‘Ọnowo na . . . O Wo Ogaga Ulogbo’

 1, 2. Didi ikpeware Elaeja ọ ruẹ no evaọ uzuazọ riẹ, rekọ eware igbunu vẹ ọ ruẹ evaọ okenọ ọ jọ eghogho jọ evaọ Ugbehru Horẹb?

ELAEJA ọ ruẹ ikpeware no vẹre. Ọ ruẹ ekọlọbe nọ e jẹ wọ emuore sei isiava okpẹdẹ evaọ okenọ ọ jẹ rria evaọ eria idhere. Ọ ruẹ eka nọ a wuhu gbe ewhri nọ i je vihọ evaọ ikolo ivẹ evaọ etoke ohọo uthethei. Ọ tubẹ ruẹ erae nọ i kie no ehru ze evaọ uyo kẹ olẹ riẹ. (1 Ivie, uzou avọ 17, 18) Dede na, Elaeja ọ te ruẹ uvumọ oware utiona ha.

² Nọ o kiẹzẹ kẹle unu eghogho jọ evaọ Ugbehru Horẹb, ọ tẹ ruẹ eware igbunu sa-sa nọ e via. Ọ kake ruẹ ofou. O je fou gaga avọ edo ologbo, keme ofou na ọ ga te epanọ ọ rọ hẹriẹ igbehru jẹ vaha itho. Ọ tẹ jẹ ruẹ otọ nọ u nuhu, nọ u siobọno ẹgba ologbo nọ ọ rrọ otọ ẹkpẹ na. Kẹsena ọ tẹ ruẹ erae. Nọ e jẹ to ruọ oria na kpobi na, ẹsejọhọ eri erae na o je mu Elaeja.—1 Ivie 19:8-12.

 3. Odhesẹvia okwakwa Ọghẹnẹ vẹ Elaeja ọ ruẹ, kọ diẹse ma sae jọ ruẹ odhesẹvia okwakwa nana?

³ Eware sa-sa nana kpobi nọ Elaeja ọ ruẹ na i wo oware ovo jọ kugbe—e jọ odhesẹvia ogaga ulogbo Jihova Ọghẹnẹ. Dede na, u du gwọlọ nọ ma rẹ ruẹ eware igbunu tao re ma te vuhumu nọ Ọghẹnẹ o wo okwakwa onana ha. A rẹ jọ oria kpobi rue riẹ. Ebaibol na ọ ta k’omai nọ emama e kẹ imuẹro “ogaga irurẹ Ọghẹnẹ.” (Ahwo Rom 1:20) Dai roro kpahe elo ọnwranwra ehru nọ o re rienẹ gbe edo egbrara, ame nọ o bi hwẹ no ugbehru ze, ima ruru ima isi nọ e rrọ ehru na! Kọ whọ gbẹ be ruẹ ogaga Ọghẹnẹ evaọ eware itieye na? Ghele na, umutho ahwo jọ ọvo evaọ akpọ inẹnẹ na a ghine vuhu ogaga Ọghẹnẹ mu. Enọ i wo otoriẹ ogaga oyena a tubẹ kawo viere dede. Rekọ ewo otoriẹ okwakwa Ọghẹnẹ nana o rẹ k’omai ẹjiroro buobu nọ ma re ro si kẹle Jihova viere. Evaọ abọ nana ọrọ obe na ma te kiẹ ogaga ulogbo Jihova riwi kokodo.

 4, 5. (a) Didi ojẹhọ o rrọ odẹ Jihova gbe ẹgba hayo ogaga riẹ? (b) Fikieme u je fo nnọ Jihova ọ rehọ eruẹ ro dhesẹ ogaga riẹ?

