Uzou avọ 13

“Me You Ọsẹ Na”

1, 2. Eme Jọn ukọ na o kere kpahe aso urere nọ ikọ na a jọ kugbe Jesu taure o te ti whu?

ỌKPỌKUỌZAE jọ o kru ugbẹ họ obọ, eware buobu e vọ riẹ udu nọ ọ gwọlọ kere. Odẹ riẹ họ Jọn, ọye họ ukọ Jesu Kristi nọ o whu kiọkọ. Ọ joma kpako te ikpe udhusoi (100) no, yọ o bi roro kpahe oware nọ o via evaọ aso urere nọ ọyomariẹ gbe ikọ nọ i kiọkọ a rọ jọ kugbe Jesu taure o te ti whu evaọ enwenọ ikpe udhosa gbe ikpe nọ e vrẹ. Avọ obufihọ ẹzi ọfuafo Ọghẹnẹ, Jọn ọ kareghẹhọ eware nọ e via je kere ai kpobi.

² Jesu ọ ta evaọ aso yena inọ okenọ a ti ro kpei o kẹle no. Jọn ọvo họ ohwo nọ o kere kpahe oware nọ o soriẹ nọ Jesu ọ rọ rọwo nnọ o re whu uwhu oja oyena: “Epanọ Ọsẹ na ọ ta kẹ omẹ ere me [bi] ru, re akpọ na ọ riẹ nọ me you Ọsẹ na. Kparoma, ma nya no etenẹ.”​—Jọn 14:31.

3. Ẹvẹ Jesu o ro dhesẹ nọ o you Ọsẹ riẹ?

³ “Me you Ọsẹ na.” Oware ofa nọ o jọ Jesu oja te oyena o rrọ họ. Orọnikọ o je dhe eme yena ẹwẹwariẹ hẹ. Eva Jọn 14:31 na ọvo Jesu ọ jọ ta gbiae inọ o you Ọsẹ riẹ. Rekọ, Jesu o yeri uzuazọ nọ u dhesẹ nọ o gine you Ọsẹ na. Uyoyou nọ o wo kẹ Jihova u dhesẹ oma via kẹdẹ kẹdẹ. Aruọwha Jesu, ẹmeoyo riẹ, gbe ithihakọ riẹ e kẹ imuẹro uyoyou nọ o wo kẹ Ọghẹnẹ. Uyoyou nana o wọ riẹ ru eware kpobi nọ o ru evaọ iruo odibọgba riẹ.

4, 5. Oghẹrẹ uyoyou vẹ Ebaibol e mae t’ẹme kpahe, kọ eme ma rẹ sae ta kpahe uyoyou nọ Jesu o wo kẹ Jihova?

⁴ Nẹnẹ, ahwo jọ a sai roro inọ eyẹlẹ họ enọ i re dhesẹ uyoyou. A tẹ fodẹ uyoyou, iroro rai e rẹ sai kpohọ eme hayo ile obẹlẹ, hayo isiuru obẹlẹ gheghe nọ e rẹ jọ udevie emezae gbe emetẹ. Ebaibol na e ta kpahe uyoyou ọzae avọ aye evaọ edhere nọ u wo ohẹriẹ no oghẹrẹ nọ ahwo a rri rie nẹnẹ. (Itẹ 5:​15-21) Rekọ oghẹrẹ uyoyou ofa jọ o riẹ nọ Ebaibol e mae t’ẹme kpahe. Uyoyou nana orọnikọ orọ isiuru gheghe nọ a re wo kpahe omọfa ha; hayo kọ onọ a rọ unu ta ọvo ho. Uyoyou utiọye u re no udu ze. Ehri-izi Ọghẹnẹ e rẹ kpọe, yọ ohwo nọ o wo rie o re ru eware iwoma. Uyoyou nana o rrọ ugheghẹ hẹ. Ebaibol e ta nọ: “Uyoyou u re re he.”​—1 Ahwo Kọrint 13:8.

