Kọ Whọ Thuzi Wọso Ẹzi Ọfuafo Na No?

‘Uzioraha jọ o rọ nọ u re kpe ohwo.’—1 JỌN 5:16.

 1, 2. Ẹvẹ ma rọ riẹ nọ a rẹ sae thuzi wọso ẹzi ọfuafo Ọghẹnẹ?

“UDU o be hai bru omẹ inọ o wọhọ nọ mẹ thuzi wọso ẹzi ọfuafo na no.” Ere aye obọ Germany jọ o kere, dede nọ ọ be gọ Ọghẹnẹ. Kọ Oleleikristi ọ rẹ sae ginẹ thuzi wọso ẹzi ọfuafo Ọghẹnẹ?

² Ee, Oleleikristi ọ rẹ sae thuzi wọso ẹzi ọfuafo Jihova. Jesu Kristi ọ ta nọ: “Kuzioraha kuzioraha gbe emeaghọ a rẹ te rehọ ae vrẹ ohwo, rekọ emeaghọ nọ a ta kpahe Ẹzi a rẹ te rehọ ae vrẹ hẹ.” (Matiu 12:31) A vẹvẹ omai unu nọ: “Otẹrọnọ ma riẹ uzẹme na no, ma tẹ jẹ barosa keke be raha izi, iwẹ egọ fiki izieraha igbe fiokaha; rekọ kọ ozọ obrukpe ẹdhoguo-ologbo.” (Ahwo Hibru 10:26, 27) Jọn ukọ na o te je kere nọ: ‘Uzioraha jọ o rọ nọ u re kpe ohwo.’ (1 Jọn 5:16) Kọ ohwo nọ ọ thọ uzi ulogbo jọ ọye o re bruoziẹ oghẹrẹ uzioraha na inọ ‘ọ raha uzi nọ u re kpe ohwo’?

Ekurẹriẹ Ọ rẹ Wha Erọvrẹ Ze

 3. Eme o wọhọ nọ u dhesẹ nọ ma te bi weri gaga fiki uzi jọ nọ ma thọ?

³ Jihova họ ọnọ o re bruoziẹ irumuomu. Eva uzẹme, mai kpobi ma te niyẹrẹ kẹe, yọ o re ru onọ u kiehọ ẹsikpobi. (Emuhọ 18:25; Ahwo Rom 14:12) Jihova họ ọnọ ọ rẹ ta sọ ma thọ uzi nọ u wo erọvrẹ hẹ, yọ ọ rẹ sai mi omai ẹzi riẹ. (Olezi 51:11) Dede na, ma te bi weri gaga fiki uzi jọ nọ ma thọ, kiyọ o wọhọ nọ ma gine kurẹriẹ. Rekọ, eme họ uvi ekurẹriẹ?

 4. (a) Eme ekurẹriẹ u dhesẹ? (b) Fikieme eme nọ e rrọ Olezi 103:10-14 e rẹ rọ kẹ omosasọ?

⁴ Ekurẹriẹ u dhesẹ nọ ma nwene iroro mai kpahe uzi jọ nọ ma thọ vẹre hayo iroro eyoma jọ nọ ọ rọ udu mai nọ ma gwọlọ ru. U dhesẹ nọ ma weri kẹ iruthọ mai je ku oma rẹriẹ no edhere uzioraha. Otẹrọnọ ma thọ uzi ulogbo jọ, ma tẹ jẹ emamọ owọ no ro dhesẹ inọ ma gine kurẹriẹ, ma rẹ sai wo omosasọ no eme ọso-ilezi na ze: “[Jihova] o re ru omai epanọ eyoma mai ọ rọ họ, epanọ imuemu mai e rọ ọ rẹ rehọ ere hwa omai osa ha. Keme ri epanọ odhiwu o kpehru vi akpọ, jẹ ruere ohrọ riẹ o rọ kẹ enọ e be dhẹozọ riẹ; wọhọ epanọ ovatha-ọre ri te ukiediwo riẹ u thabọ na, jẹ ruere o si eware iyoma mai no omai; wọhọ epanọ ọsẹ ọ rẹ re ohrọ emọ riẹ, jẹ ruere ỌNOWO ọ be re ohrọ enọ e be dhẹozọ riẹ. Keme na ọye ọ riẹ epanọ a rọ ma omai; ọ be kareghẹhọ nọ mai ẹkpẹ gheghe.”—Olezi 103:10-14.

