Uzou Avọ 13

Enọ I Zihe Ruọ Ilele Jesu

ONO họ odibo Ọghẹnẹ nọ ọ mai woma nọ ọ rria no?— Whọ ta gba, ọye họ Jesu Kristi. Kọ who roro nnọ ma sae jọ wọhọ iẹe?— Ebaibol na e ta nọ o fi oriruo nọ ma re lele họ otọ kẹ omai. Yọ o zizie omai re ma jọ ilele riẹ.

Kọ whọ riẹ oware nọ o gwọlọ re a jọ olele Jesu?— O gwọlọ eware buobu. Orọ ọsosuọ, ma re wuhrẹ mi ei. Rekọ oyena ovo u te he. Ma rẹ jẹ ghinẹ rọwo ẹme nọ ọ ta. Ma te ru ere, ma ti ru oware nọ ọ ta kẹ omai.

Ahwo buobu a rẹ ta nnọ a rọwo Jesu. Kọ who roro nnọ aikpobi na a ghinẹ rrọ ilele riẹ?— Ijo, ibuobu rai a rrọ ilele riẹ hẹ. A rẹ sai kpohọ ichọche. Rekọ ibuobu rai a re ghinẹ raha oke ro wuhrẹ kpahe oware nọ Jesu o wuhrẹ hẹ. Uzẹme, enọ i bi lele oriruo Jesu ọvo họ ilele riẹ.

Joma ta ẹme kpahe ahwo jọ nọ a jọ ilele Jesu okenọ ọ jọ ohwo evaọ otọakpọ. Ohwo jọ evaọ usu enọ e kaki zihe ruọ ilele riẹ họ Filip. Filip ọ tẹ nyae gwọlọ ogbẹnyusu riẹ Nataniẹl (ọnọ a re je se Batolomi), ọnọ whọ be ruẹ nọ ọ keria otọ ure na. Okenọ Nataniẹl o bru Jesu ze, Jesu ọ tẹ ta nọ: ‘Rri, nọ ohwo oruọzewọ, uvi ọmọ Izrẹl.’ U gbe Nataniẹl unu, fikiere ọ tẹ nọ nnọ: ‘Ẹvẹ whọ rọ riẹ omẹ?’

Jesu ọ tẹ ta nọ: ‘Taure Filip o te ti se owhẹ, okenọ whọ jọ otọ ure ifigi na, mẹ ruẹ owhẹ.’ Akpọ o gbe Nataniẹl unu inọ Jesu ọ riẹ uzedhe oria nọ ọ jọ, fikiere Nataniẹl ọ tẹ ta nọ: “Whẹ họ Ọmọ Ọghẹnẹ! Whẹ họ Ovie Izrẹl!”—Jọn 1:49.

Ẹdẹ nọ o kpemu na, amọfa a kake rehọ Filip gbe Nataniẹl zihe ruọ ilele Jesu no. Enana họ Andru gbe oniọvo riẹ Pita avọ Jọn gbe ẹsejọhọ Jemis, oniọvo Jọn. (Jọn 1:35-51) Rekọ u kri hi imane nana a te zihe kpohọ iruo okuori rai. Ẹdẹjọ nọ Jesu ọ jẹ nya evaọ akotọ Abade Galili, ọ tẹ ruẹ Pita avọ Andru nọ a bi fi ẹriri rai họ ame. Jesu ọ tẹ kpare unu se ai nọ: “Wha nya lele omẹ.”

Nọ ọ dina nya haro, Jesu ọ tẹ ruẹ Jemis avọ Jọn. A rrọ okọ kugbe ọsẹ rai, be rra ẹriri rai. Jesu o te je se ai re a lele iei. Eme whọ hai ru o hae jọnọ Jesu o se owhẹ? Kọ whọ hae te nwani lele iei ovavo?— Ezae nana e riẹ ohwo nọ Jesu ọ rrọ. A riẹ nọ Ọghẹnẹ o vi rie ze. Fikiere a tẹ nwane nya siọ iruo okuori rai ba je lele Jesu.—Matiu 4:18-22.

Okenọ ezae enana a zihe ruọ ilele Jesu no, kọ u dhesẹ nnọ no oke oye vrẹ oware uwoma ọvo a je ru?— Ijo. Whọ sae kareghẹhọ nọ ezae enana a tubẹ jẹ vravro kpahe ọnọ ọ mae jọ udevie rai rro. Rekọ a gaviezọ kẹ Jesu a tẹ jẹ gwọlọ nọ a re nwene. Otẹrọnọ ma rẹ gwọlọ nwene, ma rẹ sae jọ ilele Jesu re.

