Terus Nduwé Harapan marang Yéhuwah

 1. Yéhuwah mènèhi harapan apa kanggo awaké dhéwé?

YÉHUWAH mènèhi awaké dhéwé harapan urip saklawasé. Kuwi luar biasa banget. Ana sing nduwé harapan bakal urip saklawasé ing swarga. (1 Kor. 15:50, 53) Sing liyané akèh-akèhé harapané ing bumi. (Why. 21:3, 4) Tapi ora soal nduwé harapan urip ing swarga utawa ing bumi, awaké dhéwé mesthi nganggep kuwi berharga banget.

 2. Kenapa awaké dhéwé isa yakin nèk harapané awaké dhéwé mesthi bakal kelakon?

² Ing Alkitab, kata ”berharap” kuwi maksudé ”ngentèni sesuatu sing apik sing bakal kelakon”. Awaké dhéwé nduwé harapan sing pasti merga kuwi asalé saka Yéhuwah. (Rm. 15:13) Awaké dhéwé ya wis ngerti apa waé janjiné Yéhuwah lan ngerti nèk Yéhuwah bakal nepati janjiné. (Wi. 23:19) Yéhuwah ora mung péngin nepati janjiné, tapi ya nduwé kuwasa bèn kabèh sing dijanjèkké isa kelakon. Dadi, harapané awaké dhéwé kuwi dudu sesuatu sing mungkin bakal kelakon, tapi kuwi mesthi bener-bener kelakon.

 3. Apa sing bakal dirembug ing artikel iki? (Mazmur 27:14)

³ Yéhuwah kuwi sayang karo awaké dhéwé. Yéhuwah ya péngin bèn awaké dhéwé bener-bener berharap karo Dhèwèké. (Wacanen Mazmur 27:14.) Nèk bener-bener berharap karo Yéhuwah lan percaya nèk harapané awaké dhéwé mesthi kelakon, awaké dhéwé mesthi isa tetep bahagia meskipun ngadhepi masalah. Ing artikel iki, awaké dhéwé bakal ngrembug apa manfaaté nèk terus nduwé harapan. Tapi, awaké dhéwé bakal ngrembug dhisik kenapa harapan isa dipadhakké kaya jangkar lan topi wesiné prajurit. Bar kuwi, awaké dhéwé bakal mbahas piyé carané bèn isa terus nduwé harapan.

 4. Kenapa harapan kuwi kaya jangkar? (Ibrani 6:19)

⁴ Ing suraté kanggo wong-wong Ibrani, Rasul Paulus madhakké harapan kuwi kaya jangkar. (Wacanen Ibrani 6:19.) Ing perjalanan utusan injilé, Paulus kerep numpak kapal. Dadi, dhèwèké ngerti gunané jangkar kuwi kanggo apa. Malah, dhèwèké tau ndelok dhéwé pas awak kapal ngedhunké jangkar pas ana badai. Para awak kapal biasané ngedhunké jangkar merga wedi nèk kapalé kandhas ing watu karang. (Kis. 27:29, 39-41) Kaya jangkar sing isa nggawé kapal ora hanyut, nèk nduwé harapan, awaké dhéwé isa tetep cedhak karo Yéhuwah meskipun ngadhepi masalah sing abot kaya badai. Awaké dhéwé isa yakin nèk mesthi isa ngadhepi masalah kuwi lan masalahé awaké dhéwé kuwi mesthi ya bakal rampung. Mbiyèn Yésus ya tau ngomong nèk murid-muridé bakal dianiaya. (Yoh. 15:20) Bèn isa terus setya, awaké dhéwé kudu ngrenungké harapan sing wis dijanjèkké Yéhuwah kanggo umaté.

 5. Meskipun ngerti nèk arep dipatèni, tapi merga nduwé harapan Yésus piyé?

⁵ Merga nduwé harapan, Yésus isa tetep setya meskipun dhèwèké ngerti nèk bakal dipatèni. Pas Péntakosta 33 M, Rasul Pétrus ngutip kata-kata saka Kitab Mazmur sing nggambarké nèk Yésus kuwi bener-bener percaya karo Yéhuwah. Rasul Pétrus ngomong soal Yésus, ”Aku bakal terus percaya karo Njenengan merga Njenengan ora bakal ninggalké aku ing Kuburan. Njenengan ya ora bakal ngejarké badané abdi-Mu sing setya dadi rusak. . . . Njenengan nggawé aku bahagia merga isa ana ing cedhak-Mu.” (Kis. 2:25-28; Mzm. 16:8-11) Mémang, Yésus ngerti nèk bakal mati. Tapi, Yésus ya ngerti nèk Yéhuwah bakal nguripké dhèwèké manèh. Pas kuwi kelakon, Yésus mesthi bakal bahagia banget merga isa bareng-bareng karo Bapaké manèh ing swarga.​—Ibr. 12:2, 3.