⁴ A rẹ ruẹ obọ Jihova ha evaọ ogaga. Jerimaya 10:6 o ta nọ: “Ohwo ọvo nọ ọ wọhọ owhẹ ọ rọ họ O, ỌNOWO; whẹ o wo oro, odẹ ra o tẹ jẹ rọ ruaro avọ ogaga.” Muẹrohọ nọ a rehọ oruaro, hayo ogaga, jẹhọ odẹ Jihova. Kareghẹhọ, otofa odẹ nana họ “O re Ru Zihe Ro.” Eme o re ru Jihova sai zihe omariẹ ro oware nọ u je rie kpobi? Ojọ họ ogaga. Ẹhẹ, ẹgba Jihova nọ ọ rẹ rọ j’owọ, nọ o re ro ru oreva riẹ gba, o wo umuo ho. Ogaga utioye na yọ ovo jọ evaọ usu ekwakwa obọdẹ riẹ.

⁵ Fikinọ ma rẹ sai wo otoriẹ ovọvọ orọ ogaga riẹ hẹ, Jihova ọ rehọ etadhesẹ fiobọhọ k’omai. Wọhọ epanọ ma ruẹ no na, ọ rehọ eruẹ dhesẹ ogaga riẹ. (Izikiẹl 1:4-10) Eruẹ ọ nwani fo, keme eruẹ ẹwho dede yọ arao ologbo avọ ogaga. Ahwo nọ e jọ ẹkwotọ Palẹstain ọrọ oke Ebaibol na a ruẹ arao ọfa ọvuọvo nọ ọ ga viere he. Rekọ a riẹ kpahe oghẹrẹ eruẹ jọ nọ o muozọ viere—eruẹ ẹwọ, hayo ogholi, ọnọ o n’akpọ no anwẹdẹ. (Job 39:9-12) Julius Caesar Ovie-Ologbo Rom ọ ta okejọ nnọ iruẹ nana e rẹ dina rro te eni. O kere nọ: “A re gbiku ogaga gbe awọ-osio rai hi.” Dai roro oghẹrẹ nọ whọ rẹ kawo te who te dikihẹ kẹle arao otiọye na!

 6. Fikieme a je se Jihova ọvo “Erumeru”?

⁶ Epọvo na re, ohwo ọ rọ kakao gheghe jẹ rọ hẹhẹhẹ nọ a tẹ rehọ iẹe wawo Ọghẹnẹ ogaga na, Jihova. Rọ kẹe, makọ erẹwho ilogbo dede e wọhọ ogẹgẹ ovu gheghe evaọ ehru owawọ. (Aizaya 40:15) Wo ohẹriẹ no omama kpobi, ogaga Jihova u wo umuo ho, keme ọye ọvo a re se “Erumeru!”a (Eviavia 15:3) Jihova o wo “ẹgba ologbo.” (Aizaya 40:26) Ọye họ ehri ogaga nọ u rre re he. Ọ rẹroso uvumọ oware kẹ ẹgba ha, keme ‘ogaga . . . orọ Ọghẹnẹ.’ (Olezi 62:11) Rekọ, idhere vẹ Jihova o re ro dhesẹ ogaga riẹ via?

 7. Eme họ ẹzi ọfuafo Jihova, kọ eme a rẹ rehọ eme ẹvẹrẹ ọsosuọ Ebaibol na dhesẹ?

⁷ Ẹzi ọfuafo o re hwẹ no obọ Jihova ze ababọ eriosehọ. Yọ ogaga Ọghẹnẹ nọ o rrọ iruo. Evaọ uzẹme, eva Emuhọ 1:2 (NW), Ebaibol na o se rie “ogaga iruo” Ọghẹnẹ. Ibiẹme Hibru gbe Griki ọsosuọ nọ a fa “ẹzi” na a sae jọ eria efa fae “ofou,” “ofou-ẹwẹ,” gbe “ogaga.” Wọhọ epanọ ahwo nọ a re kere ebe-ofeme a ta, ibiẹme ẹvẹrẹ ọsosuọ na i dhesẹ ẹgba nọ a rẹ ruẹ hẹ nọ o bi ruiruo. Wọhọ ofou, ma rẹ rọ ẹro ruẹ ẹzi Ọghẹnẹ hẹ, rekọ ma rẹ sae ruẹ iruo riẹ.