Jesu o zizie oghẹrẹ ahwo kpobi re a jọ ilele riẹ. Okejọ o jariẹ nọ ọmoha ọdafe jọ nọ ọ rrọ osu ọ nya bru Jesu ze jẹ nọ e epanọ ọ sai ro wo uzuazọ ebẹdẹ bẹdẹ. Okenọ osu ọdafe na ọ ta nọ o koko ijaje Ọghẹnẹ no anwọ emaha riẹ ze, Jesu o te zizie iei anọ: “Nyaze ti lele omẹ.” Kọ whọ riẹ oware nọ o via?—

Whaọ, okenọ ọzae na ọ ruẹ nọ re a jọ olele Jesu o rẹ rro vi re a jọ ọdafe, eva e were riẹ vievie he. O zihe ruọ olele Jesu hu keme o you ugho riẹ vi Ọghẹnẹ.—Luk 18:18-25.

Nọ Jesu ọ ta usiuwoma kẹle ukpe ovo gbe ubro no, ọ tẹ jọ usu ilele riẹ na salọ ahwo 12 re a jọ ikọ. Ikọ na yọ ahwo nọ o re vi kpohọ obọdẹ iruo. Kọ whọ riẹ edẹ rai?— Ma gwọlọ dao oma wuhrẹ edẹ rai. Jọ etenẹ rri ifoto rai, jẹ dao oma sọ whọ sai se edẹ rai. Whọ vẹ dao oma se edẹ rai uzuzou.

Uwhremu na, omọvo ikọ 12 na jọ o te ti yoma. Odẹ riẹ Judas Iskariọt. A tẹ te salọ olele ọfa re ọ jọ ukọ. Kọ whọ riẹ odẹ riẹ?— Odẹ riẹ họ Matayas. Uwhremu na Pọl avọ Banabas a zihe ruọ ikọ re, rekọ a jọ usu ikọ 12 na ha.—Iruẹru 1:23-26; 14:14.

Wọhọ epanọ ma jọ Uzou 1 obe nana wuhrẹ na, Jesu o wo isiuru kpahe emaha gaga. Fikieme o ro ru ere?— Keme ọ riẹ nọ a sai zihe ruọ ilele riẹ re. Evaọ uzẹme, emaha e sae ta ẹme evaọ edhere nọ ọ rẹ sai ru enọ e kpako no gaviezọ jẹ gwọlọ wuhrẹ kpahe Owuhrẹ Ologbo na viere.

Eyae buobu e jọ ilele Jesu re. Ejọ i lele i rie evaọ okenọ o je kpohọ ikpewho efa nyae ta usiuwoma. Meri Magdalin, Joana, gbe Suzana a ru ere. O sae jọnọ a je there emu kẹe jẹ fọrọ iwu riẹ.—Luk 8:1-3.

Kọ whọ gwọlọ jọ olele Jesu?— Kareghẹhọ, re ma rọ unu ta ọvo nnọ mai yọ omọvo ilele riẹ u re ru omai fihọ olele riẹ hẹ. Ma re ru wọhọ ilele riẹ evaọ oria kpobi nọ ma rrọ, orọnikọ okenọ ma te kpohọ iwuhrẹ Ileleikristi ọvo ho. Kọ whọ sai roro ku eria jọ nọ o jọ gwọlọ nọ ma re ru wọhọ ilele Jesu?—

E, ma sai ru ere eva obọ uwou. Rekọ oria ofa họ eva obọ isukulu. Oware nọ o rẹ thọrọ omai ẹro ho họ, re ma jọ emamọ olele Jesu, ma re ru epanọ o ru kẹdẹ kẹdẹ, makọ oria nọ ma rrọ kpobi.

Se kpahe oware nọ Ebaibol na e ta kpahe ilele Jesu eva Matiu 28:19, 20; Luk 6:13-16; Jọn 8:31, 32; gbe 1 Pita 2:21.

[Uwoho nọ o rrọ ẹwẹ-obe avọ 72]

Ono họ ọzae nana, kọ ẹvẹ o ro zihe ruọ olele Jesu?

[Uwoho nọ o rrọ ẹwẹ-obe avọ 73]

Amono Jesu o bi se re a jọ ilele riẹ?

[Uwoho nọ o rrọ ẹwẹ-obe avọ 75]

Pita

Andru

Jemis (oniọvo Jọn)

Jọn

Filip

Nataniẹl

Matiu

Tọmọs

Jemis (ọmọ Alfiọs)

Saimọn

Judas (ọnọ a re je se Tadiọs)

Judas Iskariọt

[Uwoho nọ o rrọ ẹwẹ-obe avọ 76]

Amono họ eyae enana nọ i fi obọ họ kẹ Jesu evaọ okenọ ọ jẹ ta usiuwoma na?

[Uwoho nọ o rrọ ẹwẹ-obe avọ 76]

Diẹse u fo nọ ma rẹ jọ ru wọhọ olele Jesu?