ENỌ AHWO NỌ A S’EBE

Oghẹrẹ vẹ ẹzi ọfuafo na o bi ro w’obọ evaọ eromuo ekpako gbe idibo iruiruo nẹnẹ?

Orọ ọsosuọ, ẹzi ọfuafo na ọ wọ ahwo nọ a kere Ebaibol na nọ a ro kere iruemu sa-sa nọ o gwọlọ nọ ohwo o re wo re a tẹ te rehọ iẹe mu ọkpako hayo odibo oruiruo. Iruemu ikpegbezeza nọ o gwọlọ nọ ohwo o re wo re a tẹ te rehọ iẹe mu ọkpako e rrọ obe 1 Timoti 3:​1-7. Iruemu efa jọ nọ a gwọlọ mi ohwo otiọye e rrọ obe Taitọs 1:​5-9 gbe obe Jemis 3:​17, 18. Yọ iruemu nọ o gwọlọ nọ ohwo o re wo re a tẹ rehọ iẹe mu odibo oruiruo e rrọ obe 1 Timoti 3:​8-10, 12, 13. Orọ avivẹ, inievo nọ e be rọ odẹ ibe Ileleikristi rai ze jẹ ta nọ a te kẹ ahwo nọ a rẹ sae kẹ owha-iruo ọkpako hayo odibo oruiruo a rẹ lẹ se Jihova kẹ ẹzi riẹ re ọ kpọ ae oke kpobi nọ a tẹ keria be jiroro onana. Kẹsena a vẹ kiẹ rri sọ oniọvo nọ a rọ odẹ riẹ ze na ọ be daoma ziezi evaọ iruemu nọ Ikereakere na e ta nọ o gwọlọ nọ ohwo o re wo re ọ tẹ jọ ọkpako hayo odibo oruiruo na. Orọ avesa, o gwọlọ nọ oniọvo nọ a rọ odẹ riẹ ze inọ o te ọnọ a rẹ sae kẹ owha-iruo na o re wo iruemu nọ u dhesẹ nọ o wo abọ sa-sa ọrọ ubi ẹzi ọfuafo Ọghẹnẹ evaọ uzuazọ riẹ. (Gal. 5:​22, 23) Umutho eware nọ ma ta no na u dhesẹ nọ ẹzi Ọghẹnẹ o re gine w’obọ evaọ kabọ kabọ eromuo ọkpako hayo odibo oruiruo.

Rekọ, amono a rẹ rehọ inievo itienana mu? Evaọ oke nọ u kpemu, a re vi odẹ inievo nọ a roro nọ i te enọ a re ro mu ekpako hayo idibo iruiruo kpohọ uwou ogha. Evaọ obọ uwou ogha, inievo nọ Utu Ẹruorote Iruẹru Isẹri Jihova a ro mu a vẹ nabe romatotọ kiẹ eware nọ a kere kpahe oniọvo nọ a vi odẹ riẹ se ae na riwi jẹ rehọ iẹe mu nọ a tẹ ruẹ nọ o gine te. Kẹsena uwou ogha u ve kere se ugboma ekpako ukoko riẹ inọ a rehọ e riẹ mu no. Ekpako na a vẹ vuẹ oniọvo nọ a ro mu obọ na inọ a kẹ riẹ owha-iruo okpokpọ no, a vẹ jẹ nọe sọ ọ jẹ owha-iruo na rehọ hayo u wo oware jọ nọ o rri nọ o te whaha iẹe nọ ọ te sai ro te kẹ owha-iruo na ha. Nọ ọ tẹ jẹ owha-iruo na rehọ no, a ve ru owhowhovia evaọ ukoko riẹ inọ a rehọ e riẹ mu no.

