Dọmu Fiki Ẹruore, Wo Ọwhọ Fiki Uyoyou

“Whaọ wha jọ eva orọwọ, ẹruore, uyoyou, esa enana: rekọ onọ omae jọ enana ro kọ uyoyou.”—1 AHWO KỌRINT 13:13.

 1. Didi unuovẹvẹ Pọl ukọ na ọ k’omai?

PỌL ukọ na ọ vẹvẹ omai unu nnọ, wọhọ okọ, ẹrọwọ mai ọ rẹ sai zue. Ọ t’ẹme kpahe “orọwọ u kru ga gbe iroro ezi. Eghẹrẹ ahwo jọ nọ a jẹ iroro fiẹ, ae ọvo a zue okọ [ẹrọwọ] rai no.” (1 Timoti 1:19) Evaọ ikpe-udhusoi ọsosuọ C.E., ire a je ro ku ekọ. Re a fievahọ ekọ evaọ abade, o roma hwa oghẹrẹ ure nọ a ro ku ai gbe ona ikuẹku riẹ.

 2. Fikieme ma jẹ bọ okọ ẹrọwọ mai gaga, kọ eme onana o gwọlọ mi omai?

² Oware nọ a sai se okọ ẹrọwọ mai na u re vori hrọ evaọ udevie abade ẹvohẹ ahwo-akpọ na. (Aizaya 57:20; Eviavia 17:15) Fikiere a rẹ bọe ga, yọ mai onana o rrọ obọ. Okenọ “abade” akpọ ahwo Ju gbe ahwo Rom ọ vohẹ ga hrọ no kẹ Ileleikristi ọsosuọ, Jud o te kere nọ: “Iyoyou, wha rọ orọwọ ọrẹri rai yọrọ oma rai whẹro, wha lẹ evaọ Ẹzi Ẹri na; jẹ yọre oma rai eva uyoyou Ọghẹnẹ na; wha hẹrẹ ohrọ-oriọ Ọnowo mai Jesu Kristi rite uzuazọ ebẹdẹ bẹdẹ.” (Jud 20, 21) Nọ o rọnọ Jud ọ t’ẹme te ‘ẹhọre kẹ ẹrọwọ nọ a rọ kẹ erezi’ na, ẹme na “orọwọ ọrẹri” na o be ta kpahe iwuhrẹ Ileleikristi kpobi, kugbe usiuwoma usiwo na. (Jud 3) Kristi họ otọhotọ ẹrọwọ yena. Ma gwọlọ ẹrọwọ ọgaga ma tẹ gwọlọ dọmu uvi ẹrọwọ Ileleikristi na.

Ẹdadamu kẹ Ẹkporo “Imuozọ Egagọ Erue”

 3. Ẹvẹ ejọ e be rehọ “imuozọ egagọ erue” ro ruiruo?

³ Evaọ ikpe jọ kẹle na, ma ruẹ imuozọ buobu no erọ ethuwhu ogbotu, ahwo okpe, ohọre ugbarugba ọrọ ẹko ahwo nọ a kokohọ. Wọhọ epanọ o rẹ jọ, ahwo buobu, kugbe isu egọmeti evezi, a dhesẹ ọdawẹ no kpahe ẹthọ evowa, maero emaha, no obọ ẹko ahwo imuozọ itieye na. Ababọ avro, “ọghẹnẹ akpọ nana” nọ ọ rọ emu ethube nana, ọ wha oware nọ otujọ a bi se imuozọ egagọ erue ze no, yọ ọ be rehọ enana họre ahwo Jihova. (2 Ahwo Kọrint 4:4; Eviavia 12:12) Ahwo jọ a rehọ uyero nana ruru ovao rọ wọso iruo mai no. Evaọ erẹwho jọ, isu na a rehọ ahwo mu no gidigba re a thọ ahwo no obọ “ẹko ahwo imuozọ” na rekọ a te kuọ Isẹri Jihova kugbei, a tẹ be rọ ẹghẹ raha odẹ mai. Onana u ru isẹri-ise n’uwou ruọ uwou evaọ erẹwho Europe jọ rọ gaga o tẹ jẹ lẹliẹ ahwo jọ nọ a bi wuhrẹ Ebaibol kugbe omai sioma kpemu no. Onana o tẹ lẹliẹ inievo mai jọ whrehe no.