 8. Evaọ Ebaibol na, odẹme vẹ a ro se ẹzi Ọghẹnẹ, kọ fikieme ẹwawọ nana o je fo?

⁸ Ẹzi ọfuafo Ọghẹnẹ o re ruiruo buobu. Jihova ọ sae rehọ iẹe ru ẹjiroro kpobi nọ o wo h’iroro gba. Nwani fo, evaọ Ebaibol na, a rehọ odẹme se ẹzi Ọghẹnẹ “uziobọ” riẹ, “ugbobọ ulogbo riẹ.” (Luk 11:20; Iziewariẹ 5:15; Olezi 8:3) Wọhọ epanọ ohwo ọ rẹ rọ obọ ru eware sa-sa nọ e gwọlọ oghẹrẹ ogaga kpobi na, ere Ọghẹnẹ ọ rẹ sae rehọ ẹzi riẹ ru ẹjiroro kpobi gba—wọhọ ẹma egẹgẹ-emama nọ a rẹ rọ udugaga ruẹ na hayo ẹhẹriẹ Abade Ọwawae na hayo ẹgba nọ ọ kẹ Ileleikristi ikpe-udhusoi ọsosuọ re a jẹ evẹrẹ efa.

 9. Ẹvẹ ogaga esuo Jihova o kẹre te?

⁹ Jihova o re je dhesẹ ogaga ẹkwoma udu-esuo riẹ wọhọ Osu Ehrugbakpọ na. Kọ who roro nọ o lọhọ re who wo ahwo nọ a wo areghẹ ima ruru ima nọ e rẹ romakpotọ gwọlọ ru oreva ra? Jihova o wo ogaga esuo utioye na. O wo idibo ahwo-akpọ, enọ a rẹ jọ Ikereakere na dhesẹ wọhọ otu obuobu. (Olezi 68:11; 110:3) Rekọ ohwo-akpọ yọ omama nọ o ga ha nọ a tẹ rehọ iẹe wawo ẹnjẹle. Whaọ, okenọ ogbaẹmo Asiria a wọ ohọre bru ahwo Ọghẹnẹ ze, ẹnjẹle ọvo ọ jọ usu isoja eyena kpe 185,000 evaọ aso ọvo! (2 Ivie 19:35) Enjẹle Ọghẹnẹ i wo ‘ẹgba’ gaga.—Olezi 103:19, 20.

10. (a) Fikieme a je se Erumeru na Jihova ogbaẹmo? (b) Ono họ ọnọ ọ mae rro kpobi evaọ usu emama Jihova?

¹⁰ Bro enjẹle e riẹ? Evaọ aruọruẹ, Daniẹl ọruẹaro na ọ ruẹ bu vi emama ẹzi ima 100 nọ e rrọ aro agbara-uvie Jihova, rekọ uvumọ oware o riẹ hẹ nọ u dhesẹ nọ emama enjẹle na kpobi ọ ruẹ na. (Daniẹl 7:10) Fikiere enjẹle nọ e riẹ i ti bu te ima egba buobu. Oye jabọ nọ a je se Ọghẹnẹ inọ Jihova ogbaẹmo na. Odẹ-ova nana u dhesẹ ọkwa ologbo riẹ wọhọ Osu enjẹle ilogbo buobu nọ i koko oma họ na. Ọ rehọ ẹnjẹle jọ fihọ uzou emama ẹzi enana kpobi, Ọmọ oyoyou riẹ, “ọtuyẹ evaọ emama kpobi.” (Ahwo Kọlọsi 1:15) Wọhọ olori enjẹle na—ọnọ o wuzou enjẹle na kpobi, sẹraf, gbe cherub—Jesu họ ọnọ ọ mae rro kpobi evaọ usu emama Jihova.

