Ekpako Ukoko Gbe Idibo Iruiruo Wha Rọ Aro Kele Timoti

EVAỌ ukpe n’ukpo, a jọ ikoko sa-sa rọ inievo-emezae buobu mu ekpako gbe idibo iruiruo wariẹ akpọ na soso họ. Whọ tẹ rrọ omọvo inievo yena, u mu omai ẹro nọ eva e be were owhẹ gaga kpahe owha-iruo okpokpọ nọ who wo na.

Dede na, o sae jọnọ onana o be dina lẹliẹ owhẹ ruawa. Ọkpako ukoko jọ nọ a re se Jason nọ ọ gbẹ dina maha ọ ta nọ: “Nọ a rọ omẹ mu ọkpako ukoko obọ, o jọ omẹ oma nọ owha-iruo na o rro vi omẹ.” Mosis avọ Jerimaya a je roro nọ a te sai ru iruo nọ Jihova ọ kẹ rai hi. (Ọny. 4:10; Jeri. 1:6) Otẹrọnọ ere o rrọ owhẹ oma, ẹvẹ whọ sai ro fi iroro itieye na kparobọ jẹ ruabọhọ ẹnyaharo ra? Joma ta kpahe oriruo Timoti.​—Iruẹru 16:1-3.

Okenọ Pọl ukọ na ọ vuẹ Timoti nọ jọ o kuomagbei evaọ erẹ usiuwoma ota riẹ, o wọhọ nọ Timoti ọ be kẹle ikpe udhe no hayo ọ nwane vrẹ ere obọ. Evaọ oke ọsosuọ, o sae jọnọ ẹzi ọmaha u ru nọ ozọ o jẹ rọ dina mu Timoti kpahe owha-iruo okpokpọ riẹ na. (1 Tim. 4:​11, 12; 2 Tim. 1:​1, 2, 7) Dede na, ikpe ikpe nọ i lele i rie, Pọl ọ sai kere se ukoko obọ Filipai nọ: “Me bi rẹro nọ me ti vi Timoti ze kẹle na o tẹ ruọ Olori na Jesu. . . . Keme me wo omọfa nọ o wo ọkpọ uruemu riẹ hẹ.”​—Fil. 2:​19, 20.

Eme u ru nọ Timoti ọ rọ jọ emamọ ọkpako ukoko otiọye? Joma ta kpahe eware ezeza jọ nọ ma rẹ sai wuhrẹ mi Timoti.

1. Ọ jẹ daezọ amọfa ziezi. Pọl ọ ta kẹ ibe Ileleikristi riẹ evaọ obọ Filipai nọ: “[Timoti] ọ te rọ eva riẹ kpobi rẹrote eware nọ e rrọ ọdawẹ kẹ owhai.” (Fil. 2:20) Avro ọ riẹ hẹ, Timoti ọ jẹ hae daezọ amọfa. O wo isiuru kpahe ẹnyaharo rai evaọ egagọ Ọghẹnẹ, yọ o je gine ru eware buobu fiki rai.

Who du wo uruemu edraeva jọ nọ a ro gbiku hu, ọnọ u wo oke nọ a fihọ inọ ọ rẹ rọ wọ ahwo evaọ eria sa-sa. Rekọ ọ tẹ dhẹ te eria na, ahwo na a gbẹ re nyaze he, ọ vẹ be hae dhẹ ofofe vrẹ fikinọ o bi koko oke. William nọ ọ rrọ ọkpako ukoko vrẹ ikpe udhe no ọ rẹ kẹ inievo nọ a ro mu ekpako obọ ohrẹ jọ inọ: “You inievo na. Hae tẹrovi ẹgwọlọ rai viukpọ epanọ eware kpobi e rẹ rọ nya owowa evaọ ukoko na.”

