Amono Họ Egbodibo Ọghẹnẹ Nẹnẹ?

“Ete mai obọ Ọghẹnẹ o nọze; ọnọ oru omai te kẹ iruiruo ọvọ ọkpokpọ na.”—2 AHWO KỌRINT 3:5, 6.

 1, 2. Didi owha-iruo Ileleikristi ikpe-udhusoi ọsosuọ na kpobi a wo kugbe, kọ ẹvẹ eware i ro nwene?

EVAỌ ikpe-udhusoi ọsosuọ ọrọ Ekele Oke mai na, Ileleikristi kpobi a w’obọ evaọ owha-iruo jọ nọ u wuzou gaga—owha-iruo nọ a rẹ rọ vuẹ emamọ usi na. A wholo i rai kpobi a tẹ jẹ jọ egbodibo ọvọ ọkpokpọ na. Ejọ i wo ewha-iruo efa, wọhọ orọ ewuhrẹ evaọ ukoko na. (1 Ahwo Kọrint 12:27-29; Ahwo Ẹfẹsọs 4:11) Esẹ gbe ini a wo ewha-iruo egbẹgbẹdẹ evaọ uviuwou na. (Ahwo Kọlọsi 3:18-21) Rekọ aikpobi a w’obọ evaọ ugogo iruo usiuwoma ota nọ o r’oja na. Evaọ Griki ọsosuọ nọ a ro kere Ikereakere Ileleikristi na, a se owha-iruo nana di·a·ko·niʹa—iruo, hayo odibọgba.—Ahwo Kọlọsi 4:17.

² Nọ oke o be nyaharo na, eware i te nwene. Utu ahwo jọ e tẹ roma via nọ a te riẹ wọhọ isu-egagọ, enọ i dhesẹ nọ ae ọvo a wo uvẹ-ọghọ usiuwoma ota na. (Iruẹru 20:30) Isu-egagọ na yọ utu osese evaọ udevie enọ i se oma rai Ileleikristi. A tẹ te riẹ otu ologbo ọdekọ na wọhọ ahwo gheghe. Dede nọ a wuhrẹ ahwo gheghe na nnọ a wo ugogo ewha-iruo jọ nọ a re ru, wọhọ azọhọ nọ a re ru kẹ ẹruorote isu-egagọ na, ibuobu rai i zihe ruọ enọ e rẹ kezọ kẹ usiuwoma nọ a be ta ọvo no.

 3, 4. (a) Ẹvẹ ahwo evaọ Kristẹndọm a re ro zihe ro egbodibo? (b) Ono a re se ọgbodibo evaọ Kristẹndọm, kọ fikieme onana u ro wo ohẹriẹ evaọ udevie Isẹri Jihova?

³ Isu-egagọ na e ta nọ ae yọ egbodibo (onọ a si no ubiẹme na “odibo” ze, nọ o rọ otofa ọ di·aʹko·nos).a Re a tẹ jọ egbodibo, a re no ekọleji hayo isukulu ichọche nwrotọ no a vẹ rehọ ai romu. The International Standard Bible Encyclopedia o ta nọ: “ ’Romu’ gbe ‘eromuo’ i dikihẹ kẹ obọdẹ ọkwa ọ egbodibo hayo izerẹ ẹkwoma obọdẹ ewuhrẹ nọ a nya, avọ ẹgba nọ a re ro whowho Ẹme na hayo wozẹ emuemu no ohwo oma, hayo ru ivẹ na.” Ono ọ rẹ rehọ egbodibo na romu? The New Encyclopædia Britannica o ta nọ: “Evaọ ichọche nọ i wo uruemu na n’otọ ze, ohwo nọ ọ rẹ rehọ ai romu họ ibishọpo. Evaọ ichọche Presbyteria, egbodibo nọ i wo ekwa ilogbo na a rẹ rehọ ahwo mu.”

⁴ Fikiere, evaọ ichọche Kristẹndọm, uvẹ-ọghọ nọ a rọ jọ ọgbodibo o rọ kẹ umutho ahwo jọ ọvo. Ghele na, ere o rọ họ evaọ udevie Isẹri Jihova. Eme jabọ? Keme o jọ ere he evaọ ukoko Ileleikristi ikpe-udhusoi ọsosuọ na.