 4. Fikieme ọkparesuọ o gbe whrehe omai hi?

⁴ Rekọ, ukpenọ u re whrehe omai, ọwọsuọ ọ rẹ bọ imuẹro mai ga inọ ma rọ Egagọ-Ileleikristi uzẹme. (Matiu 5:11, 12) A bọwo Ileleikristi ọsosuọ na ota inọ a rọ ẹko ahwo ọraha, a jẹ ta “ẹme oyoma” rai evaọ koria koria. (Iruẹru 24:5; 28:22) Rekọ Pita ukọ na ọ kẹ ibe enọ e rọwo imuẹro, kere nọ: “Iyoyou mẹ, odawọ erae nọ ubi bru owhai tha re a vuhu owhai na, u gbe owhai unu hu, wọhọ nikọ oware okpokpọ jọ nọ o be via kẹ owhai. Rekọ ghọghọ fiki epanọ who wo ẹkẹ eva uye Kristi, re whọ te ghọghọ re, je wo evawere okenọ oruaro riẹ o te via.” (1 Pita 4:12, 13) Epọvo na re, omọvo jọ ugboma esuo ikpe-udhusoi ọsosuọ na o kere nọ: “Imoni mẹ, re egheghẹrẹ edawọ i te te owhai, wha rehọ iẹe avọ evawere, keme na wha riẹ nọ odawọ nọ u te orọwọ rai na, o rẹ rehọ akothiho ọwhawha tha. Jọ akothiho rai ọ jọ uvi riẹ, re wha kiete jẹ gbunu, oware ovo o se owhai bẹ ẹkarọ.” (Jemis 1:2-4) Wọhọ epanọ ofou ọgaga o re dhesẹ epanọ okọ o ga te na, ere ẹkporo ukpokpoma o re dhesẹ ewhrehe kpobi nọ ọ rọ okọ ẹrọwọ mai.

Ukpokpoma O rẹ Wha Ithihakọ Ze

 5. Ẹvẹ o sai ro mu omai ẹro nọ ẹrọwọ mai o dọmu evaọ otọ ukpokpoma?

⁵ Ileleikristi a rẹ sai wo imuẹro ithihakọ rai gbe ẹdọmuo ẹrọwọ rai okenọ a tẹ fa ẹkporo ukpokpoma vrẹ no. Ithihakọ mai o rẹ “jọ uvi riẹ” evaọ abade ẹkporo otẹrọnọ ma ‘kiete jẹ gbunu, oware ovo o gbẹ kare omai hi,’ kugbe ẹrọwọ ọgaga. Pọl o kere nọ: “Rekọ eva eware kpobi ma dhesẹ oma mai, wọhọ iruiruo Ọghẹnẹ eva odiri ọwhawha, eva ẹlahiẹ ẹbẹbẹ, oja-oriọ.”—2 Ahwo Kọrint 6:4.

 6. Fikieme ma jẹ ‘ghọghọ evaọ otọ ukpokpoma,’ kọ ẹvẹ onana o rẹ rọ bọ ẹruore mai ga?

⁶ Ma re rri ofou ọgaga ọrọ ukpokpoma nọ ma rẹ sae nyaku ẹsejọ wọhọ uvẹ nọ ma re ro dhesẹ nnọ okọ ẹrọwọ mai o rẹ gaga jẹ dọmu. Ro se Ileleikristi evaọ obọ Rom, Pọl o kere nọ: “Rekọ ma wo oro eva ukpokpoma re, jẹ riẹ nọ ukpokpoma akothiho ore no tha; akothiho, uruemu u re no tha; uruemu, ẹruore o re no tha. [Ẹruore] ọ rẹviẹ omai họ họ.” (Ahwo Rom 5:3-5) Edikihẹ ga evaọ otọ edawọ o rẹ wha ọjẹrehọ Jihova s’omai. Onana o vẹ bọ ẹruore mai ga.

