Osu Mai Nọ O Bi Ru Iruo Gaga Nẹnẹ

“Ọ be dhẹ vrẹ yọ o [bi] kpe avọ obọ-okparọ.”—EVIA. 6:2.

1, 2. (a) Oghẹrẹ vẹ a jọ Ebaibol dhesẹ iruo nọ Kristi Ovie na o bi ru anwọ 1914 ze? (b) Eware jọ vẹ Kristi o ru no anwẹnọ a rọ rehọ iẹe mu ovie?

A REHỌ Kristi mu Ovie ọrọ Uvie Jihova evaọ 1914. Eme ma roro nọ o bi ru enẹna? Kọ ma roro nọ ọ keria agbara-uvie riẹ ọvo, bi no otọakpọ na rri n’oke ruoke re ọ ruẹ epanọ ukoko riẹ o rrọ? Otẹrọnọ ere ma bi roro, u fo re ma nwene eriwo mai. Obe Ilezi gbe obe Eviavia i dhesẹ Jesu wọhọ ovie nọ o wo ẹgba nọ ọ keria ehru anyenya, be dhẹ vrẹ “yọ o [bi] kpe avọ obọ-okparọ.”—Evia. 6:2; Ol. 2:6-9; 45:1-4.

² Oware ọsosuọ nọ Kristi o ru nọ a rehọ iẹe mu ovie no họ o fi “odudu na avọ ikọ riẹ” kparobọ. Kristi, ọnọ ọ rrọ Maekẹl, ukọ-odhiwu oride na, avọ ikọ-odhiwu riẹ, a gele Setan avọ idhivẹri riẹ no odhiwu ziọ otọakpọ. (Evia. 12:7-9) Kẹsena, Jesu nọ ọ rrọ “ukọ ọvọriọ na,” o te kuomagbe Jihova Ọsẹ riẹ te kiẹ etẹmpol abọ-ezi na riwi. (Mal. 3:1) O bruoziẹ kpe Kristẹndọm, abọ “Babilọn ologbo” na nọ ọ mai wo afuẹwẹ, keme ọ reabe azẹ-okpe gbe ẹnwae-obro abọ-ẹzi kugbe ivie akpọ nana.—Evia. 18:2, 3, 24.

O Ru Ọrigbo Ẹrọwọ na Fo

3, 4. (a) Iruo vẹ Kristi nọ ọ rrọ “ukọ” Jihova na o ru no? (b) Eme Kristi ọ ruẹ nọ ọ nyaze te kiẹ etẹmpol na riwi, kọ ono Jesu o ro mu?

³ Okenọ Jihova avọ “ukọ” riẹ a nyaze te kiẹ etẹmpol abọ-ẹzi na riwi, a ruẹ inọ utu jọ orọ Ileleikristi uzẹme o riẹ nọ u kuomagbe ichọche Kristẹndọm ho. Ghele na, o gwọlọ nọ a re ru Ileleikristi nana nọ a rọ ẹzi wholo na fo, enọ a riẹ wọhọ “emọ Livai” na. O nwane wọhọ epanọ Malakae ọruẹaro na ọ ta, inọ: “[Jihova] ọ rẹ te keria wọhọ ọwozẹ gbe ọnọ o re ru Siliva fua, o re ti ru emọ Livai fua ọ vẹ wozẹ ae fo wọhọ igoru gbe Siliva, kẹsena a te ti dhe-idhe ikiẹrẹe kẹ ỌNOWO na.” (Mal. 3:3) Jihova ọ rehọ “ukọ ọvọriọ na,” Jesu Kristi, ro ru emọ Izrẹl abọ-ẹzi nana fo.

⁴ Ghele na, Kristi ọ ruẹ nọ Ileleikristi ẹrọwọ nana nọ a rọ ẹzi wholo na a be dawo ẹgba rai kpobi re a rọ emu abọ-ẹzi ẹruoke kẹ uviuwou Ọghẹnẹ. Anwọ ukpe 1879 ze, makọ evaọ otọ iyero ebẹbẹ, a be rọ emagazini nana whowho uzẹme nọ o rrọ Ebaibol na kpahe Uvie Ọghẹnẹ. Jesu ọ ruẹaro inọ oke nọ ọ te “nyatha” re ọ kiẹ ekwakwa riẹ riwi evaọ etoke “urere akpọ na,” ọ te ruẹ ọrigbo nọ ọ be rọ emuore abọ-ẹzi kẹ ahwo uviuwou riẹ evaọ ẹruoke. O ti jiri ọrigbo na, jẹ “rehọ iẹ e mu uzou eware riẹ kpobi” nọ e rrọ otọakpọ. (Mat. 24:3, 45-47) Kristi nọ o Wuzou ukoko Ileleikristi na, ọ be rehọ “odibo oruọzewọ, nọ o wo areghẹ” na rọ wha iruo Uvie na haro evaọ otọakpọ. Ọ rọ ẹkwoma Ugboma Esuo na rehọ ekpọvio kẹ enọ a wholo na gbe “igodẹ efa” na no.—Jọn 10:16.

