ, keme eware kpobi nọ mẹ jọ obọ Ọsẹ mẹ yo, eye mẹ jẹ owhai riẹ.” (Jọn 15:14, 15) Jesu avọ ilele riẹ a jẹ hae t’ẹme kugbe ziezi. A jẹ hai ru eware kugbe re. A zizie ‘Jesu gbe ilele riẹ’ kpohọ ehaa orọo nọ a ru evaọ obọ Kena. (Jọn 2:2) A wo eria nọ a jẹ hai jo s’omahọ, oria wọhọ ọgbọ Getsemane. Ebaibol e ta nọ “Jesu avọ ilele riẹ a kpo obei ẹsi buobu” no.—Jọn 18:2.

U fo re aye ọ riẹ nnọ ọzae riẹ họ ohwo nọ ọ mae kẹle iẹe oma. Fikiere o roja gaga re ezae avọ eyae a wereva kugbe! Gọ Ọghẹnẹ kugbe. Wha wuhrẹ Ebaibol kugbe. Raha oke kugbe—wha hae nyusu, t’ẹme, jẹ re emu kugbe. Wha thakpe jọ ọzae avọ aye ọvo ho; wha jọ egbẹnyusu ekpekpe.

O ‘You Rai te Urere’

Jesu ‘o you ilele riẹ te urere.’ (Jọn 13:1) Ezae jọ a be raro kele Kristi hi evaọ ẹme nana. Ejọ e rẹ tubẹ dhẹ siọ “aye oge” rai ba re a ruẹse rehọ ọmọtẹ ọboba.—Mal. 2:14, 15.

Ọzae jọ nọ ọ raro kele Kristi họ Willi. Fiki ẹyao nọ aye riẹ ọ jẹ mọ, ọ rẹro tei ikpe buobu. Ẹvẹ Willi o rri owha-iruo nana? Ọ ta nọ: “N’otọ avọ otọ ze, me rri aye mẹ na wọhọ okẹ nọ u no obọ Ọghẹnẹ ze. Ikpe 60 nọ i kpemu, mẹ ya eyaa inọ mẹ rẹ rẹro tei makọ eware i woma hayo i yoma. Eyaa yena e rẹ thọrọ omẹ ẹro ho.”

Ezae Ileleikristi, wha raro kele uyoyou Kristi. Rri aye nọ Ọghẹnẹ ọ k’owhẹ na ghaghae wọhọ oniọvo gbe ogbẹnyusu.

[Uwoho nọ o rrọ ẹwẹ-obe avọ 20]

Kọ aye ra họ ogbẹnyusu nọ ọ mae kẹle owhẹ?

[Uwoho nọ o rrọ ẹwẹ-obe avọ 20]

‘Hai you aye ra’