UWUHRẸ AVỌ 21
Oghẹrẹ Vẹ A be rọ Ta Usi Uwoma na Nẹnẹ?
Uviemenẹ, Jihova ọ te rọ Uvie riẹ ku ebẹbẹ mai kpobi họ. Nọ emamọ usi nọ u fo nọ ahwo kpobi a re yo. Fikiere, Jesu ọ gwọlọ nọ ilele riẹ a rẹ vuẹ ahwo kpobi usi nana! (Matiu 28:19, 20) Ẹvẹ Isẹri Jihova a bi ro koko ujaje Jesu nana?
1. Ẹvẹ Matiu 24:14 o bi ro rugba nẹnẹ?
Jesu ọ ta nọ: “A te ta usi uwoma Uvie na evaọ akpọ na soso re o jọ isẹri kẹ erẹwho na kpobi.” (Matiu 24:14) Isẹri Jihova a be rọ evawere ru iruo nana nọ i wuzou gaga na. Ma be jọ akpọ na soso rọ evẹrẹ nọ i bu vi odu ọvo (1,000) ta usi uwoma na! Nọ iruo ilogbo nọ o gwọlọ nọ ma rẹ daoma fihọ gaga. Ababọ obufihọ Jihova, ma sai ru ei hi.
2. Ẹvẹ ma be daoma te re ma sae ta usi uwoma kẹ ahwo?
Ma rẹ ta usi uwoma na evaọ oria kpobi nọ ahwo a rrọ. Wọhọ Ileleikristi ikpe-udhusoi ọsosuọ, ma rẹ ta usi uwoma “no uwou ruọ uwou.” (Iruẹru Ikọ 5:42) Ma be sae rọ edhere nana ta usi uwoma na kẹ ima ahwo buobu kukpe kukpe. Nọ orọnọ ahwo a rẹ jọ uwou ẹsikpobi hi na, ma rẹ jẹ ta usi uwoma re evaọ ẹgbede. Ma rẹ gwọlọ uvẹ kpobi nọ ma rẹ rọ vuẹ amọfa kpahe Jihova gbe ẹjiroro riẹ.
3. Ono o fo nọ ọ rẹ ta usi uwoma na?
U fo nọ Ileleikristi uzẹme kpobi a rẹ ta usi uwoma na kẹ amọfa. Ma rẹ rọ iruo nana zaharo vievie he. Ma rẹ ta usi uwoma wọhọ epanọ uyero mai o kẹ omai uvẹ te keme ma riẹ nọ u re siwi uzuazọ ahwo. (Se 1 Timoti 4:16.) A be hwa omai osa fihọ iruo na ha keme Ebaibol na ọ ta nọ: “Ọvọvẹ a kẹ owhai, wha kẹ ọvọvẹ.” (Matiu 10:7, 8) Orọnikọ ohwo kpobi ọ rẹ rọwo gaviezọ kẹ omai hi. Ghele na ma rẹ gbẹ ta usi uwoma na keme ma be rọ enẹ yoẹme kẹ Jihova je ru eva were iẹe.
GBE WUHRẸ EWARE EFA
Gbe wuhrẹ kpahe epanọ Isẹri Jihova a be daoma te re a ta usi uwoma na evaọ akpọ-soso, gbe epanọ Jihova o bi ro fiobọhọ kẹ omai.
Usi uwoma ota evaọ akpọ na soso: (A) Costa Rica, (B) United States, (C) Benin, (D) Thailand, (E) Yap, (F) Sweden
4. Ma be daoma gaga re ma sai te ahwo kpobi oma
Isẹri Jihova a rẹ daoma gaga re a sae ta usi uwoma na kẹ ahwo evaọ oria kpobi. Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.
Eme ọ were owhẹ evaọ epanọ Isẹri Jihova a be daoma te re a sae ta usi uwoma na?
Se Matiu 22:39 gbe Ahwo Rom 10:13-15, kẹsena wha vẹ ta ẹme kpahe enọ nana:
Ẹvẹ usi uwoma ota mai u bi ro dhesẹ nọ ma you erivẹ mai?
Ẹvẹ Jihova o bi rri ahwo nọ a be ta usi uwoma na?—Rri owọ avọ 15.