Ivuẹvu Akpọ Na

 5. Eme Jọn ukọ na ọ jọ eruẹaruẹ ruẹ inọ Ovie na o ru?

⁵ Jọn ukọ na ọ jọ eruẹaruẹ ruẹ oware ọfa jọ nọ Mesaya Ovie na o ti ru evaọ “edẹ Ọnowo na,” nọ a tẹ rehọ iẹe mu ovie no evaọ 1914. Jọn o kere nọ: “Me riwi mẹ tẹ ruẹ ẹgho ọfuafo, yọ ọjọ nọ ọ wọhọ Ọmọ ohwo ọ keria ehru ẹgho na, yọ ọ rehọ etu-uvie igoru ro towu, yọ ofọrẹbe nọ o rẹ dada prẹprẹprẹ ọ riẹ obọ.” (Evia. 1:10; 14:14) Jọn o yo nọ ukọ-odhiwu Jihova jọ ọ ta kẹ Ovu-Ivuẹvu nana inọ ọ ruẹrẹ ofọrẹbe riẹ họ keme “oke ivuẹvu akpọ na u te no.”—Evia. 14:15, 16.

 6. Eme Jesu ọ ta nọ ọ te via nọ oke o be nya haro na?

⁶ “Ivuẹvu akpọ na” nọ Jọn ọ ruẹaro riẹ na o kareghẹhọ omai ohare Jesu orọ eka gbe ikpoko na. Jesu ọ rehọ oma riẹ dhesẹ ohwo nọ ọ kọ eka fihọ udhu riẹ avọ irẹro inọ ọ te kọrọ eka nọ e gba ziezi, onọ u dikihẹ kẹ “emọ uvie na,” koyehọ Ileleikristi uzẹme nọ a wholo nọ i ti lele Jesu su evaọ Uvie riẹ. Rekọ evaọ aso, ọwegrẹ jọ, Ẹdhọ, ọ tẹ nyae kọ ikpoko vọ udhu na, koyehọ “emọ oyoma na.” Ọkibi na o j’uzi kẹ iruiruo na inọ a kẹ eka gbe ikpoko na uvẹ re e rro kugbe bọo oke ivuẹvu, koyehọ etoke “urere akpọ na.” Evaọ oke yena, Jesu o ti vi ikọ-odhiwu riẹ re a hẹriẹ eka na no ikpoko.—Mat. 13:24-30, 36-41.

 7. Oghẹrẹ vẹ Kristi ọ be rọ wha iruo “ivuẹvu akpọ na” haro?

⁷ Evaọ orugba eruẹaruẹ nọ a kẹ Jọn na, Jesu ọ be kobaro evaọ iruo ivuẹvu akpọ na soso. “Ivuẹvu akpọ na” i muhọ nọ a muọ enọ i kiọkọ evaọ idu udhuhrẹ gbe ene (144,000) erọ “emọ uvie na” họ ekokohọ, koyehọ enọ Jesu ọ jọ ohare riẹ se “eka na.” Ohẹriẹ nọ o rrọ udevie Ileleikristi uzẹme gbe erọ erue u dhesẹ oma via vevẹ nọ Ẹmo Akpọ Ọsosuọ ọ vrẹ no, te epanọ o rọ zọhọ fihọ abọ avivẹ ọrọ “ivuẹvu akpọ na,” koyehọ ekokohọ igodẹ efa na. Igodẹ efa na e rrọ usu “emọ uvie na” ha, rekọ “otu obuobu” nọ e be rọ unevaze tha Uvie na uke. A koko enana họ rono “ahwo kpobi, erẹwho gbe evẹrẹ kpobi” ze. A be rọ oma kpotọ kẹ Uvie Mesaya na, onọ Jesu Kristi gbe “erezi” idu udhuhrẹ gbe ene (144,000) a ti su.—Evia. 7:9, 10; Dan. 7:13, 14, 18.

