Joma Hai Yeri Uzuazọ Ẹsikpobi Wọhọ “Erara”

“Mẹ lẹ owhai wọhọ erara gbe enọ a le kpo ẹwho ọfa, wha si oma rai no urusio iwo.”—1 PITA 2:11.

ẸVẸ WHỌ TE K’IYO ENỌ NANA?

Fikieme a sae rọ ta nọ otu nọ a rọ ẹzi wholo na yọ erara akpọ na?

Oghẹrẹ vẹ otu “igodẹ efa” na a rọ rrọ erara evaọ akpọ na?

Eme who bi rẹro riẹ?

1, 2. Amono Pita o se enọ a “sanọ,” kọ fikieme o ro se ai “erara”?

IKPE ọgba nọ i lele i rie nọ Jesu o zihe kpohọ odhiwu no, Pita ukọ na o kere ileta se “enọ e vahabọ ruọ ewho efa evaọ Pọntus, Galesha, Kapadosia, Esia gbe Bithinia, enọ Ọghẹnẹ Ọsẹ na ọ sanọ.” (1 Pita 1:1, 2) O rrọ vevẹ inọ ahwo nọ a rọ ẹzi wholo wọhọ ọyomariẹ nọ a “yẹ zihe ruọ ọkpokpọ, e ruọ ẹruore ebẹdẹ” nọ i ti lele Jesu su evaọ obọ odhiwu na họ ahwo nọ Pita o se enọ a “sanọ” na. (Se 1 Pita 1:3, 4.) Rekọ fikieme o ro se enana nọ a sanọ na “erara” uwhremu na? (1 Pita 2:11) Nọ o rọnọ omọvo evaọ usu Isẹri Jihova nọ i bu te egba ezeza gbe ikpe isoi (650) ọvo họ okpodhiwu na, kọ ẹvẹ ẹme nana o ro kpomahọ omai?

² U woma kẹhẹ inọ a se enọ a rọ ẹzi wholo evaọ ikpe-udhusoi ọsosuọ na “erara.” Enọ i kiọkọ otọakpọ nẹnẹ evaọ usu ikpodhiwu na a te rria otọakpọ na bẹdẹ bẹdẹ hẹ. Pọl ukọ na nọ ọ rrọ omọvo “uthuru okakao” nọ a rọ ẹzi wholo na o ru ẹme na vẹ inọ: “Rekọ okugbe mai ọ rọ obọ odhiwu, eva riẹ ma jẹ be hẹrẹ Osiwi, Ọnowo na Jesu Kristi.” (Luk 12:32; Fil. 3:20) Otu nọ a rọ ẹzi wholo na a ti no otọakpọ kpohọ odhiwu nọ a te whu no keme “obọ odhiwu” a jọ rrọ emotọ. (Se Ahwo Filipai 1:21-23.) Fikiere a rẹ sai se ai “erara” evaọ akpọ Setan nana.

 3. Enọ vẹ ma rẹ sae nọ kpahe utu “igodẹ efa” na?

³ Kọ “igodẹ efa” na omarai? (Jọn 10:16) Kọ a wo ẹruore nọ o muẹro no Ikereakere ze inọ ae yọ emotọ evaọ akpọ na? Evaọ uzẹme, otọakpọ na a te rria bẹdẹ bẹdẹ. Rekọ a rẹ sai je se ai erara re. Evaọ oghẹrẹ vẹ?

‘EMAMA NA SOSO I BI DIMẸ’

 4. Eme isu akpọ a be sae whaha ha?

⁴ Nọ Jihova ọ re raha akpọ omuomu Setan he na, ahwo kpobi, makọ Ileleikristi a te gbẹ ruẹ uye emuemu nọ ọwọsuọ Setan ọ wha ze. Ma se evaọ obe Ahwo Rom 8:22 inọ: “Ma riẹ nọ enama na soso i bi dimẹ eva [ọyawọ] usuovo na rifi enẹna.” Ghelọ omodawọ isu akpọ, ekiotọ-eriariẹ gbe ikoko obufihọ sa-sa, a be sai si ọyawọ nọ ahwo-akpọ a be ruẹ uye riẹ n’otọ họ.