Amono A Ghinẹ Rọ Egbodibo Ọghẹnẹ?

 5. Wọhọ epanọ Ebaibol na ọ ta, ahwo nọ a rẹ jọ egbodibo a kugbe amono?

⁵ Wọhọ epanọ Ebaibol ọ ta, egegagọ Jihova kpobi—te erọ odhiwu gbe erọ otọakpọ—a rọ egbodibo. Enjẹle e gbodibo kẹ Jesu. (Matiu 4:11; 26:53; Luk 22:43) Enjẹle a re je “ru iruo fiki otu nọ i re ti wo esiwo na.” (Ahwo Hibru 1:14; Matiu 18:10) Jesu ọ jọ ọgbodibo. Ọ ta nọ: “Ọmọ ohwo ọ ze re a gba odibo kẹ e he, rekọ ọ rẹ gba odibo.” (Matiu 20:28; Ahwo Rom 15:8) Fikiere, nọ o rọnọ ilele Jesu a re lele “ithihi riẹ” na, u re gbunu hu inọ a rẹ jọ egbodibo re.—1 Pita 2:21.

 6. Ẹvẹ Jesu o ro dhesẹ nọ ilele riẹ a rẹ jọ egbodibo?

⁶ Taure ọ tẹ te nwani tovrẹ kpohọ odhiwu, Jesu ọ ta kẹ ilele riẹ nọ: “Wha wuhrẹ ahwo erẹwho kpobi, wha họ ae ame evaọ odẹ Ọsẹ, gbe Ọmọ gbe Ẹzi Ẹri, wha wuhrẹ ai, re a ru eware kpobi nọ mẹ vuẹ owhai.” (Matiu 28:19, 20) Ilele Jesu a rẹ jọ iru-ilele—egbodibo. Ilele ekpokpọ nọ a ru a re wuhrẹ epanọ a re ro koko eware kpobi nọ Jesu o jie, kugbe ujaje eruo ilele na. Ọzae hayo aye, ọkpako hayo ọmaha, uvi olele Jesu Kristi ọ rẹ jọ ọgbodibo.—Joẹl 2:28, 29.

 7, 8. (a) Ikereakere vẹ i dhesẹ nọ Ileleikristi uzẹme kpobi a rẹ jọ egbodibo? (b) Didi enọ e rẹ romavia kpahe eromuo?

⁷ Rọwokugbe onana, evaọ ẹdẹ Pẹntikọst 33 C.E., ilele Jesu nọ e jariẹ kpobi, ezae gbe eyae, a kuomagbe evaọ ẹta kpahe “iruo ogaga nọ Ọghẹnẹ [o] ru.” (Iruẹru 2:1-11) Ofariẹ, Pọl ukọ na o kere nọ: “Iroro eva ohwo ọ rẹ rọ rọwa ọ vẹ rọ ere wo unuzou, ọ vẹ jẹ rehọ igbenu riẹ ta via, a vẹ rọ ere siwi ei.” (Ahwo Rom 10:10) Orọnikọ utu isu-egagọ jọ ọvo Pọl o kere eme eyena se he, rekọ se “enọ e rọ evaọ Rom kpobi, enọ Ọghẹnẹ o you.” (Ahwo Rom 1:1, 7) Epọvo na, “erezi na nọ e rọ obọ Ẹfẹsọs, enọ i wo orọwọ eva Kristi Jesu” kpobi a rẹ “wha eviẹ ọruẹrẹ kpahọ usiuwoma udhedhẹ họ awọ rai.” (Ahwo Ẹfẹsọs 1:1; 6:15) Yọ ahwo kpobi nọ a yo eme ileta nọ a kere se ahwo Hibru na a rẹ ‘yọrọ ọtavia ẹgbede ẹruore rai na whawha ababọ enuho.’—Ahwo Hibru 10:23.

⁸ Rekọ okevẹ ohwo o re ro zihe ruọ ọgbodibo? Koyehọ, okevẹ a rẹ rọ rehọ iẹe romu? Kọ ono ọ rẹ rehọ iẹe romu?