Ẹruorote Ikoko Na

8, 9. (a) Eme o dhesẹ nọ orọnikọ uruemu ukoko na soso ọvo Kristi o bi muẹrohọ họ, rekọ te uruemu omomọvo nọ e rrọ ukoko na? (b) Wọhọ epanọ a dhesẹ evaọ ẹwẹ-obe avọ 26 na, “eware ididi Setan” vẹ u fo nọ ma rẹ whaha?

⁸ Ma jọ uzoẹme nọ o vrẹ na ruẹ epanọ Kristi ọ rọ tẹrovi edikihẹ abọ-ẹzi orọ ukoko ovuovo evaọ ikpe-udhusoi ọsosuọ. Kristi Osu mai nọ a kẹ “ogaga kpobi nọ o rọ eva odhiwu gbe akpọ na,” ọ be kpọ ikoko gbe ekpako ukoko nọ e rrọ otọakpọ na soso nẹnẹ. (Mat. 28:18; Kọl. 1:18) Jihova ọ rehọ e riẹ mu ọnọ o “wo uzou” enọ a rọ ẹzi wholo na. (Ẹf. 1:22) Fikiere, ọ be ruẹ eware kpobi nọ e be via evaọ ikoko Isẹri Jihova nọ i bu vrẹ idu udhusoi (100,000) na.

⁹ Jesu o vi uwou se ukoko nọ o jọ obọ Thiatira, inọ: “Eme Ọmọ Ọghẹnẹ na ọnọ aro riẹ ọ wọhọ ebrierae. . . . ‘Mẹ riẹ iruo ra.’” (Evia. 2:18, 19) Ọ whọku Ileleikristi nọ e jọ ukoko yena fiki uzuazọ ọfariẹ-ogbe rai gbe eware etọtọ efa nọ a je ru, inọ: “Mẹ họ ọnọ ọ rẹ riẹ otọ eva gbe iroro ahwo kpobi, mẹ họ ọnọ ọ rẹ hwa osa kẹ kohwo kohwo epanọ iruo riẹ erọ.” (Evia. 2:23) Eme yena i dhesẹ nọ orọnikọ iruemu ikoko na ọvo Kristi o je muẹrohọ họ, rekọ te uruemu omomọvo nọ e jọ ukoko kpobi. Jesu o jiri Ileleikristi nọ e jọ Thiatira nọ “i wuhrẹ . . . eware ididi Setan na ha.” (Evia. 2:24) Epọvo na nẹnẹ, ọ be wereva kpahe ahwo kpobi, te emaha gbe ekpako, enọ i siomano “eware ididi Setan” evaọ Itanẹte, aruọzaha ozighi erọ ividio, gbe iroro ethọthọ ahwo-akpọ. O be kẹe evawere gaga nọ ọ be rọ ruẹ Ileleikristi buobu nẹnẹ na nọ e be dawo ẹgba rai kpobi re a sae nya lele ithubro riẹ evaọ kabọ kabọ uzuazọ rai!

10. Eme a rehọ ekpako ukoko nọ Kristi ọ be kpọ na dhesẹ, rekọ eme u fo nọ ekpako na a re vuhumu?

¹⁰ Kristi ọ be rehọ ẹkwoma ekpako ukoko nọ a ro mu na kpọ ikoko otọakpọ riẹ. (Ẹf. 4:8, 11, 12) Evaọ etoke ikpe-udhusoi ọsosuọ, ekpako ukoko kpobi yọ enọ a rọ ẹzi wholo. A jọ obe Eviavia dhesẹ ai wọhọ isi nọ e rrọ obọze Kristi. (Evia. 1:16, 20) Ekpako ukoko buobu nẹnẹ yọ utu igodẹ efa na. A be hae lẹ re a tẹ rehọ ai mu, yọ ẹzi ọfuafo na ọ be kpọ eromuo rai, fikiere a rẹ sae ta nọ Kristi ọ be kpọ ai re. (Iruẹru 20:28) Dede na, ekpako ukoko a re vuhumu inọ Kristi ọ be kpọ ilele riẹ evaọ otọakpọ ẹkwoma umutho ezae jọ nọ a rọ ẹzi wholo, nọ e rrọ Ugboma Esuo na.—Se Iruẹru Ikọ Na 15:6, 28-30.

“Nyaze, Ọnowo Jesu!”