 5. Didi owọ ima ahwo buobu a jẹ no anwọ 1914 ze, kọ fikieme?

⁵ Fikiere, anwọ 1914 ze, ima ahwo buobu a be romakpotọ kẹ Ovie nọ Ọghẹnẹ o ro mu, Jesu Kristi. A gwọlọ jọ abọ ọvuọvo ọrọ akpọ omuomu Setan na ha, yọ a be rọ oghẹrẹ ovuovo tha isuẹsu akpọ Setan uke gbe he. Ukpoye, a be rọ uzuazọ gbe ekwakwa rai kpobi tha iruo Uvie Ọghẹnẹ uke.—Rom 14:7, 8.

 6. Fikieme ma sae rọ ta inọ Isẹri Jihova yọ erara evaọ akpọ nana?

⁶ Evaọ erẹwho nọ i bu vi egba ivẹ (200) nọ Isẹri Jihova a rrọ, a bi koko izi egọmeti, dede na a be rria wọhọ erara. A be whoma họ abọ ọvuọvo ho evaọ isuẹsu hayo iruẹru akpọ na. Enẹna, a rri oma rai wọhọ emotọ akpọ ọkpokpọ nọ Ọghẹnẹ ọ ya eyaa riẹ na. Eva e be were ai inọ akpọ omuomu ọnana nọ a jẹ rọ erara na o bi te ekuhọ no.

 7. Ẹvẹ idibo Ọghẹnẹ a ti ro zihe ruọ emotọ, kọ emotọ idiẹse?

⁷ Kẹle na, Jesu Kristi ọ te raha eyero-akpọ omuomu Setan nana no. Esuo ẹrẹreokie riẹ u ti si uzioraha gbe uye-oruẹ kpobi no. O te raha Setan avọ ikọ riẹ kpobi no, te enọ a rẹ ruẹ gbe enọ a rẹ ruẹ hẹ nọ a be wọso udu esuo Jihova. Idibo Ọghẹnẹ kpobi a vẹ te jọ emotọ Aparadase bẹdẹ bẹdẹ. (Se Eviavia 21:1-5.) Evaọ oke yena yọ a si emama kpobi no “igbo egbogbo eruọ eva uvẹ oruaro emọ Ọghẹnẹ” no.—Rom 8:21.

URUEMU NỌ A GWỌLỌ MI ILELEIKRISTI UZẸME

8, 9. Nọ Pita ọ ta nọ Ileleikristi a “si oma rai no urusio iwo,” eme o wo họ iroro?

⁸ Pita ọ fodẹ uruemu nọ a gwọlọ mi Ileleikristi inọ: “Iyoyou, mẹ lẹ owhai wọhọ erara gbe enọ a le kpo ẹwho ọfa, wha si oma rai no urusio iwo nọ u bi lele ẹzi rai họra.” (1 Pita 2:11) Ileleikristi nọ a rọ ẹzi wholo Pita ọ kẹ ohrẹ nana, rekọ epọvo na u w’iruo kẹ igodẹ efa na re.

⁹ Orọnikọ isiuru kpobi e thọ họ, nọ ma te ru ẹgwọlọ isiuru itieye na gba evaọ edhere Ọghẹnẹ. Evaọ uzẹme, i re ru akpọ were. Wọhọ oriruo, o rrọ isiuru ohwo re ọ reawere emamọ emu gbe udi, w’obọ evaọ arozaha nọ o rẹ kẹ omawere, re ọ jẹ reawere oma ukugbe emamọ egbẹnyusu. O thọ họ re erivẹ-orọo a wo isiuru jẹ re omawere owezẹ ọzae-avọ-aye kugbe. (1 Kọr. 7:3-5) Rekọ Pita ọ be ta kpahe “urusio iwo” nọ “u bi lele ẹzi [na] họra.” Efafa Ebaibol King James Version o fa oria nana vevẹ inọ “urusio iwo nọ o vrẹta,” yọ efafa New International Version o fa oria ovona “urusio uzioraha.” O rrọ vevẹ, ma rẹ daoma whaha urusio kpobi nọ o wọso ẹjiroro Jihova, onọ o rẹ sae raha emamọ usu nọ ma wo kugbei. O gbẹ rrọ ere he, ma ve ti ku uvẹ ẹruore uzuazọ nọ ma bi rẹro riẹ na fiẹ.

