Muẹrohọ Otọ Jẹ Jọ Jajaja!

“Fikiere wha roro, keme wha riẹ ẹdẹ na hayo oke gbe he.”—MATTHEW 25:13.

 1. Eme Jọn ukọ na o je rẹro riẹ?

EVAỌ ẹme urere riẹ evaọ Ebaibol na, Jesu ọ y’eyaa nọ: “Mẹ be tha enẹna.” Jọn ukọ riẹ ọ tẹ kuyo nọ: “Ami. Nyaze, Ọnowo Jesu!” Ukọ na o wo avro ho sọ Jesu ọ te nyaze. Jọn ọ jọ usu ikọ na nọ e nọ Jesu nọ: “Oke ovẹ eware nana ete via, gbe eme ọ rẹ te jọ oka ẹtha ra [Griki, pa·rou·siʹa] gbe urere akpọ na?” Ẹhẹ, Jọn ọ hẹrẹ ẹzino obaro Jesu avọ evaifihọ.—Eviavia 22:20; Matiu 24:3.

 2. Kpahe ẹzino Jesu, uyero vẹ o rrọ ichọche?

² Evaifihọ utioye na o rọ godogodo nẹnẹ. Ichọche buobu a wo igogo iwuhrẹ jọ kpahe “ẹtha” Jesu, rekọ umutho ahwo rai jọ ọvo a bi rẹro riẹ. Yọ eriwo otiọye na a bi ro yeri uzuazọ rai. Obe na The Parousia in the New Testament o muẹrohọ nọ: “Umutho jọ gheghe ọvo ẹruore Ọzino na o bi ro kpomahọ uzuazọ, iroro gbe iruo ichọche na. . . . Ovẹrẹ nọ ichọche na o bi ro whowho ekurẹriẹ gbe usiuwoma ota na, u hrẹ kpotọ gaga no, otẹrọnọ u ri tube serihọ họ.” Rekọ orọnikọ ohwo kpobi o rọ ere kẹ hẹ!

 3. (a) Ẹvẹ pa·rou·siʹa na o rrọ Ileleikristi uzẹme oma? (b) Eme dẹẹ ma te t’ẹme te obọnana?

³ Ilele uzẹme Jesu a be rehọ ọwhọ hẹrẹ ekuhọ uyerakpọ ọnana. Nọ ma be rọ omarokpotọ ru ere na, u fo re ma wo eriwo ọliọliọ kpahe eware nọ i kpomahọ ẹzino Jesu kpobi, ma vẹ jẹ j’owọ lele eriwo ọyena. Oyena o te lẹliẹ omai ‘thihakọ te urere jẹ zọ.’ (Matiu 24:13) Okenọ ọ jẹ ruẹaruo nọ ma rẹ jọ Matiu izou avọ 24 gbe 25 duku na, Jesu ọ kẹ ohrẹ areghẹ nọ ma rẹ sai fihọ iruo, avọ erere ebẹdẹ bẹdẹ. Uzou avọ 25 u wo ehare nọ ma rẹro nọ whọ riẹ, kugbe onọ a ta kpahe emetẹ-kọkọ ikpe na (emetẹ-kọkọ iwareghẹ gbe igheghẹ na) gbe ohare etalẹnte na. (Matiu 25:1-30) Ẹvẹ ma sai ro wo erere no etadhesẹ eyena ze?

Muẹrohọ Otọ, Wọhọ Emetẹ-Kọkọ Isoi Na!

