Fikieme Ahwo A Bi Ro ru Eware Iyoma?

OWARE jọ nọ ahwo buobu a rẹ vravro riẹ hẹ họ: Mai kpobi ma gba ha, fikiere, eware e rẹ thọ omai obọ, yọ ma re ru eware jọ nọ ma rẹ vioja rai okiofa. Dede na, kọ ma sae ta nọ oye o be so eware iyoma buobu te esese gbe ilogbo nọ ma be ruẹ hayo yo kpahe kẹdẹ kẹdẹ na ze?

Ghelọ sebaẹgba ohwo-akpọ, ahwo a vuhumu inọ u wo itee uruemu jọ nọ u fo inọ a rẹ la vrẹ hẹ, gbe inọ o lọhọ kẹ ohwo-akpọ re o si obọ no emuemu. Amọfa buobu a rẹ jẹ rọwo inọ ohẹriẹ o rrọ udevie ẹme nọ ọ gba ha nọ a rọ ethobọ ta gbe ọrue nọ ohwo o keke aro họ ta, gbe inọ ohẹriẹ o rrọ omonwa idudhe nọ ohwo ọ rọ ọthobọ wha se omọfa gbe aro nọ a re keke fihọ si uwhu kpe omọfa. Ghele na, ahwo nọ a rẹ jọ oria viẹro ku hu ae a re ru ikpeware imuozọ ẹsibuobu. Fikieme? Eme ahwo a bi ro ru eware iyoma?

Ebaibol i ru onana vẹ. O fodẹ igogo eware nọ e soriẹ ze nọ ahwo a bi ro ru eware nọ a jọ udu rai riẹ nọ e thọ. Muẹrohọ oware nọ o ta.

▪ “Okienyẹ o re ru ohwo nọ owareghẹ ghẹhọ.”—ỌTAUSIUWOMA NA 7:7.

Ebaibol i dhesẹ nọ ẹsejọ, uyero nọ ohwo ọ rrọ u re tu ei họ ru oware nọ ọ hae gwọlọ ru vẹre he. Ahwo jọ a re tube thuji hayo ru eware ethube efa nọ a roro inọ o te kioja ọbẹwẹ hayo okienyẹ nọ a be rọ ẹro ruẹ. Obe na, Urban Terrorism, o ta nọ: “Ẹsibuobu . . . oware nọ o rẹ mae wọ ahwo ru ozighi ọkparesuọ họ, idhọvẹ nọ ahwo a bi wo fikiọ ebẹbẹ esuo, ohẹriẹ uyẹ gbe ẹbẹbẹ ekọ nọ a be ruẹ ifue kẹ hẹ.”

▪ “Uyoyou kpahe igho oye họ owọ imuomu kpobi.”—1 TIMOTI 6:10.

Ahwo a rẹ ta nọ ugho o rẹ raha ohwo, inọ makọ ahwo nọ a wo uruemu ezi dede, a re gbabọkẹ oruọzewọ gbe ẹfuọ uruemu nọ a tẹ rọ ẹro ruẹ igho buobu. Ahwo jọ nọ who rri nọ a rrọ wowou jẹ rrọ wolẹ a sai nwene idudhe zihe ruọ adaka evaọ uruemu rai nọ a tẹ kparo ruẹ ugho. Roro kpahe eware iyoma sa-sa nọ uvo-uthei o rẹ wha ze—ofruriọ, iwhayo, ohwo-otho, tubọ ohwo-okpe dede.

▪ “Fiki epanọ uye oziẹobro oware uyoma o be kake via ha, eva emọ ahwo e tẹ vọ kẹ oware uyoma uruo.”—ỌTAUSIUWOMA NA 8:11.