11, 12. (a) Edhere vẹ ẹme Ọghẹnẹ o bi ro dhesẹ ogaga? (b) Ẹvẹ Jesu ọ rọ kẹ imuẹro kpahe okẹkẹe ogaga Jihova?

¹¹ Jihova o wo edhere ọfa jọ nọ o re ro dhesẹ ogaga riẹ via. Ahwo Hibru 4:12 o ta nọ: ‘Ẹme Ọghẹnẹ ọ rrọ uzuazọ, avọ ogaga.’ Kọ whọ ruẹ ogaga ẹme Ọghẹnẹ, hayo ovuẹ nọ ẹzi ọ kẹ ẹgba nọ a rawo fihọ Ebaibol na no ẹdẹjọ? O rẹ sae k’omai ẹgba, bọ ẹrọwọ mai ga, je fiobọhọ k’omai ru inwene ilogbo evaọ oma mai. Pọl ukọ na ọ vẹvẹ ibe enọ e rọwo unu kpahe ahwo nọ a rẹ rehọ ọfariẹ-ogbe wholo. O te fibae nọ: “Ere otu rai jọ ọ jọ.” (1 Ahwo Kọrint 6:9-11) Ẹhẹ, “ẹme Ọghẹnẹ” ọ jọ oma rai dhesẹ ogaga riẹ no je fiobọhọ kẹ ae nwene.

¹² Ogaga Jihova o rro gaga yọ idhere nọ ọ be rọ rehọ iẹe ruiruo i w’ẹgba te epanọ uvumọ oware o gbẹ sae zae dhe he. Jesu ọ ta nọ: “Eware kpobi e rẹ lọlọhọ eva obọ Ọghẹnẹ.” (Matiu 19:26) Ẹjiroro vẹ Jihova ọ be kpọ ogaga riẹ riwi?

13, 14. (a) Fikieme ma jẹ sae ta nọ Jihova ọ rrọ ehri ogaga jọ gheghe he? (b) Idhere vẹ Jihova ọ rẹ rọ rehọ ogaga riẹ ruiruo?

¹³ Ẹzi Jihova o wo ogaga vi ẹgba emama kpobi; yọ Jihova ọ rrọ ẹgba gheghe jọ nọ o wo iroro ho ho, ehri ogaga jọ gheghe. Ọ rrọ Ọghẹnẹ nọ ọ rrọ uzuazọ ọnọ ọ rẹ kpọ ogaga riẹ. Rekọ eme ọ be wọe rehọ iẹe ro ruiruo?

¹⁴ Wọhọ epanọ ma te ruẹ na, Ọghẹnẹ ọ rẹ rehọ ogaga riẹ ma, raha, thọ, hayo zihe ze—uzẹme riẹ họ, ọ rẹ rehọ iẹe ru oware kpobi nọ u kiehọ ẹjiroro ọgbagba riẹ. (Aizaya 46:10) Evaọ ẹsejọ, Jihova ọ rẹ rehọ ogaga riẹ fere abọ ologbo ekwakwa gbe itee riẹ jọ via. Maero, ọ rẹ kpọ ogaga riẹ ro ru oreva riẹ gba—re ọ kpare esuo-okpehru riẹ je ru odẹ ofuafo riẹ fo ẹkwoma Uvie Mesaya na. Uvumọ oware o rẹ sae za ẹjiroro ọyena dhe he.

15. Fiki ẹjiroro vẹ Jihova ọ jẹ rehọ ogaga riẹ ro ruiruo evaọ eware nọ i kpomahọ idibo riẹ, kọ ẹvẹ o ro dhesẹ onana via evaọ oma Elaeja?