11. Fikieme ma be rọ rehọ ọwhọ rẹro okenọ Osu mai ọ te rọ nyaze?

¹¹ Evaọ eruẹaruẹ nọ a rọ kẹ Jọn ukọ na, Jesu ọ ta unuẹse buobu inọ ọ be nyaze vẹrẹ. (Evia. 2:16; 3:11; 22:7, 20) Ababọ avro, ọ jẹ ta kpahe okenọ ọ te nyaze te raha Babilọn Ologbo na gbe uyerakpọ omuomu Setan nọ u kiọkọ kpobi. (2 Tẹs. 1:7, 8) Avọ ọwhọ re ọ ruẹ orugba eware igbunu kpobi nọ a ruẹaro rai na, Jọn ukọ na o te yo nọ: “Ami. Nyaze, Ọnowo Jesu!” Mai nọ e be rria etoke edẹ urere orọ uyerakpọ omuomu nana ma be rọ ọwhọ rẹro okenọ Osu gbe Ovie mai ọ te rọ nyaze re o ru odẹ Ọsẹ riẹ fo jẹ kpare esuo Ọsẹ riẹ kpehru.

12. Eme Kristi o ti ru no taure a te ti si obọ no ofou ọraha na?

¹² Taure Jesu ọ tẹ te raha akpọ Setan, yọ ikpodhiwu idu udhuhrẹ gbe ene (144,000) na e gbunu no. Ebaibol na e ta vevẹ inọ bẹsenọ a re kpoka họ ahwo idu udhuhrẹ gbe ene na no, a ti si obọ no ofou nọ ọ te raha uyerakpọ Setan he.—Evia. 7:1-4.

13. Oghẹrẹ vẹ Kristi o ti ro ru re ahwo a riẹ nọ ọ nyaze no evaọ etoke abọ ọsosuọ ọrọ ‘uye ulogbo’ na?

¹³ Ahwo buobu nẹnẹ a ri vuhumu hu inọ “ẹtha” Kristi u muhọ anwọ 1914. (2 Pita 3:3, 4) Dede na, Kristi o ti ru re ahwo kpobi a riẹ inọ ọ nyaze no ẹkwoma uyerakpọ Setan nọ ọ be te raha no kẹle. Ẹraha “ohwo uzioraha” na, koyehọ isu-egagọ Kristẹndọm, u ti ru nọ ahwo kpobi a ti ro vuhu “oke ẹtha riẹ” mu ziezi. (Se 2 Ahwo Tẹsalonika 2:3, 8.) Onana o te kẹ imuẹro ivevẹ inọ Kristi ọ j’owọ no wọhọ Obruoziẹ nọ Jihova o ro mu. (Se 2 Timoti 4:1.) Kristẹndọm, abọ Babilọn Ologbo nọ ọ mai wo afuẹwẹ na, oye a te kake raha, kẹsena a vẹ raha egagọ erue efa nọ i kiọkọ kpobi muotọ. Jihova o ti fi ei họ udu isu akpọ na re a raha ogberẹ nana. (Evia. 17:15-18) Oye o te jọ abọ ọsosuọ ọrọ ‘uye ulogbo’ na.—Mat. 24:21.

14. (a) Fikieme a ti ro bru abọ ọsosuọ ọrọ uye ulogbo na kpẹre? (b) Ẹruore vẹ “oka Ọmọ ohwo” na o te kẹ idibo Jihova?

¹⁴ Jesu ọ ta nọ a ti bru edẹ uye ulogbo na kpẹre ‘fiki enọ a salọ na,’ koyehọ Ileleikristi nọ a rọ ẹzi wholo nọ i gbe kiọkọ otọakpọ na. (Mat. 24:22) Nọ isu akpọ na a tẹ raha egagọ erue no, Jihova ọ te kẹ uvẹ hẹ re a raha Ileleikristi nọ a wholo na gbe igodẹ efa na no otọakpọ na. Jesu o fibae nọ “uye obẹbẹ edẹ eyena o tẹ nwane i re [no],” ọre, ọvẹre, gbe isi i ve ti dhesẹ egheghẹrẹ eka jọ via, “kẹsena oka Ọmọ ohwo o [vẹ] te via eva obọehru.” Onana u ti ru erẹwho akpọ na “bruenu.” Rekọ o te jọ ere kẹ enọ a wholo na nọ i wo ẹruore obọ odhiwu na ha, gbe igodẹ efa na nọ i wo ẹruore ẹria otọakpọ na. A te ‘kpare uzou rai, je rri ehru keme esiwo rai ọ kẹle no.’—Mat. 24:29, 30; Luk 21:25-28.