10. Idhere vẹ Setan ọ be rọ gwọlọ ru Ileleikristi duoma họ akpọ na?

¹⁰ Utee Setan họ, re ọ raha ọtamuo Ileleikristi nọ i bi yeri uzuazọ wọhọ “erara” evaọ akpọ na. Setan ọ gwọlọ nọ ma le efe akpọ, duoma họ iruẹru ọfariẹ-ogbe, le okpodẹ, wo uruemu nọ ma rẹ rọ gwọlọ jọ oria ọsosuọ evaọ oware kpobi, hayo re ma họre kẹ orẹwho mai. Enana kpobi yọ egbefẹ Setan nọ u fo nọ ma re rri mu. Nọ ma tẹ be whaha ekpehre isiuru itienana, yọ ma bi dhesẹ vevẹ inọ ma gwọlọ jọ abọ ọvuọvo ho evaọ akpọ Setan ọnana. Onana o rẹ jẹ kẹ imuẹro inọ mai yọ erara akpọ na. Oware nọ ma ginẹ gwọlọ jẹ be daoma le họ, epanọ ma rẹ rọ jọ emotọ evaọ akpọ ọkpokpọ okiẹrẹe nọ Ọghẹnẹ ọ ya eyaa riẹ na.

EMAMỌ URUEMU

11, 12. Ẹvẹ ahwo a re rri erara ẹsejọ, kọ eme ahwo a rẹ ta kpahe Isẹri Jihova?

¹¹ Pita ọ ta eware efa nọ a gwọlọ mi Ileleikristi nọ e rrọ “erara” akpọ na evaọ owọ avọ 12 inọ: “Yọrọ uruemu ezi udevie otu Egedhọ, re wọhọ epanọ a be ta ẹme kpahe owhai rọ iru-umuomu na, a vẹ ruẹse te ruẹ iruo iwoma rai, a vẹ kẹ Ọghẹnẹ oro eva ẹdẹ oziẹobro.” Ẹsejọ, a re mu ta eme iyoma kpahe erara. Fikinọ a wo ohẹriẹ no ahwo nọ a rrọ okegbe rai, a re rri rai wọhọ emamọ ahwo ho. Ẹmeọta rai, uruemu rai, gbe oghẹrẹ nọ a rẹ g’ẹgọ u wo ohẹriẹ. Rekọ nọ a te bi ru eware ezi, a rẹ rọ ere dhesẹ kẹ ahwo inọ a rrọ ahwo yoma ha.

¹² Epọvo na, uvi Ileleikristi a wo ohẹriẹ no erivẹ rai buobu, te ẹmeọta rai gbe oghẹrẹ arozaha omawere nọ a rẹ salọ. Ẹsibuobu osẹ rai u re dhesẹ nọ a wo ohẹriẹ no ahwo okegbe rai. Ẹsejọ ohẹriẹ utioye na u re ru nọ ahwo buobu nọ a riẹ rai totọ họ a rẹ rọ ta eme iyoma kpahe ai. Rekọ amọfa a rẹ ta eme iwoma kpahe ai fiki oghẹrẹ uzuazọ nọ a bi yeri.

13, 14. Ẹvẹ iruẹru mai i re ro dhesẹ nọ owojẹ mai u kiete? Kẹ oriruo.

¹³ Evaọ uzẹme, uruemu ezi mai o rẹ sai ru amọfa ruẹ vuhumu inọ ahwo a be ta eme iyoma kpahe omai gheghe. Makọ Jesu nọ o kru ẹrọwọ riẹ gbagba kẹ Ọghẹnẹ dede, a ta eme iyoma kpahe iẹe. Ahwo jọ a se rie “ọgba eriare, ọgba edada, ogbẹnyusu imiazọhọ gbe erahaizi.” Uzẹme riẹ họ, oma nọ ọ rọ kẹ egagọ Ọghẹnẹ u ru eme iyoma nọ a ta kpahe iẹe fihọ ọrue. Jesu omariẹ ọ ta nọ: “Iruo nọ areghẹ o ru a re ro vuhumu inọ o kiete.” (Mat. 11:19, NW) Ere o rrọ nẹnẹ re. Wọhọ oriruo, nọ inievo mai jọ a kpohọ iruo uwou ogha obọ Selters, evaọ Germany, o jọ ahwo okegbe rai oma inọ inievo na a riẹ oware nọ a bi ru hu. Rekọ osu ẹwho na ọ ta ẹme owoma inievo na inọ: “Uzẹme, uzuazọ Isẹri Jihova nọ e rrọ etẹe ru iruo u wo ohẹriẹ, rekọ o be wha ẹbẹbẹ se uvumọ ohwo evaọ okegbe na ha.”