Oware nọ Otujọ A jẹ Ruẹ-Uye Okọ-Uzue

 7. (a) Wọhọ epanọ eme ọ Pọl i dhesẹ, ẹvẹ okọ abọ-ẹzi u ro zue otujọ no? (b) Ẹvẹ otujọ a rọ kẹnoma kẹ uzẹme na no nẹnẹ?

⁷ Okenọ Pọl ọ vẹvẹ unu kpahe ‘okọ uzue,’ ọ jẹ ta kpahe otujọ nọ i ku iroro ezi “fiẹ” a te je ku ẹrọwọ rai fiẹ. (1 Timoti 1:19) Usu rai họ Himẹnayọs gbe Alekzanda enọ i kieno ẹrọwọ, kẹnoma no uzẹme na jẹ be t’eme ekela. (1 Timoti 1:20; 2 Timoti 2:17, 18) Nẹnẹ, ikọ-erue, enọ e kẹnoma no uzẹme na no, a be rọ ẹmeunu họre ‘ọrigbo nọ o wo ẹrọwọ avọ areghẹ’ na, koyehọ a be rowo obọ nọ o ko rai no evaọ abọ-ẹzi. Ejọ i tho “odibo omuomu” na, be r’obọ s’udu nọ, ‘Olori mẹ o bi lehie.’ (Matiu 24:44-49; 2 Timoti 4:14, 15) A vro inọ ekuhọ uyerakpọ omuomu ọnana ọ kẹlino a tẹ be wọso otu ọrigbo na nọ o bi muẹrohọ otọ evaọ abọ-ẹzi fikinọ ọ be sẹro ẹzi ovẹrẹ evaọ udevie ahwo Jihova. (Aizaya 1:3) Ikọ-erue itieye na a sae ghinẹ “raha ẹrọwọ otu jọ” no, nọ o wha okọ-uzue abọ-ẹzi ze no.—2 Timoti 2:18.

 8. Eme ọ lẹliẹ otujọ zue okọ hayo zue-eghogho họ okọ ẹrọwọ rai no?

⁸ Ileleikristi efa nọ e roma mudhe no a zue okọ ẹrọwọ rai no ẹkwoma abọgbekẹ iroro-oziẹbro rai je bi duomahọ ẹgwọlọ omawere akpọ nana nọ o vrẹta gbe ọfariẹ-ogbe riẹ na. (2 Pita 2:20-22) Amọfa a bi zue okọ ẹrọwọ rai keme evaọ eriwo rai omofọwẹ uyerakpọ ọkpokpọ na o te kẹle tere he. Nọ a be sai kele oke ọ orugba eruẹaruẹ jọ họ na, jẹ be jọ eva rai kpairoro vrẹ “ẹdẹ Ọnowo” na, a te gbabọkẹ egagọ uzẹme. (2 Pita 3:10-13; 1 Pita 1:9) U kri hi a tẹ wariẹ ruẹ oma rai evaọ ame oluhu, ọrọ ẹvohẹ uyerakpọ ọnana. (Aizaya 17:12, 13; 57:20) Ejọ nọ e siọ ukoko Ileleikristi na ba ekuomagbe no a gbẹ rọwo inọ oye họ egagọ uzẹme na. Rekọ a kare odiri gbe ithihakọ nọ o gwọlọ re a hẹrẹ akpọ kpokpọ nọ Jihova Ọghẹnẹ ọ y’eyaa riẹ na. Uzuazọ evaọ Aparadase o nyaze vẹrẹ te epanọ a gwọlọ họ.

