SI Kẹle Jihova Ẹsikpobi

1, 2. Diẹse oma o rẹ jọ fọ omai nẹnẹ?

MA REHỌ iẹe nọ whọ rrọ edhere bi kpohọ oria jọ, yọ okpofou o bi fou. Ehru na o te muhọ ebi, elo egbrara i bi lo, kẹsena egbrara i te muhọ ẹva. U ri kri hi na, oso o te muhọ ẹrrọ. Whọ tẹ be gwọlọ oria nọ whọ rẹ dhẹ rro. Ẹvẹ o rẹ jọ owhẹ oma nọ whọ tẹ ruẹ emamọ oria jọ nọ whọ rẹ sae dhẹ rro?

² Uyero utioye na ma rrọ nẹnẹ re. Akpọ na o bi dhe eyeyoma. Whọ sae ruawa inọ, ‘Kọ diẹse me re kpohọ re oma o fọ omẹ?’ Ọso-ilezi jọ o kere evaọ Ebaibol nọ: “Mẹ te ta kẹ Jihova nọ: ‘Whẹ họ oria adhẹzọ mẹ gbe oria omofọwẹ mẹ, Ọghẹnẹ mẹ nọ me fievahọ.’” (Olezi 91:2) Ẹhẹ, Jihova ọ rẹ sae kẹ omai omofọwẹ rono ebẹbẹ mai enẹna, yọ ọ kẹ omai obọdẹ ẹruore no re kpahe obaro.

 3. Eme ma re ru re Jihova ọ sae jọ oria adhẹzọ mai?

³ Ẹvẹ Jihova ọ rẹ rọ thọ omai? O re fiobọhọ kẹ omai re ma sai thihakọ ẹbẹbẹ kpobi nọ ma wo, yọ ọ ga vi ohwo kpobi nọ ọ gwọlọ nwa omai oma thethabọ. Oware uyoma jọ o tẹ make via kẹ omai enẹna, ma wo imuẹro inọ Jihova ọ te ruẹrẹ eware kpobi họ evaọ obaro. Ebaibol na ọ tuduhọ omai awọ nọ, ma gbẹ hai ‘ru eware nọ Ọghẹnẹ o re ro you omai.’ (Jud 21) Rekọ o gwọlọ nọ ma re si kẹle Jihova re o fiobọhọ kẹ omai evaọ oke ebẹbẹ. Ẹvẹ ma sai ro ru ere?

4, 5. Ẹvẹ Jihova o ro dhesẹ uyoyou riẹ kẹ omai no?

⁴ Re ma sai si kẹle Jihova, o gwọlọ nọ ma rẹ riẹ epanọ o you omai te. Dai roro kpahe eware kpobi nọ Jihova o ru kẹ omai no. Ọye ọ ma otọakpọ owowoma nana nọ ma be rria na gbe ire gbe erao na kpobi. Ọ kẹ omai oghoghẹrẹ emu ọwewere sa-sa gbe emamọ ame nọ ma rẹ da. Ọ rẹhọ ẹkwoma Ebaibol na wuhrẹ omai odẹ riẹ gbe emamọ iruemu riẹ. Maero na, o dhesẹ nọ o you omai gaga nọ o vi Ọmọ oyoyou riẹ Jesu ziọ otọakpọ na re o whu kẹ omai. (Jọn 3:16) Yọ fiki uwhu Jesu na, ma wo uvi ẹruore kpahe obaro na.

⁵ Jihova ọ tẹ jẹ rọ Uvie Mesaya na mu no, koyehọ egọmeti obọ odhiwu nọ o ti ku ebẹbẹ mai kpobi họ kẹle na. Uvie na u ti ru otọakpọ na fihọ aparadase, oria nọ ohwo kpobi ọ te rria avọ udhedhẹ gbe evawere bẹdẹ bẹdẹ. (Olezi 37:29) Edhere ọfa nọ Jihova o ro dhesẹ uyoyou riẹ kẹ omai no họ, o bi wuhrẹ omai oghẹrẹ nọ ma re ro yeri emamọ uzuazọ enẹna. O te je zizie omai inọ ma lẹ sei, gbe nọ ọ te gaviezọ kẹ elẹ mai ẹsikpobi. O rrọ vevẹ inọ Jihova o dhesẹ uyoyou riẹ kẹ omai omomọvo no.

 6. Ẹvẹ whọ sai ro dhesẹ nọ uyoyou nọ Jihova o dhesẹ o da owhẹ ẹro?