Rekọ, oghẹrẹ vẹ a jẹ rọ rehọ ahwo mu evaọ ikpe-udhusoi ọsosuọ? Ẹsejọ, ikọ na a jẹ hae rehọ ahwo mu nọ a tẹ gwọlọ nọ a rẹrote oghẹrẹ ewha-iruo jọ. Wọhọ oriruo, a rehọ ezae ihrẹ jọ mu re a ghale emu okpẹdẹ kẹ eyae-uku. (Iruẹru 6:​1-6) Dede na, o sae jọnọ ezae yena a jọ ekpako no vẹre taure a tẹ te kẹ ae owha-iruo yena.

Dede nọ Ikereakere na e nwane ta oware kpobi kpahe oghẹrẹ nọ a jẹ rọ rehọ idibo Ọghẹnẹ mu kẹ ewha-iruo evaọ oke nọ u kpemu hu, ma ruẹ ẹmẹvo oghẹrẹ nọ a je ro ru onana. Ebaibol na ọ ta nọ okenọ Pọl ukọ na avọ Banabas a je no erẹ imishọnare ọsosuọ rai ze, ‘a jẹ rehọ ekpako mu evaọ ukoko kpobi, a jẹ siọ emuọriọ ba jẹ lẹ kẹ ae, a je mu ai họ obọ Ọnowo na ọnọ a rọwo.’ (Iruẹru 14:23) Ikpe buobu nọ i lele i rie, Pọl o kere se Taitọs nọ a gbẹ jọ onya imishọnare inọ: ‘Oware nọ me je vu owhẹ wa obọ Kriti ona, re whọ kpọ eware nọ e thọ vi, re whọ rehọ ekpako mu evaọ kẹwho kẹwho wọhọ epanọ me dhesẹ kẹ owhẹ.’ (Tait. 1:⁠5) Yọ o wọhọ nọ Pọl ukọ na ọ kẹ Timoti nọ o je lele ei kpohọ erẹ imishọnare gaga udu nọ ọ jẹ rọ rehọ ekpako mu re. (1 Tim. 5:22) O rrọ vevẹ inọ esẹro ọnyawariẹ e jẹ rehọ ekpako nana mu orọnikọ ikọ na omarai hayo ekpako nọ e jọ obọ Jerusalẹm hu.

Otoriẹ nana nọ Utu Ẹruorote Iruẹru Isẹri Jihova a wo kpahe oghẹrẹ nọ a jẹ rọ rehọ ekpako mu evaọ ikpe-udhusoi ọsosuọ na u ru nọ a ro ru inwene no kpahe oghẹrẹ nọ a rẹ rọ rehọ ekpako gbe idibo iruiruo mu. No umuo Azie 1, 2014 vrẹ, enẹ a be te rọ rehọ ekpako gbe idibo iruiruo mu: Ọsẹro okogho ọ be te hae romatotọ kiẹ eware nọ a kere kpahe inievo-emezae riwi, enọ a kere odẹ rai h’otọ inọ a te kẹ owha-iruo ọkpako hayo odibo oruiruo evaọ okogho na. Okenọ o te weze bru ukoko, ọ rẹ daoma riẹ inievo-emezae nọ a kere odẹ rai fihotọ na, lele ai kpohọ usiuwoma ota nọ o tẹ lọhọ. Ọsẹro okogho na o ve je lele ugboma ekpako ukoko na ta kpahe inievo nọ a kere odẹ rai fihotọ kẹ eromuo na, kẹsena ọ vẹ rehọ ae mu nọ ọ tẹ ruẹ nọ a gine te. Enẹ ọruẹrẹfihotọ eromuo ekpako gbe idibo iruiruo na o te rọ wọhọ epanọ o jọ evaọ ikpe-udhusoi ọsosuọ.

