Ẹria Lele Uzi Kristi Na

“Whai ohwo ọ wha uye ohwo, re wha rọ ere ru uzi Kristi na gba.”—AHWO GALESHA 6:2.

 1. Fikieme a jẹ sae tae nọ uzi Kristi na yọ ogaga ulogbo rọ kẹ ewoma oruo nẹnẹ?

EVAỌ Rwanda, Isẹri Jihova erọ Hutu avọ Tutsi a fi izuazọ rai họ awa re a thọ ohwohwo no ikpakpe uyẹ nọ o jọ ẹkuotọ ọyena kẹle na. Ọraha ologbo o te Isẹri Jihova evaọ obọ Kobe, Japan, enọ i ku ahwo uviuwou rai fiẹ fiki otọ-nuhu ologbo jọ. Ghele, a kparoma vẹrẹ re a siwi amọfa nọ onana u kpomahọ. Ẹhẹ, iriruo nọ e rẹ sasa udu ro no akpọ na soso ze u dhesẹ nọ uzi Kristi u bi ruiruo nẹnẹ. U wo ẹgba owowoma.

 2. Ẹvẹ Kristẹndọm a ro vru no otoriẹ uzi Kristi na, kọ ẹvẹ ma re ro ru uzi oyena gba?

² Evaọ okiọvo na, eruẹaruẹ Ebaibol kpahe “edẹ urere” egaga nana i bi rugba. Ibuobu “a rẹ yọrọ oghẹrẹ egagọ” rekọ a vẹ “vro ogaga nọ o rọ eva riẹ.” (2 Timoti 3:1, 5) Maero evaọ Kristẹndọm, egagọ i zihe ruọ oware ọ omuruo no, orọnikọ oware nọ u re no udu ze he. Kọ oyena fikinọ o re bẹbẹ re a rria lele uzi Kristi? Ijo. Jesu ọ k’omai uzi nọ a rẹ sai lele he he. Kristẹndọm a riẹ otọ uzi oyena ha. Ọ rẹ sae fi eme enana nọ a rehọ ẹzi kere na họ iruo ho inọ: “Whai ohwo ọ wha uye ohwo, re wha rọ ere ru uzi Kristi na gba.” (Ahwo Galesha 6:2) Ma re “ru uzi Kristi na gba” ẹkwoma owha ohwohwo nọ ma rẹ wọ, orọnikọ aro-orokele otu Farisi re ma rọ aro koko fiba ewha inievo mai hi.

 3. (a) Eme họ ijaje jọ nọ a fiba uzi Kristi na? (b) Fikieme o jẹ thọ re a kuei họ nọ ukoko Ileleikristi o re wo izi hi u te no ijaje nọ Kristi ọ fodẹ na no?

³ Uzi Kristi na u kugbe ijaje Kristi Jesu kpobi—makọ orọ ẹta usiuwoma na gbe ewuhrẹ, re a ru ẹro na fuafo jẹ lọhọ, eruo udhedhẹ kugbe ọrivẹ mai, hayo orọ egbegbe osino ukoko na. (Matiu 5:27-30; 18:15-17; 28:19, 20; Eviavia 2:14-16) Uzẹme, o gba Ileleikristi họ re a koko ijaje Ebaibol na kpobi nọ i kpomahọ ilele Kristi. Rekọ o jọ etẹe kuhọ họ. Ukoko ulogbo Jihova, gbe ikoko ọvuọvo, a re fi izi gbe eruẹrẹfihọ nọ i fo jọ họ re e yọrọ ẹkpatiẹ owoma. (1 Ahwo Kọrint 14:33, 40) Whaọ, Ileleikristi a sai tube kokohọ họ otẹrọnọ a wo izi kpahe oke, oria, gbe epanọ a re ru iwuhrẹ enana ha! (Ahwo Hibru 10:24, 25) Ẹmeoyo kẹ izi areghẹ itieye nọ enọ i wo udu i fihọ evaọ ukoko na yọ abọ erugba uzi Kristi na.—Ahwo Hibru 13:17.