 9. Eme Ileleikristi jọ nọ e roma mudhe no a bi ru, kọ eme eware enana e rẹ lẹliẹ omai roro kpahe?

⁹ O wọhọ nọ umutho Ileleikristi jọ nọ e roma mudhe no evaọ abọjọ akpọ na a fariẹ ubi-okọ no okọ ẹrọwọ rai no. Okọ na u gbe bi vori, rekọ ukpenọ o dhẹ haro evaọ ẹrọwọ vọvọ, u bi su kẹkẹkẹ. Fikinọ ẹruore “Aparadase ekẹlena” o si rai urru, otu jọ a dao utho ẹgba rai kpobi re a woi—a wo ọwhọ evaọ iruo usiuwoma ota na je kpohọ iwuhrẹ ẹsikpobi, ikokohọ esese gbe ilogbo. Enẹna nọ a bi roro nọ orugba ẹruore rai o thabọ vi epanọ a roro na, a te hrẹ kpotọ no. Onana u dhesẹ oma via evaọ ekiekpotọ oke nọ a be jọ usiuwoma ota raha, iwuhrẹ kpohọ godo godo, a gbẹ be daezọ họ otẹrọnọ abọ ikokohọ jọ i vo rai. Amọfa a be raha oke viere kẹ arozaha hayo ilale efe. Eware enana e rẹ lẹliẹ omai roro kpahe oware nọ u fo nọ o rẹ kpọ uzuazọ mai kpahe omarọkẹ Jihova mai. Kọ ọwhọ mai evaọ egagọ riẹ o rẹ roma hwa ẹruore “Aparadase ekẹlena”?

A rọ Ẹruore Wawo Umu-Okọ

10, 11. Eme Pọl ọ rehọ ẹruore mai dhesẹ, kọ fikieme ẹwawo nana o je fo?

¹⁰ Pọl ọ ta nnọ Jihova ọ y’eyaa eghale nọ i ti no ẹkwoma Abraham te omai. Kẹsena ukọ na ọ tẹ ta nọ: “Ọghẹnẹ . . . ọ tẹ rehọ iyeiduwo ro ru ei ga. Re a rehọ fiki eware ivẹ eyena nọ a sae rẹriẹ hẹ na, yọ Ọghẹnẹ ọ sae ta erue eva rai hi na, mai e nọ e be dhẹ guọlọ oria [adhẹzọ] ma ruẹse ga te epanọ ma sai ro kru ẹruore nọ a fihọ aro mai na. Ma wo onana wọhọ umuẹro gbe o nọ u kie omai uduvi.” (Ahwo Hibru 6:17-19; Emuhọ 22:16-18) Ẹruore nọ a fihọ aro Ileleikristi nọ a wholo họ uzuazọ sebaewhu evaọ odhiwu. Nẹnẹ, ibuobu idibo Jihova a wo ẹruore ogbunu ọrọ uzuazọ ebẹdẹ bẹdẹ evaọ otọakpọ aparadase. (Luk 23:43) Ababọ ẹruore otiọye na, ohwo ọ sai wo ẹrọwọ họ.

