Ẹkiẹvia “Eware Ididi Ọghẹnẹ”

“Ẹzi ọ rẹ guọlọ eware kpobi via, makinọ eware ididi Ọghẹnẹ.”—1 AHWO KỌRINT 2:10.

 1. Uzẹme Ebaibol jọ vẹ e rẹ wha evawere se emọ-uwuhrẹ Ebaibol ekpokpọ?

IBUOBU mai nọ e rrọ ukoko Ileleikristi na ma sae kareghẹhọ epanọ eva e were omai te nọ ma kaki vuhu uzẹme na mu. Ma wuhrẹ kpahe epanọ odẹ Jihova o wuzou te, oware nọ ọ jẹ kuvẹ kẹ uye-oruẹ, oware nọ ahwo jọ a bi ro kpohọ obọ odhiwu, gbe oware nọ o rrọ obaro hẹrẹ ahwo-akpọ kpobi nọ i ru oreva Ọghẹnẹ. O sae jọ nọ ma kiẹ Ebaibol na riwi no vẹre, rekọ ma wo otọriẹ eware nana ha, wọhọ epanọ o rrọ kẹ ahwo-akpọ buobu na. Ma jọ wọhọ ohwo nọ ọ be rehọ ibiaro gheghe rri ame ethẹ. Fikinọ o ku oware ovo họ ovao ho, emamọ eware nọ ọ rẹ ruẹ i re tulo ho. Rekọ nọ o te fi oghẹrẹ ẹno nọ a re ro diwi kpobọ otọ ame họ ovao hayo nọ ọ tẹ ruọ okọ nọ a rehọ ughẹgbe ru otọ riẹ, o ve ti mu iyei gbe eware efa sa-sa nọ i re gbunu họ ẹruẹ. Epọvo na, okenọ ohwo jọ o mu omai Ebaibol na họ ewuhrẹ, ẹsiẹ ma ro mu otoriẹ “eware ididi Ọghẹnẹ” họ ewo.—1 Ahwo Kọrint 2:8-10.

 2. Fikieme evawere nọ ma re wo no ewuhrẹ Ẹme Ọghẹnẹ ze o rẹ rọ jọ ribri?

² Kọ u fo re ma ta nọ umutho eriariẹ Ebaibol jọ nọ ma wo no i te kẹ omai? Ẹme na “eware ididi Ọghẹnẹ” o kẹre te otoriẹ areghẹ Ọghẹnẹ nọ a rọ ẹkwoma ẹzi ọfuafo na rovie via kẹ Ileleikristi, rekiyọ i dhere amọfa. (1 Ahwo Kọrint 2:7) O rẹ kẹ omai evawere nọ ma te bi wuhrẹ eriariẹ Ọghẹnẹ nọ i wo oba ha na. Fiki ereghẹ ididi riẹ, ma sae riẹ ẹjiroro kpobi nọ Ọghẹnẹ o bi ro ru eware he. Ma rẹ gbẹ sai wo oghọghọ nọ ma wo vẹre okenọ ma kaki mu Ebaibol na họ ewuhrẹ otẹrọnọ ma ruabọhọ ẹkiẹvia “eware ididi Ọghẹnẹ.”

 3. Eme u je fo re ma wo otoriẹ ogbagba orọ oware nọ ma rọwo?

³ Fikieme u je fo re ma wo otoriẹ “eware ididi” yena? Ma te wo otoriẹ oware nọ ma rọwo gbe ẹjiroro nọ ma ro wo orọwọ yena, o rẹ bọ ẹrọwọ gbe udufihọ mai ga. Ikereakere na e tudu họ omai awọ re ma rehọ ẹgba iroro mai ruiruo “re [ma] dhesẹ oreva Ọghẹnẹ via, o nọ uwoma nọ a jẹrehọ nọ ojẹ gbunu.” (Ahwo Rom 12:1, 2) Ma tẹ riẹ oware nọ Jihova ọ rọ fiki riẹ ta kẹ omai nọ ma yeri oghẹrẹ uzuazọ jọ u re fi obọ họ kẹ omai yoẹme kẹe. Fikiere, ewo otoriẹ “eware ididi” o rẹ sae kẹ omai ẹgba nọ ma rẹ rọ whaha oware uyoma uruo je ru omai rehọ oma kẹ “iruo iwoma.”—Taitọs 2:14.