¹⁴ A ta ọkpọ oware ovona kpahe Isẹri Jihova nọ e rrọ obọ Moscow, evaọ Russia. A wọ eku họ ai uzou inọ a bi ru eware iyoma sa-sa. Rekọ evaọ amara ọ June 2010, ogbẹgwae okọto Europe nọ o rẹ thọ udu nọ ohwo o re ro ru ẹgwọlọ riẹ, onọ a re se European Court of Human Rights evaọ Strasbourg, obọ France u bruoziẹ kẹ Isẹri Jihova inọ: “Okọto na o ruẹ inọ awhaha nọ [orẹwho Mosco] u bi fihọ kẹ iruẹru egagọ [Isẹri Jihova] evaọ orẹwho rai na o thọ. Okotọ Mosco o sae fodẹ oware ovuovo ho nọ u dhesẹ” nọ [Isẹri Jihova] a reabe, wọhọ oriruo, inọ a be hẹriẹ iviuwou, lẹliẹ ahwo thuru whu, hayo siọ usiwo-imu. Fikiere, “awhaha nọ okọto ẹwho o fihọ kẹ ai na o ga hrọ, izi rai i keke hrọ yọ oziẹ nọ a bru o yoma vi oware nọ uzi orẹwho rai o tubẹ gwọlọ.”

MA RẸ ROMA KPOTỌ KẸ EGỌMETI

15. Uthubro Ikereakere na vẹ Ileleikristi uzẹme a bi ru lele?

¹⁵ Isẹri Jihova kpobi, te erọ obọ Moscow a bi ru oware ofa nọ a gwọlọ mi Ileleikristi wọhọ epanọ Pita ọ ta. O kere nọ: “Wha rọ fiki Ọnowo na hrẹ oma kpotọ kẹ uzi nọ ohwo o fihọ kpobi, hayo rọ kẹ ovie wọhọ ọnowuzou; hayo rọkẹ eba.” (1 Pita 2:13, 14) Dede nọ Ileleikristi uzẹme a rrọ abọ ọvuọvo evaọ akpọ omuomu nana ha, a rẹ roma kpotọ kẹ egọmeti “enọ a kẹ udu” wọhọ epanọ Pọl ọ ta.—Se Ahwo Rom 13:1, 5-7.

16, 17. (a) Eme o dhesẹ nọ ma wọso egọmeti hi? (b) Eme ahwo egọmeti jọ a ta kpahe Isẹri Jihova no?

¹⁶ Nọ Isẹri Jihova a bi yeri uzuazọ rai wọhọ “erara” na, orọnikọ a be rọ ẹkwoma enẹ wọso egọmeti hi. A be wọso hayo dhunu họ ẹme ahwo nọ a bi su hu, yọ a bi duoma họ iruẹru egọmeti hi. Wo ohẹriẹ no ahwo egagọ efa, Isẹri Jihova a wo abọ ọvuọvo kpahe esuo-ohrowo ho. A rẹ ta onọ ahwo a re ru kẹ ai gbe he kpahe isuẹsu. A rẹ wha ozighi họ iruẹru egọmeti hayo la uzi egọmeti vrẹ vievie he.