⁶ Ẹvẹ whọ sai ro dhesẹ nọ uyoyou nọ Jihova o dhesẹ o da owhẹ ẹro? Dhesẹ kẹ Jihova nọ eware nana kpobi nọ o ru kẹ owhẹ na e da owhẹ ẹro fia. U yoma gaga inọ ahwo buobu nẹnẹ a wo edẹro ho. Ere ọvona o jọ re evaọ okenọ Jesu ọ jọ otọakpọ na. Evaọ ẹdẹ jọ, Jesu o siwi emoti ikpe, rekọ ọvuọvo o yere Jesu. (Luk 17:12-17) Ma gwọlọ jọ wọhọ ọzae nọ o yere Jesu na. U fo nọ ma re yere Jihova ẹsikpobi.

 7. Ẹvẹ u fo nọ ma re you Jihova te?

⁷ Ma re je dhesẹ nọ ma you Jihova re. Jesu ọ ta kẹ ilele riẹ nọ a rẹ rọ udu rai kpobi, uzuazọ rai kpobi gbe iroro rai kpobi you Jihova hrọ. (Se Matiu 22:37.) Eme oyena u dhesẹ?

8, 9. Ẹvẹ ma sai ro dhesẹ nọ ma you Jihova?

⁸ Kọ u te re ma rọ unu ta ọvo nọ ma you Jihova? Ijo. Otẹrọnọ ma ginẹ rọ udu mai kpobi, uzuazọ mai, gbe iroro mai you Jihova, ma rẹ rọ eware nọ ma bi ru ro dhesẹ iẹe via. (Matiu 7:16-20) Ebaibol ọ ta vevẹ inọ ma te gine you Ọghẹnẹ, ma re koko ijaje riẹ. Kọ oyena o ga hrọ? Ijo, keme “ijaje riẹ e rrọ owha ogbẹgbẹdẹ hẹ.”​—Se 1 Jọn 5:3.

⁹ Ma te bi yoẹme kẹ Jihova, ma re wo evawere je yeri emamọ uzuazọ. (Aizaya 48:17, 18) Rekọ eme o ti fiobọhọ kẹ omai si kẹle Jihova? Joma ruẹ.

10. Fikieme whọ rẹ rọ ruabọhọ wuhrẹ kpahe Jihova?

¹⁰ Ẹvẹ who ro zihe ruọ ogbẹnyusu Jihova? Ebaibol na nọ who wuhrẹ u fiobọhọ kẹ owhẹ riẹ Jihova vi epaọ ọsosuọ, who te mu usu kugbei. Usu nana o wọhọ erae nọ whọ rẹ kuvẹ re i fu hu. Wọhọ epanọ o gwọlọ nọ a rẹ hai fi ire họ erae re e seba efu na, ere ọvona o gwọlọ nọ whọ rẹ ruabọhọ wuhrẹ kpahe Jihova re usu ra kugbei o jọ gaga.​—Itẹ 2:1-5.

11. Ẹvẹ eware nọ whọ be jọ Ebaibol na wuhrẹ na i ti kpomahọ owhẹ?

¹¹ Nọ whọ be ruabọhọ wuhrẹ Ebaibol na, who ti wuhrẹ eware nọ i ti duobọte udu ra. Nọ Jesu o je ru eruẹaruẹ Ebaibol vẹ kẹ ilele ivẹ riẹ jọ, u duobọte ai udu gaga. A ta nọ: “Agbẹta nọ eme riẹ i ro duobọte omai udu gaga na nọ ọ jẹ ta ẹme kẹ omai evaọ edhere na, nọ ọ jẹ fa otọ Ikereakere na vevẹ kẹ omai na!”​—Luk 24:32.

12, 13. (a) Eme ọ rẹ sae via kẹ uyoyou nọ ma wo kẹ Ọghẹnẹ? (b) Eme ma re ru re uyoyou nọ ma wo kẹ Jihova u gbe dhẹ no ho?

¹² Wọhọ epanọ eware nọ ilele Jesu a wo otoriẹ rai evaọ Ebaibol na i duobọte ai udu na, ẹsejọhọ eware jọ nọ who wo otoriẹ rai no evaọ Ebaibol na i duobọte owhẹ udu no re. Onana u fiobọhọ kẹ owhẹ riẹ Jihova je you rie. Whọ kuvẹ re uyoyou nana u dhẹ no ho.​—Matiu 24:12.

¹³ Who te zihe ruọ ogbẹnyusu Ọghẹnẹ no, o gwọlọ nọ whọ rẹ daoma re usu na o jọ gaga ẹsikpobi. O gba owhẹ họ nọ whọ rẹ ruabọhọ wuhrẹ kpahe Jihova avọ Jesu, roro didi kpahe eware nọ who bi wuhrẹ na gbe oghẹrẹ nọ who re ro fi ai họ iruo evaọ uzuazọ ra. (Jọn 17:3) Nọ who te bi se hayo wuhrẹ Ebaibol na, nọ omara nọ: ‘Eme oware nana u wuhrẹ omẹ kpahe Jihova Ọghẹnẹ? Fikieme o rọ gwọlọ nọ mẹ rẹ rọ udu gbe uzuazọ mẹ kpobi ro you rie?’​—1 Timoti 4:15.