Eromuo Wọhọ Ọgbodibo—Okevẹ?

 9. Okevẹ a rọ rehọ Jesu mu, kọ ono ọ rehọ e riẹ mu?

⁹ Kpahe okenọ gbe ohwo nọ ọ rẹ rehọ ohwo mu, roro kpahe oriruo Jesu Kristi. Orọnikọ o wo obe no oria isukulu ichọche jọ ze he re o ro dhesẹ nọ ọgbodibo ọ rọ, yọ uvumọ ohwo ọ rehọ e riẹ mu hu. Kọ fikieme ma jẹ sae ta nnọ ọ jọ ọgbodibo? Fikinọ eme Aizaya nọ a gie ẹwolo ku e jọ oma riẹ rugba: “Ẹzi Ọnowo na ọ rọ omẹ oma, fiki epanọ o ku ewhri ku omẹ re [mẹ] vuẹovuẹ emamọ usi.” (Luk 4:17-19; Aizaya 61:1) Eme eyena i dhesẹ vevẹ nọ a vi Jesu uwou re ọ vuẹ emamọ usi na. Ono o vi rie? Nọ o rọnọ ẹzi Jihova o wholo iei kẹ iruo na, Jihova Ọghẹnẹ họ ọnọ ọ rehọ Jesu mu. Okevẹ onana o rọ via? Ẹzi Jihova ọ ruọ Jesu oma okenọ ọ rọ họ-ame. (Luk 3:21, 22) Fikiere, eva oke ame-ọhọ riẹ a rọ rehọ iẹe romu.

10. Ono o re ru ọgbodibo Oleleikristi ‘te ziezi’?

¹⁰ Kọ ẹvẹ kpahe ilele ikpe-udhusoi ọsosuọ Jesu? Ọkwa rai wọhọ egbodibo o no obọ Jihova ze re. Pọl ọ ta nọ: “Ete mai obọ Ọghẹnẹ o nọze; ọnọ oru omai te kẹ iruiruo ọvọ ọkpokpọ na.” (2 Ahwo Kọrint 3:5, 6) Ẹvẹ Jihova o re ro ru egegagọ riẹ te kẹ egbodibo? Roro kpahe oriruo Timoti, ọnọ Pọl o se “odibo Ọghẹnẹ eva usiuwoma Kristi.”—1 Ahwo Tẹsalonika 3:2.

11, 12. Ẹvẹ Timoti o ro ru ẹnyaharo kpohọ ezihero ọgbodibo?

¹¹ Eme enana nọ a kere se Timoti na i fiobọhọ k’omai wo otoriẹ epanọ o ro zihe ruọ ọgbodibo: “Rekọ whẹ hari, ruẹabọhọ umutho [nọ] who wuhrẹ jẹ rọwo na, whọ vẹ jẹ riẹ ọnọ whọ jọ obọ riẹ wuhrẹ iẹe. Jegbe epanọ whọ riẹ ikere ẹri na nọ anwọ oke emaha ze, enọ i te epanọ i re ru owhẹ wha ẹro te usiwo eva ẹruọrọsuọ Jesu Kristi.” (2 Timoti 3:14, 15) Otọhotọ ẹrọwọ Timoti, onọ o rẹ wọe ta usiuwoma ẹgbede na, họ eriariẹ Ikereakere na. Kọ isase omobọ riẹ họ oware kpobi nọ a gwọlọ evaọ onana? Ijo. Timoti ọ gwọlọ obufihọ re o wo eriariẹ egbagba gbe otoriẹ abọ-ẹzi orọ oware nọ o bi se na. (Ahwo Kọlọsi 1:9) Fikiere, a ‘tẹzẹ Timoti rọwo.’ Nọ o rọnọ ọ riẹ Ikereakere na “nọ anwọ oke emaha ze” na, iwuhrẹ ọsosuọ riẹ họ oni riẹ gbe oniode riẹ, keme o wọhọ nọ ọsẹ riẹ ọ rọwo ho.—2 Timoti 1:5.