⁵ Evaọ usu ahwo kpobi nọ a rria akpọ na no, Jesu họ ọnọ ọ mai you Jihova. Uvumọ ohwo o ri ru te Jesu hu evaọ ekoko ujaje nọ Jesu ọ ta nọ o mae rro evaọ ijaje Ọghẹnẹ kpobi inọ: “Whọ rẹ rehọ eva ra kpobi, gbe ẹzi ra kpobi, gbe iroro ra kpobi, gbe ogaga ra kpobi, you Ọnowo na Ọghẹnẹ ra.” (Mak 12:30) Ẹvẹ Jesu ọ sai ro wo uyoyou utioye? Ẹvẹ ọ sae rọ yọrọ uyoyou riẹ kẹ Ọghẹnẹ okenọ ọ jọ otọakpọ? Kọ ẹvẹ ma sae rọ raro kele iei?

Uyoyou nọ O Mae Tọ jẹ Ga

6, 7. Ẹvẹ ma rọ riẹ nọ Ọmọ Ọghẹnẹ a t’ẹme kpahe eva Itẹ 8:​22-31, orọnikọ areghẹ gheghe he?

⁶ Kọ t’owhẹ te ogbẹnyusu ra wha ru iruo kugbe no ẹdẹjọ, ukuhọ riẹ whọ tẹ ruẹ nọ o lẹliẹ usu rai kpekpe vi epaọ ọsosuọ? Oyena o sai fi obọ họ kẹ owhẹ riẹ oghẹrẹ uyoyou nọ o jọ udevie Jihova avọ Ọmọvo riẹ. Ma fodẹ Itẹ 8:30 unuẹse buobu no, rekọ enẹna joma ta ẹme kpahe eme nọ e wariẹ e riẹ họ. Ma jọ owọ avọ 22 rite 31 ruẹ oghẹrẹ nọ a dhesẹ areghẹ wọhọ ohwo. Ẹvẹ ma rọ riẹ inọ eme nana i kiekpahe Ọmọ Ọghẹnẹ?

⁷ Evaọ owọ avọ 22, areghẹ ọ ta nọ “Ọto muhọ iruo ỌNOWO na ọrọ ma omẹ, [omama] anwae ọsosuọ riẹ.” Eme nana e sai kiekpahe areghẹ gheghe he, keme a “ma” areghẹ hẹ. Areghẹ u wo emuhọ họ, keme Jihova ọnọ ọ rrọ ehri areghẹ na o wo emuhọ họ. (Olezi 90:2) Rekọ, Ọmọ Ọghẹnẹ họ “otuyẹ emama kpobi.” Ẹma a ma riẹ; ọye họ omama ọsosuọ Jihova. (Ahwo Kọlọsi 1:15) Ọmọ na ọ jọ uzuazọ no taure a tẹ te ma idhiwu gbe otọakpọ na, wọhọ epanọ obe Itẹ u dhesẹ. Jesu nọ ọ rrọ Ẹme na, koyehọ Ọtota Ọghẹnẹ, o dhesẹ areghẹ Jihova via gbagba.​—Jọn 1:1.

