Ohwo-akpọ Ọ Gwọlọ Eriariẹ Ọghẹnẹ

“Whọ vẹ te riẹ ozodhẹ ỌNOWO na jẹ ruẹ eriariẹ Ọghẹnẹ na.”—ITẸ 2:5.

 1. Ẹvẹ a sae rọ ta nọ udu ohwo-akpọ na yọ okwakwa obọdẹ nọ Ọghẹnẹ ọ ma?

IBIUDU ahwo-akpọ nọ i bu viọ 5,600,000,000 i bi kie evaọ otọakpọ na obọnana. Kẹdẹ kẹdẹ, ubiudu ra u re kie asia 100,000 je se azẹ nọ o bu te ilita 7,600 dhẹ iriẹ azẹ na wariẹ nọ i theri te ikilomita 100,000. Uriẹ ovuọvo nọ u re ruiruo viọ okwakwa obọdẹ onana nọ Ọghẹnẹ ọ ma na o riẹ hẹ.

 2. Ẹvẹ who re dhesẹ ubiudu ẹwoho na?

² Ibiudu ẹwoho nọ i bu te 5,600,000,000 e be jọ otọakpọ na ruiruo re. Evaọ ubiudu ẹwoho na họ oria nọ ọwhọ-eva mai, owojẹ mai, gbe isiuru mai e rọ. Oye họ ehri iroro mai, otoriẹ mai, gbe oreva mai. Ubiudu ẹwoho na o rẹ sae wo omoya hayo romakpotọ, o rẹ sai muovahọ hayo jọ whẹtiẹwhẹtiẹ, o rẹ sai muebi hayo lo.—Nehemaya 2:2; Itẹ 16:5; Matiu 11:29; Iruẹru 14:17; 2 Ahwo Kọrint 4:6; Ahwo Ẹfẹsọs 1:16-18.

 3, 4. Ẹvẹ usiuwoma na u bi ro te idu ahwo?

³ Jihova Ọghẹnẹ ọ rẹ sae riẹ oware nọ o rọ ubiudu ohwo na. Itẹ 17:3 o ta nọ: “Ẹbẹro a rẹ rọ ghra isiliva, a vẹ rehọ ebrerae rọ ghra oro, ỌNOWO na ọ rẹ dawo ibiudu.” Ukpenọ ọ kiẹ ubiudu ovuovo riwi re ọ kẹ oziẹobro, Jihova ọ be rọ Isẹri riẹ ru iruo re a rehọ usiuwoma na te ibiudu ahwo. Onana o rọwo kugbe eme Pọl ukọ na: “Keme, ‘kohwo kohwo nọ ọ be fa odẹ ỌNOWO a re ti siwi ei.’ Rekọ kẹvẹ ahwo a re ti ro se odẹ ohwo nọ a re rọwo ho? Jegbe ẹvẹ a rẹ te rọ rọwo ohwo nọ a ti yo usi riẹ hẹ? Ẹvẹ a re ro yo ababọ ọtausiuwoma? Kẹvẹ ahwo a rẹ rọ ta usiuwoma kẹ ae ajokpa nọ a re vi ai? Wọhọ epanọ a kere nọ, ‘Kinọ erru awọ ahwo nọ a be ta usiuwoma!’ ”—Ahwo Rom 10:13-15.

⁴ O were Jihova eva re o vi Isẹri riẹ kpohọ oka otọakpọ na re a “ta usiuwoma” re a jẹ gwọlọ ahwo nọ i wo udu ẹmeoyo. Enẹna ma bi le ahwo 5,000,000—a tẹ ghale ae Osẹri 1 o re te ahwo 1,200 evaọ otọakpọ na. Re a rehọ usiuwoma na nyate ima-idu ahwo nọ e rọ otọakpọ na o lọhọ họ. Rekọ Ọghẹnẹ ọ be rọ ẹkwoma Jesu Kristi kpọ iruo enana, ọnọ o bi si ahwo udu oruọzewọ. Fikiere, eruẹaruẹ nọ a kere fihọ Aizaya 60:22 o bi rugba: “Enọ i kpotọ i re ti zihe ruọ odu, enọ e mae kao kpobi a re ti zihe ruọ orẹwho ulogbo. Mẹ họ ỌNOWO na; me re ti ru ei vẹrẹ nọ u te ezi riẹ.”