¹⁵ Jihova ọ rẹ jẹ rọ ogaga riẹ ruiruo nọ e rẹ k’omai erere wọhọ omomọvo. Muẹrohọ oware nọ 2 Iruẹru-Ivie 16:9 o ta: “Ibiaro ỌNOWO na e rẹ nya akpọ na re re o dhesẹ ẹgba riẹ rọ kẹ enọ i wo eva efuafo rọ kpahe iẸe.” Oware nọ Elaeja ọ rọ ẹro ruẹ, nọ ma jọ emuhọ fodẹ na, yọ oriruo jọ. Fikieme Jihova ọ jẹ kẹe odhesẹvia idudu ọrọ ogaga urirẹ oyena? Whaọ, Jezibẹl Ovie-Aye ọgeva na o seha nọ o re kpe Elaeja no. Ọruẹaro na ọ jẹ dhẹ kẹ uzuazọ riẹ. Ọ jọ goli, avọ ozọ, avọ iroro ewhrehe—epaọ ẹsenọ iruo egaga riẹ kpobi e rrọ ivrẹvru. Re ọ sasa ọzae nọ udu u bi nuhu na oma, Jihova ọ tẹ rehọ edhere ovevẹ kareghẹhọ Elaeja ogaga urirẹ riẹ. Ofou, otọ nọ u nuhu, gbe erae na i dhesẹ nọ Ohwo nọ ọ mae ga kpobi evaọ ehrugbakpọ na ọ rrọ etẹe kugbe Elaeja. Ono họ Jẹzibẹl nọ ọ rẹ dhozọ riẹ, nọ Ọghẹnẹ erumeru na ọ rọ kugbei na?—1 Ivie 19:1-12.b

16. Fikieme ma je wo omosasọ evaọ eroro kpahe ogaga ulogbo Jihova?

¹⁶ Dede nọ oke nana o rọ oke nọ a re ro ru eware igbunu hu, Jihova o ri nwene he anwọ oke Elaeja ze. (1 Ahwo Kọrint 13:8) O wo ọwhọ ọvo na nẹnẹ re ọ rehọ ogaga riẹ fiobọhọ kẹ enọ i you rie. Uzẹme, ọ be rria obọ akpọ izi nọ o kpehru gaga, rekọ o thabọ no omai hi. Ogaga riẹ u wo umuo ho, fikiere ugbo o rrọ ẹbẹbẹ kẹ e he. Ukpoye, “ỌNOWO na ọ kẹle enọ i bo se ei kpobi.” (Olezi 145:18) Okejọ nọ Daniẹl ọruẹaro na o bo se Jihova kẹ obufihọ, ẹnjẹle jọ ọ roma via taure o te ti ku olẹ na họ dede! (Daniẹl 9:20-23) Uvumọ oware o sae whaha Jihova obufihọ gbe ẹgba nọ ọ rẹ rọ kẹ enọ o you hu.—Olezi 118:6.

17. Edhere vẹ ogaga Jihova o rẹ rọ k’omai ozodhẹ, rekọ didi oghẹrẹ ozodhẹ o rẹ kẹ hẹ?

¹⁷ Kọ ogaga Ọghẹnẹ u re ru omai dhozọ riẹ? Ma rẹ sae kuyo na nọ E gbe ijo. E, keme ekwakwa riẹ e rẹ k’omai ẹjiroro nọ ma re ro wo ozodhẹ Ọghẹnẹ, idudu urirẹ gbe adhẹẹ nọ ma t’ẹme te kpẹkpẹe evaọ uzou nọ o vrẹ na. Wọhọ epanọ Ebaibol na ọ ta k’omai, ozodhẹ utioye na họ “emuhọ areghẹ!” (Olezi 111:10) Rekọ ma rẹ sae jẹ kuyo nọ ijo keme ogaga Ọghẹnẹ o rẹ k’omai ozodhẹ uduama ha hayo nọ ma jẹ siẹe ba esikẹle he.

18. (a) Fikieme ibuobu i je viẹro ku ahwo nọ a wo ogaga? (b) Ẹvẹ ma rọ riẹ nnọ ogaga o rẹ sai gbe Jihova ku hu?