 4. Eme họ ugogo eme ohare emetẹ-kọkọ na?

⁴ Whọ sae gwọlọ se ohare emetẹ-kọkọ na, nọ o rọ Matiu 25:1-13. Umuhọ riẹ họ ehaa-orọo ahwo Ju ilogbo jọ nọ ọva na ọ rẹ jọ nya kpohọ uwou ọsẹ ọmọtibobo na re o su ei ziọ uwou ọva na (hayo kpohọ uwou ọsẹ riẹ). Ikporo-ile gbe eso-ile e sae jọ usu-ehaa itieye na, yọ ohwo ọvo ọ rẹ sae fodẹ uzedhe oke nọ a ti ro t’uwou hu. Evaọ ohare na, emetẹ-kọkọ ikpe e hẹrẹ ẹtha ọva na te udeviaso. Avọ ugheghẹ, isoi jọ a rehọ ewhri buobu lele oma ha, fikiere a tẹ nya e dẹ efa. Isoi edekọ na a rọ areghẹ ku ewhri họ ukolo lele oma re a jariẹ kuhọ ikpẹ rai o tẹ gwọlọ ere evaọ etoke ohẹrẹ na. Isoi enana ọvo e jariẹ jẹ ruẹrẹ oma kpahe evaọ okenọ ọva na ọ nyaze. Fikiere, ae ọvo a kuvẹ re a rueva ehaa na. Okenọ emetẹ-kọkọ igheghẹ na a zihe ze, oke nọ a rẹ rọ rueva o vrẹ rai no.

 5. Ikereakere vẹ i fiobọhọ k’omai riẹ otofa ẹwoho ọrọ ohare emetẹ-kọkọ na?

⁵ Abọ buobu ohare onana yọ eme ọtakpeze. Wọhọ oriruo, Ikereakere na e ta kpahe Jesu wọhọ ọva. (Jọn 3:28-30) Jesu ọ rehọ oma riẹ dhesẹ ọmọ ovie nọ a ruẹrẹ ehaa orọo họ kẹ. (Matiu 22:1-14) Yọ Ebaibol na ọ rehọ Kristi dhesẹ ọzae uwou-orọo. (Ahwo Ẹfẹsọs 5:23) Avọ isiuru, dede nọ a jọ oria ofa dhesẹ Ileleikristi nọ a wholo na wọhọ “Ọmọtibobo” ọrọ Kristi, ohare na o fodẹ ọmọtibobo ho. (Jọn 3:29; Eviavia 19:7; 21:2, 9) Rekọ o ta kpahe emetẹ-kọkọ, yọ a jọ oria ofa jọ dhesẹ enọ a wholo na wọhọ ọmọtẹ-kọkọ nọ Kristi ọ sa h’otọ.—2 Ahwo Kọrint 11:2.a

 6. Didi uthubro Jesu ọ kẹ evaọ okenọ o je ku ohare emetẹ-kọkọ na họ?

⁶ U te no eme eyena no gbe otofa eruẹaruẹ nọ e rọ eva riẹ, emamọ ehri-izi jọ e riẹ nọ ma rẹ sai wuhrẹ no ohare onana ze. Wọhọ oriruo, muẹrohọ nọ Jesu o ku ohare na họ avọ eme na: “Fikiere wha roro, keme wha riẹ ẹdẹ na ha hayo oke gbe he.” Fikiere ohare na u dhesẹ ẹgwọlọ nọ mai omomọvo o re ro muẹrohọ otọ, re ma jaja aro vi kpahe ẹkẹle urere ọ eyero omuomu ọnana. Ababọ avro, urere onana o be tha, dede nọ ma rẹ sae riobọ họ ẹdẹ jọ họ. Evaọ abọ ọnana, muẹrohọ uruemu nọ eko emetẹ-kọkọ ivẹ na i dhesẹ.

 7. Edhere vẹ isoi evaọ usu emetẹ-kọkọ ohare na e rọ rrọ gheghẹ?

⁷ Jesu ọ ta nọ: “Isoi rai jọ igheghẹ.” Kọ fikinọ a rọwo nọ ọva na ọ be tha ha? Kọ a jẹ dhẹ lele eware isiuru? Hayo kọ a viẹ rae họ? Ijo. Jesu ọ ta nọ isoi enana a “nya i zere ọva” na. A riẹ nọ ọ be nyaze, yọ a gwọlọ dede iei, re a tubẹ jọ “eha orọwo” na. Ghele na, kọ a ghinẹ ruẹrẹ oma kpahe ziezi? A dina hẹrẹ iẹe omojọ, rite “udevie aso,” rekọ a ruẹrẹ oma kpahe he kẹ ọzino riẹ evaọ oke kpobi nọ ọ nyaze—makọ ọ kake nyaze hayo ọ raha oke vi epanọ a rẹro riẹ.