 5. Eme họ eriariẹ, kọ eme a rẹ sae ta kpahe ereghẹ akpọ na?

⁵ Ezi na ọna, yọ oware ovo jọ u muẹro—ima-idu ahwo otọakpọ na a gwọlọ eriariẹ. Uzẹme, eriariẹ họ otoriẹ izẹme nọ a rẹ jọ eware nọ e via no wo, ẹromuhọ, hayo uwuhrẹ. Akpọ na o koko eriariẹ buobu họ no. A ru ẹnyaharo gaga no evaọ eria wọhọ ofa-edhere, eria-imu, gbe ekwakwa ovuẹ ugbothabọ. Rekọ eriariẹ akpọ ohwo ọ ghinẹ gwọlọ? Vievie! Ẹmuofio, ọyawọ, ẹyao, gbe uwhu e gbẹ be lahiẹ ahwo-akpọ. Ereghẹ akpọ ọnana e tẹ wọhọ epanọ uwẹkpẹ o re go no oria ruọ oria evaọ udhude nọ okpofou o bi jo fou.

 6. Rọ kpahe azẹ, ẹvẹ eriariẹ Ọghẹnẹ e wawo kugbe ereghẹ akpọ?

⁶ Re a dhesẹ iẹe: Oware wọhọ ikpe egba ivẹ nọ i kpemu, o jọ oware odode re a si azẹ no oma wọhọ edhere omusio nọ a roro. George Washington, ohwo agbara ọsosuọ United States, a se azẹ noi oma esese evaọ euwa urere uzuazọ riẹ. U te okejọ, ọ tẹ ta nọ: “Wha j’ome whu ẹrera; mẹ gbẹ te sae rria kri hi.” Ọ ta gba, keme ẹdẹdẹ ọyena o whu—December 14, 1799. Ukpenọ a se azẹ noma, nẹnẹ a be tudu họ azẹ nọ a re se fihọ oma ohwo. Idhere usiwo ivẹ nana evọ avọ ebẹbẹ nọ e rẹ wha uwhu ze. Evaọ oke nana kpobi dede, Ẹme Ọghẹnẹ ọ ta vẹre no: “Wha si oma no . . . azẹ.” (Iruẹru 15:29) Oke kpobi eriariẹ Ọghẹnẹ e rẹ jọ gbagba, avọ evaifihọ jẹ kpokpọ.

 7. Ẹvẹ eriariẹ Ikereakere egbagba e wawo kugbe ereghẹ akpọ kpahe ọmọ ọyọrọ?

⁷ Dai roro kpahe oriruo ereghẹ akpọ ọfa nọ a re fievahọ họ. Evaọ ikpe buobu, ahwo eriariẹ a jẹ tuduhọ emọ nọ a rẹ kuvẹ ru onuje nọ a tẹ be yọrọ ai, rekọ omọvo rai jọ nọ ọ jẹ tuduhọ onana ọ tẹ te rọwo iẹe nọ onana o thọ. Ukoko Ewuhrẹ Emama Germany ọ ta okejọ nọ, re a kẹ ọmọ uvẹ ru onuje “u fiba ebẹbẹ nọ ma bi wo enẹna kugbe emoha na.” Ereghẹ akpọ na e rọ deghedeghe, wọhọ epaọ ẹsenọ ofou ọ be wọe, rekọ oware ovo u re nuhu eriariẹ egbagba Ikereakere na ha. Ebaibol na e kẹ ohrẹ nọ u kiete kpahe ọmọ ọyọrọ. “Whọku ọmọ ra, ọ rẹte kẹ owhẹ eriosehọ; o re ti ru eva were owhẹ,” ere Itẹ 29:17 ọ tae. A rẹ kẹ ọwhọkuo ọyena avọ uyoyou, keme Pọl o kere nọ: “Whai esẹ, wha kpọ emọ rai eva ha, rekọ wha ru ai re a yo ẹme je wuhrẹ ai orọ ỌNOWO na.”—Ahwo Ẹfẹsọs 6:4.