 4. Eme họ ogaga nọ o rọ emu egagọ efuafo?

⁴ Ghele, Ileleikristi uzẹme a rẹ kẹ egagọ rai uvẹ re o jọ elele izi nọ i fioka ha ha. A be gọ Jihova fikinọ ohwo jọ hayo ukoko jọ ọ ta kẹ ai nọ a ru erei hi. Ikpoye, ogaga nọ o be wọ ai kpohọ egagọ họ uyoyou. Pọl o kere nọ: “Uyoyou Kristi oye o rọ omai esuo.” (2 Ahwo Kọrint 5:14, ẹjẹlẹ ibieme na ọmai.) Jesu o jie kẹ ilele riẹ nọ a you ohwohwo. (Jọn 15:12, 13) Uyoyou omolahiẹ kẹ amọfa oye họ ehri uzi Kristi, yọ u re su hayo wọ Ileleikristi uzẹme evaọ oria kpobi, te evaọ uviuwou gbe evaọ ukoko na. Joma ruẹ epanọ o jẹ rọ ere.

Evaọ Uviuwou Na

 5. (a) Ẹvẹ esẹ gbe ini a sai ro ru uzi Kristi na gba evaọ uwou? (b) Eme emọ a gwọlọ mi esẹ gbe ini rai, kọ didi ezadhe esẹ gbe ini a re fi kparobọ re a sae rehọ iẹe kẹ?

⁵ Pọl ukọ na o kere nọ: “Whai ezae na, wha you eyae rai, wọhọ epanọ Kristi o you ichọche riẹ, ọ jẹ rehọ oma obọriẹ kẹe.” (Ahwo Ẹfẹsọs 5:25) Nọ ọzae ọ tẹ be rọ aro kele Kristi jẹ rọ uyoyou gbe otoriẹ yeri kugbe aye riẹ, yọ o bi ru abọ ologbo ọrọ uzi Kristi na gba. Ofariẹ, Jesu o dhesẹ uyoyou kẹ emaha, ọ wọ rai họ oma, ọ tẹ rehọ abọ kpahe ae, jẹ ghale ae. (Mak 10:16) Esẹ gbe ini nọ i bi ru uzi Kristi na gba a re je dhesẹ uyoyou kẹ emọ rai. Uzẹme, esẹ gbe ini jọ e riẹ nọ a rẹ rue riẹ wọhọ use-abọ re a raro kele oriruo Jesu evaọ onana. Ejọ rai e jaja tere notọ ze he. Esẹ gbe ini, wha kuvẹ kẹ iroro itieye na re i kru owhai kpemu no edhesẹ uyoyou nọ o rọ owhai eva kẹ ai hi! U te he re whọ riẹ nọ who you emọ ra. U fo re a riẹ ere re. Yọ a rẹ sae riẹ ere he ajokpanọ whọ gwọlọ idhere nọ who re ro dhesẹ uyoyou ra.—Wawo Mak 1:11.

 6. (a) Kọ emọ a gwọlọ izi ọsẹ gbe oni, kọ fikieme whọ jẹ kuyo na ere? (b) Didi ẹjiroro kpahe izi nọ a jọ uviuwou na kẹ u fo nọ emọ a riẹ? (c) Didi enwoma a rẹ whaha nọ uzi Kristi o te bi titi evaọ uviuwou?