¹⁸ “Ogaga o rẹ raha ohwo; yọ a tẹ kẹ ohwo ogaga ovọvọ o rẹ raha ohwo riẹriẹriẹ.” Ere ogbiku Oyibo na, Lord Acton, o kere evaọ 1887. Ahwo a wariẹ eme riẹ na ẹsibuobu no, keme ahwo buobu a ruẹ no nọ eme riẹ na uzẹme. Ahwo ọ sebaẹgba a rẹ rehọ ogaga ruiruo thọthọ, wọhọ epanọ ikuigbe i dhesẹ unuẹse buobu no na. (Ọtausiwoma Na 4:1; 8:9) Fiki onana, ibuobu i re viẹro ku enọ i wo ogaga jẹ kẹnoma kẹ ae. Whaọ, Jihova o wo ogaga ovọvọ. Kọ ogaga na u gbe rie ku no evaọ oghẹrẹ jọ? Vievie! Wọhọ epanọ ma ruẹ no na, ọ rrọ fuafo, kare eyoma. Jihova o wo ohẹriẹ no ezae gbe eyae sebaẹgba nọ e rrọ esuo evaọ akpọ ogbekuo ọnana. Ọ re rehọ ogaga riẹ ruiruo thọ ẹdọvo ho, yọ o ti ru ere he.

19, 20. (a) Didi ekwakwa efa Jihova o re kugbe ro dhesẹ ogaga riẹ, kọ fikieme onana o jẹ rọ oware omosasọ? (b) Ẹvẹ whọ rẹ sai dhesẹ oma-oriẹsuo Jihova, kọ fikieme onana o jẹ rọ oware isiuru k’owhẹ?

¹⁹ Kareghẹhọ, orọnikọ ogaga ọvo họ okwakwa nọ Jihova o wo ho. Uvi-ẹdhoguo riẹ, areghẹ, gbe uyoyou riẹ e gbẹ riẹ nọ ma ti wuhrẹ kpahe. Rekọ ma re du roro nnọ Jihova o re dhesẹ ekwakwa riẹ evaọ edhere okpikpimẹ hẹ, epaọ ẹsenọ okwakwa riẹ jọ u wo uvumọ obọ kpahe edekọ họ. Wo ohẹriẹ, ma te jọ izou obaro na ruẹ nọ Jihova o re dhesẹ ogaga riẹ ẹsikpobi rọwo kugbe uvi-ẹdhoguo riẹ, areghẹ riẹ, gbe uyoyou riẹ. Roro kpahe okwakwa ofa jọ nọ Ọghẹnẹ o wo, onọ a rẹ kake jọ oma isu akpọ na ruẹ hẹ—oma-oriẹsuo.

²⁰ Dae rehọ iẹe nọ whọ nyaku ọzae jọ nọ ọ rrọ goba je wo ogaga te epanọ ozọ riẹ u ro mu owhẹ. Rekọ, evaọ omoke whọ tẹ te ruẹ nọ ọ rrọ wowolẹ. Ọ rẹ gwọlọ rehọ ogaga riẹ ro fiobọhọ jẹ thọ ahwo, maero kọ enọ e g’oma ha gbe iwhrori. Ọ rẹ rehọ ogaga riẹ ruiruo thọthọ họ. Whọ ruẹ nọ a bi mu raha odẹ riẹ, rekọ o bi kru oma riẹ, tube dhesẹ ẹwo dede. U te bi tube gb’owhẹ unu dede sọ whọ sae jọ wolẹ ere je dhesẹ oma-oriẹsuo ere, maero otẹrọnọ whọ g’oma tere! Nọ whọ be riẹ ọzae otiọye na viere na, kọ oma o gbẹ te w’owhẹ re who sikẹle iẹe? Ma wo ẹjiroro nọ o vi ere nọ ma re ro si kẹle Jihova erumeru na. Roro kpahe owọ Ebaibol nọ a si uzoẹme uzou onana no ze na: “ỌNOWO na ọ rẹ kaki mu ofu hu avọ ogaga ulogbo.” (Nahum 1:3, ẹjẹlẹ ibiẹme na ọmai.) Jihova ọ rẹ kake rọ ogaga riẹ kẹ ahwo uye he, makọ ahwo omuomu dede. Ọ rrọ wowolẹ avọ ẹwo. O dhesẹ no nọ ọ rẹ “kaki mu ofu hu” makọ evaọ okenọ a te ru iei eva dha unuẹse buobu.—Olezi 78:37-41.