 5, 6. Dhunu te igogo eme nọ e rrọ 1 Jọn 3:19-22 na re whọ jẹ fotọ eme nana erọ Jọn ukọ na.

⁵ Eme ọ Jọn ukọ na e rẹ kẹ omosasọ re: “Fiki onana ma te rọ riẹ nọ ma rọ erọ uzẹme na, u [re] ti mu eva mai ẹro evaọ aro riẹ. Oke kpobi nọ eva mai i brukpe omai; Ọghẹnẹ ọ ro vi eva mai, ọ tẹ jẹ riẹ oware kpobi. Iyoyou mẹ, re eva mai i gbe brukpe omai hi, yọ ma wo orọwọ obaro Ọghẹnẹ; Jegbe koware koware nọ ma jọ obọ riẹ yare u re te omai obọ, keme ma bi koko ijaje riẹ je bi ruẹ eware nọ e rẹ were iẹ.”—1 Jọn 3:19-22.

⁶ Ma “riẹ nọ ma rọ erọ uzẹme na” keme ma wo uyoyou inievo, yọ ma be roma kẹ uzioraha ha. (Olezi 119:11) Nọ udu mai u te bi brukpe omai fiki ẹjiroro jọ, u fo re ma kareghẹhọ nọ ‘Ọghẹnẹ ọ rro vi udu mai, ọ tẹ jẹ riẹ eware kpobi.’ Jihova ọ be re omai ohrọ keme ọ riẹ nọ mai “ohwo ọ [be] rehọ uvi uyoyou you ohwo,” ọ tẹ jẹ riẹ abọ-omuo nọ ma bi lele uzioraha mu, gbe epanọ ma be daoma te re ma ruẹsi ru oreva riẹ. (1 Pita 1:22) Udu mai u ti “brukpe omai hi” nọ ma te fi eva họ Jihova, wo uyoyou inievo, jẹ whaha uzioraha arokeke. Ma ti “wo orọwọ [hayo, ufuoma ẹmeọta, NW ] obaro Ọghẹnẹ” evaọ olẹ, yọ ọ te kpahe fihọ elẹ mai keme ma bi koko izi riẹ.

A Thuzi Wọso Ẹzi Na

 7. Eme o re dhesẹ sọ uzioraha u re wo erọvrẹ hayo u wo erọvrẹ hẹ?

⁷ Izieraha vẹ i wo erọvrẹ hẹ? Re ma ruẹse kuyo onọ nana, joma kiẹ iriruo jọ nọ a fodẹ evaọ Ebaibol na riwi. Iriruo nana e rẹ kẹ omai omosasọ nọ udu u te bi brukpe omai fiki uzioraha ulogbo jọ nọ ma thọ dede nọ ma kurẹriẹ no. Iriruo nana i ti fi obọ họ kẹ omai ruẹ inọ orọnikọ epanọ uzioraha ohwo o gbẹdẹ te o rẹ nwani dhesẹ hẹ inọ ọ thuzi nọ u wo erọvrẹ hẹ, rekọ ẹjiroro nọ ọ rọ thọ uzi na, epanọ udu ohwo na o rrọ, gbe epanọ o keke aro fihọ te thuzi na u re dhesẹ sọ onana yọ uzioraha nọ a rẹ rọ vrẹ hayo onọ a rẹ rọ vrẹ hẹ.

 8. Ẹvẹ isu-egagọ ahwo Ju erọ ikpe-udhusoi jọ a jẹ rọ thuzi wọso ẹzi ọfuafo na?

⁸ Isu-egagọ ahwo Ju erọ ikpe-udhusoi ọsosuọ nọ a rọ eva imuomu wọso Jesu a jẹ thuzi wọso ẹzi ọfuafo na. A ruẹ nọ ẹzi Ọghẹnẹ o je ru iruo evaọ oma Jesu okenọ o je ru eware igbunu nọ e kẹ Jihova orro. Ghele na, ewegrẹ nana a jẹ ta nọ ogaga Setan Ẹdhọ na Jesu o je ro ru iruo igbunu nana. Wọhọ epanọ Jesu ọ ta, ahwo nọ a jẹ ta eme-aghọ wọso ẹzi Ọghẹnẹ a jẹ rọ ere thọ uzi nọ a rẹ rọ vrẹ ohwo ho “eva kpọ nana, hayo ọ nọ ọ be tha.”—Matiu 12:22-32.