⁶ Evaọ okiọvo na, emọ e gwọlọ ekpọvio, nọ u dhesẹ nọ u fo re esẹ gbe ini rai a fi izi họ jẹ wha izi enana haro evaọ ẹsejọ ẹkwoma ọwhọkuo. (Ahwo Hibru 12:7, 9, 11) Makọ ere, a re fiobọhọ kẹ emaha na ẹmẹrera re a riẹ oware nọ a je fi izi enana họ: inọ esẹ gbe ini rai a you rai. Yọ a re wuhrẹ nọ uyoyou họ oware nọ o rẹ wọ ai koko izi esẹ gbe ini rai. (Ahwo Ẹfẹsọs 6:1; Ahwo Kọlọsi 3:20; 1 Jọn 5:3) Ute ọsẹ gbe oni orimuo o rẹ jọ re a wuhrẹ emaha re a fi ‘ogaga iroro’ rai họ iruo re a sae jẹ emamọ iroro uwhremu na kẹ omobọ rai. (Ahwo Rom 12:1; wawo 1 Ahwo Kọrint 13:11.) Evaọ abọdekọ riẹ, u fo re izi i bu hrọ hayo re ọwhọkuo ọ jọ avọ evega ha. Pọl ọ ta nọ: “Whai esẹ, wha ru emọ rai eva dha ha, ogbẹrọ ere he o vẹ te wha oyẹlẹ họ ae oma.” (Ahwo Kọlọsi 3:21; Ahwo Ẹfẹsọs 6:4) Nọ uzi Kristi u te bi titi evaọ uviuwou, o rẹ kuvẹ re a whọku avọ ofu-ọkpoo hayo avọ emiẹsọ họ. Evaọ oghẹrẹ uviuwou otiọye na, udu u re kie emọ na vi je wo ọbọga, orọnikọ oma o rẹ jọ rai ehoo hayo jọ awawa ha.—Wawo Olezi 36:7.

 7. Evaọ idhere vẹ iwou Ebẹtẹle e jẹ rọ oriruo nọ a tẹ be t’ẹme te izi nọ a re fihọ kẹ uviuwou?

⁷ Ahwo jọ nọ i weze kpohọ iwou Ebẹtẹle no evaọ akpọ na soso a ta nọ itieye họ iriruo-ezi erọ izi owowa nọ a rẹ kẹ uviuwou. Dede nọ ahwo nọ e kpako no e riẹ, eria yena i re ruiruo wọhọ iviuwou.a Uzuazọ Ebẹtẹle o rọ avọ ona o tẹ jẹ gwọlọ unu izi jọ—evaọ uzẹme izi riẹ i bu vi erọ uviuwou gheghe. Ghele, ekpako nọ e be k’obaro evaọ Ebẹtẹle, evaọ ifisi, gbe abọ nọ a rẹ jọ kporo ebe a be daoma fi uzi Kristi họ iruo. A rri rie wọhọ iruo rai orọnikọ re a rẹro te iruo na ọvo ho rekọ re a rehọ ẹnyaharo ẹzi karo gbe “evawere ỌNOWO na” evaọ udevie ibe iruiruo rai. (Nehemaya 8:10) Fikiere, a be daoma ru eware evaọ edhere liọliọ avọ ọbọga re a ru oware nọ u w’iroro. (Ahwo Ẹfẹsọs 4:31, 32) Agbẹta nọ a rọ riẹ iviuwou Ebẹtẹle kẹ ẹzi oghọghọ rai na!

Evaọ Ukoko Na

 8. (a) Eme ọ rẹ jọ ute mai ẹsikpobi evaọ ukoko na? (b) Evaọ otọ iyero vẹ ahwo jọ a jọ yare hayo ru izi no?