Amono a re w’obọ evaọ eromuo ekpako gbe idibo iruiruo na? Wọhọ epanọ o rrọ n’otọ avọ otọ ze, “odibo oruọzewọ, nọ o wo areghẹ” na o wo owha-iruo nọ ọ rẹ rọ rehọ iwuhrẹ Ọghẹnẹ ko idibo Ọghẹnẹ kpobi. (Mat. 24:​45-47) Owha-iruo nana o kẹre te Ikereakere na nọ ọ rẹ kiẹ riwi ziezi avọ obufihọ ẹzi ọfuafo na re ọ ruẹ izi hayo ehri-izi Ebaibol sa-sa nọ i w’obọ kugbe oghẹrẹ nọ u fo nọ a rẹ ruẹrẹ iruẹru abọ ukoko Ọghẹnẹ nọ o rrọ otọakpọ họ. Odibo oruọzewọ ọvona ọ rẹ jẹ rehọ esẹro okogho gbe otu Ogbẹgwae Uwou-Ogha mu. Kẹsena, uwou ogha o vẹ ruẹ nọ a fiobọhọ kẹ ikoko sa-sa evaọ oghẹrẹ nọ a sai ro fi ithubro nọ i bi no obọ odibo oruọzewọ na ze họ iruo. Ugboma ekpako na a wo owha-iruo nọ a rẹ rọ romatotọ rehọ Ikereakere na kiẹ iruemu inievo-emezae nọ a rehọ edẹ rai ze riwi sọ a te kẹ ewha-iruo ekpako hayo idibo iruiruo. Ọsẹro okogho kpobi ọ rẹ lẹ jẹ romatotọ kiẹ eware nọ a kere kpahe inievo nọ a fi odẹ rai h’otọ inọ a te kẹ ekpako hayo idibo iruiruo riwi, kẹsena ọ vẹ rehọ enọ ọ ruẹ nọ a gine te mu. Onana yọ owha-iruo ulogbo.

Ma tẹ riẹ oghẹrẹ nọ a be rọ rehọ inievo-emezae mu ekpako hayo idibo iruiruo evaọ ukoko na, ma rẹ ruẹ nọ ẹzi ọfuafo na o wiruo gaga evaọ eromuo na. Onọ u re ru nọ ma re ro fievahọ jẹ rọ adhẹẹ kẹ inievo-emezae nọ a kẹ ewha-iruo itienana ziezi evaọ ukoko na.​—⁠Hib. 13:​7, 17.

Kẹsena eruẹaruẹ na e tẹ ta nọ arao ojihẹ na ọ vẹ te “ga obọ vi ai, o ve [ti] kpe ai.” Rekọ nọ “edẹ esa gbe ubro” e tẹ vrẹ no, isẹri ivẹ nana a ve ti zihe ziọ uzuazọ, u ve ti gbe enọ e ruẹ rai kpobi unu gaga.​—⁠Evia. 11:​7, 11.

Amono họ isẹri ivẹ nana? Eware efa nọ a ta lele ẹme na i ru omai riẹ ahwo nọ a rrọ. Orọ ọsosuọ, a jọ eruẹaruẹ na se isẹri ivẹ na “ire olivi ivẹ gbe ikpẹ-erae ivẹ.” (Evia. 11:⁠4) Onana o rẹ kareghẹhọ omai ukpẹ-erae gbe ire olivi ivẹ nọ eruẹaruẹ Zekaraya e ta kpahe. A jọ eruẹaruẹ Zekaraya na ta nọ ire olivi ivẹ yena i dikihẹ kẹ “imava nọ a ro mu” hayo nọ a wholo, koyehọ Zerubabẹl avọ Joshua Ozerẹ Okpehru na, “enọ i dikihẹ akotọ ỌNOWO na rọ kẹ akpọ na ọsoso.” (Zek. 4:​1-3, 14) Orọ avivẹ, eruẹaruẹ na e ta nọ isẹri ivẹ na a ru ọkpọ eware igbunu nọ Mosis avọ Elaeja a ru.​—⁠Rọ eme nọ e rrọ obe Eviavia 11:​5, 6 wawo obe Ikelakele 16:​1-7, 28-35 gbe obe 1 Ivie 17:1; 18:​41-45.