¹² Ghele na, eware efa i kuobọgbe ọgbodibo nọ Timoti o zihe ro. Orọ ọsosuọ, usu onya kugbe Ileleikristi evaọ ikoko ekẹloma o bọ ẹrọwọ riẹ ga. Ẹvẹ ma rọ riẹ? Keme okenọ Pọl ọ kake nyaku Timoti, “imoni nọ e rọ eva Listra gbe Ikọniọm a ta ẹme ezi” kpahe ọmoha na. (Iruẹru 16:2) Fibae, evaọ edẹ eyena inievo jọ e jẹ hai kere ileta bru ikoko na re a bọ ae ga. Yọ esẹro i je weze bru ai re a bọ ae ga. Eruẹrẹfihotọ itieye na i fiobọhọ kẹ Ileleikristi wọhọ Timoti nyaharo evaọ abọ-ẹzi.—Iruẹru 15:22-32; 1 Pita 1:1.

13. Okevẹ a rọ rehọ Timoti romu wọhọ ọgbodibo, kọ fikieme whọ jẹ sae ta nọ ẹnyaharo abọ-ẹzi riẹ o jọ etẹe kuhọ họ?

¹³ Fiki ujaje Jesu nọ a kere fihọ Matiu 28:19, 20 na, o rẹ sai mu omai ẹro nọ evaọ okejọ ẹrọwọ Timoti ọ wọ riẹ raro kele Jesu ọ tẹ họ-ame. (Matiu 3:15-17; Ahwo Hibru 10:5-9) Onana yọ oka oma kpobi nọ Timoti ọ rọ kẹ Ọghẹnẹ. Eva oke ame-ọhọ riẹ Timoti o te zihe ruọ ọgbodibo. No oke oyena vrẹ, uzuazọ riẹ, ẹgba riẹ, eware nọ o wo kpobi i te zihe ruọ erọ Ọghẹnẹ. Onana yọ abọ ologbo egagọ riẹ, ‘iruo efuafo.’ Ghele na, orọnikọ Timoti ọ r’abọ muoma no umuo oke oyena vrẹ nnọ o le ọkwa t’obọ no ho. Ọ ruabọ họ ẹrro evaọ abọ-ẹzi, o te zihe ro ọgbodibo Oleleikristi nọ ọ kpako. Onana o roma via fiki usu okpekpe Timoti kugbe Ileleikristi nọ e kpako wọhọ Pọl, uwuhrẹ omobọ riẹ, gbe iruẹru usiuwoma ota ọwhọ riẹ.—1 Timoti 4:14; 2 Timoti 2:2; Ahwo Hibru 6:1.

14. Nẹnẹ, ẹvẹ ohwo nọ “a ro mu kẹ uzuazọ ebẹdẹ bẹdẹ” o re ro ru ẹnyaharo kpohọ ẹjọ ọgbodibo?

¹⁴ Nẹnẹ, epọvo na eromuo kẹ odibọgba Ileleikristi na o rrọ re. A re fiobọhọ kẹ ohwo nọ “a ro mu kẹ uzuazọ ebẹdẹ bẹdẹ” re o wuhrẹ kpahe Ọghẹnẹ gbe ẹjiroro riẹ ẹkwoma uwuhrẹ Ebaibol. (Iruẹru 13:48) Ohwo na o re wuhrẹ epanọ o re ro koko ehri-izi Ebaibol evaọ uzuazọ riẹ jẹ lẹ se Ọghẹnẹ avọ emamọ ẹjiroro. (Olezi 1:1-3; Itẹ 2:1-9; 1 Ahwo Tẹsalonika 5:17, 18) Ọ rẹ nyusu kugbe amọfa nọ a rọwo ọ vẹ jẹ rehọ eruẹrẹfihotọ nọ ‘ọrigbo nọ o wo ẹrọwọ avọ areghẹ na’ o bi ru kpobi ro ruiruo. (Matiu 24:45-47; Itẹ 13:20; Ahwo Hibru 10:23-25) Ere oruo, o ve ru ẹnyaharo evaọ othotha.