2. Ọ rọ iruo usiuwoma ota na karo. Pọl o dhesẹ ohẹriẹ nọ o rrọ Timoti gbe amọfa evaọ oke riẹ nọ ọ ta nọ: “Ahwo nọ a kiọkọ kpobi a be gwọlọ ewoma obọrai orọnikọ ọrọ Jesu Kristi hi.” (Fil. 2:21) Okenọ Pọl ọ jọ Rom o ro kere ileta nana. O muẹrohọ nọ inievo nọ e jọ Rom, a jẹ dhogbo iruẹru obọrai. A jẹ roma kpobi kẹ iruo Ọghẹnẹ hẹ. Rekọ ere Timoti o je ru hu. Nọ uvẹ u rovie fihọ nọ ọ sae rọ ta usiuwoma na vi epaọ anwẹdẹ, o dhesẹ ọkpọ uruemu Aizaya nọ ọ ta nọ: “Mẹ na! Vi omẹ.”​—Aiz. 6:8.

Eme whọ rẹ sai ru nọ iruẹru obọra i gbe ro mi owhẹ oke nọ who re ro ru iruo Uvie na ha? Orọ ọsosuọ, riẹ eware nọ e mai wuzou. Pọl ọ tuduhọ omai awọ nọ: “Wha . . . vuhu eware nọ e mae roja.” (Fil. 1:10) Jọ eware nọ e mai wuzou kẹ Ọghẹnẹ e jọ eware nọ e rẹ mai wuzou kẹ owhẹ re. Orọ avivẹ, gbobọnẹ eware jọ. Whaha eware nọ e roja ha nọ e rẹ rehọ oke gbe ẹgba ra. Pọl ọ hrẹ Timoti nọ: “Dhẹ siọ isiuru uzoge ba, rekọ le ẹrẹreokie, ẹrọwọ, uyoyou, udhedhẹ.”​—2 Tim. 2:22.

3. Ọ rọ ẹgba riẹ kpobi ru iruo Uvie na. Pọl ọ kareghẹhọ Ileleikristi obọ Filipai nọ: “Wha riẹ imuẹro nọ [Timoti] ọ kẹ kpahe omariẹ, inọ wọhọ ọmọ nọ ọ rrọ kugbe ọsẹ riẹ o lele omẹ ruẹ uye re usi uwoma na o nyaharo.” (Fil. 2:22) Timoti ọ jọ ọyẹlẹ hẹ. O lele Pọl ru iruo gaga, yọ onana u ru nọ usu rai imava o rọ kpekpe ziezi.

Iruo e vọ ukoko Jihova nọ ma re ru nẹnẹ. Iruo nana e rẹ kẹ evawere yọ i re ru omai si kẹle inievo mai. Fikiere, jọ o jọ utee ra inọ who re wo “iruo buobu nọ [who] re ru evaọ iruo Olori na.”​—1 Kọr. 15:58.

4. O fi eware nọ o je wuhrẹ họ iruo. Pọl o kere se Timoti nọ: “Who bi lele uwuhrẹ mẹ kpekpekpe, te edhere uzuazọ mẹ, utee mẹ, ẹrọwọ mẹ, odiri mẹ, uyoyou mẹ, ithihakọ mẹ.” (2 Tim. 3:10) Fikinọ Timoti o fi eware nọ o je wuhrẹ họ iruo, u ru nọ o ro wo ewha-iruo efa evaọ ukoko Ọghẹnẹ.​—1 Kọr. 4:17.

Kọ u wo oniọvo jọ nọ o kruga ziezi evaọ ukoko na nọ whọ be rọ aro kele ẹrọwọ riẹ? Otẹrọnọ who wo ho, kọ who gbe roro kpahe ọjọ? Oniọvo nọ a re se Tom nọ ọ rrọ ọkpako ukoko ikpe buobu no ọ ta nọ: “Ọkpako ukoko jọ nọ o kri ukoko na no ọ rehọ omẹ wọhọ ọmọ obọriẹ, yọ ọ nabi wuhrẹ omẹ ziezi. Ẹsikpobi mẹ jẹ hae gwọlọ ohrẹ mi ei, yọ me je ru lele ohrẹ riẹ. Onana u ru nọ me ro wo udu ziezi.”