5. Mai yọ ibe iruiruo Ọghẹnẹ
Eware buobu nọ e via no i dhesẹ nọ Jihova ọ be kpọ iruo mai na. Wọhọ oriruo, evaọ New Zealand, oniọvo-ọmọzae jọ nọ a re se Paul ọ nyaku aye jọ evaọ uvo ẹdẹ jọ nọ ọ jẹ ta usi uwoma no uwou ruọ uwou. Whaọ ohiohiẹ ẹdẹ yena, aye na o se odẹ Jihova okenọ ọ jẹ lẹ sei jẹ yare nọ ohwo jọ ọ nyabru ei ze. Paul ọ ta nọ, “nọ euwa esa e vrẹ no, me te kporo ẹthẹ aye na.”
Se 1 Ahwo Kọrint 3:9, kẹsena wha vẹ ta ẹme kpahe onọ nana:
Ẹvẹ oware nọ o via evaọ obọ New Zealand na u ro dhesẹ nọ Jihova ọ be kpọ iruo na?
Se Iruẹru Ikọ 1:8, kẹsena wha vẹ ta ẹme kpahe onọ nana:
Fikieme o rọ gwọlọ nọ Jihova o re fiobọhọ kẹ omai re ma sae ta usi uwoma na?
Kọ whọ riẹ?
Koka koka evaọ iwuhrẹ nọ ma re ru evaọ udevie oka na, a re wuhrẹ omai epanọ ma rẹ ta usi uwoma. Otẹrọnọ who kpohọ ewuhrẹ nana jọ no, ẹvẹ who rri eware nọ a be hai wuhrẹ na?
6. Ma bi koko ujaje Ọghẹnẹ nọ o ta nọ ma ta usi uwoma na
Evaọ ikpe-udhusoi ọsosuọ, ewegrẹ a jẹ gwọlọ whaha ilele Jesu re a siọ usi uwoma na ba ẹta. Ileleikristi oke yena a ru epanọ udu nọ a rẹ rọ ta usi uwoma na u re ro “dikihẹ evaọ abọ egọmeti.” (Ahwo Filipai 1:7) Epọvo na Isẹri Jihova a bi ru nẹnẹ re.a
Se Iruẹru Ikọ 5:27-42, kẹsena wha vẹ ta ẹme kpahe onọ nana:
Fikieme ma gbẹ rọ siọ usi uwoma na ba ẹta ha?—Rri owọ avọ 29, 38, gbe 39.
OHWO JỌ Ọ TẸ NỌ OWHẸ NỌ: “Fikieme Isẹri Jihova a be rọ ta usi uwoma no uwou ruọ uwou?”
Uyo vẹ whọ te kẹe?
EME WHO WUHRẸ NO?
Jesu o jie uzi kẹ ilele riẹ nọ a ta usi uwoma na kẹ ahwo erẹwho kpobi. Jihova o bi fiobọhọ kẹ ahwo riẹ ru iruo nana.
Ọkiẹkpemu
Oghẹrẹ vẹ a be rọ ta usi uwoma na evaọ akpọ na soso?
Ẹvẹ usi uwoma ota mai u bi ro dhesẹ nọ ma you erivẹ mai?
Kọ who roro nọ usi uwoma ota o rẹ lẹliẹ eva were omai? Fikieme?
KIẸ KPAHE EFA
Rri oghẹrẹ nọ Isẹri Jihova a be rọ ta usi uwoma evaọ ikpewho ilogbo.
Eme Isẹri Jihova a ru no re a sae ta usi uwoma kẹ ahwo nọ ẹmo hayo okpẹtu o le no ẹwho rai?
Rri epanọ eva e be were oniọvo jọ te fikinọ ọ rọ oke uzuazọ riẹ kpobi ta usi uwoma na.
Gbe se kpahe obọdẹ edhọ ekọto jọ nọ a jọ bru kẹ omai nọ u bi fiobọhọ kẹ omai ta usi uwoma na ziezi.
“Etausiuwoma Uvie na A Wọ Ẹdhọ Rai Kpohọ Ekọto” (Uvie Ọghẹnẹ U Muhọ Esuo No!, uzou avọ 13)
a Ọghẹnẹ họ ọnọ ọ kẹ omai udu nọ ma ta usi uwoma na. Fikiere, u du gwọlọ nọ egọmeti ohwo-akpọ ọ rẹ kẹ Isẹri Jihova uvẹ taure a tẹ te ta usi uwoma na ha.