15. Eme ọ rẹ via evaọ okenọ ohwo ọ tẹ họ-ame no? ( Je rri oruvẹ-obotọ.)

¹⁵ Uwhremu na, ọmọ-uwuhrẹ Ebaibol na, nọ o ti wo uyoyou kẹ Jihova Ọghẹnẹ je fi ẹrọwọ ọgaga họ idhe ẹtanigbo na no na, ọ vẹ gwọlọ nọ ọ rẹ rehọ oma riẹ kpobi mudhe kẹ Ọsẹ obọ odhiwu riẹ. (Jọn 14:1) O re ru omarọkẹ oyena evaọ olẹ riẹ kẹsena ọ vẹ họ-ame wọhọ oka ẹgbede ọrọ oware idhereno oyena. Ame-ọhọ riẹ họ ehaa eromuo riẹ keme umuo oke oyena vrẹ a rọ riẹe wọhọ odibo nọ ọ roma kpobi mudhe no, di·aʹko·nos, ọrọ Ọghẹnẹ. Ọ rẹ hẹrioma no akpọ na hrọ. (Jọn 17:16; Jemis 4:4) Ọ rehọ oma riẹ kpobi kẹ no wọhọ ‘idhe ekpokpọ, ọrẹri, onọ Ọghẹnẹ ọ rẹ jẹrehọ’ riẹriẹriẹ. (Ahwo Rom 12:1)b Ọ rọ ọgbodibo Ọghẹnẹ, nọ ọ be raro kele Kristi.

Eme Họ Odibọgba Ileleikristi Na?

16. Didi ewha-iruo jọ Timoti o wo wọhọ ọgbodibo?

¹⁶ Eme odibọgba Timoti o kugbe? O wo ewha-iruo obọdẹ wọhọ ọnọ o je lele Pọl kperẹ. Yọ okenọ o te ọkpako ukoko no, Timoti o ruiruo gaga evaọ ewuhrẹ gbe ẹbọga ibe Ileleikristi. Rekọ ugogo abọ odibọgba riẹ, wọhọ epanọ o jọ kẹ Jesu gbe Pọl, họ ẹta emamọ usi na gbe eruo ilele. (Matiu 4:23; 1 Ahwo Kọrint 3:5) Pọl ọ ta kẹ Timoti nọ: “Rọ kẹ owhẹ, dikihẹ ga, thihi-akọ eva uye-oruẹ, re who ru iruo ọta-usiuwoma, je ru iruo ra gbunu.”—2 Timoti 4:5, ẹjẹlẹ ibieme na ọmai.

17, 18. (a) Odibọgba vẹ Ileleikristi a dhomahọ? (b) Ẹvẹ iruo usiuwoma ota na u wuzou te kẹ ọgbodibo Oleleikristi?

¹⁷ Epọvo na o rọ kẹ egbodibo Ileleikristi nẹnẹ. A bi ruiruo odibọgba ẹgbede, iruo usiuwoma ota, bi ku amọfa rẹriẹ kpohọ esiwo fiki idhe Jesu je bi wuhrẹ otu omarokpotọ re a se odẹ Jihova. (Iruẹru 2:21; 4:10-12; Ahwo Rom 10:13) A bi dhesẹ no Ebaibol na ze nnọ Uvie na ọvo họ ẹruore kẹ ahwo-akpọ nọ a be ruẹ uye je bi dhesẹ nọ makọ enẹna eware i re woma otẹrọnọ ma rria lele ehri-izi edhere Ọghẹnẹ. (Olezi 15:1-5; Mak 13:10) Rekọ ọgbodibo Oleleikristi ọ rẹ ta usiuwoma ọ epanọ a rẹ rọ rehọ ehri-izi Ileleikristi ku ebẹbẹ akpọ họ họ. Ukpoye, o re wuhrẹ nọ ‘omarọkẹ Ọghẹnẹ u wo eyaa uzuazọ enẹna gbe onọ o be tha.’—1 Timoti 4:8.