5. Ọ ruabọhọ je wuhrẹ omariẹ. Pọl ọ ta kẹ Timoti nọ: “Wuhrẹ omara avọ utee orọ omarọkẹ Ọghẹnẹ.” (1 Tim. 4:7) Ohwo nọ o re wobọ evaọ erozaha oma-uru-jaja ọ rẹ sai wo ohwo nọ o re wuhrẹ iẹe, rekọ o gwọlọ nọ o re wuhrẹ omariẹ re. Pọl ọ tuduhọ Timoti awọ nọ: “Gbẹ hae roma kẹ isase ẹgbede, hae kẹ uduotahawọ je wuhrẹ ahwo. . . . Hai roro kpahe eware nana; rọ oma kpobi kẹ ae, re ahwo kpobi a sae ruẹ ẹnyaharo ra vevẹ.”​—1 Tim. 4:​13-15.

Epọvo na re, o gwọlọ nọ whọ rẹ gbẹ daoma wo onaa ziezi. Daoma wo ẹnyaharo evaọ usu ra kugbe Jihova, je wo otoriẹ okpokpọ orọ oghẹrẹ nọ a bi ro ru eware evaọ ukoko na. Who fievahọ omara gahrọ họ, ẹsejọhọ bi roro nọ who wo eriariẹ buobu evaọ ukoko na, fikiere whọ rẹ sai ru oware nọ u fo evaọ uyero kpobi ababọ ekiakiẹ nọ who re ru tao. Rọ aro kele Timoti hai “muẹrohọ omara gbe ewuhrẹ ra ẹsikpobi.”​—1 Tim. 4:16.

6. Ọ rẹroso ẹzi ọfuafo Jihova. Pọl o roro kpahe odibọgba Timoti, kẹsena ọ tẹ kareghẹhọ iẹe nọ: “Rehọ ẹkwoma obufihọ ẹzi ọfuafo nọ ọ rrọ omai oma na sẹro efe ọghaghae nọ a mu họ owhẹ obọ na.” (2 Tim. 1:14) Re Timoti ọ sae sẹro hayo ruabọhọ odibọgba riẹ, o gwọlọ nọ ọ rẹ rẹroso ẹzi ọfuafo Ọghẹnẹ.

Oniọvo jọ nọ a re se Donald nọ ọ rrọ ọkpako ukoko ikpe buobu no o muẹrohọ nọ: “O gwọlọ nọ inievo nọ i wo owha-iruo evaọ ukoko na a re se usu rai kugbe Ọghẹnẹ gboja gaga. Inievo nọ i ru ere a ti ‘dhe ẹgẹga’ evaọ iruo odibọgba rai. A tẹ lẹ kẹ ẹzi Ọghẹnẹ jẹ daoma wo ubi ẹzi na, a te jọ obufihọ gaga kẹ ibe Ileleikristi rai.”​—Ol. 84:7; 1 Pita 4:11.

O rrọ oware uduotahawọ gaga kẹ omai nọ ma be rọ ruẹ inievo-emezae buobu wọhọ owhẹ nọ i bi wo ẹnyaharo evaọ ukoko na, nọ a kẹ ewha-iruo ekpokpọ. Jason nọ ma ta kpahe evaọ obọ emuhọ uzoẹme na ọ ta nọ: “Anwọ okenọ mẹ rọ rrọ ọkpako ukoko na, me wuhrẹ eware buobu no, yọ udu o ruọ omẹ awọ vi epaọ anwẹdẹ no re. Enẹna, mẹ be reawere iruo mẹ yọ me rri uvẹ-ọghọ nọ Jihova ọ kẹ omẹ na ghaghae!”

Kọ whọ te ruabọhọ ẹnyaharo evaọ ukoko na? Jọ o jọ utee ra inọ whọ rẹ rọ aro kele Timoti. Who te ru ere, whọ te jọ obufihọ gaga kẹ ibe Ileleikristi ra re wọhọ Timoti.