⁸ Evaọ ukoko na o rọ ute mai re, re ma bọ ohwohwo ga evaọ ẹzi uyoyou. (1 Ahwo Tẹsalọnika 5:11) Fikiere Ileleikristi kpobi a rẹ yọrọ oma re a seba efiba ewha amọfa ẹkwoma udu obọ rai nọ a re ro fi izi eware nọ e jọ ẹro rai woma họ kẹ amọfa. Eva ẹsejọ, ahwo jọ a re kere se Watch Tower Society be nọ kpahe izi nọ i kpomahọ eme wọhọ oghẹrẹ ighe nọ a re riwi, ebe nọ a re se, gbe eware arozaha. Ghele, a kẹ Ukoko-Ulogbo udu re ọ kiẹ eware itieye je fi izi hotọ kẹ ai hi. Evaọ ẹsibuobu, enana yọ eme nọ omomọvo hayo ọnọ o wuzou uviuwou ọ rẹ jiroro kpahe, fiki uyoyou nọ o wo kẹ izi Ebaibol. Efa a re nwene ẹjiroro gbe ọkpọvio Ukoko-Ulogbo kpohọ izi. Wọhọ oriruo, evaọ Uwou-Eroro Na ọrọ March 15, 1996 (ọrọ Oyibo), uzoẹme owoma jọ o riẹ nọ o tudu họ ekpako awọ re a ru iweze ẹruorote bru ahwo ukoko na ẹsikpobi. Kọ a kere i rie re o jọ uzi? Ijo. Dede nọ ahwo nọ a sai lele ẹjiroro na a ruẹ irere buobu, oma o kẹ ekpako jọ uvẹ re a sai ru ere he. Epọvo na re, uzoẹme na “Enọ Ahwo nọ A s’Ebe” evaọ Uwou-Eroro Na ọrọ April 1, 1995 (ọrọ Oyibo), o fodẹ eware nọ a rẹ whaha re a siọ ọghọ ba esino ame-ọhọ, wọhọ ehaa-igbe ilogbo nọ a re ru hayo ile obokparọ nọ a re gbe wariẹ. Ahwo jọ a rehọ ohrẹ nana thomawa no, tube ru uzi noi ze inọ re a vi ekade ọbọga o thọ!

 9. Fikieme u je wuzou re ma whaha inoma gbe ẹdhọ nọ ma re gu amọfa?

⁹ Dai roro re, inọ, otẹrọnọ “uzi ufuoma nọ o gba kiete na” o re viharo evaọ udevie mai, ma rẹ riẹ nọ orọnikọ iroro Ileleikristi kpobi e rọ epọvo na ha. (Jemis 1:25) Kọ ma re si ikẹ otẹrọnọ ahwo a wo ọvuọ iroro riẹ kẹ omobọ rai nọ o raha uzi Ikereakere he? Ijo. Ere oruo u re dhesẹ nọ ma be wha ohẹriẹ ze. (1 Ahwo Kọrint 1:10) Pọl, nọ ọ jẹ vẹvẹ omai unu kpahe ẹdhoguo ibe Oleleikristi mai, ọ tẹ ta nọ: “Eva aro olori riẹ ọvo o je dikihẹ hayo ekie, yọ ate kpare iẹe dikihẹ, keme Olori na ọ rẹ sai ru ei dikihẹ.” (Ahwo Rom 14:4) Ma re ru Jihova eva dha otẹrọnọ ma rẹ t’eme iyoma kpahe ohwohwo evaọ eme nọ a seba kẹ iroro ejẹ omomọvo.—Jemis 4:10-12.

10. Amono a romu re a rẹro te ukoko na, kọ ẹvẹ ma sae rọ thọ ae uke?

¹⁰ Joma kareghẹhọ re, inọ, a rehọ ekpako na mu re a sẹro uthuru Ọghẹnẹ. (Iruẹru 20:28) A rọ etẹe re a fiobọhọ. Ma rẹ sae nya bru rai odode kẹ ohrẹ, keme emọ-uwuhrẹ Ebaibol a rọ a tẹ jẹ riẹ oware nọ a t’ẹme te no evaọ ebe ọ Watch Tower Society. Nọ ekpako na a tẹ ruẹ uruemu nọ u re su kpohọ ẹraha izi Ikereakere, a rẹ rehọ ababọ ozodhẹ kẹ ohrẹ nọ u fo. (Ahwo Galesha 6:1) Ahwo ukoko a re lele uzi Kristi na ẹkwoma ẹmeoyo kẹ ithuru-igodẹ eghaghae enana, enọ e be kobaro evaọ udevie rai.—Ahwo Hibru 13:7.

Ekpako A re Fi Uzi Kristi na họ Iruo

11. Ẹvẹ ekpako a re fi uzi Kristi na họ iruo evaọ ukoko na?