 4. Eme uwuhrẹ Ebaibol o kẹre te?

⁴ Re ma sai wo otoriẹ eware ididi o gwọlọ ewuhrẹ. Dede na, orọnikọ a se obe dhẹ duwu ọvo họ ewuhrẹ hẹ. O kẹre te ẹkiẹ nọ ma rẹ kiẹ kpahe otọ oware nọ ma se na re ma ruẹ epanọ u ro wo obọ kugbe onọ ma riẹ no vẹre. (2 Timoti 1:13) U kugbe ewo otoriẹ ẹjiroro nọ a rọ ta ẹme na. Uwuhrẹ Ebaibol o rẹ kẹre te eroro kpahe epanọ ma re ro fi oware nọ ma wuhrẹ na h’iruo rọ jiroro areghẹ gbe epanọ ma rẹ rọ rehọ iẹe fi obọ họ kẹ amọfa. Ofariẹ, nọ orọnọ “Ọghẹnẹ o gie ẹwolo ku Ikerakere na kpobi” na, u fo re ma wuhrẹ “kẹme kẹme nọ ọ via no unu Ọghẹnẹ ze.” (2 Timoti 3:16, 17; Matiu 4:4) Uwuhrẹ Ebaibol o gwọlọ omodawọ gaga! Rekọ o rẹ jẹ wha evawere ze, yọ ewo otoriẹ “eware ididi Ọghẹnẹ” o ga vi omai obọ họ.

Jihova O re Fi Obọ Họ kẹ Otu Omaurokpotọ Wo Otoriẹ

 5. Amono a rẹ sai wo otoriẹ “eware ididi Ọghẹnẹ”?

⁵ O tẹ make rọnọ whọ riẹ obe tere he yọ obe uwuhrẹ o rẹ ruọ owhẹ oma ha, who roro nọ ewo otoriẹ “eware ididi Ọghẹnẹ” o ga vi owhẹ obọ họ. Evaọ odibọgba otọakpọ Jesu, Jihova o rovie ẹjiroro Riẹ via orọnikọ rọkẹ iwareghẹ gbe enọ e riẹ obe he, rekọ rọkẹ ahwo nọ a riẹ obe he enọ e romakpotọ re Jesu o wuhrẹ ai. A jọ wọhọ emọ efofa nọ a tẹ rehọ ae wawọ enọ i kpohọ isukulu ziezi. (Matiu 11:25; Iruẹru 4:13) Pọl ukọ na o kere se ibe eg’Ọghẹnẹ riẹ kpahe eware nọ “Ọghẹnẹ ọ ruẹrẹ kpahe kẹ enọ iyou rie,” inọ: ‘Ọghẹnẹ ọ rehọ e rai via kẹ omai evaọ Ẹzi. Keme ẹzi ọ rẹ guọlọ eware kpobi via, makinọ eware ididi Ọghẹnẹ.’—1 Ahwo Kọrint 2:9, 10.

 6. Eme 1 Ahwo Kọrint 2:10 o dhesẹ?

⁶ Oghẹrẹ vẹ ẹzi Ọghẹnẹ ọ rẹ rọ gwọlọ “eware kpobi via, makinọ eware ididi Ọghẹnẹ”? Ukpenọ o re rovie uzẹme na kẹ omomọvo Ileleikristi, Jihova ọ be rehọ ẹzi riẹ kpọ ukoko na, onọ u bi fi obọ họ kẹ ahwo nọ a be gọ Ọghẹnẹ evaọ okugbe wo otoriẹ Ebaibol na. (Iruẹru 20:28; Ahwo Ẹfẹsọs 4:3-6) Evaọ akpọ na soso, oghẹrẹ ọruẹrẹfihotọ uwuhrẹ Ebaibol ọvo ikoko Isẹri Jihova kpobi a be reawere riẹ. Evaọ umutho ikpe jọ, a rẹ jọ iwuhrẹ ukoko duobọte igogo iwuhrẹ Ebaibol na kpobi. Ẹzi ọfuafo na ọ be rọ ukoko na fi obọ họ kẹ ahwo re a wo uruemu nọ o gwọlọ re a sai ro wo otoriẹ “eware ididi Ọghẹnẹ.”—Iruẹru 5:32.