¹⁸ Uzẹme, egbodibo buobu a wo idhere efa nọ a bi jo ruiruo, enọ e rẹ sai wo ohẹriẹ no Oleleikristi jọ ruọ ọfa. Ibuobu i wo ewha-iruo uviuwou. (Ahwo Ẹfẹsọs 5:21–6:4) Ekpako gbe idibo iruiruo a wo ewha-iruo evaọ ukoko na. (1 Timoti 3:1, 12, 13; Taitọs 1:5; Ahwo Hibru 13:7) Ileleikristi buobu a bi fiobọhọ bọ Egwa Uvie. Ejọ i wo uvẹ-ọghọ igbunu orọ iruo wọhọ ahwo unevaze evaọ iwou Ebẹtẹle Watch Tower Society na jọ. Ghele na, egbodibo Ileleikristi kpobi a re w’obọ evaọ ẹta emamọ usi na. O gba ohwo kpobi họ. Abọ-owo evaọ iruo nana u re dhesẹ ohwo via wọhọ uvi ọgbodibo Oleleikristi.

Uruemu Ọgbodibo Oleleikristi

19, 20. Didi uruemu egbodibo Ileleikristi a re wo hrọ?

¹⁹ Egbodibo Kristẹndọm buobu a re rẹro nọ a kẹ ae adhẹẹ obọdẹ, a vẹ re edẹ wọhọ “ukọ Ọghẹnẹ” gbe “efada.” Ghele na, ọgbodibo Oleleikristi ọ rẹ riẹ nọ Jihova ọvo họ ọnọ o te kẹ adhẹẹ idudu. (1 Timoti 2:9, 10) Uvumọ ọgbodibo Oleleikristi o re siuru adhẹẹ okpehru otiọye na hayo gwọlọ edẹ-ova obọdẹ hẹ. (Matiu 23:8-12) Ọ riẹ nọ uzedhe otofa ọrọ di·a·ko·niʹa họ “iruo.” Ẹsejọ a rẹ rehọ ubiẹme nọ u kuobọgbei ro ruiruo evaọ Ebaibol na ro dhesẹ iruo odibọgba dẹẹ, wọhọ emu nọ a rẹ wọ fihọ emẹjẹ kẹ ahwo. (Luk 4:39; 17:8; Jọn 2:5) Dede nọ eroruiruo riẹ kpahe odibọgba Oleleikristi na oye o mai kpehru, di·aʹko·nos ọ gbẹ rọ odibo.

²⁰ Fikiere uvumọ ọgbodibo Oleleikristi ọ rẹ wọ oma kpehru hu. Uvi egbodibo Ileleikristi—makọ enọ i wo ewha-iruo obọdẹ evaọ ukoko na—yọ erigbo omarokpotọ. Jesu ọ ta nọ: “Ohwo nọ ọ rẹ te jọ udevie rai rua, ọ rẹ te jọ odibo rai. Ohwo nọ ọ rẹ te jọ aro udevie rai, ọ rẹ te jọ ọrigbo rai.” (Matiu 20:26, 27) Nọ o je dhesẹ kẹ ilele riẹ emamọ uruemu nọ a re wo, Jesu ọ tẹ wozẹ awọ rai, bi ruiruo ọrigbo nọ ọ mai kpotọ kpobi. (Jọn 13:1-15) Ẹvẹ onana o rọ iruo omarokpotọ te! Fikiere, egbodibo Ileleikristi a rẹ rọ omarokpotọ gọ Jihova Ọghẹnẹ gbe Jesu Kristi. (2 Ahwo Kọrint 6:4; 11:23) A re dhesẹ omarokpotọ evaọ odibọgba kẹ ohwohwo. Yọ okenọ a tẹ ta usiuwoma na, yọ a be rehọ ababọ oriobọ gbodibo kẹ erivẹ rai nọ e rọwo ho.—Ahwo Rom 1:14, 15; Ahwo Ẹfẹsọs 3:1-7.

Thihakọ Evaọ Odibọgba Na

21. Ẹvẹ a rọ hwosa kẹ Pọl fiki ithihakọ evaọ odibọgba na?

²¹ Rọkẹ Pọl, re a jọ ọgbodibo o gwọlọ ithihakọ. Ọ ta kẹ ahwo Kọlọsi nọ o thihakọ eware buobu re ọ sae ta usiuwoma na kẹ ae. (Ahwo Kọlọsi 1:24, 25) Rekọ, fikinọ o thihakọ, ibuobu e tẹ jẹ emamọ usi na rehọ a te zihe ruọ egbodibo. A te yẹ ai wọhọ emọ Ọghẹnẹ gbe inievo Jesu Kristi, avọ irẹro ẹjọ emama ẹzi kugbei evaọ obọ odhiwu. Ẹvẹ onana o rọ osohwa oruaro te kẹ ithihakọ!