 8. Ẹvẹ isoi evaọ usu emetẹ-kọkọ ohare na a ro wo areghẹ?

⁸ Isoi edekọ na—enọ Jesu o se iwareghẹ na—a nya lahwe re avọ ikpẹ nọ i bi lo, be hẹrẹ ẹtha ọva na. A hẹrẹ re, rekọ a ‘wo areghẹ.’ Ubiẹme Griki nọ a fa “iwoareghẹ” na u wo otofa “areghẹ, avọ iroro.” Isoi enana a dhesẹ nọ a wo areghẹ ẹkwoma ilolo ewhri nọ a wha re a kuhọ ikpẹ rai, otẹrọnọ o gwọlọ ere. Evaọ uzẹme, a ruẹrẹ oma kpahe kẹ ọva na te epanọ a rọ rọwo siobọno ewhri rai dede he. Ẹromuhotọ rai na ọ nya thọ họ, keme a ghinẹ jariẹ a tẹ jẹ ruẹrẹ oma kpahe ziezi okenọ ọva na ọ nyaze. Enana e “ruẹrẹ oma kpahe a vae a tẹ ruọ eva kpo obọ eha orọwo; a te wuhu ẹthẹ.”

 9, 10. Eme họ otofa ohare emetẹ-kọkọ na, kọ didi enọ ma rẹ nọ oma mai?

⁹ Orọnikọ Jesu ọ jẹ fodẹ emamọ uruemu nọ a rẹ jọ ehaa-orọo dhesẹ hẹ, hayo kọ ọ jẹ kẹ ohrẹ kpahe ẹghale oware nọ ohwo o wo kugbe amọfa ha. Uwuhrẹ riẹ họ: “Fikiere wha roro, keme wha riẹ ẹdẹ na hayo oke gbe he.” Nọ oma ra nọ, ‘Kọ me ghine muẹrohọ otọ kpahe ẹzino Jesu?’ Ma rọwo nọ Jesu o bi su enẹna evaọ obọ odhiwu, rekọ ẹvẹ ma bi muẹrohọ otọ te evaọ uzẹme na nnọ ‘Ọmọ ohwo ọ te tha obọnana evaọ ẹgho odhiwu avọ ogaga gbe oruaro ulogbo’? (Matiu 24:30) Evaọ “udevie aso” na, ẹtha ọva na ọ ghinẹ kẹle vi okenọ emetẹ-kọkọ na a rọ kake nyaze ti zere iei. Epọvo na re, ẹtha Ọmọ ohwo re ọ te raha eyero omuemu ọnana ọ kẹle vi epaọ okenọ ma ro muọ ẹtha riẹ họ ẹhẹrẹ no. (Ahwo Rom 13:11-14) Kọ ma gbe bi muẹrohọ otọ, be tubẹ jaja aro vi nọ oke oyena u bi si kẹle viere na?

¹⁰ Re ma kezọ kẹ ujaje ọ ‘gbẹ hai roro’ na o gwọlọ ẹro nọ ma re muhọ otọ ẹsikpobi. Emetẹ-kọkọ isoi a kuvẹ re ewhri rai o re no a tẹ nya e dẹ efa. Epọvo na, o lọhọ re Oleleikristi nẹnẹ o reghe, nọ ọ gbẹ ruẹrẹ oma kpahe ziezi hi kẹ ẹtha idudhe Jesu na. Ere o via kẹ Ileleikristi ikpe-udhusoi ọsosuọ jọ. O rẹ sae via kẹ otujọ nẹnẹ. Fikiere jọ ma nọ oma mai nọ, ‘Kọ o be via k’omẹ?’—1 Ahwo Tẹsalonika 5:6-8; Ahwo Hibru 2:1; 3:12; 12:3; Eviavia 16:15.