Oware nọ “Eware Ididi Ọghẹnẹ” E Rrọ

 7. Fikieme ahwo buobu a gbe bi ro wo otoriẹ “eware ididi Ọghẹnẹ” hẹ?

⁷ Ma rẹ nwani roro ho inọ o rẹ jọ bẹbẹ re ma wo otoriẹ “eware ididi.” Ahwo buobu nọ a bi wo otoriẹ “eware ididi Ọghẹnẹ” hẹ na orọnikọ fikinọ o rẹ bẹbẹ re a wo otoriẹ rai hi, rekọ fiki epanọ Setan ọ be viẹ ahwo họ re a siọ obufihọ nọ Jihova ọ be kẹ ẹkwoma ukoko Riẹ.—2 Ahwo Kọrint 4:3, 4.

 8. Eware ididi vẹ Pọl ọ ta kpahe evaọ uzou avọ esa ọrọ ileta nọ o kere se ahwo Ẹfẹsọs?

⁸ Uzou avọ esa ọrọ ileta nọ Pọl o kere se ahwo Ẹfẹsọs o dhesẹ nọ “eware ididi Ọghẹnẹ” i kugbe iwuhrẹ Ebaibol buobu nọ enwenọ ahwo Jihova kpobi a wo otoriẹ rai ziezi, wọhọ oriruo, epanọ a re ro vuhu Ubi nọ a ya eyaa riẹ na, ẹsalọ ahwo nọ a wo ẹruore obọ odhiwu, gbe Uvie Mesaya na. Pọl o kere nọ: “A sai ru emọ ahwo riẹ [eware ididi nana] eva ige nọ e vrẹ hẹ, wọhọ epanọ a jọ enẹna rehọ ai via kẹ ikọ na gbe eruẹaro eva Ẹzi na; re ahwo Egedhọ a jọ ereuku re, a vẹ jẹ jọ otu oma-ovo na, a vẹ gbẹ jọ otu aghale eya na eva Kristi Jesu.” Pọl ọ ta inọ a kẹ riẹ iruo “re [o] ru ahwo kpobi ruẹ eware ididi anwae nọ i dhere eva Ọghẹnẹ.”—Ahwo Ẹfẹsọs 3:5-9.

 9. Eme o jẹ rọ uvẹ-ọghọ re ma wo otoriẹ “eware ididi Ọghẹnẹ”?

⁹ Pọl o te gbe ru oreva Ọghẹnẹ vẹ inọ ẹjiroro jọ nọ Ọghẹnẹ ọ rọ ko oware udidi na dhere ige nọ e vrẹ họ ‘re a rọ ẹkwoma ukoko na dhesẹ ubu areghẹ Ọghẹnẹ via evaọ eria nọ e rọ obọ odhiwu.’ (Ahwo Ẹfẹsọs 3:10) Ijẹle i bi wo erere nọ a te muẹrohọ je wo otoriẹ oghẹrẹ nọ Jihova o bi ro yeri kugbe ukoko Ileleikristi na. Ọghọ riẹ o rro kẹhẹ re ma wo otoriẹ eware nọ makọ ijẹle a wo isiuru kpahe! (1 Pita 1:10-12) Ofariẹ, Pọl ọ ta inọ ma rẹ daoma “wo ogaga nọ [ma] re ro lele erezi na riẹ epa okẹkẹe, gbe uthethei, [gbe] ekpehru gbe ekodo” ọrọ orọwọ Ileleikristi. (Ahwo Ẹfẹsọs 3:11, 18) Joma ta kpahe iriruo ọrọ eware ididi jọ nọ e rẹ sae ru otoriẹ mai kodo ziezi.

Iriruo Eware Ididi

10, 11. Wọhọ epanọ Ikereakere na e ta, okevẹ Jesu o ro zihẹ ruọ abọ ọsosuọ ọrọ “ubi” “aye” na?

¹⁰ Ma riẹ inọ Jesu họ abọ ọsosuọ ọrọ “ubi” na, ubi ọ abọ ukoko Ọghẹnẹ nọ ọ rọ obọ odhiwu, onọ a dhesẹ wọhọ “aye” eva Emuhọ 3:15 na. Re otoriẹ mai o gbe kodo, ma rẹ sae nọ inọ: ‘Okevẹ Jesu o ro zihe ruọ Ubi nọ a ya eyaa riẹ na? Taure ọ tẹ te ziọ otọakpọ, eva oke nọ a ro yẹi wọhọ ohwo-akpọ, eva oke ame-ọhọ riẹ, manikọ oke nọ ọ kparoma no?’