22, 23. (a) Fikieme egbodibo Ileleikristi nẹnẹ a jẹ gwọlọ ithihakọ? (b) Didi ubi igbunu u re no akothiho Ileleikristi ze?

²² Ithihakọ e r’oja nẹnẹ kẹ enọ e ghinẹ rọ egbodibo Ọghẹnẹ. Ibuobu i bi lele ẹyao hayo edada owho muabọ kẹdẹ kẹdẹ. Eyewọ—nọ ibuobu rai i wo ọrivẹ-orọo ho—a bi ruiruo gaga re a yọrọ emọ rai. Avọ aruọwha, emọ nọ e rrọ isukulu i bi mugba kẹ ikpomahọ ethọthọ nọ e wariẹ e rae họ. Ileleikristi buobu e be họre gaga kugbe ẹgaga abọ-ugho. Yọ ibuobu e be ruẹ-uye ukpokpoma hayo ọbẹwẹ fiki “oke ẹbẹbẹ” inẹnẹ na! (2 Timoti 3:1) Ẹhẹ, enwenọ egbodibo ima ezeza Jihova inẹnẹ na a rẹ sae ta wọhọ Pọl ukọ na nọ: “Eva eware kpobi ma dhesẹ oma mai, wọhọ iruiruo Ọghẹnẹ eva odiri ọwhawha.” (2 Ahwo Kọrint 6:4) Oma o rẹ lọhọ egbodibo Ileleikristi hi. A re ghine jiri ai fiki akothiho rai.

²³ Ofariẹ, wọhọ epanọ o jọ kẹ Pọl, akothiho ọ rẹ mọ ibi igbunu. Ẹkwoma ithihakọ, ma rẹ yọrọ usu okpekpe mai kugbe Jihova je ru udu riẹ ghọghọ. (Itẹ 27:11) Ma rẹ jẹ bọ ẹrọwọ mai ga je ru ilele, fiba okugbe-inievo na. (1 Timoti 4:16) Jihova ọ sẹro egbodibo riẹ no jẹ ghale odibọgba rai no evaọ edẹ urere enana. Fikiere, a koko erọ urere 144,000 na họ no, yọ ima ahwo efa a wo irẹro imuẹro ọrọ ewo uzuazọ ebẹdẹ bẹdẹ evaọ otọakpọ aparadase. (Luk 23:43; Eviavia 14:1) Uzẹme, odibọgba Oleleikristi na ghinọ odhesẹvia ohrọ Jihova. (2 Ahwo Kọrint 4:1) Jomai kpobi ma rri rie ghaghae jẹ kẹ uyere nọ ibi riẹ e te jọ bẹdẹ bẹdẹ.—1 Jọn 2:17.

[Footnotes]

Kọ Whọ Sae k’Iyo Nana Vevẹ?

• Didi owha-iruo Ileleikristi ikpe-udhusoi ọsosuọ na kpobi a wo?

• Okevẹ gbe ono ọ rẹ rehọ ọgbodibo Oleleikristi romu?

• Didi uruemu ọgbodibo Oleleikristi o re wo?

• Fikieme ọgbodibo Oleleikristi o je thihakọ evaọ aro ebẹbẹ?

[Iwoho nọ e rrọ ẹwẹ-obe avọ 14, 15]

A wuhrẹ Timoti ẹme Ọghẹnẹ no emaha ze. O zihe ruọ ọgbodibo nọ a romu evaọ okenọ ọ họ-ame

[Uwoho nọ o rrọ ẹwẹ-obe avọ 16]

Ame-ọhọ họ oka omarọkẹ Ọghẹnẹ u te je kpoka họ eromuo ohwo wọhọ ọgbodibo

[Uwoho nọ o rrọ ẹwẹ-obe avọ 18]

U re no egbodibo Ileleikristi eva ze re a gbodibo