“Eriariẹ Ọghẹnẹ Na”

 8, 9. Ẹvẹ whọ rẹ sai dhesẹ oware nọ Itẹ 2:1-6 o ta kpahe eriariẹ nọ ohwo-akpọ ọ ghinẹ gwọlọ?

⁸ Dede nọ Pọl yọ ohwo nọ ọ riẹ obe, ọ ta nọ: “Otẹrọnọ ohwo jọ udevie rai o roro nọ o wo areghẹ eva oge ọnana, jọ ọ jọ ohwo ogheghẹ re ọ ruẹse te jọ owareghẹ. Keme areghẹ akpọ ọnana ugheghẹ obọ Ọghẹnẹ.” (1 Ahwo Kọrint 3:18, 19) Ọghẹnẹ ọvo ọ rẹ sae kẹ eriariẹ nọ ohwo-akpọ ọ ghinẹ gwọlọ. Kpahe onana, Itẹ 2:1-6 ọ ta nọ: “Ọmọ mẹ, otẹrọnọ whọ rehọ eme mẹ, re whọ yọrọ izi mẹ fihọ eva ra, re whọ gaviezọ kẹ areghẹ, who ve je rovie udu ra kẹ otoriẹ, uzẹme, otẹrọnọ who bo kẹ orimuo, whọ vẹ jẹ kpare uru ra kẹ otoriẹ, otẹrọnọ whọ gwọle riẹ wọhọ isiliva, jẹ gwọlọ iẹe wọhọ efe nọ a sino, kẹsena whọ vẹ te riẹ ozodhẹ ỌNOWO na jẹ ruẹ eriariẹ Ọghẹnẹ na. Keme ỌNOWO na ọ rẹ kẹ areghẹ, evaọ unu riẹ eriariẹ gbe otoriẹ i re no tha.”

⁹ Ahwo nọ omamọ udu o rẹ wọ a rẹ gaviezọ kẹ areghẹ ẹkwoma eriariẹ Ọghẹnẹ nọ a re fihọ iruo gbagba. A rẹ kpọ idu rai kpohọ orimuo, rehọ omakpotọ wawo izẹme nọ a bi wuhrẹ na. Evaọ ere oruo, yọ a bi bo kẹ otoriẹ, hayo ẹgba nọ ohwo ọ rẹ rọ ruẹ oghẹrẹ nọ abọ ọvuọvo o kpomahọ ohwohwo eva ẹme na. Ahwo udu oruọzewọ a re ruiruo wọhọ ẹsenọ a be tọ kẹ isiliva jẹ kiẹ rọ kẹ efe nọ a sino. Didi efe ologbo enọ i wo udu ẹmeoyo a rẹ ruẹ? Oye họ “eriariẹ Ọghẹnẹ na.” Didi oware oye? Re a ru ei lọlọhọ, oyehọ eriariẹ nọ a rẹ jọ Ẹme Ọghẹnẹ, Ebaibol na ruẹ.