¹¹ Ọghẹnẹ ọ ya eyaa no inọ abọ ukoko riẹ nọ ọ rrọ obọ odhiwu, onọ a ta ẹme te evaọ eruẹaruẹ wọhọ “aye” riẹ na, o re ti yẹ ubi nọ ọ te nwa araomuomu na uzou. Rekọ idu ikpe buobu e vrẹ, yọ aye nana o yẹ uvumọ ubi nọ ọ sae raha Setan avọ iruo riẹ hẹ. Fikiere, eruẹaruẹ Aizaya o se rie “ọga” gbe ọnọ “o da te ẹzi.” (Aizaya 54:1, 5, 6) Uwhremu na a te yẹ Jesu evaọ Bẹtlẹhẹm. Rekọ okenọ ọ họ-ame no, nọ a rọ ẹzi wholo iei no, o ro zihe ruọ ọmọ ẹzi Ọghẹnẹ, ẹsiẹ Jihova o ro whowho nọ: “Ọnana họ Ọmọ oyoyou mẹ.” (Matiu 3:17; Jọn 3:3) Enẹ ọnọ ọ rrọ abọ ọsosuọ ọrọ “ubi” aye na ọ rọ roma via. Uwhremu na a te ti ku ẹzi ku ilele Jesu jẹ rehọ ai mu. “Aye” na, ọnọ ọ wọhọ “ọga nọ o ri yẹ hẹ” anwọ oke krẹkri ze na, ọ tẹ te ‘suọ ole oghọghọ.’—Aizaya 54:1; Ahwo Galesha 3:29.

12, 13. Ikereakere vẹ i dhesẹ nọ enọ a ku ẹzi Ọghẹnẹ ku kpobi evaọ otọakpọ na, ae họ ‘ọrigbo nọ o wo ẹrọwọ avọ areghẹ na?’

¹² Oriruo avivẹ ọrọ eware ididi nọ a rovie via kẹ omai no u kie kpahe ẹjiroro nọ Ọghẹnẹ ọ rọ jọ udevie ahwo-akpọ salọ ahwo 144,000. (Eviavia 14:1, 4) Ma wo otoriẹ jẹ rọwo uwuhrẹ na inọ enọ a wholo nọ e rrọ otọakpọ evaọ etoke jọ kpobi họ enọ i ru ‘ọrigbo nọ o wo ẹrọwọ avọ areghẹ’ na via ọnọ Jesu ọ ta nọ ọ te rehọ “emu” ko uwou riẹ na. (Matiu 24:45) Eria Ebaibol vẹ i dhesẹ nọ otoriẹ nana o gba? Kọ o sae jọ nọ Jesu ọ jẹ ta kpahe Oleleikristi jọ kpobi nọ ọ rẹ bọ inievo riẹ ga evaọ abọ-ẹzi?

¹³ Ọghẹnẹ ọ ta kẹ orẹwho Izrẹl nọ: “Whai họ isẹri mẹ . . . gbe odibo mẹ nọ omẹ salọ.” (Aizaya 43:10) Rekọ evaọ Nisan 11 ọrọ ukpe 33 C.E., Jesu ọ ta kẹ isu Izrẹl inọ Ọghẹnẹ ọ se orẹwho rai no inọ a gbẹ rọ idibo Riẹ hẹ. Ọ ta kẹ ae nọ: ‘A re ti mi owhai uvie Ọghẹnẹ a vẹ te rehọ iẹ kẹ orẹwho nọ o rẹ mọ ibi riẹ.’ Jesu ọ ta kẹ ogbotu na inọ: “Wha ri, a siọ uwou rai ba kẹ owhai ofofe.” (Matiu 21:43; 23:38) Orẹwho Izrẹl ọ gbẹ jọ ọrigbo Jihova nọ o wo ẹrọwọ hayo areghẹ hẹ. (Aizaya 29:13, 14) Uwhremu na evaọ ẹdẹ ọvo yena, Jesu ọ tẹ nọ inọ: “Ono họ odibo oruọzewọ” na? Otofa onọ riẹ na họ ‘Orẹwho vẹ nọ o wo areghẹ ọ te rehọ ẹta Izrẹl re o jọ ọrigbo Ọghẹnẹ nọ o wo ẹrọwọ?’ Pita ukọ na ọ kuyo na nọ ọ ta kẹ ukoko Ileleikristi nọ a wholo na inọ: ‘Whai họ . . . orẹwho ọrẹri, ahwo obọ Ọghẹnẹ.’ (1 Pita 1:4; 2:9) Orẹwho abọ-ẹzi yena, ‘Izrẹl Ọghẹnẹ,’ o te zihe ruọ ọrigbo ọkpokpọ Jihova. (Ahwo Galesha 6:16) Wọhọ epanọ ahwo Izrẹl anwae kpobi a jọ “ọrigbo” ọvo na, ere Ileleikristi nọ a wholo nọ e rrọ otọakpọ evaọ etoke jọ kpobi a ru ‘ọrigbo nọ o wo ẹrọwọ avọ areghẹ’ na via. Ọghọ riẹ o rro kẹhẹ nọ ọrigbo Ọghẹnẹ na ọ be rọ rehọ “emu” kuọ omai!