¹¹ Oma o rẹ wọ ekpako na re a ru uzi Kristi gba evaọ ukoko na. A rẹ kobaro evaọ ẹta usiuwoma na, wuhrẹ no Ebaibol na ze re a ruẹse nyate idu yọ, wọhọ ithuru-igodẹ iyoyou, iwowolẹ, a rẹ t’ẹme kẹ “enọ udu u re bro.” (1 Ahwo Tẹsalọnika 5:14) A rẹ whaha iruemu nọ i fo Ileleikristi hi nọ e viodẹ gaga evaọ egagọ Kristẹndọm buobu. Uzẹme, akpọ ọnana ọ be whrẹkpo no kpata kpata, yọ wọhọ Pọl, ekpako a rẹ sae ruawa kẹ uthuru na; rekọ a rẹ jọ owowa nọ a bi yeri kugbe ọdawẹ itieye na.—2 Ahwo Kọrint 11:28.

12. Okenọ Oleleikristi ọ tẹ nya bru ọkpako kẹ obufihọ, ẹvẹ ọkpako na ọ rẹ kuyo?

¹² Wọhọ oriruo, Oleleikristi ọ rẹ sae rọ ẹme obọdẹ jọ nọ Ikereakere e nwane t’ẹme te gbiae he hayo nọ o gwọlọ ẹwawọ izi Ileleikristi buobu hu bru ọkpako. Ẹsejọhọ a wọ riẹ kpehru evaọ oria iruo riẹ nọ u wo osa nọ u bu vi orọ ọsosuọ rekọ avọ owha-iruo ulogbo. Hayo ọsẹ ọmaha Oleleikristi nọ ọ rọwo ho ọ be gwọlọ eware buobu mi ei te epanọ e sae ro kpomahọ odibọgba riẹ. Evaọ eme itieye na ọkpako o re si oma no iroro obọ riẹ. Ikpoye, kọ o re rovie Ebaibol na je fiobọhọ kẹ ohwo na jiroro kpahe ehri-izi nọ i wuzou. Ọ rẹ sae rehọ Watch Tower Publications Index ro ruiruo, otẹrọnọ obe na o riẹ, re ọ gwọlọ oware nọ ‘ọrigbo ẹrọwọ gbe areghẹ’ na ọ ta no kpahe ẹme ọyena evaọ Uwou-Eroro Na gbe ebe efa. (Matiu 24:45) Rekọ, ẹvẹ otẹrọnọ Oleleikristi na ọ jiroro nọ u woma te evaọ aro ọkpako na ha? Otẹrọnọ ẹjiroro na o wọso ujaje hayo uzi Ebaibol jọ họ, Oleleikristi na ọ rẹ te ruẹ nọ ọkpako na o vuhu udu omomọvo nọ ọ rẹ rọ jiroro otiọye na mu, nọ ọ riẹ nọ “kohwo kohwo ọvuọ uye riẹ ọ rẹ te wha.” Rekọ Oleleikristi na ọ rẹ kareghẹhọ inọ “koware koware nọ ohwo ọ kọ e, oye o re vuẹ.”—Ahwo Galesha 6:5, 7.

13. Ukpenọ a kẹ iyo ovavo kẹ enọ hayo kẹ iroro obọ rai, fikieme ekpako a je fiobọhọ kẹ amọfa jiroro kẹ omobọ rai kpahe eware?