8. Eme Ọmọ na o je ru taure ọ tẹ te ziọ otọakpọ, kọ nọ ma te bi rri omama jọ nọ o were omai, ono iroro mai i re kpohọ?

⁸ Eme Ọmọ na o je ru evaọ ikpe buobu gbidi gbidi nọ ọ rria taure ọ tẹ te ziọ otọakpọ na? Owọ avọ 30 o ta nọ ọ jọ abotọ Ọghẹnẹ wọhọ “osu iruo.” Eme oyena u dhesẹ? Ahwo Kọlọsi 1:16 o ta nọ: “Eva riẹ a jẹ ma eware kpobi, enọ erọ evaọ odhiwu gbe akpọ, . . . fiki riẹ a rọ ma eware na kpobi jẹ rọ kẹe.” Fikiere Jihova, Ọmemama na, ọ rehọ Ọmọ riẹ ọnọ ọ rrọ Osu Iruo na gboma rọ ma emama efa kpobi​—ijẹle, idedeghe ọraragha na, otọakpọ na avọ oghoghẹrẹ ekakọ, erao sa-sa, gbe ahwo-akpọ. Ma sae rehọ okugbe nọ ọ rrọ udevie ohwo nọ ọ rẹ drọ omaa-uwou gbe ọnọ ọ rẹ bọ uwou ro dhesẹ okugbe nọ ọ rrọ udevie Ọsẹ na avọ Ọmọ na. Nọ ma te bi jiri omama jọ, yọ Ọmemama na ma be rọ orro kẹ na. (Olezi 19:1) Rekọ ma sae jẹ kareghẹhọ nọ Ọmemama na avọ “osu iruo” riẹ a rọ evawere ru iruo kugbe oke krẹkri.

9, 10. (a) Eme ọ lẹliẹ usu Jihova avọ Ọmọ riẹ jọ gaga? (b) Eme ọ rẹ sai fi obọ họ kẹ owhẹ wo usu okpekpe kugbe Ọsẹ obọ odhiwu ra?

⁹ Nọ imava nọ e gba ha a te bi ru iruo kugbe, a rẹ sai wo ẹbẹbẹ ẹsejọ. Rekọ o jọ ere kẹ Jihova avọ Ọmọ riẹ hẹ! Ọmọ na o lele Ọsẹ riẹ ru iruo ikpe nọ i wo unu hu, yọ ọ jẹ ‘ghọghọ eva aro riẹ kẹse kẹse.’ (Itẹ 8:30) O jẹ were iẹe re ọ jọ kugbe Ọsẹ riẹ, yọ ere ọvona o jọ kẹ Ọsẹ na re. Enẹ iruemu-aghae Ọsẹ na e rọ daruọ Ọmọ na oma. Agbẹta nọ usu Ọsẹ na avọ Ọmọ na o rọ jọ gaga na! A sai dhesẹ usu nana wọhọ onọ o mae tọ jẹ mae ga evaọ ehrugbakpọ na.

¹⁰ Eme ma sai wuhrẹ no onana ze? Ẹsejọhọ whọ rẹ sai roro nọ o lọhọ họ re who wo usu utioye kugbe Jihova. Evaọ uzẹme, mai ọvuọvo ma wo uvẹ-ọghọ nọ Ọmọ na o wo ho. Rekọ, uvẹ ulogbo jọ u rovie fihọ kẹ omai. Kareghẹhọ inọ iruo nọ Jesu o lele Ọsẹ riẹ ru u ru rie si kẹle Ọsẹ riẹ gaga. Fiki uyoyou, Jihova o rovie uvẹ kẹ omai re ma jọ ‘ibe iruiruo’ riẹ. (1 Ahwo Kọrint 3:9) Nọ ma be raro kele oriruo Jesu evaọ odibọgba na, joma kareghẹhọ ẹsikpobi inọ mai yọ ibe iruiruo Ọghẹnẹ. Onana o rẹ lẹliẹ usu mai kugbe Jihova dhe ẹgẹga. Kọ uvẹ-ọghọ jọ o riẹ nọ o rro vi onana?

11-13. (a) Eme u je fo re ma rri uyoyou wọhọ oware nọ o rrọ uzuazọ, kọ ẹvẹ Jesu o ro kru uyoyou riẹ kẹ Jihova gaga nọ ọ gbẹ jọ ọmaha? (b) Ẹvẹ Jesu o ro dhesẹ nọ o were riẹ re o wuhrẹ mi Jihova te okenọ ọ jọ obọ odhiwu gbe nọ ọ ziọ otọakpọ?