Ma rẹ Sae Reawere Uwuhrẹ Omobọ Ohwo

14. Fikieme uwuhrẹ Ebaibol o jẹ wha evawere ze vi ese nọ ma re sei dhẹ duwu ọvo?

¹⁴ Okenọ a te dhesẹ otoriẹ okpokpọ ọrọ oria Ikereakere na jọ kẹ omai, eva e rẹ were omai fiki epanọ o rẹ bọ ẹrọwọ mai ga. Oye jabọ nọ uwuhrẹ Ebaibol o jẹ wha evawere ze vi ese nọ ma re sei dhẹ duwu ọvo. Fikiere, okenọ who te bi se ebe nọ ukoko Ileleikristi o kere, nọ oma ra inọ: ‘Ẹvẹ oruvẹ nana o rọ rọwokugbe otoriẹ nọ me wo kpahe ẹme nana vẹre? Kọ eria Ikereakere efa vẹ mẹ rẹ sai roro kpahe nọ e rọwokugbe ẹme nọ a ta evaọ uzoẹme nana?’ Otẹrọnọ o gwọlọ ekiakiẹ efa, kere enọ nọ whọ gwọlọ iyo rai fihọ otọ, re whọ rehọ ai ru uwuhrẹ eva oke ofa.

15. Eware ekpokpọ vẹ whọ rẹ sai wuhrẹ nọ e rẹ kẹ owhẹ evawere, kọ ẹvẹ e sae rọ wha erere krẹkri ze?

¹⁵ Eware ekpokpọ vẹ whọ rẹ sai wuhrẹ nọ e rẹ kẹ owhẹ evawere? Whọ sai wuhrẹ kokodo kpahe evọ sa-sa nọ Ọghẹnẹ ọ re kugbe ahwo-akpọ re ma sai wo emamọ uzuazọ evaọ obaro. O rẹ sae bọ ẹrọwọ ra ga nọ who te bi wuhrẹ kpahe eruẹaruẹ nọ i kiekpahe Jesu Kristi hayo obe eruẹaruẹ Ebaibol na jọ nọ who re wuhrẹ othotha. Ikuigbe Isẹri Jihova erọ oke mai na nọ whọ rẹ kiẹriwi ẹkwoma obe na Jehovah’s Witnesses—Proclaimers of God’s Kingdom, o rẹ jẹ bọ ẹrọwọ ra ga.a “Enọ Ahwo nọ A s’Ebe” nọ whọ rẹ wariẹ se evaọ Uwou-Eroro nọ ma se vrẹ no u re fi obọ họ kẹ owhẹ wo otoriẹ vevẹ ọrọ eme jọ. Muẹrohọ eria Ikereakere nọ o wha riẹ ze nọ a jẹ kẹ uyo onọ na oghẹrẹ utioye. Onana u ti fi obọ họ kẹ owhẹ wuhrẹ ‘ẹgba otoriẹ’ ra je wo orimuo. (Ahwo Hibru 5:14) Nọ who bi ru uwuhrẹ omobọ ra na, hai kpoka họ Ebaibol ra hayo kere eme fihọ obe ofa jọ re uwuhrẹ ra o ruẹse wha erere krẹkri se owhẹ gbe ahwo nọ who ti fi obọ họ kẹ.

Fi Obọ Họ kẹ Emọ Ra Reawere Uwuhrẹ Ebaibol

16. Ẹvẹ whọ sai ro fi obọ họ kẹ emọ re a reawere uwuhrẹ Ebaibol?