10. Eme ma re ru hrọ re ma sae reawere omamọ omakpokpọ ẹzi?

¹⁰ Eriariẹ Ọghẹnẹ e rọ wowoma, i re kpemu kparo ho, e rẹ kẹ uzuazọ. E rẹ wha omokpokpọ ẹzi ze. Pọl ọ tuduhọ Timoti awọ nọ: “He lele oghẹrẹ eme oma ojaja eyena enọ whọ jọ unu mẹ yo na eva ẹrọwọ gbe uyoyou nọ e rọ eva Kristi Jesu.” (2 Timoti 1:13, ẹjẹlẹ ẹme na ọmai.) Ẹvẹrẹ o wo oghẹrẹ ibieme riẹ. Oghẹrẹ ovo na, “ẹvẹrẹ ọgbagba” uzẹme Ikereakere na o wo “oghẹrẹ eme oma ojaja” nọ e mai wo ehri no uzoẹme Ebaibol na ze ọrọ ẹkpare esuo Jihova ẹkwoma Uvie na. (Zefanaya 3:9) U fo re ma yọrọ oghẹrẹ eme oma ojaja enana fihọ iroro gbe udu. Re ma ruẹse whaha ẹyao udu re ma jẹ jọ sasasa evaọ ẹzi, ma re fi Ebaibol na họ iruo evaọ uzuazọ je fihọ iruo vọvọ ọruẹrẹfihọ ẹzi nọ Ọghẹnẹ o bi ru lọhọ ẹkwoma ‘ọrigbo ẹrọwọ gbe areghẹ na.’ (Matiu 24:45-47; Taitọs 2:2) Joma hae kareghẹhọ kẹse kẹse nnọ rọ kẹ emamọ omokpokpọ ẹzi, ma gwọlọ eriariẹ Ọghẹnẹ.

11. Didi eware e soriẹ nọ ohwo-akpọ ọ jẹ gwọlọ eriariẹ Ọghẹnẹ?

¹¹ Roro eware efa nọ e soriẹ nọ ima-idu ahwo-akpọ a jẹ gwọlọ eriariẹ Ọghẹnẹ. Kọ ahwo-akpọ kpobi a riẹ oghẹrẹ nọ akpọ na gbe ahwo a rọ ze uzuazọ? Ijo, a riẹ hẹ. Kọ ahwo-akpọ kpobi a riẹ Ọghẹnẹ uzẹme na gbe Ọmọ riẹ? Kọ ahwo kpobi a riẹ kpahe ikẹ nọ Setan ọ kpare ze kpahe esuo Ọghẹnẹ gbe ẹgbakiete ohwo-akpọ? Ijo re. Kọ ahwo a riẹ oware nọ ma jẹ be who je whu? Ma rẹ jẹ wariẹ ta nọ, ijo. Kọ ahwo nọ e be rria akpọ na kpobi a vuhumu nọ Uvie Ọghẹnẹ u bi su enẹna gbe nnọ ma be rria evaọ edẹ urere na? A riẹ kpahe egaga izi imuemu? Kọ ahwo akpọ kpobi a wo eriariẹ nọ a re fievahọ kpahe epanọ a re ro wo uviuwou evawere? Kọ ogbotu ahwo na a riẹ nọ uzuazọ evawere evaọ Aparadase yọ ẹjiroro Ọnọma omai rọ kẹ ahwo-akpọ nọ i yoẹme? Rọ kẹ enọ nana kpobi re, ijo họ uyo na. U ri vevẹ, inọ ohwo-akpọ ọ gwọlọ eriariẹ Ọghẹnẹ.

12. Ẹvẹ ma sae rọ gọ Ọghẹnẹ “avọ ẹzi gbe uzẹme”?

¹² Ohwo-akpọ ọ gwọlọ eriariẹ Ọghẹnẹ re fiki ẹme nọ Jesu ọ ta evaọ olẹ oke aso urere uzuazọ otọakpọ riẹ. U fi ọwhọ odidi họ ikọ riẹ oma nọ a yo ẹme riẹ nọ ọ ta nọ: “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ, gbe Jesu Kristi ọnọ who vi.” (Jọn 17:3) Eriariẹ itieye na fihọ iruo ọvo họ edhere nọ a rẹ rọ gọ Ọghẹnẹ avọ ọjẹrehọ. “Ọghẹnẹ họ Ẹzi, enọ e be gọ e, e rẹ rọ ẹzi gbe uzẹme gọ e hrọ,” ere Jesu ọ ta. (Jọn 4:24) Ma rẹ “rọ ẹzi” gọ Ọghẹnẹ no udu ze nọ ẹrọwọ gbe uyoyou o tẹ wọ omai. Ẹvẹ ma rẹ rọ gọe ‘avọ uzẹme’? Ẹkwoma ewuhrẹ Ẹme riẹ ma vẹ jẹ gọe nya lele uzẹme riẹ nọ o rovie via no—“eriariẹ Ọghẹnẹ na.”

