Enọ Ahwo Nọ A S’ebe

Iku nọ Matiu o gbe kpahe eyẹ Jesu gbe okenọ ọ rọ jọ ọmaha e dina wo ohẹriẹ no erọ Luk keme abọ ọvona aimava a gbiku na noze he.

Eware nọ i kiekpahe Josẹf eye Matiu o kere kpahe. O kere kpahe oghẹrẹ nọ o jọ Josẹf oma nọ o yo nọ Meri o dihọ, ewezẹ nọ ukọ-odhiwu ọ jọ ru ẹme na vẹ kẹ Josẹf, gbe epanọ o ro ru lele ẹme ukọ-odhiwu na. (Mat. 1:​19-25) Matiu o te je kere kpahe ewezẹ nọ Josẹf ọ wezẹ nọ ukọ-odhiwu ọ jọ vuẹe nọ ọ dhẹ kpobọ Ijipti, epanọ tei te uviuwou riẹ a rọ dhẹ, ewezẹ nọ ukọ-odhiwu ọ jọ vuẹe nọ o zihe kpobọ Izrẹl, epanọ o ro zihe, gbe epanọ ọ rọ jiroro nọ ọyomariẹ avọ uviuwou riẹ a rẹ rria ẹwho Nazarẹt. (Mat. 2:​13, 14, 19-23) Evaọ izou ọsosuọ obe Matiu, a fodẹ odẹ Josẹf isia eree, rekọ isiane ọvo a fodẹ odẹ Meri.

Evaọ abọdekọ riẹ, Meri ọye Luk ọ mae ta kpahe. O kere kpahe epanọ ukọ-odhiwu nọ a re se Gebriẹl o ro weze bru Meri, epanọ Meri o ro weze bru Ẹlizabẹt omoni riẹ, gbe eme nọ Meri ọ ta ro jiri Jihova. (Luk 1:​26-56) Luk o te je kere kpahe eme nọ Simiọn ọ ta kẹ Meri kpahe uye nọ Jesu ọ te ruẹ evaọ obaro. Makọ evaọ ikuigbe ọrọ okenọ Jesu ọ jọ ikpe ikpegbivẹ nọ tei te uviuwou riẹ a ro kpobọ etẹmpol, ẹme nọ Meri ọ ta Luk ọ wariẹ, orọnikọ ẹme Josẹf ho. Luk o fibae nọ eware nọ e jẹ via na kpobi i je duobọte Meri gaga. (Luk 2:​19, 34, 35, 48, 51) Evaọ obe Luk uzou ọsosuọ gbe orọ avivẹ, Luk ọ fodẹ Meri isia ikpegbivẹ rekọ isiasa ọvo ọ fodẹ Josẹf. Fikiere, eware nọ i kiekpahe Josẹf Matiu ọ mai kere kpahe, Luk kọ enọ i kiekpahe Meri.

Epọvo na re, oware nọ Matiu avọ Luk a kere kpahe uyẹ Jesu u wo ohẹriẹ. Uyẹ Josẹf oye Matiu o kere kpahe ro dhesẹ nọ Jesu o gine wo udu nọ ọ rẹ rọ keria agbara-uvie Devidi, nọ orọnọ Josẹf ọ jọ ọsẹ riẹ evaọ otọakpọ na. Fikieme? Keme nọ a te kele iei no umuo Solomọn ọmọ Devidi ze, ma rẹ ruẹ nọ uyẹ Devidi oye Josẹf o no ze. (Mat. 1:​6, 16) Rekọ uyẹ Meri oye Luk o kere kpahe ro dhesẹ nọ Jesu ginọ ọmọ Devidi “ọnọ a yẹ wọhọ ohwo-akpọ,” fikiere o wo udu nọ rẹ rọ keria agbara-uvie Devidi. (Rom 1:3) Fikieme? Keme nọ a te kele iei no umuo Netan ọmọ Devidi ze, ma rẹ ruẹ nọ uyẹ Devidi oye Meri o no ze. (Luk 3:31) Rekọ nọ orọnọ Hilai họ ọsẹ Meri na, fikieme Luk ọ gbẹ rọ ta nọ Meri ọmọ Hilai ha? Keme abọ ezae a jẹ hai kele uyẹ ahwo no ze evaọ oke nọ u kpemu. Fikiere nọ Luk ọ fodẹ Josẹf je sei ọmọ Hilai, ahwo a riẹ nọ ọgọ Hilai ọye Luk o wo họ iroro.​—Luk 3:23.

Uyẹ Jesu nọ Matiu avọ Luk a kere kpahe na u dhesẹ vevẹ nọ ọye họ Mesaya nọ a ya eyaa riẹ na. Ahwo a tubẹ riẹ uyẹ Jesu nana te epanọ ahwo Farisi gbe Sadusi dede a sae rọ vro riẹ hẹ. Nẹnẹ, oware nọ Matiu avọ Luk a kere kpahe uyẹ Jesu u ru nọ ma ro fi ẹrọwọ họ Jesu je wo imuẹro inọ eyaa Ọghẹnẹ e rẹ seba erugba ha.