¹⁷ Ileleikristi a bi yoẹme kẹ otu egọmeti wọhọ epanọ Pita ọ ta nọ jọ a “kẹ ovie adhẹẹ,” oghẹrẹ utiona a be rọ rehọ adhẹẹ kẹ isu itieye na. (1 Pita 2:17) Ẹsejọ, ahwo egọmeti a ta no inọ Isẹri Jihova a wo ẹme kugbe ohwo ho. Wọhọ oriruo, ọzae jọ nọ a re se Steffen Reiche nọ ọ jọ omọvo isu ubrotọ Germany ọ ta nọ: “Isẹri Jihova a dhesẹ emamọ uruemu gaga evaọ iwou-odi gbe eria sa-sa nọ a fi rai họ, ẹrọwọ rai nọ a kru ghelọ ukpokpoma isoja Nazi gbe emamọ uruemu nọ a dhesẹ kẹ ahwo nọ a gbẹ jọ uwou-odi yọ iruemu ezi nọ i wuzou gaga kẹ ewoma orẹwho mai. Oghẹrẹ uruemu ezi rai na u wuzou gaga kẹ Germany maero kọ enẹna nọ a be jọ ẹkwotọ na mukpahe ahwo erẹwho efa, ahwo egagọ efa, gbe ahwo nọ a rọwokugbe otu nọ o bi su hu.”

WO UYOYOU

18. (a) Fikieme o jẹ rrọ ẹkoma mai re ma wo uyoyou kẹ ibe Ileleikristi mai? (b) Eme ahwo jọ nọ a rrọ Isẹri Jihova ha a muẹrohọ no?

¹⁸ Pita ukọ na o kere nọ: “[Wha] you imoni na. Wha dhozọ Ọghẹnẹ.” (1 Pita 2:17) Fikinọ Isẹri Jihova a gwọlọ ru oware nọ o rẹ dha Ọghẹnẹ eva ha, o soriẹ nọ a bi ro ru oreva riẹ. Oma o be were ai inọ a rrọ usu inievo akpọ-soso nọ e be rọ evevo gọ Jihova. Fikiere, o rrọ uruemu rai re a “you imoni na.” Uyoyou inievo yena nọ o kare oriobọ na o rẹ jọ oware igbunu kẹ ahwo nọ a rrọ Isẹri Jihova ha ẹsejọ. Wọhọ oriruo, evaọ ukpe 2009, ohwo jọ nọ o bi ru iruo kẹ ekọmpene jọ evaọ obọ America nọ ọ rẹ rẹrote ahwo nọ a re kpohọ ugheriwo o muẹrohọ uruemu Isẹri Jihova. Akpọ o gbe rie unu nọ ọ ruẹ oghẹrẹ nọ inievo na a bi ro dhesẹ uyoyou je bi fi obọ họ kẹ ibe Ileleikristi rai nọ i no eria avọ eria ziọ okokohọ akpọ-soso evaọ obọ Germany. Ọ ta nọ ọ re ruẹ obọ ahwo otiọna ha anwẹnọ o bi ro ru iruo kẹ ekọmpene na. Oniọvo jọ ọ ta kpahe aye na uwhremu na inọ: “Whọ rẹ jọ ovao aye na ruẹ ọwhọ gbe epanọ oware nọ ọ ruẹ na u gine gbei unu te okenọ ọ jẹ ta ẹme na.” Kọ who muẹrohọ oware utiona no evaọ oma ahwo nọ a rrọ inievo ho nọ a kpohọ okokohọ jọ nọ whọ nya?

19. Eme o rẹ jọ ọtamuo mai, kọ fikieme?

¹⁹ Isẹri Jihova a be rọ idhere nọ ma fodẹ no na gbe efa buobu ro dhesẹ nọ ae yọ “erara” evaọ akpọ omuomu Setan na. Yọ o be were ai re a jọ ere. A wo ẹruore ọgaga inọ kẹlena a be te jọ emotọ akpọ ọkpokpọ okiẹrẹe Ọghẹnẹ bẹdẹ bẹdẹ. Kọ who wo ẹruore otiọye re?

[Uwoho nọ o rrọ ẹwẹ-obe avọ 20]

Ma be dhogbo epanọ ma re ro ru akpọ Setan woma ha

[Uwoho nọ o rrọ ẹwẹ-obe avọ 20]

Ma be tha iruo Uvie Ọghẹnẹ uke

[Uwoho nọ o rrọ ẹwẹ-obe avọ 22]

Uwuhrẹ Ẹme Ọghẹnẹ u fi obọ họ ku uviuwou ahwo Russia nana gbe