14. Ẹvẹ olẹ u re ro fiobọhọ ru uyoyou nọ ma wo kẹ Jihova jọ gaga ẹsikpobi?

¹⁴ Who te wo emamọ ogbẹnyusu, who re lele iei ta ẹme ẹsikpobi, yọ onana u re ru usu na jọ gaga. Epọvo na re, ma tẹ be lẹ se Jihova ẹsikpobi, u re ru uyoyou nọ ma wo kẹe jọ gaga. (Se 1 Ahwo Tẹsalonika 5:17.) Olẹ yọ obọdẹ okẹ nọ u no obọ Ọsẹ obọ odhiwu mai ze. U fo nọ ma rẹ lẹ no udu mai ze ẹsikpobi. (Olezi 62:8) Orọnikọ ma rẹ wariẹ eme jọ nọ ma se fihọ uzou ho, rekọ o rẹ jọ oware nọ o ginẹ rrọ omai udu dẹẹ. Evaọ uzẹme, ma tẹ ruabọhọ bi wuhrẹ Ebaibol na jẹ be lẹ no udu mai ze, uyoyou nọ ma wo kẹ Jihova o te jọ gaga ẹsikpobi.

15, 16. Ẹvẹ who rri iruo usi uwoma ota na?

¹⁵ Ma tẹ gwọlọ nọ ma re wo usu okpekpe kugbe Jihova ẹsikpobi, o gwọlọ nọ ma rẹ vuẹ amọfa kpahe iẹe ẹsikpobi. Uvẹ-ọghọ o rrọ re ma vuẹ amọfa kpahe Jihova. (Luk 1:74) Onana yọ iruo nọ Jesu ọ rọ kẹ Ileleikristi uzẹme kpobi. U fo nọ mai omomọvo ọ rẹ ta usi uwoma Uvie Ọghẹnẹ. Kọ who mu onana họ eruo no?​—Matiu 24:14; 28:19, 20.

¹⁶ Pọl ukọ na o rri iruo usi uwoma ota na ghaghae gaga, o se rie “efe.” (2 Ahwo Kọrint 4:7) Re whọ vuẹ amọfa kpahe Jihova gbe ẹjiroro riẹ họ iruo nọ e mai wuzou nọ whọ rẹ sai ru. Onana yọ edhere jọ nọ whọ rẹ rọ gọ Jihova, yọ onọ who ru evaọ onana o rẹ dae ẹro. (Ahwo Hibru 6:10) Usi uwoma ota o rẹ jẹ kẹ owhẹ gbe amọfa kpobi nọ a gaviezọ kẹ owhẹ erere, keme te owhẹ te ahwo na, wha ti si kẹle Jihova vi epaọ ọsosuọ je wo uzuazọ ebẹdẹ bẹdẹ evaọ obaro. (Se 1 Ahwo Kọrint 15:58.) Kọ iruo efa jọ e riẹ nọ e rẹ sae kẹ owhẹ evawere vi enana?

17. Fikieme iruo usi uwoma ota na e rọ rrọ kpata kpata gaga?

¹⁷ Iruo usi uwoma ota na e rrọ kpata kpata gaga. O gwọlọ nọ ma rẹ “vuẹ ẹme na,” je ru ei “kpata kpata.” (2 Timoti 4:2) Yọ u fo nọ ahwo a re yo kpahe Uvie Ọghẹnẹ. Ebaibol na ọ ta nọ: “Ẹdẹ ologbo Jihova ọ kẹle no! Ọ kẹle no yọ ọ be tha kpata kpata! Urere na o te ze “evaọ ẹruoke!” (Zẹfanaya 1:14; Habakọk 2:3) Ẹhẹ uviemenẹ, Jihova ọ te raha akpọ omuomu Setan nana no. Rekọ taure oyena o tẹ te via, o gwọlọ nọ ma rẹ vẹvẹ ahwo unu kpahe onana re a mu Jihova họ ẹgọ.

18. Fikieme ma je kuomagbe Ileleikristi uzẹme efa gọ Jihova?

¹⁸ Jihova ọ gwọlọ nọ ma kuomagbe Ileleikristi uzẹme efa gọe. Ebaibol na ọ ta nọ: “Joma roro kpahe ohwohwo re ma sai ru ohwohwo dhesẹ uyoyou je ru iruo iwoma, ma re gbabọkẹ omakokohọ mai hi wọhọ epaọ uruemu otujọ, rekọ ma rẹ tuduhọ ohwohwo awọ, maero kọ enẹna nọ wha be ruẹ nọ ẹdẹ na o bi si kẹle na.” (Ahwo Hibru 10:24, 25) Ma rẹ daoma mai kpobi re ma ruẹ nọ ma kpohọ iwuhrẹ mai kpobi. Ma rẹ jọ iwuhrẹ mai wo uvẹ nọ ma rẹ rọ tuduhọ ohwohwo awọ jẹ bọ ohwohwo ga.