 9. Eme họ eme-aghọ, kọ eme Jesu ọ ta kpahe iẹe?

⁹ Eme-aghọ yọ ọtaraha, eme ekela hayo eme nọ e rẹ nwoma. Nọ orọnọ Ọghẹnẹ ọye o wo ẹzi ọfuafo na, ohwo ọ tẹ be ta ẹme wọso ẹzi riẹ kiyọ Jihova omariẹ ọ be ta ẹme mukpahe na. Ohwo ọ tẹ be hae ta eme-aghọ itieye na ababọ ekurẹriẹ, o re wo erọvrẹ hẹ. Oghẹrẹ eme nọ Jesu ọ ta kpahe uzioraha utioye na u dhesẹ nọ otu nọ a rẹ rọ arokeke wọso iruẹru ẹzi ọfuafo Ọghẹnẹ ọ jẹ ta kpahe. Fikinọ ẹzi Ọghẹnẹ ọye Jesu o je ro ru iruo, rekọ otu nọ ọ wọso Jesu a be ta nọ ogaga Ẹdhọ, eme-aghọ a jẹ ta wọso ẹzi na.Fikiere Jesu ọ tẹ ta inọ: “Ọ nọ ọ ta emeaghọ kpahe Ẹzi Ẹri o re wo erọvrẹ bẹdẹ hẹ rekọ ọ riabe uzioraha ebẹdẹ bẹdẹ.”—Mak 3:20-29.

10. Fikieme Jesu o ro se Judas “ọmọ ọraha”?

¹⁰ Je muẹrohọ oware nọ o via kẹ Judas Iskariọt. Ọ kare oruọzewọ, ọ jẹ hai tho igho no ẹkpa ugho nọ a rọ kẹe kru. (Jọn 12:5, 6) Uwhremuna ọ tẹ nya bru isu ahwo Ju jẹ ma omaa epanọ o ti ro vivie Jesu nọ a tẹ kẹe ewẹ idọlọ-efuafo 30. Uzẹme, oware nọ Judas o ru na o da riẹ nọ o vivie Jesu no, rekọ o kurẹriẹ no uzioraha arokeke riẹ na ha. Fikiere, Judas o te ohwo nọ o re wo ẹkparomatha ha. Oyejabọ nọ Jesu o ro sei “ọmọ ọraha na.”—Jọn 17:12; Matiu 26:14-16.

A Thuzi Wọso Ẹzi Ọfuafo na Ha

11-13. Ẹvẹ Devidi ovie na ọ rọ thuzi kugbe Batshẹba, kọ omosasọ vẹ ma rẹ sai wo no oware nọ Ọghẹnẹ o ru kpahe uzioraha rai ze?

¹¹ Ẹsejọ Ileleikristi nọ e ta izieraha ilogbo rai via no je wo obufihọ no obọ ekpako ukoko na ze no a rẹ sai gbe wo obrukpe iroro ghele fiki izi nọ a raha eva oke nọ u kpemu. (Jemis 5:14) Nọ udu o tẹ be hai brukpe omai oghẹrẹ utiona, ẹsejọhọ ma ti wo omosasọ nọ ma te roro kpahe oware nọ Ikereakere na e ta kpahe ahwo nọ Ọghẹnẹ ọ rehọ izieraha rai vrẹ ai.