¹¹ U re fi obọ họ re ma rri uyoyou nọ ma wo wọhọ oware nọ o rrọ uzuazọ. Wọhọ epanọ o gwọlọ nọ ma rẹ rẹrote idodo nọ ma kọ fihọ ighẹ mai na, ere o gwọlọ nọ ma rẹ yọrọ uyoyou mai re o sae jọ gaga. Nọ ma te gbabọ kẹe, o rẹ sai whrehe je kiekpo no. Jesu o rri uyoyou riẹ kẹ Jihova evevere he. O kru rie gaga evaọ etoke nọ ọ jọ otọakpọ na. Joma ruẹ oghẹrẹ nọ o ro ru ere.

¹² Wariẹ roro kpahe okenọ Jesu ọ gbẹ jọ ọmaha nọ ọ rọ daji etẹmpol evaọ obọ Jerusalẹm okenọ ọsẹgboni riẹ a je kpo. Kareghẹhọ inọ ọ ta kẹ ọsẹgboni riẹ nọ e jẹ gwọlọ iẹe inọ: “Eme wha jẹ be guọlọ omẹ? Wha gbẹ riẹ nọ mẹ rẹ jọ eva uwou Ọsẹ mẹ?” (Luk 2:49) Okenọ Jesu ọ gbẹ jọ ọmaha, u muẹro inọ ọ re kareghẹhọ uzuazọ nọ ọ jọ obọ odhiwu yeri hi. Ghele na, uyoyou riẹ kẹ Jihova, Ọsẹ riẹ, o jọ gaga. Ọ riẹ inọ ẹkwoma Jihova nọ ọ rẹ gọ ọ sai ro dhesẹ uyoyou nana. Fikiere, oria nọ o were Jesu oma te uwou Ọsẹ riẹ nọ ọ rẹ jọ o riẹ hẹ. O rẹ were iẹe re o kpohọ etẹe, yọ ọ rẹ gwọlọ kpo ho. Ofariẹ, orọnikọ ọ rẹ nya wọhọ oriughe gheghe he. O jariẹ oja re o wuhrẹ kpahe Jihova jẹ ta oware nọ ọ riẹ kpahe iẹe. Orọnikọ nọ ọ jọ ikpe 12 o ro mu uruemu nana họ ewo ho, yọ ọ jọ unuikpe yena serihọ họ.

¹³ Anwọ okenọ Ọmọ na ọ rọ jọ obọ odhiwu o bi ro wuhrẹ mi Ọsẹ riẹ. Eruẹaruẹ nọ e rrọ Aizaya 50:​4-6 i dhesẹ via inọ Jihova o wuhrẹ Ọmọ riẹ kpahe ọkwa Mesaya nọ ọ te jọ. Dede nọ uwuhrẹ nana u kugbe ẹriẹ kpahe edawọ jọ nọ i ti tei wọhọ Ọnọ Jihova o Wholo, Ọmọ na ọ roma kpotọ wuhrẹ. Uwhremu na nọ Jesu ọ ziọ otọakpọ jẹ rro t’ọzae no, o gbẹ jariẹ oja re o kpohọ uwou Ọsẹ riẹ je kuomagbe egagọ, je wuhrẹ ahwo eware nọ Jihova ọ gwọlọ. Ebaibol e ta kpahe epanọ Jesu ọ jẹ hai ro kpohọ iwou-egagọ na kẹse kẹse. (Luk 4:16; 19:47) Ma tẹ gwọlọ nọ uyoyou mai kẹ Jihova o rẹ jọ gaga jẹ tọ, o gwọlọ nọ ma re kpohọ iwuhrẹ ẹsikpobi, oria nọ ma jẹ gọ Jihova je wuhrẹ kpahe iẹe ziezi.

14, 15. (a) Fikieme Jesu ọ jẹ hae rọ gwọlọ nọ ọye ọvo ọ rẹ jọ oria ẹsejọ? (b) Ẹvẹ elẹ Jesu i ro dhesẹ nọ o wo usu okpekpe kugbe Ọsẹ riẹ je wo adhẹẹ kẹe?