¹³ Fikieme ọkpako nọ o wo otoriẹ o je ru enẹ? O tẹ kawo fiki ẹjiroro ivẹ. Orọ ọsosuọ, Pọl ọ ta kẹ ukoko jọ inọ ọ rọ ‘olori ẹrọwọ rai hi.’ (2 Ahwo Kọrint 1:24) Ọkpako na, evaọ obufihọ kẹ oniọvo riẹ re ọ rehọ Ikereakere na jiroro re ọ riẹ iroro jẹ, yọ ọ be raro kele uruemu Pọl. Ọ riẹ nọ udu riẹ u wo umuo, wọhọ epanọ Jesu o vuhumu nọ udu riẹ u wo umuo. (Luk 12:13, 14; Jud 9) Evaọ okiọvo na, ekpako a rẹ kẹ obufihọ, makọ ohrẹ ogaga Ikereakere evaọ oria nọ u je fo. Orọ avivẹ, ọkpako na ọ be rehọ ere wuhrẹ ibe Oleleikristi riẹ. Pọl ukọ na ọ ta nọ: “Emu ọgaga ọ rọ kẹ e nọ e route no nọ, i wo areghẹ te epanọ a sae hẹriẹ uwoma no uyoma.” (Ahwo Hibru 5:14) Fikiere, re a rro te ẹkpako, u fo re ma fi ẹgba iroro mai họ iruo, orọnikọ ma rẹ rẹro so ohwo jọ ẹsikpobi re ọ jiroro k’omai hi. Ọkpako na, ẹkwoma edhesẹ kẹ ibe Oleleikristi riẹ epanọ ọ rẹ rọ rehọ Ikereakere na jiroro, yọ o bi fiobọhọ kẹe re ọ nyaharo.

14. Ẹvẹ ahwo nọ e kpako no a re ro dhesẹ nọ a fievahọ Jihova?

¹⁴ Ma rẹ sai wo ẹrọwọ inọ Jihova Ọghẹnẹ ẹkwoma ẹzi ọfuafo riẹ ọ rẹ te kpọ idu egegagọ uzẹme. Fikiere, Ileleikristi nọ e kpako a rẹ gwọlọ nyate idu inievo rai, a rẹ lẹ ai, wọhọ epanọ Pọl ukọ na o ru. (2 Ahwo Kọrint 8:8; 10:1; Filimọn 8, 9) Pọl ọ riẹ nọ ohwo nọ o kiẹrẹe he ọye rẹ gwọlọ izi nọ e rẹ kpọe re ọ seba eghoro, orọnikọ ohwo okiẹrẹe he. (1 Timoti 1:9) Orọnikọ o je viẹro ku inievo riẹ hẹ, rekọ o fievahọ ai. Ro se ukoko jọ o kere nọ: “Ma wo eva ifihọ eva Ọnowo na kpahe owhai.” (2 Ahwo Tẹsalọnika 3:4) Ẹrọwọ Pọl, evaifihọ riẹ, gbe udu riẹ u ghine ru abọ ologbo ro fi ọwhọ họ Ileleikristi eyena. Ekpako gbe esẹro ọnyawariẹ nẹnẹ a wo ute ovo na. Ẹvẹ ezae ẹrọwọ enana e rọ omosasọ k’omai te, nọ a be rehọ uyoyou sẹro uthuru Ọghẹnẹ na!—Aizaya 32:1, 2; 1 Pita 5:1-3.

Eria Lele Uzi Kristi Na

15. Didi enọ jọ ma sae nọ oma mai re ma ruẹ sọ ma bi fi uzi Kristi na họ iruo evaọ usu mai kugbe inievo mai?

¹⁵ U fo re mai kpobi a hae kiẹ oma mai riwi ẹsikpobi sọ ma be rria lele jẹ wha uzi Kristi na haro. (2 Ahwo Kọrint 13:5) Uzẹme, mai kpobi a rẹ sai wo erere ẹkwoma ẹnọ inọ: ‘Kọ mẹ rọ ọbọga manikọ me re gu inoma? Mẹ rọ owowa manikọ me re ru vrẹ oma? Kọ me bi dhesẹ ororokẹ rọ kẹ amọfa manikọ mẹ yọ atanure?’ Oleleikristi ọ rẹ daoma fodẹ owọ nọ oniọvo riẹ ọ rẹ jẹ hayo onọ ọ rẹ jẹ hẹ hẹ nọ u te kpomahọ eme nọ a jọ Ebaibol na fodẹ gbiae he.—Ahwo Rom 12:1; 1 Ahwo Kọrint 4:6.

16. Ẹvẹ ma sai ro fiobọhọ kẹ ahwo nọ a bi rri oma rai kpotọ, re ma rehọ erei ru abọ ologbo ọrọ uzi Kristi na gba?