Jaja Aro Vi Nọ Urere na O Be Kẹle Na

11. Ohare ofa vẹ Jesu o bru, kọ eme u tho?

¹¹ Evaọ ohare ofa riẹ, orọnikọ uduotahawọ re a muẹrohọ otọ ọvo Jesu ọ kẹ ilele riẹ hẹ. Nọ ọ ta kpahe emetẹ-kọkọ iwareghẹ gbe igheghẹ na no, ọ tẹ kẹ ọtadhesẹ etalẹnte na. (Se Matiu 25:14-30.) Evaọ abọ buobu onana u tho ohare emaena nọ ọ kake kẹ na, onọ Jesu ọ kẹ fikinọ ibuobu ‘a roro nọ uvie Ọghẹnẹ o te nwane via.’—Luk 19:11-27.

12. Eme họ ugogo-eme ọ ohare etalẹnte na?

¹² Evaọ ohare etalẹnte na, Jesu ọ ta kpahe ọzae jọ nọ, taure o te ti kpohọ erẹ ẹwho ọfa o se irigbo esa riẹ. Ọ tẹ rehọ etalẹnte isoi kẹ ọjọ, ọ tẹ kẹ ọfa ivẹ, ọ tẹ kẹ ọrọ urere na ọvuọvo—“epanọ a rẹ sai ruẹ ọ rọ kẹ omomọvo.” Ẹsejọhọ, onana yọ etalẹnte isiliva, igho nọ ọgbodibo o re wo evaọ ikpe 14—yọ igho buobu! Okenọ ọzae na o zihe ze, o te se irigbo na re a guọvunu oware nọ a ru evaọ ‘oke krẹkri’ nọ ọ jọ erẹ na. Irigbo ivẹ ọsosuọ na a wo erere akuava evaọ ugho nọ a kẹ rai. Ọ tẹ ta nọ “whọ riẹ ru,” ọ tẹ y’eyaa iruo efa buobu kẹ omomọvo rai, o te ku ei họ nọ: “Ruọ eva oghọghọ olori ra.” Be ta nọ olori na o re si ivri, ọrigbo nọ a kẹ etalẹnte ọvo na ọ rehọ e riẹ ruiruo erere ọvo ho. O si ugho na no, o tube fi ei họ ebanke re u wo isuo ho. Olori na o te sei ‘omuomu avọ ọyẹlẹ’ keme ọ rọ suọ ewoma olori riẹ. Fikiere, a te mi ei etalẹnte na no, a te gbolo iei fihọ otafe “oria nọ ahwo a jẹ viẹ gbe akọ ọriọ.”

13. Ẹvẹ Jesu ọ rọ wọhọ olori na evaọ ohare na?

¹³ Ohare nana yọ ọtakpeze re. Wọhọ oriruo, Jesu, ọnọ a rehọ ọzae nọ o kperẹ na dhesẹ na, ọ te nyasiọ ilele riẹ ba, kpohọ odhiwu, ọ vẹ hẹrẹ etoke thethei re a tẹ kẹe ogaga uvie.b (Olezi 110:1-4; Iruẹru 2:34-36; Ahwo Rom 8:34; Ahwo Hibru 10:12, 13) Rekọ, ma sae jẹ jọ etenẹ ruẹ uwuhrẹ ulogbo nọ mai kpobi ma re fihọ iruo evaọ izuazọ mai. Didi uwuhrẹ?

14. Didi ẹgwọlọ ohare etalẹnte na o riobọhọ?

¹⁴ Makọ ẹruore mai ọrọ uzuazọ sebaewhu evaọ odhiwu hayo uzuazọ ebẹdẹ bẹdẹ evaọ otọakpọ aparadase, o rọ vevẹ no ohare Jesu na ze inọ ma re kru oma ga evaọ iruẹru Ileleikristi. Evaọ uzẹme, a rẹ sae rehọ ubiẹme ovo dhesẹ otofa ohare onana: obọkruga. Ikọ na a fi oriruo na h’otọ n’umuọ Pẹntikọst 33 C.E. vrẹ. Ma se nọ: “Jegbe eme ibuobu efa [Pita] o ro se isẹri kẹ ae jẹ hrẹ ae nnọ, ‘Wha si oma rai no oge ọna nọ o re kuidiemu na no.’” (Iruẹru 2:40-42) Kọ ẹvẹ erere nọ o wo no omodawọ riẹ ze o rro te! Nọ amọfa a bi kuomagbe ikọ na evaọ iruo usiuwoma ota na, ae oma rai a te je kru obọ ga, avọ usiuwoma na nọ o be nyaharo evaọ “akpọ na kpobi.”—Ahwo Kọlọsi 1:3-6, 23; 1 Ahwo Kọrint 3:5-9.