Etenẹ Ikereakere na u dhesẹ iroro ahwo-akpọ via, onọ a re ro roro inọ a sae vabọ osohwa eyoma nọ ohwo ọvo ọ gbẹ riẹ nọ ọ be nọ ae unu hayo si-uzi mu ai hi. Onana o soriẹ nọ ahwo a be hae rọ dhẹ imoto siawọ vrẹta, tho kere evaọ ẹdawọ, tho igho egọmeti je ru eware efa nọ i tube yoma viere. Nọ ahwo nọ a kẹ udu a gbẹ be rọ uye nọ u fo kẹ enọ e thuzi hi, hayo nọ ozọ inọ a ti kru ohwo o gbẹ riẹ hẹ, o rẹ sai ru ahwo nọ a jẹ hai koko uzi vẹre gbaudu ru oware uyoma. Emagazini na Arguments and Facts, o ta nọ: “O wọhọ nọ oghẹrẹ nọ ahwo-ugbarugba a be rọ vabọ uye-okẹ lọlọhọ o be lẹliẹ ahwo nọ i wo emamọ uruemu ru eware iyoma nọ a sae rọ unu gbiku rai hi.”

▪ “Kohwo kohwo o re kie ruọ odawọ okenọ urusio avọ eguọlọ-aguọlọ riẹ e gba riẹ họ. Kẹsena, nọ urusio u te dihọ, u ve yẹ umuomu.”—JEMIS 1:14, 15.

Iroro ethọthọ e rẹ sae ruọ ohwo kpobi udu. Iroro ethothọ nọ ahwo jọ a rẹ sae jẹ kẹ omai hayo odawọ nọ ma re ro ru eyoma e rẹ romavia kẹdẹ kẹdẹ. Evaọ etoke nọ a ro kere Ebaibol na, a ta kẹ Ileleikristi nọ: “Ẹdawọ ọvuọvo o re bru owhẹ tha ha, ajokpa oghẹrẹ nọ u bi te ahwo kpobi.” (1 Ahwo Kọrint 10:13) Dede na, oware nọ u re no edawọ itieye na ze o roma hwa iroro nọ ohwo ọ jẹ—ọ sae siọ iroro ethọthọ na kpata kpata hayo kẹ iroro itieye uvẹ rro evaọ udu riẹ. Oria ikere obe Jemis nọ o rrọ obehru na o vẹvẹ unu inọ ohwo ọ tẹ kẹ isiuru ethọthọ uvẹ re i “dihọ,” avro ọ riẹ hẹ, u re su kpohọ eyoma oruo.

▪ “Ọnọ ọ nya lele ahwo owareghẹ o re wo areghẹ, rekọ usu igheghẹ o rẹ nwa ohwo oma.”—ITẸ 13:20.

A rẹ vravro riẹ hẹ sọ usu mai kugbe amọfa o rẹ sai kpomahọ omai wowoma hayo yoyoma. Ẹsibuobu, ahwo a re ru eware nọ a wo họ iroro ho—fiki otunyẹ ọhwa hayo fikinọ a mu ekpehre usu, avọ iyẹrẹ iyoma nọ i re noi ze. Wọhọ epanọ a rehọ e riẹ ruiruo evaọ Ebaibol na, ẹme na “igheghẹ” u dhesẹ ahwo nọ e siọ ohrẹ areghẹ nọ o rrọ Ẹme Ọghẹnẹ, orọnikọ ahwo nọ a kare areghẹ hẹ. Ma make rrọ emaha hayo ekpako, ma gbẹ rọ areghẹ salọ egbẹnyusu mai lele itee Ebaibol na ha, ma sae wha enwoma se oma mai.

Eria Ebaibol nana gbe efa i dhesẹ vevẹ oware nọ o soriẹ nọ ahwo—makọ otu nọ e rrọ wowoma evaọ abọ ọfa—a bi ro ru eware iyoma, makọ eware imuozọ dede. Nọ ma riẹ eware nọ e be lẹliẹ ahwo ru eware iyoma no na, kọ ẹruore ọ riẹ inọ eware i ti woma? Ee, keme orọnikọ eware nọ e be lẹliẹ ahwo ru umuomu ọvo Ebaibol e ta kpahe he, e ta kpahe eyaa Ọghẹnẹ nọ o ti ro si eware itieye na n’otọ. Didi eyaa ọ ya? Kọ ginọ uzẹme inọ eware iyoma kpobi nọ e rrọ akpọ na i ti kuhọ ẹdẹjọ? Uzoẹme nọ o kẹle onana o kẹ uyo na.