13. Didi eware evia nọ a kere fihọ Iruẹru 16:25-34, kọ eme ma sae wuhrẹ noi ze?

¹³ Idu ahwo a bi mu Jihova họ ẹgọ kukpe kukpe. Ghele na, kọ o rọ ọgbahọ re a ru uwuhrẹ Ebaibol kugbe ahwo nọ i wo isiuru krẹkri, hayo o lọhọ kẹ ahwo udu oruọzewọ re a nyate ute ame-ọhọ vẹrẹ viere? Whaọ, dai roro kpahọ oware nọ o via kẹ oriekarọ avọ uviuwou riẹ nọ a fodẹ evaọ Iruẹru 16:25-34. A fi Pọl avọ Sailas họ uwou-odi evaọ Filipai, rekọ evaọ udevie aso, otọ nọ u nuhu ruaro u te rovie ethẹ uwou-odi na. Nọ o roro nọ ahwo ekarọ na kpobi a dhẹ vabọ so hiẹe uzou no avọ uye nọ u ti tei, oriekarọ na o je ti kpe oma riẹ no nọ Pọl ọ rọ ta kẹe nnọ ae kpobi a gbunu evaọ etẹe. Pọl avọ Sailas a tẹ “ta ẹme Ọnowo na kẹ e avọ otu nọ a rọ uwou riẹ kpobi.” Oriekarọ ọyena avọ uviuwou riẹ a jọ ahwo Egedhọ nọ a riẹ onahona evaọ Ikereakere Efuafo na ha. Ghele na, evaọ aso ọvo ọyena, a te zihe ruọ ilele. Je tube viere dede, “a jẹ nwane họ e, avọ ekru riẹ ame.” Eyena yọ eware nọ e rẹ rehọ ọthobọ via, rekọ a wuhrẹ ahwo kpokpọ izẹme nọ i wuzou no a te je wuhrẹ eware efa no evaọ uwuhrẹ ukoko na. Oware utioye na o sae lọhọ nẹnẹ re.

Ivuẹvu Na E Rẹ Ruaro!

14. Fikieme ẹgwọlọ ọ jẹ riẹ re a ru iwuhrẹ Ebaibol buobu evaọ umutho oke?

¹⁴ O rẹ jọ ziezi otẹrọnọ unu iwuhrẹ Ebaibol nọ Isẹri Jihova a bi ru e rẹ jọ buobu evaọ umutho oke. Onana o rọ ẹgwọlọ gaga. Wọhọ oriruo, evaọ ẹkwotọ Eastern Europe, ahwo a re kere odẹ rai fihọ obe a vẹ hẹrẹ oke nọ a re ru iwuhrẹ Ebaibol kugbe ai. Ere o rọ evaọ ekuotọ efa re. Evaọ ẹwho jọ evaọ obọ Dominican Republic, Isẹri isoi jọ a wo ahwo nọ e be gwọlọ obe uwuhrẹ te epanọ a gbẹ be sai ro ru iwuhrẹ na kpobi hi. Kọ eme a ru? A tudu họ ahwo nọ i wo isiuru nnọ a ze ewuhrẹ evaọ obọ Ọgwa Uvie na re a kere odẹ rai fihọ obe kẹ uwuhrẹ Ebaibol. Epavo na orọ evaọ eria buobu nya akpọ na wariẹ re.

15, 16. Eme a siobọ no re a rọ vaha eriariẹ Ọghẹnẹ kpata viere, kọ eme họ izẹme jọ kpahiẹe?