¹² Devidi ovie na ọ thuzi ulogbo kugbe Batshẹba, aye Uraya. Nọ ọ jọ ehru uwou riẹ kparo ruẹ aye nana nọ o wo erru na nọ ọ be họ, Devidi o te vi uwou inọ jọ a sei ziọ ọgwa uvie riẹ, kẹsena o te lele iei wezẹ. Nọ aye na ọ vuẹe nọ o dihọ no, Devidi o te ru ẹghẹ re ọzae aye na, Uraya, ọ ruẹsi lele aye na wezẹ re ahwo a seba ẹriẹ kpahe ẹnwa-obro na. Nọ ẹghẹ yena o ru iruo ho, Devidi o te ru ọruẹrẹfihotọ nọ a ro kpe Uraya evaọ arọ ẹmo. Ukuhọ riẹ Batshẹba o te zihe ruọ aye Devidi je yẹ ọmọ kẹe nọ o whu uwhremuna.—2 Samuẹle 11:1-27.

¹³ Jihova o ru oware kpahe uzioraha Devidi avọ Batshẹba na. Ọghẹnẹ ọ rọ vrẹ Devidi, ẹsejọhọ fikinọ o kurẹriẹ gbe fiki ọvọ Uvie nọ ọ re kugbei. (2 Samuẹle 7:11-16; 12:7-14) U muẹro inọ Batshẹba o dhesẹ uruemu ekurẹriẹ keme o wo uvẹ-ọghọ nọ ọ rọ jọ oni Solomọn ovie na, gbe oni-ode Jesu Kristi. (Matiu 1:1, 6, 16) Otẹrọnọ ma raha uzi jọ, u fo re ma kareghẹhọ nọ Jihova o bi muẹrohọ uruemu mai nọ u dhesẹ ekurẹriẹ.

14. Ẹvẹ oware nọ o via kẹ Manasẹ u ro dhesẹ epanọ Ọghẹnẹ o wo erọvrẹ te?

¹⁴ Ma rẹ sae jọ oware nọ o via kẹ Manasẹ ovie Juda ruẹ oghẹrẹ nọ Jihova o wo erọvrẹ te. Manasẹ o ru oware nọ o thọ evaọ aro Jihova. Ọ rehọ aruẹri vi kẹ Ebale, ọ gọ “eware obọ ehru,” jẹ tubẹ bọ aruẹri kẹ eghẹnẹ erue fihọ etẹmpol ivẹ. Ọ jẹ mahe emọ riẹ ro dheidhe, wha iruẹru-imizi haro, jẹ lẹliẹ ahwo Juda gbe Jerusalẹm “ru imuomu nọ i vi erọ erẹwho nọ ỌNOWO na ọ raha rọ kẹ ahwo Izrẹl.” Ọ gaviezọ kẹ unuovẹvẹ eruẹaro Ọghẹnẹ hẹ. Uwhremuna ovie Asiria o te mu Manasẹ kpohọ igbo. Eva obei, Manasẹ o te kurẹriẹ jẹ roma kpotọ lẹ se Ọghẹnẹ, Ọghẹnẹ ọ tẹ rọ vrẹe je zihe iei ziọ ọkwa uvie riẹ evaọ Jerusalẹm, nọ ọ jọ wha egagọ uzẹme haro.—2 Iruẹru-Ivie 33:2-17.

15. Eme ọ via kẹ Pita nọ u dhesẹ nọ Jihova ọ rẹ rọ vrẹ evaọ edhere ologbo?

¹⁵ Ikpe buobu nọ i lele i rie, Pita ukọ na ọ vro Jesu, onọ o jọ uzioraha ulogbo. (Mak 14:30, 66-72) Dede na, Jihova ọ rọ vrẹ Pita evaọ edhere ologbo. (Aizaya 55:7) Fikieme? Fikinọ Pita o kurẹriẹ no eva ze. (Luk 22:62) Edẹ 50 e vrẹ no, u dhesẹ oma via vevẹ inọ Ọghẹnẹ ọ rọ vrẹ Pita keme a kẹ riẹ uvẹ-ọghọ nọ o ro se isẹi ududu kpahe Jesu. (Iruẹru 2:14-36) Kọ ẹjiroro jọ ọ riẹ nọ ma re ro roro nọ Ọghẹnẹ o ti keke obọ kpahe ẹrọvrẹ Ileleikristi nọ i gine kurẹriẹ no izieraha rai nẹnẹ? Ọso-ilezi na ọ so nọ: “O ỌNOWO, otẹrọnọ, who roro imuemu mai, ỌNOWO kọ ono ọ rẹ sai dikihẹ? Rekọ who wo erọvrẹ.”—Olezi 130:3, 4.