¹¹ Umu-okọ yọ okwakwa ogbẹgbẹdẹ, onọ a re gbolo fihọ ame re okọ-oyibo o seba esu. Obiokọ ọvuọvo o re yiwi lehọ ababọ umu-okọ họ. Okọ u zue Pọl unuẹse buobu no, ọ riẹ nọ izuazọ ibiekọ e roma hwa umu-okọ rai. (Iruẹru 27:29, 39, 40; 2 Ahwo Kọrint 11:25) Evaọ ikpe-udhusoi ọsosuọ, okọ-oyibo u wo ẹjini nọ obiokọ na ọ rẹ rọ kpọ okọ na kpohọ obonọ ọ gwọlọ họ. U te no ekọ-ẹmo nọ a rẹ rehọ uvi bi no, ofou ọ jẹ hai fou ekọ dhẹ. Otẹrọnọ okọ na o be te dhẹ ruọ ehru itho, ifue obiokọ na kpobi họ o re gbolo umu-okọ na fihọ ame re ọ sae va ẹkporo na abọ, avọ evaifihọ nnọ umu-okọ na o te jọ otọ abade na jẹhọ oware jọ. Fikiere Pọl ọ tẹ rehọ ẹruore Oleleikristi wawo “umu-okọ ọrọ ẹwẹ na, onọ u muẹro jẹ rọ gaga.” (Ahwo Hibru 6:19, NW ) Okenọ ma tẹ rẹriẹ aro ku ẹkporo ukpokpoma hayo nyaku edawọ efa, ẹruore ogbunu mai o wọhọ umu-okọ nọ u re ru omai dadamu wọhọ ewẹ nọ e be rria, re okọ ẹrọwọ mai o seba esu kpohọ uwẹkpẹ imuozọ ọrọ avro hayo itho ọraha erọ ekieno-ẹrọwọ.—Ahwo Hibru 2:1; Jud 8-13.

12. Ẹvẹ ma sae rọ whaha omasino Jihova?

¹² Pọl ọ vẹvẹ Ileleikristi Hibru unu nọ: “Whaọ imoni, wha yọrọ oma rai o gbẹrọ erehe ohwo oyoma jọ eva udevie rai, avọ eva imuomu nọ e kare orọwọ o ve ti su owhai kie no Ọghẹnẹ uzuazọ na.” (Ahwo Hibru 3:12) Evaọ ekere Grik na, ‘esu kie’ u dhesẹ “re a kpemu,” koyehọ, re a kieno ẹrọwọ. Rekọ ma rẹ sae whaha okọ-uzue utioye na. Ẹrọwọ gbe ẹruore e rẹ lẹliẹ omai talamu Jihova makọ evaọ etoke ẹkporo ẹdawọ. (Iziewariẹ 4:4; 30:19, 20) Ẹrọwọ mai ọ rẹ jọ wọhọ okọ nọ ifou iwuhrẹ ikọ-erue i re fou kpenẹ avọ enẹ hẹ. (Ahwo Ẹfẹsọs 4:13, 14) Yọ avọ ẹruore wọhọ umu-okọ mai, ma vẹ te sae za ẹkporo uzuazọ dhe wọhọ idibo Jihova.

Ọwhọ Fiki Uyoyou gbe Ẹzi Ọfuafo

13, 14. (a) Fikieme umu-okọ ẹruore mai ọvo u gbe te he? (b) Eme o fo nọ o rẹ wọ omai gọ Jihova, kọ fikieme?

¹³ Oleleikristi ọ rẹ nyaharo kpohọ uyerakpọ okpokpọ na ha otẹrọnọ ẹjiroro nọ ọ be rọ gọ Jihova kpobi họ ẹruore ẹrria bẹdẹ bẹdẹ evaọ otọakpọ aparadase. Nọ ọ be sẹro umu-okọ ẹruore riẹ wọhọ ẹgba nọ ọ be rọ dadamu evaọ uzuazọ na, u fo re o fi ẹgba uyoyou bae avọ ẹrọwọ riẹ. Pọl o dhesẹ uzẹme onana nọ o kere nọ: “Whaọ wha jọ eva orọwọ, ẹruore, uyoyou, esa enana: rekọ onọ omae jọ enana ro kọ uyoyou.”—1 Ahwo Kọrint 13:13.