¹⁴ Olẹ ikẹse kẹse yọ oware ofa nọ u fi obọ họ kẹ Jesu yọrọ uyoyou riẹ kẹ Jihova. Dede nọ ọ jẹ whẹtiẹ ahwo họ oma, o jẹ were iẹe re ọye ọvo ọ jọ oria evaọ ẹsejọ. Wọhọ oriruo, Luk 5:16 o ta nọ: “O te si oma no kpo obọ ẹwọ, ọ tẹ lẹ.” Matiu 14:23 o tẹ jẹ ta nọ: “Nọ o vi itu ibuobu na vrẹ [no], ọ tẹ nya kpo ehru ugbehru e lẹ, ọ ye ọvo: nọ owọwọ u te ọye ọvo ọ jọ etẹe.” Jesu ọ gwọlọ nọ ọye ọvo ọ rẹ jọ evaọ etoke nana gbe etoke efa, orọnikọ fikinọ ọ gwọlọ siomano ahwo ho, hayo kọ o mukpahe amọfa, rekọ ọ gwọlọ nọ ọye ọvo ọ rẹ jọ oria lẹ se Jihova, Ọsẹ obọ odhiwu riẹ.

¹⁵ Ẹsejọ nọ Jesu ọ tẹ be lẹ, ọ jẹ hae ta nọ “Abba, Ọsẹ.” (Mak 14:36) Okenọ Jesu ọ jọ akpọ, emọ a jẹ hai se ọsẹ rai “Abba.” O rrọ usu eme ọsosuọ nọ ọmọ o re ro wuhrẹ ẹmeọta. Ghele na, o jọ odẹ nọ a je se avọ adhẹẹ. Jesu ọ rehọ odẹ nana dhesẹ usu okpekpe nọ o wo kugbe Ọsẹ riẹ, gbe adhẹẹ odidi nọ o wo kẹe. Ma rẹ sae jọ elẹ Jesu kpobi nọ a kere fihọ Ebaibol na ruẹ onana. Wọhọ oriruo, evaọ Jọn uzou avọ 17, Jọn ukọ na o kere kpahe olẹ uthethei nọ Jesu ọ lẹ evaọ aso urere riẹ taure o te ti whu. O rẹ kẹ erere re ma wuhrẹ olẹ yena jẹ raro kele iei​—orọnikọ ma rẹ wariẹ eme Jesu na ha, rekọ ma rẹ daoma re ma lẹ se Ọsẹ obọ odhiwu mai no udu ze kẹse kẹse. Ma te bi ru ere, uyoyou mai kẹ Ọghẹnẹ o rẹ jọ gaga.

16, 17. (a) Ẹvẹ Jesu ọ rọ ta kpahe uyoyou nọ o wo kẹ Ọsẹ riẹ? (b) Oghẹrẹ vẹ Jesu o dhesẹ ọghọruo Ọsẹ riẹ?

¹⁶ Wọhọ epanọ ma ta ẹsejọ na, orọnikọ Jesu o dhe ẹme na “me you Ọsẹ na” ẹwẹwariẹ hẹ. Rekọ, ẹsibuobu ọ ta kpahe uyoyou nọ o wo kẹ Ọsẹ riẹ. Oghẹrẹ vẹ o ro ru ei? Jesu ọ ta nọ: ‘Ọsẹ Ọnowo odhiwu gbe akpọ, me jiri owhẹ.’ (Matiu 11:25) Nọ ma je wuhrẹ Abọ avọ 2 ọrọ obe nana, ma ruẹ inọ edhere jọ nọ Jesu o je ro jiri Ọsẹ riẹ họ amọfa nọ o je wuhrẹ kpahe Ọsẹ na. Wọhọ oriruo, ọ rehọ Jihova dhesẹ ọsẹ nọ ọ gwọlọ rọ vrẹ ọmọ ogbọfariẹ riẹ te epanọ ọsẹ na o je ro rẹro nọ ọmọ na o ti kurẹriẹ je zihe ze, nọ ọ ruẹ ọmọ na evaọ ugbo, ọ tẹ dhẹ bru ei je dede iei. (Luk 15:20) Oghẹrẹ nọ Jesu o dhesẹ uyoyou gbe erọvrẹ Jihova evaọ iku nana u mu urirẹ kẹhẹ!