15. Iruo vẹ Kristi o ti ru nọ ọ tẹ tha?

¹⁵ U wo edhere ọfa jọ nọ Ọmọ ohwo ọ te rọ tha taure o te ti ku odhẹ obokparọ riẹ na họ. Ọ ruẹaro inọ: “Nọ Ọmọ ohwo ọ te tha eva oruaro riẹ, gbe ikọ-odhiwu kpobi a viẹ, kẹsena ọvẹ te keria ehru akaba oruaro riẹ. Erẹwho kpobi i re ti kuku aro riẹ ọ vẹ te hẹriẹ ae ọjọ nọ ọjọ wọhọ epanọ othuru-igodẹ ọ rẹ hẹriẹ igodẹ no ewe, ọ vẹ te rehọ igodẹ fihọ obọze riẹ, rekọ ewe kọ ẹkpẹlobọ.” (Mat. 25:31-33) Onana u dhesẹ okenọ Kristi ọ te tha wọhọ Obruoziẹ, ọ vẹ te hẹriẹ ahwo “erẹwho kpobi” fihọ eko ivẹ: “igodẹ,” koyehọ, enọ e tha inievo abọ-ẹzi riẹ uke (Ileleikristi nọ a rọ ẹzi wholo evaọ otọakpọ) gbe “ewe,” koyehọ, “enọ e kezọ usiuwoma Jesu Ọnowo mai hi.” (2 Tẹs. 1:7, 8) Igodẹ na nọ a dhesẹ wọhọ ‘ikiẹrẹe na’ a ti wo “uzuazọ ebẹdẹ bẹdẹ” evaọ otọakpọ, rekọ ewe na i ti kpohọ “uye bẹdẹ bẹdẹ,” hayo ọraha kufiẹ.—Mat. 25:34, 40, 41, 45, 46.

Jesu O Ku Ohọre Riẹ họ avọ Obokparọ

16. Ẹvẹ Kristi Olori mai na o ti ro ku ohọre riẹ họ avọ obokparọ?

¹⁶ Nọ a te kpoka họ enọ i bi ti lele Kristi su no, je fi igodẹ na họ obọze riẹ kẹ esiwo no, Kristi o ve ti “kpe avọ obọ-okparọ.” (Evia. 5:9, 10; 6:2) Kristi avọ ijẹle obọ odhiwu gbe inievo riẹ nọ a kpare kpohọ odhiwu no, a te raha isuẹsu, egbaẹmo, gbe ekiọthuọ uyerakpọ Setan kpobi no. (Evia. 2:26, 27; 19:11-21) Kristi o ti ku ohọre riẹ họ avọ obokparọ nọ ọ tẹ raha uyerakpọ omuomu Setan kpobi muotọ no. Ọ vẹ te gba Setan avọ idhivẹri riẹ fihọ ọgọdọ odidi evaọ odu ikpe.—Evia. 20:1-3.

17. Diẹse Kristi o ti su igodẹ efa riẹ kpohọ evaọ etoke Esuo Odu Ikpe na, kọ eme ọ rẹ jọ ọtamuo mai?

¹⁷ Be ta kpahe “otu obuobu” ọrọ igodẹ efa na, enọ e te zọ evaọ uye ulogbo na, Jọn ukọ na ọ ruẹaro inọ “Omogodẹ nọ ọ rọ udevie akaba-uvie na ọye họ osu rai, ọye o re ti su ai kpohọ oria eyeri ame uzuazọ.” (Evia. 7:9, 17) Ẹhẹ, evaọ etoke Esuo Odu Ikpe na, Kristi ọ te thọ igodẹ efa nọ i gine yoẹme kẹe na, o ve je su ai kpohọ uzuazọ ebẹdẹ bẹdẹ. (Se Jọn 10:16, 26, 28.) Fikiere, joma lele Osu mai nọ ọ rrọ Ovie na no enẹna rite akpọ ọkpokpọ nọ Jihova ọ ya eyaa riẹ na.

Ọkiẹkpemu

• Eme Kristi o ru nọ a rehọ iẹe mu ovie no?

• Amono Kristi ọ be rọ kpọ ikoko sa-sa?

• Idhere vẹ Kristi Osu mai ọ te gbẹ rọ tha?

• Ẹvẹ Kristi ọ te rọ kpọ omai evaọ akpọ ọkpokpọ na?

[Uwoho nọ o rrọ ẹwẹ-obe avọ 29]

Nọ Kristi ọ tẹ raha uyerakpọ omuomu Setan no, ahwo kpobi a te riẹ inọ ọ ze no