¹⁶ Evaọ eke ebẹbẹ enana, u wuzou k’omai re ma gwọlọ idhere nọ ma rẹ rọ tudu họ ohwohwo awọ. (Ahwo Hibru 10:24, 25; wawo Matiu 7:1-5.) Okenọ ma te rri inievo emezae gbe emetẹ mai, kọ emamọ iruemu rai e gbẹ jọ omai ẹro ghare vi oyẹlẹ rai? Rọ kẹ Jihova, omomọvo ọ rọ ghaghae. Avọ ọkora, orọ ahwo kpobi oma ere he, makọ rọ kpahe omobọ rai dede. Ahwo jọ a re rri ẹthọthọ gbe sebaẹgba omobọ rai ọvo. Re ma tudu họ ahwo itieye na awọ—gbe amọfa—kọ ma gbẹ daoma t’ẹme kugbe omọvo hayo imava evaọ k’ewuhrẹ k’ewuhrẹ, re ma jae riẹ oware nọ ma je rri ẹnyaze rai ghaghae gbe abọ ologbo nọ a be zọhọ fihọ ukoko na? Ẹvẹ oghọghọ riẹ o rẹ rro te re ma ru owha rai vori evaọ edhere ọnana re ma rọ ere ru uzi Kristi na gba!—Ahwo Galesha 6:2.

Uzi Kristi na O rọ Iruo!

17. Didi idhere sa-sa whọ be jọ ruẹ uzi Kristi na nọ u bi ruiruo evaọ ukoko ra?

¹⁷ Uzi Kristi na o rọ iruo evaọ ukoko Ileleikristi. Ma be rueriẹ kẹdẹ kẹdẹ—nọ ibe Isẹri a tẹ be rọ ọwhọ ta usiuwoma na, nọ a tẹ be sasa jẹ tudu họ ohwohwo awọ, nọ a tẹ be daoma gọ Jihova ghelọ ebẹbẹ ilogbo, nọ esẹ gbe ini a tẹ be daoma yọrọ emọ rai re a rọ idu oghọghọ you Jihova, nọ esẹro a te bi wuhrẹ Ẹme Ọghẹnẹ avọ uyoyou gbe omosasọ, bi ru uthuru na re a wo ọwhọ ọgaga nọ a rẹ rọ gọ Jihova bẹdẹ bẹdẹ. (Matiu 28:19, 20; 1 Ahwo Tẹsalọnika 5:11, 14) Nọ omai omomọvo ma te fi uzi Kristi họ iruo evaọ izuazọ mai, ẹvẹ onana o rẹ lẹliẹ udu Jihova were te! (Itẹ 23:15) Ọ gwọlọ nọ ahwo nọ i you uzi ogbagba riẹ kpobi a rria bẹdẹ bẹdẹ. Evaọ Aparadase nọ ọ be tha na, ma te ruẹ oke nọ ohwo-akpọ ọ te rọ jọ gbagba, oke nọ ọ te kare uzioraha, gbe okenọ iroro idu mai kpobi e te kpọvi. Ẹvẹ osaohwa riẹ o te rro te fiki ẹria lele uzi Kristi na!

[Footnote]

Eme Who Roro?

◻ Fikieme Kristẹndọm a ro ku ẹjiroro uzi Kristi na fiẹ?

◻ Ẹvẹ ma rẹ sae ro fi uzi Kristi na họ iruo evaọ uviuwou na?

◻ Re a fi uzi Kristi na họ iruo evaọ ukoko na, eme ma rẹ whaha, kọ eme ma re ru hrọ?

◻ Ẹvẹ ekpako a re ro yoẹme kẹ uzi Kristi na evaọ iruẹru rai kugbe ukoko na?

[Picture on page 30]

Ẹgwọlọ ologbo ọmọ ra họ uyoyou

[Picture on page 31]

Ẹvẹ ekpako iyoyou mai e rọ omosasọ k’omai te!