¹⁵ Ekuotọ ekẹkẹre—idhu logbo kẹ ivuẹvu—i bi rovie via kẹ ahwo Ọghẹnẹ. Dede nọ Jihova, “Olori ivuẹvu na,” o bi vi iruiruo buobu, eware buobu e gbẹ riẹ nọ a re ru. (Matiu 9:37, 38) Fikiere, re a vaha eriariẹ Ọghẹnẹ kpata kpata viere, ‘ọrigbo ẹrọwọ’ na o ru oware jọ nọ o rẹ kẹ ubi-eme ovuẹ re emọ ewuhrẹ Ebaibol a sai wo ẹnyaharo ẹzi evaọ uwuhrẹ ọvuọvo rai. Onana yọ obe okpokpọ nọ a rẹ sai wuhrẹ re no vẹrẹ evaọ obe uwuhrẹ Ebaibol—otiẹsejọ evaọ umutho emera. Yọ obe onana o rẹ gba ẹkpa erẹ, ẹmẹkpa usiobọ mai, hayo makọ ẹkpa ewu mai dede! Eva e were ahwo idu udhusoi nọ i koko họ evaọ Okokohọ Ubrotọ “Enọ I bi Jiri Avọ Oghọghọ” ọrọ Isẹri Jihova na nọ a ro wo obe okpokpọ nọ ewẹre-obe riẹ i bu te 192 avọ uzoẹme nọ o ta nọ Eriariẹ Nọ I Re Su Kpohọ Uzuazọ Ebẹdẹ Bẹdẹ.

¹⁶ Ikere-ebe nọ e rọ ekuotọ sa-sa ae ruẹrẹ ikere nọ a kiẹ riwi je kuhọ kẹ obe ọ Eriariẹ na. Fikiere obe na o te jọ obe nọ u re siuru rọ kẹ ahwo erẹwho kpobi. Rekọ u ti kri re a te ti siobọ no obe okpokpọ onana evaọ evẹrẹ ahwo nya akpọ na wariẹ? Ijo, keme obe nọ ewẹre riẹ i bu te 192 o vẹrẹ re a fae vi ebe ilogbo. Evaọ amara October 1995, Ogbẹgwae Ikere-ebe ọrọ Ugboma Esuo na a kẹ udu inọ a fa obe onana no Oyibo fihọ evẹrẹ nọ i bu te 130.

17. Didi eware i ru riei lọhọ re a rehọ obe Eriariẹ na ruiruo?

¹⁷ Eme ivevẹ evaọ uzou ovuovo obe Eriariẹ na u re fiobọhọ kẹ emọ-uwuhrẹ re a nyaharo evaọ ẹzi. Obe na o kẹ izẹme Ikereakere evaọ edhere ọbọga. O raha oke gbiku kpahe iwuhrẹ erue he. Eme ivevẹ ẹvẹrẹ gbe owowa uwuhrẹ riẹ u re ru ei lọhọ re a rehọ obe na ru uwuhrẹ Ebaibol je fiobọhọ kẹ ahwo re a wo otoriẹ eriariẹ Ọghẹnẹ. U te no ikereakere nọ a fodẹ no, izou Ebaibol nọ uwuhrẹ na u no ze a kere i rai fihiẹe nọ ọmọ-uwuhrẹ na ọ sae riwi kpohọ evaọ oke nọ ọ be ruẹrẹ oma kpahe kẹ uwuhrẹ na. A rẹ sai se enana evaọ oke uwuhrẹ na epanọ oke o riẹ te, dede na o rẹ jọ oware ugheghẹ re a t’ẹme te eware efa nọ i re kpe igogo-eme na họ otọ. Ikpoye, enọ i bi ru uwuhrẹ Ebaibol na a rẹ daoma re a riẹ otọ je ru oware nọ uzou ẹme obe na o be t’ẹme kpahe vevẹ kẹ ọmọ-uwuhrẹ na. Onana u dhesẹ nọ owuhrẹ na o re se ziezi, re eme nọ e mai w’uzou e vẹ jọ vevẹ evaọ iroro riẹ.