Ẹwhaha Udubro inọ Ẹsejọhọ Ohwo Ọ Thuzi Wọso Ẹzi Na

16. Fiki eware vẹ Ọghẹnẹ ọ sae rọ rehọ izieraha vrẹ ohwo?

¹⁶ U fo re iriruo nọ ma fodẹ na i fi obọ họ kẹ omai whaha udubro inọ ẹsejọhọ ma thuzi wọso ẹzi ọfuafo na no. Iriruo na i dhesẹ nọ Jihova ọ rẹ rọ vrẹ erahaizi nọ i kurẹriẹ. Olẹ nọ u no eva ze u wuzou gaga. Otẹrọnọ ma raha uzi jọ, ma rẹ sae lẹ se Jihova inọ ọ rọ vrẹ omai fiki idhe ẹtanigbo Jesu, fiki ohrọ Riẹ, fiki iruo ẹrọwọ nọ ma ru vrẹ no, re ọ jẹ kareghẹhọ nọ ma gba ha. Fikinọ ma riẹ epanọ aruoriwo Jihova o kpehru te, ma sae lẹ kẹ erọvrẹ avọ evaifihọ inọ ọ te rọ vrẹ omai.—Ahwo Ẹfẹsọs 1:7.

17. Eme ma re ru nọ ma tẹ thuzi jẹ gwọlọ obufihọ abọ-ẹzi?

¹⁷ Kọ ẹvẹ otẹrọnọ ma thuzi yọ ehoo nọ ma rẹ rọ lẹ se Ọghẹnẹ o bi ru omai fiki uzioraha na? Jemis olele na o kere kpahe onana nọ: “Jọ [ohwo otiọye na] o se ekpako ukoko na, re a lẹ kẹe, avẹ rehọ udẹ wholo iei eva odẹ Ọnowo na; olẹ orọwọ u re siwẹ ohwo nọ ọ rẹ mọ; Ọnowo na ọ vẹte kpariẹ tovrẹ; re otẹrọnọ ọ raha izi, o reti wo erọvrẹ.”—Jemis 5:14, 15.

18. A tẹ maki si ohwo no ukoko fiki uzioraha jọ, fikieme a gbẹ rọ nwane ta ha inọ uzioraha nọ u wo erọvrẹ hẹ ọ thọ na?

¹⁸ Ohwo nọ ọ raha uzi o gbe kurẹriẹ evaọ okioke yena ha nọ a te si ei no ukoko dede, orọnikọ o nwani dhesẹ nọ uzioraha nọ u wo erọvrẹ hẹ ọ thọ na ha. Pọl o kere kpahe ohwo jọ nọ a rọ ẹzi wholo evaọ ukoko obọ Kọrint nọ a si no ukoko fiki uzioraha riẹ inọ: “Utho uye kpobi nọ a hẹrọ kẹ ohwo ọyena u he woma; ikpoye wha rọ vrẹ e, wha sasiẹ e oma, ogbẹrọ ere he uweli riẹ o vẹ te dae oma fia.” (2 Ahwo Kọrint 2:6-8; 1 Ahwo Kọrint 5:1-5) Dede na, re a ruẹse ruẹrẹ usu rai họ kugbe Ọghẹnẹ, u fo re ahwo nọ a nya thọ a jẹ obufihọ nọ ekpako ukoko a be rehọ ẹkwoma Ikereakere kẹ ai rehọ, a vẹ jẹ kẹ imuẹro uvi ekurẹriẹ. A rẹ “mọ ibi nọ iwoma te ekurẹriẹ” hrọ.—Luk 3:8.