15. Edhere obọdẹ vẹ ma re ro fi ugogo eme ohare etalẹnte na họ iruo?

¹⁵ Muẹrohọ eme nọ e wariẹ ohare onana họ—eruẹaruẹ kpahe ẹzino Jesu. Ma wo imuẹro buobu nnọ pa·rou·siʹa ọ Jesu o be nyaharo, yọ kẹle na u ti te urere. Kareghẹhọ ọjẹhọ nọ Jesu o fihọ udevie “urere na” avọ iruo nọ i fo nọ Ileleikristi a re ru: “A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ kpobi, kẹsena urere u te zi te.” (Matiu 24:14) Nọ onana o rọ iroro mai na, oghẹrẹ ọrigbo vẹ ma rọ? Nọ oma ra nọ: ‘Kọ ẹjiroro jọ ọ riẹ nọ a re ro ku ei họ nọ mẹ rọ wọhọ ọrigbo nọ o si ugho nọ a kẹ riẹ no na, ẹsejọhọ yọ ọ be rẹro te iruo obọ riẹ? Hayo kọ o rọ vevẹ nnọ mẹ wọhọ enọ e rọ ziezi avọ oruọzewọ na? Kọ mẹ roma mẹ kpobi kẹ erubuo isiuru Olori na kẹse kẹse?’

Ẹromuhotọ avọ Obọkruga Evaọ Ẹzino Riẹ

16. Didi ovuẹ ehare ivẹ nọ ma t’ẹme te no na e k’owhẹ?

¹⁶ Ẹhẹ, u te no otofa ẹwoho gbe orọ eruẹaruẹ rai no, ehare ivẹ enana e k’omai uduotahawọ ivevẹ nọ i no unu Jesu ze. Ovuẹ riẹ ona: Muẹrohọ otọ; kru obọ ga, maero nọ whọ tẹ ruẹ oka pa·rou·siʹa ọrọ Kristi. Enẹna họ oke na. Fikiere, kọ who ghine muẹrohọ otọ je kru obọ ga?

17, 18. Didi ohrẹ Jemis olele na ọ kẹ kpahe ẹzino Jesu?

¹⁷ Jemis, oniọvo Jesu, ọ jọ Ugbehru Olivi na ha re o yo eruẹaruẹ Jesu; rekọ o yo kpahe iẹe uwhremu na, o te wo otoriẹ riẹ. O kere nọ: “Fikiere, wha wo ithihakọ, imoni mẹ, bẹsenọ Ọnowo na ọ rẹ tha. Wha ri ọwhẹrẹ, epanọ ọ rẹ hẹrẹ ubi oghaghae otọ na, o re thihakọ kẹe bẹsenọ oso ọsosuọ avọ ọrọ urere ọ rẹ rọ kuei. Whai omarai wha wo ithihakọ re. Wha dikihẹ whawha, keme ẹtha Ọnowo na ọ kẹle ino.”—Jemis 5:7, 8, ẹjẹlẹ ibieme na ọmai.

¹⁸ Nọ ọ kẹ imuẹro nnọ Ọghẹnẹ o ti guẹdhọ enọ e be rehọ efe rai ruiruo thọthọ no, Jemis ọ tẹ tuduhọ Ileleikristi awọ inọ a kare odiri hi nọ a be hẹrẹ re Jihova ọ j’owọ na. Oleleikristi nọ ọ kare odiri ọ sai mu oja họ ẹkiẹ, wọhọ epaọ ẹsenọ o wo udu nọ ọ rẹ rọ kpọ eyoma na vi. Oyena o rẹ jọ ere he, keme oke ẹdhoguo na o kẹle no. Oriruo ọwhẹrẹ o dhesẹ oyena, wọhọ epanọ Jemis ọ ta na.