Eme eria ikere nana i wo kugbe? Ikereakere na ọvuọvo e ta kpahe ohwo nọ Ọghẹnẹ o ro mu nọ o je su ahwo riẹ evaọ etoke ẹbẹbẹ hayo odawọ. Fikiere, evaọ orugba obe Eviavia uzou avọ 11 na, Ileleikristi nọ a rọ ẹzi wholo nọ e jẹ kobaro kẹ ibe Ileleikristi rai evaọ etoke 1914 nọ a rọ rehọ Uvie Ọghẹnẹ mu no evaọ obọ odhiwu na, a rehọ “ehọ-ekpa” zuo evaọ iruo usiuwoma ota Uvie na te ikpe esa gbe ubro.

Nọ etoke nọ a jẹ rọ rehọ ehọ ekpa zuo ta usiuwoma na u kuhọ no, a te kpe Ileleikristi nana nọ a rọ ezi wholo na wọhọ odẹme, koyehọ a te fi ai họ uwou odi evaọ etoke kpẹkpẹe onọ u dikihẹ kẹ edẹ esa gbe ubro. Evaọ eriwo ewegrẹ idibo Ọghẹnẹ, a roro nọ a raha iruo rai no riẹriẹriẹ, onọ u ru nọ ewegrẹ na a rọ ghọghọ gaga.​—⁠Evia. 11:​8-10.

Rekọ wọhọ epanọ eruẹaruẹ na e ta na, isẹri ivẹ na a zihe ziọ uzuazọ nọ edẹ esa gbe ubro na e gba no. Ileleikristi nana nọ a rọ ẹzi wholo na a no uwou-odi ze, enọ i gbe kru ẹrọwọ evaọ udevie rai a te je wo uvẹ nọ Ọghẹnẹ ọ rọ rehọ Jesu Kristi nọ ọ rrọ Olori rai salọ ae kẹ obọdẹ iruo jọ. A jọ usu inievo nọ a rehọ mu “odibo oruọzewọ, nọ o wo areghẹ” evaọ ukpe 1919, re a wuhrẹ idibo Ọghẹnẹ eware nọ i re ru ẹrọwọ rai ga nọ usu rai kugbe Ọghẹnẹ o jẹ jọ gaga evaọ edẹ urere nana.​—⁠Mat. 24:​45-47; Evia. 11:​11, 12.

Nwani fo na, a jọ obe Eviavia 11:​1, 2 ta kpahe eware nọ i dhesẹ nọ eruẹaruẹ kpahe isẹri ivẹ na i w’obọ kugbe etoke nọ a te rọ wawo hayo kiẹ ọruẹrẹfihotọ egagọ Ọghẹnẹ riwi evaọ otọakpọ. Obe Malakae uzou avọ 3 o ta kpahe ọkpọ ọkiẹriwo otiọna, kẹsena oke orufuọ u te lele iei. (Mal. 3:​1-4) Ẹvẹ etoke ọkiẹriwo gbe orufuọ nana u kri te? U muhọ no ukpe 1914 rite abọ emuhọ ọrọ ukpe 1919. Etoke nana họ edẹ 1,260 (hayo emerae 42) avọ edẹ esa gbe ubro erọ ẹwoho nọ a fodẹ evaọ obe Eviavia 11 na.

Eva e be were omai gaga inọ Jihova o ru ọruẹrẹfihotọ nọ o ro ru ahwo riẹ fo kẹ iruo iwoma. (Tait. 2:14) Eva e tẹ be jẹ were omai inọ Ileleikristi nọ a rọ ẹzi wholo na a fi emamọ oriruo hotọ kẹ omai, a kobaro evaọ iruo Uvie na evaọ etoke edawọ yena, jẹ rọ ere dikihẹ kẹ isẹri ivẹ nọ a fodẹ evaọ eruẹaruẹ na.a