¹⁴ U fo re oware nọ o rẹ wọ omai gọ o jọ uyoyou kẹ Jihova, evaọ uyo kẹ uyoyou udidi riẹ k’omai. Jọn ukọ na o kere nọ: “Ohwo nọ o wo uyoyou hu, ọ riẹ Ọghẹnẹ hẹ; keme Ọghẹnẹ họ uyoyou. Eva onana a je ru uyoyou Ọghẹnẹ via udevie mai, epanọ Ọghẹnẹ o vi Ọmọvo riẹ ze eva akpọ na, re ma ruẹse rọ fiki riẹ zọ. Ma you [rie] keme ọye ọ kaki you omai.” (1 Jọn 4:8, 9, 19) Fiki uyere kẹ Jihova, oware nọ ma rẹ rọ k’aro họ, orọnikọ re ma wo usiwo ho, rekọ re ma se isẹri kẹ orufuọ odẹ ẹri riẹ gbe ẹkpare-kpehru esuo okiẹrẹe riẹ.

15. Ẹvẹ uyoyou mai kẹ Jihova u ro wo obọ kpahe ẹme ọ esuo okpehru riẹ?

¹⁵ Jihova ọ gwọlọ re ma gọe fikinọ ma you rie, orọnikọ Aparadase ọvo ho. Ofeme Ebaibol na Insight on the Scripturesa o ta nọ: “Jihova o wo oruaro fikinọ esuo okpehru riẹ gbe ẹmeoyo emama riẹ kẹe i no uyoyou ze. Ọ gwọlọ enọ i you esuo riẹ fiki ekwakwa iwoma riẹ gbe nnọ fikinọ o kiẹrẹe ọvo, enọ e gwọlọ esuo riẹ vi efa kpobi. (1Kọr 2:9) A gwọlọ jọ otọ esuo riẹ ukpenọ a rẹ gwọlọ jọ orọ obọ rai—onana fiki eriariẹ rai kpahe iẹe gbe uyoyou riẹ, ẹdhoguo-okiẹrẹe, gbe areghẹ, onọ a vuhumu nnọ u kpehru vi orọ obọ rai. (Ol 84:10, 11)”—Uko avọ 2, ẹwẹ-obe avọ 275.

16. Ẹvẹ uyoyou kẹ Jesu o rọ rrọ ẹgba ọwhọ evaọ izuazọ mai?

¹⁶ Wọhọ Ileleikristi, ma re je dhesẹ uyoyou kẹ Jesu evaọ uyo kẹ uyoyou nọ o wo k’omai. Pọl ọ jiroro nọ: “Keme uyoyou Kristi oye o rọ omai esuo, keme umu omai ẹro nọ ọ vo jọ o whu kẹ ahwo kpobi; fikiere ahwo kpobi a te whu re. O te whu kẹ ahwo kpobi re enọ egbẹrọ uzuazọ egbẹ jọ kẹ oma obọ rai ofaha, rekọ a rẹ jọ kẹ e ọnọ o whu fiki rai ọ tẹ jẹ kparoma.” (2 Ahwo Kọrint 5:14, 15) Kristi họ otọhotọ nọ ma rẹ bọ izuazọ abọ-ẹzi mai, ẹrọwọ mai, gbe ẹruore mai fihọ. Uyoyou mai kẹ Kristi Jesu o rẹ bọ ẹruore mai je ru ẹrọwọ mai dọmu, maero evaọ etoke ẹdawọ idhọvẹ.—1 Ahwo Kọrint 3:11; Ahwo Kọlọsi 1:23; 2:6, 7.

17. Ẹgba ogaga vẹ Jihova ọ k’omai, kọ ẹvẹ a dhesẹ oghẹrẹ nọ u wuzou te eva Iruẹru 1:8 gbe Ahwo Ẹfẹsọs 3:16?