¹⁷ Jesu o jiri Ọsẹ riẹ ẹsibuobu kẹ ọghọruo Riẹ. Ọ rehọ oriruo esẹgbini ahwo-akpọ nọ a gba ha ro dhesẹ epanọ u re mu omai ẹro te inọ Jihova ọ rẹ kẹ omai ẹzi ọfuafo nọ ma gwọlọ. (Luk 11:13) Jesu ọ tẹ jẹ ta kpahe ẹruore nọ Ọsẹ na ọ kẹ ahwo-akpọ. Jesu ọ rehọ evawere ta kpahe okenọ ọ te rọ wariẹ jọ kugbe Ọsẹ riẹ evaọ obọ odhiwu. (Jọn 14:28; 17:5) Ọ ta kẹ ilele riẹ kpahe ẹruore nọ Jihova ọ kẹ “uthuru okakao” na​—nọ a te rọ rria obọ odhiwu je wobọ evaọ esuo Mesaya na. (Luk 12:32; Jọn 14:2) Ọ rehọ ẹruore uzuazọ evaọ Aparadase rọ kẹ orumuomu nọ o te uwhu no omosasọ. (Luk 23:43) Idhere nana nọ Jesu ọ jẹ rọ ta kpahe ọghọruo Ọsẹ riẹ u fi obọ họ kẹe yọrọ uyoyou riẹ kẹ Jihova. Ilele Jesu buobu a ruẹ no inọ re a sae bọ uyoyou rai kẹ Jihova gbe ẹrọwọ rai ga, a rẹ ta kẹ amọfa kpahe Jihova gbe ẹruore rai.

Kọ Whọ te Raro Kele Uyoyou nọ Jesu O Wo kẹ Jihova?

18. Edhere vẹ ọ mai wuzou nọ ma rẹ rọ raro kele Jesu, kọ fikieme?

¹⁸ Edhere nọ ọ mai wuzou nọ ma sae rọ raro kele Jesu họ: Ma rẹ rọ eva, ẹwẹ, iroro gbe ogaga mai kpobi you Jihova. (Luk 10:27) Orọnikọ unu ọvo ma rẹ rọ ta nọ ma wo uyoyou utioye na ha, rekọ ma re dhesẹ iẹe via evaọ iruẹru mai. Orọnikọ unu ọvo Jesu ọ rọ ta nọ “me you ọsẹ na” ha. Ọ ta nọ: ‘Epanọ Ọsẹ na ọ ta kẹ omẹ ere me ru, re akpọ na ọ riẹ nọ me you Ọsẹ na.’ (Jọn 14:31) Setan ọ bọwo ahwo-akpọ ota inọ fiki oriobọ a be rọ gọ Jihova. (Job 2:​4, 5) Re Jesu ọ sai dhesẹ nọ ọrue koikoi Setan ọ ta na, ọ tẹ ziọ akpọ na re o dhesẹ epanọ o you Ọsẹ na te. O yoẹme kẹ Ọsẹ na te uwhu. Kọ whọ te raro kele Jesu? Kọ who ti dhesẹ kẹ akpọ na nnọ who gine you Jihova Ọghẹnẹ?

19, 20. (a) Fikieme u je wuzou re ma kpohọ iwuhrẹ ukoko ẹsikpobi? (b) Ẹvẹ ma re rri uwuhrẹ omobọ mai, eroro-didi, gbe olẹ?