18. Didi iroro a kẹ kpahe e ro ruiruo obe Eriariẹ na?

¹⁸ Ẹvẹ obe na Eriariẹ Nọ I Re Su kpohọ Uzuazọ Ebẹdẹ Bẹdẹ na o sai ro ru iruo a ru ilele na vẹrẹ? Obe onana nọ ewẹre riẹ i bu te 192 na a rẹ sai wuhriẹe re evaọ umutho oke, yọ ahwo nọ “a ro mu kẹ uzuazọ ebẹdẹ bẹdẹ” a rẹ sae wuhrẹ ziezi ẹkwoma ewuhrẹ obe na re a rehọ oma dheidhe kẹ Jihova jẹ họ-ame. (Iruẹru 13:48) Fikiere joma rehọ obe Eriariẹ na ruiruo ziezi evaọ odibọgba na. Otẹrọnọ ọmọ-uwuhrẹ Ebaibol na o wuhrẹ obe ọfa thabọ no, o sai jọ ziezi re o wuhrẹ obe oyena re. Ogbẹ rọ ere he, a jiroro riẹ nọ a nwene iwuhrẹ Ebaibol na kpohọ obe Eriariẹ na. A te wuhrẹ obe okpokpọ nana re no, a jiroro riẹ nọ a re wuhrẹ obe avivẹ kugbe ọmọ-uwuhrẹ na ha. Ahwo nọ a dede uzẹme na rehọ a sai fiba eriariẹ rai ẹkwoma ewuhrẹ ọnya kugbe Isẹri Jihova gbe ese Ebaibol gbe ebe Ukoko sasa kẹ omobọ rai.—2 Jọn 1.

19. Taure a tẹ te rọ obe Eriariẹ na ru iwuhrẹ Ebaibol, ẹvẹ o sae rọ jọ oware obọfihọ re a kiẹ ewẹre-obe 175 rite 218 ọrọ obe ọ Organized to Accomplish Our Ministry riwi?

¹⁹ Obe Eriariẹ na a kerei rie avọ ẹjiroro obọfihọ kẹ ohwo re ọ sae k’uyo kẹ enọ nọ ekpako a rẹ rọ kiẹ iwhowho-uvie nọ e re họ-ame he riwi nọ i wo isiuru ame-ọhọ wọhọ Isẹri Jihova. Fikiere, taure who te ti nwene iwuhrẹ Ebaibol ra kpohọ obe okpokpọ onana, u fo re whọ raha umutho euwa rọ kiẹ enọ nọ e rọ ewẹre-obe 175 rite 218 ọ rọ obe na Organized to Accomplish Our Ministrya riwi. Onana u ti fiobọhọ k’owhẹ fi ẹgba họ iyo enọ itieye na evaọ oke uwuhrẹ Ebaibol evaọ obe Eriariẹ na.

20. Eme whọ moma nọ whọ te rehọ obe Eriariẹ Nọ I Re Su Kpohọ Uzuazọ Ebẹdẹ Bẹdẹ na ru?

²⁰ U fo re ahwo evaọ oria kpobi a yo usiuwoma na. Ẹhẹ, ohwo-akpọ ọ gwọlọ eriariẹ Ọghẹnẹ, yọ Jihova o wo Isẹri riẹ nọ i re ru ei via. Enẹna ma wo obe okpokpọ nọ Ọsẹ oyoyou ob’odhiwu mai ọ rehọ kẹ ẹkwoma ọrigbo ẹrọwọ gbe areghẹ na. Kọ whọ te rehiẹe wuhrẹ uzẹme na jẹ wha adhẹẹ se odẹ ofuafo Jihova? Ababọ avro Jihova ọ te ghale owhẹ nọ whọ be dao ẹgba ra re whọ wha eriariẹ nọ i re su kpohọ uzuazọ ebẹdẹ bẹdẹ ro se ahwo buobu na.

[Footnotes]

Ẹvẹ Whọ Te k’Uyo?

◻ Ẹvẹ who re dhesẹ ubiudu ẹwoho na?

◻ Eme họ eriariẹ Ọghẹnẹ na?

◻ Fikieme ohwo-akpọ ọ jẹ gwọlọ eriariẹ Ọghẹnẹ?

◻ Obe okpokpọ ovẹ o riẹ, kọ ẹvẹ whọ moma nọ whọ te rehiẹe ruiruo?

[Picture on page 3]

Eware buobu e soriẹ ze nọ ima-idu ahwo akpọ a jẹ gwọlọ eriariẹ Ọghẹnẹ