Enọ I Bi Se Ebe Mai A Nọ Inọ . . .

Eme họ Amagẹdọn?

▪ Nọ ahwo buobu a te yo ẹme na “Amagẹdọn,” oware nọ o rẹ ziọ iroro rai họ ọraha ologbo—ẹmo okpemuotọ, ọraha ologbo ọrọ emama nọ ohwo ọ robọ so ho, hayo “ọraha okegbe” nọ ẹroro ọgaga ọ te wha ze. Rekọ evaọ Ebaibol na, ẹme na Amagẹdọn u dhesẹ eghẹrẹ ọraha nọ ma fodẹ na vievie he. Nọ o rrọ ere na, kọ eme họ Amagẹdọn nọ a jọ Ebaibol fodẹ na?

Ẹme na Amagẹdọn o roma via evaọ obe Eviavia evaọ Ebaibol na. U dhesẹ ẹmo oghẹrẹsa, “ẹmo ologbo Ọghẹnẹ Erumeru na,” onọ “ivie akpọ na kpobi” a ti jo kuomagbe lele Ọghẹnẹ họre. A jọ eria ikere efa ta ẹme kpahe oghẹrẹ ẹmo otiọye na re.—Eviavia 16:14-16; Izikiẹl 38:22, 23; Joẹl 3:12-14; Luk 21:34, 35; 2 Pita 3:11, 12.

Ẹvẹ ẹmo nana ọ te jọ? Obe Eviavia o rọ edhere ẹwoho ta kẹ omai inọ: “Ivie akpọ na, gbe ogbotu ẹmo rai . . . a kokohọ re a họre ọ nọ ọ keria ehru anyenya na, avọ ogbotu ẹmo riẹ.” Ọnọ “ọ keria ehru anyenya na” họ Ọmọ Ọghẹnẹ, Jesu Kristi, ọnọ Ọghẹnẹ o ro mu re o su ogbaẹmo ijẹle evaọ ẹmo nọ a ti ro fi ewegrẹ Ọghẹnẹ kparobọ. (Eviavia 19:11-16, 19-21) Obe Jerimaya 25:33 u dhesẹ epanọ ọraha ahwo omuomu na ọ te kẹre te, o ta nọ: “Enọ ỌNOWO na o [ti] kpe eva ẹdẹ ọyena a rẹte vaha ae no oka du oka akpọ na.”

Fikieme ẹmo Amagẹdọn u ro fo? Erẹwho akpọ na a siọ udu-esuo Ọghẹnẹ, a tẹ be wha esuo obọrai haro. (Olezi 24:1) A jọ obe Olezi 2:2 dhesẹ owojẹ ọwọsuọ rai, inọ: “Ivie akpọ na i mugba, isu na e tẹ jẹ jiroro kugbe; kpahe Ọnowo jẹ kpahe ọ riẹ nọ a wholo na.”

Otu ọwọsuọ nana a wọhọ ahwo ugbarugba nọ a vẹ ruọ otọ omọfa, yọ orọnikọ a be gwọlọ si rie rehọ ọvo ho rekọ a be jẹ raha iẹe. Erẹwho na nẹnẹ a be raha otọakpọ na jẹ be nua okegbe riẹ. Ẹme Ọghẹnẹ ọ ta kpahe uyero nana nọ o te roma via na inọ: “Erẹwho na kpobi a te je mu ofu, rekọ ofu [Ọghẹnẹ] ọ tẹ ze.” Kẹsena Ọghẹnẹ ọ vẹ te ‘raha enọ e be raha akpọ na.’ (Eviavia 11:18) Ẹmo Amagẹdọn họ edhere nọ Ọghẹnẹ ọ jiroro nọ o ti ro ku avro na họ, avro kpahe ohwo nọ o wo udu nọ o re ro su ahwo-akpọ.—Olezi 83:18.

Oke vẹ a ti ro fi ẹmo Amagẹdọn? Ọmọ Ọghẹnẹ ọ ta vevẹ nọ: “Ẹdẹ ọyena gbe oke oyena ohwo ọvo ọ riẹ hẹ, makọ ikọ nọ e rọ obọ odhiwu, hayo Ọmọ dede, rekọ Ọsẹ na ọvo.” (Matiu 24:36) O make rrọ ere na, nọ Jesu Kristi Ovie Ọgbaẹmo na ọ jẹ ta kpahe Amagẹdọn, ọ kẹ unuovẹvẹ nana: “Ri, Mẹ be tha wọhọ oji! [O ghale] ohwo nọ ọ jaja aro vi.” (Eviavia 16:15) Fikiere, ẹmo akpọ-soso nana o wobọ kugbe oke ọzino Kristi, onọ orugba eruẹaruẹ Ebaibol o be kẹ imuẹro inọ ma rrọ na.

Ahwo omuomu nọ e rọwo kurẹriẹ hẹ eye ẹmo Amagẹdọn ọ te raha, rekọ “otu obuobu” jọ ọ rẹ te zọ. (Eviavia 7:9-14) A te rọ ẹro ruẹ orugba ẹme nana: “Omoke kakao, iru-umuomu e gbẹ te jọ họ; dede nọ wha bi ri oria riẹ ziezi na, ọ rẹ te jọ etẹe he. Rekọ enọ e rọ oma kpotọ, e rẹ te rọ otọ na reuku; oma o rẹ te were ae evaọ omofọwẹ.”—Olezi 37:10, 11.

[Ẹme nọ a fi ẹgba họ nọ ọ rrọ ẹwẹ-obe avọọ 32]

“Enọ e rọ oma kpotọ, e rẹ te rọ otọ na reuku; oma o rẹ te were ae evaọ omofọwẹ”