¹⁶ Esẹgbini a re fi obọ họ kẹ emọ rai wo isiuru kpahe eware abọ-ẹzi. Who roro nọ eware ididi e te ga hrọ kẹ emaha na ha. Whọ tẹ ta kẹ emaha na re a ru ekiakiẹ kpahe ẹme jọ evaọ oma oruẹrẹkpahe kẹ obe-uwuhrẹ Ebaibol uviuwou, whọ rẹ sae nọ ae oware nọ a kiẹ via. A sae jọ uwuhrẹ uviuwou ru idhesẹvia nọ a re jo wuhrẹ emaha na epanọ a rẹ rọ thọ ẹrọwọ rai je dhesẹ inọ oware nọ a wuhrẹ i rai na uzẹme o ginẹ rrọ. Fiba oyena, whọ sae rehọ ibroshọ na “Ruẹ Otọ Uwoma Na”b ro wuhrẹ kpahe eria Ebaibol, je ro ru oware nọ Isase Ebaibol ọ ẹkpoka na ọ be ta ẹme te vẹ.

17. Eme u je fo re ma jọ owowa evaọ uwuhrẹ Ebaibol omobọ mai?

¹⁷ Uwuhrẹ Ebaibol omobọ ohwo o rẹ sae jọ oware isiuru jẹ bọ ẹrọwọ ga, rekọ yọrọ oma re ọ se owhẹ oke nọ whọ rẹ rọ ruẹrẹ oma kpahe kẹ iwuhrẹ ukoko ba e mi. Iwuhrẹ na yọ edhere ọfa nọ Jihova o bi ro wuhrẹ omai ẹkwoma ‘ọrigbo nọ o wo ẹrọwọ avọ areghẹ na.’ Rekọ, ekiakiẹ nọ who re ru e sai fi obọ họ kẹ owhẹ kpahe ẹme ziezi evaọ iwuhrẹ—wọhọ oriruo, eva Uwuhrẹ Obe Ukoko, hayo evaọ oruvẹ no isase Ebaibol ọ ẹkpoka ze onọ a re ru eva Isukulu Odibọgba Esuo-Ọghẹnẹ na.

18. Fikieme omodawọ nọ o gwọlọ re a wo otoriẹ “eware ididi Ọghẹnẹ” o jẹ rọ erere?

¹⁸ Ẹme Ọghẹnẹ nọ who re wuhrẹ didi kẹ omobọ ra o rẹ sai fi obọ họ kẹ owhẹ si kẹle Jihova. Bi dhesẹ erere nọ u re no uwuhrẹ utioye na ze, Ebaibol e ta nọ: “Areghẹ ọ rrọ kẹ uketha wọhọ epanọ ugho o rrọ kẹ uketha na; rekọ erere ọ eriariẹ họ areghẹ o re siwi ọnọ o wo rie.” (Ọtausiuwoma Na 7:12 NW ) Fikiere, omodawọ nọ o gwọlọ re who ru otoriẹ ra ọrọ uzẹme ẹme Ọghẹnẹ kodo o rọ oware erere gaga. Ebaibol e ya eyaa kẹ enọ e be gwọlọ eriariẹ Ọghẹnẹ inọ: ‘Wha rẹ te ruẹ eriariẹ Ọghẹnẹ.’—Itẹ 2:4, 5.

[Oruvẹ-obotọ]

Kọ Whọ Sae k’Iyo Enọ Nana Vevẹ?

• Eme họ “eware ididi Ọghẹnẹ”?

• Fikieme ma jẹ ruabọhọ ewuhrẹ eware ididi?

• Fikieme Ileleikristi kpobi a sai ro wo oghọghọ nọ u re no otoriẹ “eware ididi Ọghẹnẹ” ze?

• Ẹvẹ whọ sai ro wo erere vọvọ no “eware ididi Ọghẹnẹ” ze?

[Uwoho nọ o rrọ ẹwẹ-obe avọ 24]

Okevẹ Jesu o ro zihe ruọ ubi nọ a ya eyaa riẹ na?

[Uwoho nọ o rrọ ẹwẹ-obe avọ 27]

Esẹgbini a rẹ sae ta kẹ emọ rai re a ru ekiakiẹ kpahe ẹme jọ rọ ruẹrẹ oma kpahe kẹ uwuhrẹ uviuwou