¹⁹ A ma omai avọ iroro nọ ma re ro dhesẹ uyoyou utioye na. Fiki onana, Jihova o ru rie lọhọ re ma sae gọe evaọ edhere nọ uyoyou nọ ma wo kẹe o rẹ rọ jọ gaga. Nọ who te kpohọ ewuhrẹ, hae kareghẹhọ nọ who kpohọ etẹe re whọ gọ Ọghẹnẹ ra. Onana o kẹre te oma nọ who re kugbe inievo na evaọ ẹsuọ ile, olẹ, ezọgaviẹ, gbe obọ nọ who re wo evaọ iwuhrẹ na. Whọ rẹ sae jẹ jọ iwuhrẹ itieye na tudu họ ibe Ileleikristi ra awọ. (Ahwo Hibru 10:​24, 25) Iwuhrẹ Ileleikristi nọ who re kpohọ ẹsikpobi u re fi obọ họ kẹ owhẹ nọ uyoyou ra kẹ Ọghẹnẹ u re ro dhe ẹgẹga.

²⁰ Epọvo na uwuhrẹ omobọ ra, eroro-didi, gbe olẹ u re ru uyoyou ra kẹ Ọghẹnẹ jọ gaga. Rri enana wọhọ idhere nọ whẹ avọ Jihova ọvo wha rẹ rọ jọ kugbe. Nọ who bi wuhrẹ ẹme Ọghẹnẹ je roro didi kpahe iẹe na, o wọhọ ẹsenọ Jihova ọ be ta ẹme kẹ owhẹ. Whọ rẹ sae jọ olẹ ta eva ra kẹe. Kareghẹhọ inọ olẹ ra o rẹ jọ orọ ayare ọvo ho. U fo re whọ jọ olẹ ra yere Jihova kẹ eware nọ o ru kẹ owhẹ no, je jiri ei kẹ iruo igbunu riẹ. (Olezi 146:1) Ofariẹ, re whọ rehọ evawere gbe ajọwha jiri Jihova evaọ ẹgbede họ edhere nọ ọ mai woma nọ who re ro yere iei je dhesẹ nọ who you rie.

21. Ẹvẹ uyoyou kẹ Jihova u wuzou te, kọ eme ma te ta kpahe eva izoẹme efa nọ e rrọ aro na?

²¹ Re ma sai wo evawere bẹdẹ bẹdẹ, ma re you Ọghẹnẹ. Oware nọ a gwọlọ mi Adamu avọ Ivi kpobi oye, rekọ a sai ru ei hi. Uyoyou kẹ Ọghẹnẹ họ oware nọ u re fi obọ họ kẹ owhẹ thihakọ hayo fi odawọ kpobi kparobọ, jẹ kẹnoma kẹ oware uyoma. Onana u wuzou gaga otẹrọnọ ohwo ọ gwọlọ jọ olele Jesu. Evaọ uzẹme, ma te you Ọghẹnẹ ma re you ọrivẹ mai re. (1 Jọn 4:​20) Ma te jọ izoẹme efa nọ e rrọ aro na ta kpahe epanọ Jesu o ro dhesẹ uyoyou riẹ kẹ ahwo. Ma te jọ uzoẹme nọ ma bi ti te na ta kpahe oware nọ ahwo buobu a je ro si kẹle Jesu.

Ẹvẹ Whọ Sai ro Lele Jesu?

● Nọ ma tẹ be lẹ, ẹvẹ ma sai ro dhesẹ nọ ma fievahọ Jihova wọhọ epanọ Jesu o ru?​—Jọn 11:​41, 42; Ahwo Hibru 11:6.

● Ẹvẹ ma sae rọ rehọ oghẹrẹ nọ ma be rehọ odẹ Jihova ru iruo dhesẹ nọ ma you rie?​—Jọn 17:​6-8.

● Fikieme uyoyou kẹ Jihova o rọ gwọlọ nọ ma rẹ kẹnoma kẹ akpọ na wọhọ epanọ Jesu o ru?​—Jọn 17:​14-​16; Jemis 4:8.

● Ẹvẹ ma sai ro fi ohrẹ Jesu họ iruo re ma yọrọ uyoyou nọ ma wo kẹ Jihova?​—Eviavia 2:​1-5.

[Uwoho nọ o rrọ ẹwẹ-obe avọ 135]

“Ọ tẹ nya kpo ehru ugbehru e lẹ, ọ ye ọvo”