19. Eme ọ rẹ sai fi obọ họ kẹ omai “kru ẹrọwọ ga”?

¹⁹ Eme ọ rẹ sae lẹliẹ omai roro nọ ma thuzi wọso ẹzi ọfuafo na no? Ohwo ọ rẹ sai wo iroro itieye na nọ o te bi rri omoware kpobi nọ o thọ riẹ obọ wọhọ nọ o kie no aro Ọghẹnẹ no hayo nọ o te wo ẹyao ọkora. Nọ o tẹ via ere, olẹ gbe owezẹ nọ ohwo ọ rẹ wezẹ doma o rẹ sai fi obọ họ. Ma rẹ yọrọ oma gaga re Setan ọ siọ udu mai ba ewhrehe, nọ ma rẹ rọ siọ Ọghẹnẹ ba ẹgọ. Nọ uwhu orumuomu o rẹ were Jihova ha na, o rẹ dae gaga re odibo riẹ jọ o vru no egagọ uzẹme. Fikiere, nọ ma tẹ be ruawa nọ ẹsejọhọ ma thuzi wọso ẹzi ọfuafo na no, u fo re ma ruabọhọ wuhrẹ Ẹme Ọghẹnẹ, onọ o kẹre te oria ikere wọhọ obe Ilezi nọ o rẹ kẹ omosasọ na. U fo re ma ruabọhọ ekpohọ iwuhrẹ ukoko Ileleikristi na je wobọ evaọ iruo usiuwoma ota Uvie na. Nọ ma tẹ be hai ru ere u ti fi obọ họ kẹ omai “kru ẹrọwọ ga,” nọ ma gbẹ te rọ ruawa ha inọ ẹsejọhọ ma thuzi nọ u wo erọvrẹ hẹ.—Taitọs 2:2.

20. Eme ohwo ọ rẹ sae nọ omobọriẹ nọ u re fi obọ họ kẹe ruẹ nọ ọ re te thuzi wọso ẹzi ọfuafo na ha?

²⁰ Ohwo kpobi nọ o wo udubro inọ ẹsejọhọ ọ thuzi wọso ẹzi ọfuafo na no ọ rẹ sae nọ omariẹ nọ: ‘Kọ mẹ ta eme-aghọ kpahe ẹzi ọfuafo na no? Kọ me gine kurẹriẹ no uzioraha mẹ no? Kọ me fi ẹrọwọ họ erọvrẹ Ọghẹnẹ? Kọ mẹ yọ ohwo nọ o kie no ẹrọwọ nọ ọ siọ elo abọ-ẹzi na?’ Nọ a tẹ nọ oma rai enọ nana, ahwo otiọye na a ti vuhumu inọ a re jẹ ẹzi ọfuafo Ọghẹnẹ fiẹ hẹ, yọ a rri kie no ẹrọwọ na gbe he. A kurẹriẹ, yọ a gbe fi ẹrọwọ họ erọvrẹ Jihova. Otẹrọ ere, kiyọ a re te thuzi wọso ẹzi ọfuafo Jihova ha.

21. Enọ vẹ a te ta ẹme kpahe evaọ uzoẹme nọ o rrọ aro na?

²¹ Ẹvẹ o rẹ kẹ omosasọ te nọ ma te wo imuẹro inọ ma re thuzi wọso ẹzi ọfuafo na ha! Dede na, enọ jọ e riẹ nọ i wobọ kpahe ẹme nana nọ ma te ta ẹme te evaọ uzoẹme nọ o rrọ aro na. Wọhọ oriruo, ma sae nọ oma mai nọ: ‘Kọ ẹzi ọfuafo Ọghẹnẹ ọ be ginẹ kpọ omẹ? Kọ ubi ẹzi ọfuafo na u bi dhesẹ oma via evaọ uzuazọ mẹ?’

Didi Uyo Whọ te Kẹ?

• Ẹvẹ ma sae rọ ta nọ a rẹ sae thuzi wọso ẹzi ọfuafo na?

• Re a ta nọ ohwo o kurẹriẹ, eme u dhesẹ?

• Amono a thuzi wọso ẹzi ọfuafo na eva okenọ Jesu ọ jọ otọakpọ?

• Ẹvẹ ohwo ọ sae rọ whaha uduama inọ ẹsejọhọ ọ thọ uzi nọ u wo erọvrẹ hẹ no?

[Uwoho nọ o rrọ ẹwẹ-obe avọ 4]

Ahwo nọ a ta nọ ogaga Setan oye Jesu o ro ru iruo igbunu a thuzi wọso ẹzi ọfuafo Ọghẹnẹ

[Uwoho nọ o rrọ ẹwẹ-obe avọ 5]

Dede nọ ọ vro Jesu, Pita ọ thọ uzi nọ u wo erọvrẹ hẹ hẹ