21. Fikieme Jihova ọ gbẹ gba ahwo họ re a ru oreva riẹ hẹ, kọ eme onana u wuhrẹ omai kpahe iẹe?

²¹ Roro kpahe oma-oriẹsuo Jihova no ofẹ ofa ze. Who te wo ogaga nọ u wo umuo ho, kọ who roro nọ ẹsejọ whọ sae gba ahwo họ ru epanọ whọ gwọlọ? Jihova, avọ ogaga riẹ kpobi na, ọ rẹ gba ahwo họ re a gọe he. Dede nọ ẹgọ Ọghẹnẹ ọvo họ edhere ọvuọvo kpohọ uzuazọ ebẹdẹ bẹdẹ, Jihova ọ rẹ gb’omai họ egagọ riẹ hẹ. Ukpoye, ọ rehọ ufuoma ẹsalọ d’orro họ omomọvo. Ọ vẹvẹ unu kpahe ekuhọ oyoma ọrọ ekpehre ẹsalọ jẹ ta kpahe irere emamọ ẹsalọ. Rekọ o vu ẹsalọ na wa k’omai. (Iziewariẹ 30:19, 20) Jihova o wo isiuru kpahe egagọ nọ a rẹ kẹe fiki ọgbahọ họ hayo fiki ozodhẹ uduama orọ ogaga idudu riẹ. Ọ be gwọlọ enọ e rẹ rọ unevaze gọe, fiki uyoyou.—2 Ahwo Kọrint 9:7.

22, 23. (a) Eme u dhesẹ nọ o rẹ were Jihova re ọ kẹ amọfa ogaga? (b) Eme ma te t’ẹme te evaọ uzou n’otha na?

²² Joma ta kpahe ẹjiroro urere nọ u gbe fo re ma rria avọ ozodhẹ uduama kpahe Ọghẹnẹ Erumeru na ha. Ozọ u re mu ahwo-akpọ nọ a rọ esuo re a ghale esuo na kugbe amọfa. Rekọ o rẹ were Jihova re ọ kẹ egegagọ omarokpotọ riẹ ogaga. Ọ rehọ udu-esuo ulogbo kẹ amọfa, wọhọ oriruo epanọ ọ kẹ Ọmọ riẹ na. (Matiu 28:18) Jihova ọ rẹ jẹ kẹ idibo riẹ ogaga evaọ edhere ọfa. Ebaibol o ru rie vevẹ nọ: “O ra, O ỌNOWO, oruaro, ogaga, gbe oro gbe obokparọ gbe udu-ogaga; keme e nọ e rọ obọ idhiwu gbe evaọ akpọ na e ra. . . . Obọ ra ogaga gbe ẹgba; gbe evaọ obọ ra a je ru ai ro, a ve je wo eri.”—1 Iruẹru-Ivie 29:11, 12.

²³ Ẹhẹ, o te were Jihova re ọ k’owhẹ ogaga. Ọ rẹ tubẹ rehọ “ogaga ulogbo nọ othesiwa” rọ kẹ enọ e gwọlọ gọe. (2 Ahwo Kọrint 4:7) Kọ oma o be wọ owhẹ sikẹle Ọghẹnẹ ọgaga nana, ọnọ ọ rẹ rehọ ogaga riẹ ruiruo evaọ edhere ẹwo nọ o re lele izi na? Evaọ uzou n’otha na, ma te tẹrovi epanọ Jihova ọ rọ rehọ ogaga riẹ ma eware.