¹⁷ Nọ o rọnọ uyoyou mai kẹ Ọghẹnẹ gbe Ọmọ riẹ họ ugogo ẹgba nọ o be kpọ izuazọ mai wọhọ Ileleikristi na, Jihova ọ k’omai oware ofa nọ o be wọ omai, k’omai ẹgba, jẹ k’omai ogaga re ma nyaharo evaọ egagọ riẹ. Oye họ ogaga iruo riẹ, hayo ẹzi ọfuafo. Ibiẹme Hibru gbe Grik nọ a fa “ẹzi” i dhesẹ edhadhẹ ẹgba ọrọ ofou. Ekọ nọ i re bi wọhọ enọ Pọl ọ ro e rẹro so ẹgba ofou nọ a rẹ ruẹ hẹ re e sai bi te uwou. Epọvo na, ma gwọlọ uyoyou gbe owojẹ ogaga iruo Ọghẹnẹ nọ a rẹ ruẹ hẹ ma tẹ gwọlọ re okọ ẹrọwọ mai o nyaharo evaọ egagọ Jihova.—Iruẹru 1:8; Ahwo Ẹfẹsọs 3:16.

Nyaharo Kpohọ Ute Mai!

18. Eme u re fiobọhọ k’omai thihakọ edawọ obaro ẹrọwọ mai?

¹⁸ Ẹsejọhọ a te dawo ẹrọwọ gbe uyoyou mai gaga re ma te te uyerakpọ okpokpọ na. Rekọ Jihova ọ k’omai umu-okọ no ‘onọ u muẹro jẹ rọ gaga’—ẹruore ogbunu mai. (Ahwo Hibru 6:19; Ahwo Rom 15:4, 13) Okenọ ma tẹ be ruẹ uye fiki ọkparesuọ hayo edawọ efa, ma rẹ sai thihakọ otẹrọnọ ma kru oma ga ẹkwoma ẹruore mai. Okenọ ẹkporo jọ o te fi serihọ no taure ọfa ọ tẹ te wọ ze, joma gbae mu re ma bọ ẹruore mai ga je ru ẹrọwọ mai kothi.

19. Ẹvẹ ma sai ro ru okọ ẹrọwọ mai kpọvi edhere je te oria omofọwẹ akpọ ọkpokpọ Ọghẹnẹ?

¹⁹ Taure ọ tẹ te fodẹ “umu-okọ ọrọ ẹwẹ na,” Pọl ọ ta nọ: “Ma guọlọ re ohwo kpobi o dhesẹ ajọwha otiọyena via eva ẹriẹ evavọ umuẹro ẹruore na rite urere. Re wha siọ emoyẹlẹ ba ẹ jọ, rekọ wha rehọ a ro kele e nọ e rehọ fiki odiri gbe orọwọ reuku eya na.” (Ahwo Hibru 6:11, 12) Fikinọ uyoyou kẹ Jihova jẹ kẹ Ọmọ riẹ o be wọ omai, avọ ogaga ẹzi ọfuafo nọ ma wo, joma kpọ okọ ẹrọwọ mai họ edhere bẹsenọ ma ti te oria omofọwẹ ọrọ akpọ ọkpokpọ nọ Ọghẹnẹ ọ yaa na.

[Footnotes]

Evaọ Edhere ọ Ọkiẹkpemu

◻ Kpahe ẹrọwọ mai, didi unuovẹvẹ Pọl ọ k’omai?

◻ Ẹvẹ okọ abọ-ẹzi u ro zue otujọ no, kọ ẹvẹ amọfa a bi ro whrehe kpemu?

◻ Okwakwa Ọghẹnẹ vẹ u fo nọ ma rẹ rọ tua ẹrọwọ mai?

◻ Eme o ti fiobọhọ k’omai nyate oria omofọwẹ akpọ ọkpokpọ eyaa Ọghẹnẹ na?

[Pictures on page 16]

Ma rẹ bọ okọ ẹrọwọ mai ga ziezi re ma sai thihakọ ẹkporo uzuazọ

[Picture on page 17]

Okọ o sai zue ẹrọwọ mai

[Picture on page 18]

Ẹruore yọ umu-okọ kẹ uzuazọ mai wọhọ Ileleikristi