19. Eme o re fiobọhọ kẹ omai you inievo emezae gbe erọ emetẹ mai?

¹⁹ Whọ tẹ be hai kpohọ ewuhrẹ, whọ te jọ obei ruẹ emamọ egbẹnyusu nọ i ti fiobọhọ kẹ owhẹ gọ Jihova. Whọ te ruẹ inievo emezae gbe erọ emetẹ sa-sa nọ e be daoma rai kpobi re a gọ Jihova wọhọ epanọ who bi ru na. Yọ wọhọ epanọ whọ gba ha na, ae omarai a gba gbe he, yọ eware e rẹ thọ ae obọ re. Nọ o tẹ via ere, hae rọvrẹ rai ẹsikpobi. (Se Ahwo Kọlọsi 3:13.) Hae tẹrovi emamọ iruemu nọ inievo emezae gbe erọ emetẹ nọ e rrọ ukoko na a wo ẹsikpobi, keme onana u ti fiobọhọ kẹ owhẹ you rai je si owhẹ kẹle Jihova vi epaọ ọsosuọ.

20, 21. Eme họ uvi uzuazọ na?

²⁰ Jihova ọ gwọlọ nọ egbẹnyusu riẹ kpobi a re yeri uzuazọ nọ o mai woma kpaobọ. Ebaibol na o wuhrẹ omai nọ uzuazọ nọ ma ti yeri evaọ obaro u ti wo ohẹriẹ no onọ ma bi yeri nẹnẹ na riẹriẹriẹ.

²¹ Evaọ obaro, ma te rria bẹdẹ bẹdẹ orọnikọ ikpe udhosa-gbikpe hayo ikpe udhone ọvo ho. Ma te reawere “uzuazọ ebẹdẹ bẹdẹ” avọ ugboma ogbagba, yọ ma ti wo udhedhẹ, je wo evawere evaọ aparadase owowoma. Oyena họ oware nọ Ebaibol na o se “uvi uzuazọ na.” Jihova ọ ya eyaa nọ ọ te kẹ omai uvi uzuazọ nana, rekọ o gwọlọ nọ ma rẹ daoma kpobi enẹna re ma “dadabọ” mu ei.​—1 Timoti 6:12, 19.

22. (a) Ẹvẹ ma sae rọ “dadabọ mu uvi uzuazọ na”? (b) Fikieme mai ọvo ma gbẹ sai ro ru oware nọ a rẹ rọ rehọ uzuazọ ebẹdẹ bẹdẹ hwosa kẹ omai hi?

²² Ẹvẹ ma sae rọ “dadabọ mu uvi uzuazọ na”? O gba omai họ nọ ma rẹ “hai ru ewoma” je “fe evaọ iruo iwoma.” (1 Timoti 6:18) Onana o gwọlọ nọ ma re fi oware nọ ma wuhrẹ evaọ Ebaibol na họ iruo. Rekọ orọnikọ fiki omodawọ obọmai ma ti ro wo uvi uzuazọ na ha. Mai ọvo ma sai ru oware nọ a rẹ rọ rehọ uzuazọ ebẹdẹ bẹdẹ hwosa kẹ omai hi. Onana yọ okẹ ọvọvẹ nọ Jihova ọ te rọ kẹ idibo riẹ nọ i bi yoẹme kẹe, fiki “uwowou ulogbo” riẹ. (Ahwo Rom 5:15) Ọsẹ obọ odhiwu mai ọ ginẹ gwọlọ kẹ idibo riẹ nọ i bi yoẹme kẹe okẹ nana.

23. Fikieme u ro fo re whọ salọ nọ whọ rẹ gọ Jihova enẹna?

²³ Nọ omara nọ, ‘Kọ mẹ be gọ Ọghẹnẹ evaọ edhere nọ ọ jẹrehọ?’ Whọ tẹ ruẹ nọ o gwọlọ nọ who re ru inwene jọ, ru inwene na obọnana. Ma tẹ rẹroso Jihova jẹ be daoma mai kpobi re ma yoẹme kẹe, ọ te jọ oria adhẹzọ kẹ omai. Ọ te sẹro idibo riẹ nọ i bi yoẹme kẹe evaọ etoke edẹ urere uyero-akpọ omuomu Setan nana. Kẹsena Jihova ọ vẹ te ruẹ nọ ma rria Aparadase bẹdẹ bẹdẹ, wọhọ epanọ ọ ya eyaa riẹ na. Ẹhẹ, uvi uzuazọ na u ti te owhẹ obọ otẹrọnọ whọ salọ nọ whọ rẹ gọ Jihova enẹna!