19. Didi oghẹrẹ odiri ọwhẹrẹ ọmọ Izrẹl o re wo?

¹⁹ Ọwhẹrẹ ọmọ Izrẹl nọ ọ kọ ibi ọ rẹ hẹrẹ, orọ ọsosuọ re okakọ na o dhẹze, re okakọ na o who, u ve ti te oke ivuẹvu. (Luk 8:5-8; Jọn 4:35) Evaọ emerae eyena, oke awa-ọruọ jọ ọ sae jariẹ. Kọ oso ọsosuọ na ọ te rọ, kọ ọ te rọ ziezi? Kọ ẹvẹ kpahe iso urere na? Kọ emerae gbe okpofou i ti kpe ekakọ na? (Wawo Joẹl 1:4; 2:23-25.) Ghele na, ọwhẹrẹ ọmọ Izrẹl ọ rẹ sai fievahọ Jihova gbe ezi nọ o fihọ. (Iziewariẹ 11:14; Jerimaya 5:24) Odiri ọwhẹrẹ na o sae ghinẹ jọ irẹro evaifihọ. Avọ ẹrọwọ ọ riẹ nọ oware nọ ọ be hẹrẹ na o te tha. O te ghinẹ tha!

20. Ẹvẹ ma sai ro dhesẹ odiri rọwo kugbe ohrẹ Jemis?

²⁰ Nọ ọwhẹrẹ na ọ rẹ sae riẹ kpahe okenọ ivuẹvu na o te jọ na, Ileleikristi ikpe-udhusoi ọsosuọ a sai kele okenọ ẹzino Jesu ọ te jọ họ. Rekọ, o te seba ẹnyaze he. Jemis o kere nọ: “Ẹtha [Griki, pa·rou·siʹa] Ọnowo na ọ kẹle ino.” Okenọ Jemis o kere eme enana, oka akpọ-soso orọ ẹzino Kristi o te roma via ha. Rekọ enẹna o roma via no! Fikiere ẹvẹ oke onana o rẹ j’omai oma? Oka na o roma via no. Ma be rue riẹ. Ma rẹ sae ta avọ imuẹro nọ, ‘Mẹ be ruẹ oka na nọ u bi rugba.’ Ma rẹ sae ta avọ udu nọ: ‘Ẹzino Ọnowo na ọ rrọ etenẹ no, yọ ekuhọ riẹ ọ kẹlino.’

21. Eme ma gba riẹ mu no nọ ma ti ru?

²¹ Nọ o rọ ere na, ma wo ẹjiroro nọ o ga viere nọ ma re ro si te iroro je fi igogo iwuhrẹ erọ ehare ivẹ Jesu nọ ma t’ẹme te no na họ iruo. Ọ ta nọ: “Fikiere wha roro, keme wha riẹ ẹdẹ na hayo oke gbe he.” (Matiu 25:13) Ababọ avro, enẹna họ oke nọ ma re ro wo ọwhọ evaọ iruo Oleleikristi mai. Joma jọ izuazọ mai kẹdẹ kẹdẹ dhesẹ nọ ma wo otoriẹ eme Jesu na. Joma muẹrohọ otọ! Joma kru obọ ga!

[Footnotes]

Kọ Whọ Kareghẹhọ?

◻ Ugogo ẹme vẹ who wuhrẹ no ohare emetẹ-kọkọ iwareghẹ gbe igheghẹ na ze?

◻ Ẹkwoma ohare etalẹnte na, ugogo ohrẹ vẹ Jesu ọ be k’owhẹ na?

◻ Didi obọ odiri ra wọhọ ọrọ ọwhẹrẹ ọmọ Izrẹl o wo kpahe pa·rou·siʹa na?

◻ Ẹvẹ oke onana nọ ma be rria na o rọ rrọ orọ isiuru gbe use-abọ?

[Picture on page 29]

Didi uwuhrẹ who wo no ohare emetẹ-kọkọ na gbe orọ etalẹnte na ze?