 6. Apa manfaaté merga Sedulur Leonard nduwé harapan?

⁶ Umaté Yéhuwah ya isa tetep kuwat pas ngadhepi masalah merga nduwé harapan. Contoné Sedulur Leonard Chinn saka Inggris. Pas Perang Donya I, dhèwèké dipenjara merga ora gelem dadi tentara. Selama rong sasi, dhèwèké dipenjara ing ruang khusus dhèwèkan. Bar kuwi, dhèwèké dikongkon kerja paksa. Sedulur Leonard kandha, ”Awaké dhéwé kudu tetep percaya karo Yéhuwah bèn isa tabah wektu ngadhepi masalah sing abot. Awaké dhéwé ya isa niru Yésus, para rasul, lan para nabi ing jaman mbiyèn. Terus, awaké dhéwé kudu ngéling-éling janjiné Yéhuwah ing Alkitab. Hasilé, awaké dhéwé isa terus nduwé harapan lan isa terus kuwat.” Dadi kanggoné Sedulur Leonard, harapan kuwi bener-bener kaya jangkar. Harapan kuwi ya isa dadi kaya jangkar kanggo awaké dhéwé.

 7. Wektu ngadhepi masalah, kok isa awaké dhéwé dadi luwih percaya karo Yéhuwah? (Roma 5:3-5; Yakobus 1:12)

⁷ Awaké dhéwé isa dadi luwih percaya karo Yéhuwah nèk tetep sabar wektu ngadhepi masalah lan ngrasakké dhéwé bantuané Yéhuwah. (Wacanen Roma 5:3-5; Yakobus 1:12.) Nèk dibandhingké karo mbiyèn pas pertama sinau Alkitab, rasa percayané awaké dhéwé karo Yéhuwah mesthi luwih kuwat. Ning, Sétan mesthi ora seneng. Sétan péngin awaké dhéwé mung mikirké masalah thok nganti akhiré dadi ora semangat nglayani Yéhuwah. Tapi nèk dibantu Yéhuwah, awaké dhéwé mesthi isa ngadhepi masalah apa waé.

 8. Kenapa harapan kuwi kaya topi wesi? (1 Tésalonika 5:8)

⁸ Ing Alkitab, harapan ya dipadhakké kaya topi wesi. (Wacanen 1 Tésalonika 5:8.) Prajurit nganggo topi wesi bèn sirahé tetep aman. Kaya prajurit kuwi, awaké dhéwé ya kudu nglindhungi pikirané awaké dhéwé bèn ora dipengaruhi Sétan. Sétan terus-terusan nyerang awaké dhéwé bèn awaké dhéwé nduwé pandhangan sing ora sesuai karo pathokané Alkitab. Kaya topi wesi sing nglindhungi sirahé prajurit, nèk nduwé harapan, awaké dhéwé ya isa tetep setya karo Yéhuwah.

 9. Apa akibaté nèk awaké dhéwé ora nduwé harapan?

⁹ Nèk terus mikirké harapan urip saklawasé, awaké dhéwé mesthi bakal ngati-ati wektu nggawé keputusan. Tapi, apa akibaté nèk ora mikirké manèh harapan urip saklawasé kuwi? Awaké dhéwé bakal mung mikirké kepentingané dhéwé lan akhiré ora percaya manèh karo harapan kuwi. Kuwi sing dialami wong Kristen ing Korintus. Ana sing akhiré ora percaya manèh karo janjiné Yéhuwah nèk wong mati bakal diuripké. (1 Kor. 15:12) Paulus ngomong nèk wong-wong sing ora percaya karo harapan kuwi mung urip kanggo seneng-seneng. (1 Kor. 15:32) Saiki akèh wong ya kaya ngono. Wong-wong kuwi mung péngin seneng-seneng thok. Tapi, awaké dhéwé percaya karo harapan urip saklawasé sing dijanjèkké Yéhuwah. Kaya prajurit sing terus nganggo topi wesi, awaké dhéwé ya kudu terus mikirké harapan kuwi. Nèk terus mikirké harapan urip saklawasé, awaké dhéwé ora bakal terpengaruh karo wong-wong umumé. Awaké dhéwé ya bakal ngati-ati bèn ora mikirké kepentingané dhéwé lan akhiré dadi ora cedhak manèh karo Yéhuwah.​—1 Kor. 15:33, 34.

10. Nèk terus mikirké harapan, awaké dhéwé ora bakal mikir piyé, lan kenapa?

¹⁰ Ana manèh manfaaté nèk terus mikirké harapan urip saklawasé. Awaké dhéwé mesthi bakal ngupaya nyenengké Yéhuwah. Awaké dhéwé ora bakal mikir nèk ora isa nyenengké Yéhuwah. Misalé ngéné, mungkin ana umaté Yéhuwah sing mikir, ’Aku ora pantes urip saklawasé. Aku ya ora mungkin isa nglakoni kabèh sing dikarepké Yéhuwah.’ Pikiran kaya ngono kuwi padha karo sing tau disebutké Èlifaz. Mbiyèn Èlifaz tau ngomong karo Ayub, ’Apa mungkin manungsa isa dianggep suci? Lha wong Gusti Allah waé ora percaya karo para malaékaté, malah swarga waé ya ora dianggep suci karo Gusti Allah.’ (Ayb. 15:14, 15) Kuwi pikiran sing salah. Sétan péngin awaké dhéwé mikir kaya ngono. Sétan ngerti nèk awaké dhéwé mikir kaya ngono, awaké dhéwé dadi ora percaya manèh karo harapan sing dijanjèkké Yéhuwah. Mula, aja gelem dipengaruhi karo pandhangan sing salah. Awaké dhéwé kudu terus mikirké janji-janjiné Yéhuwah. Yéhuwah bener-bener péngin awaké dhéwé urip saklawasé lan bakal mbantu awaké dhéwé.​—1 Tim. 2:3, 4.

11. Kenapa awaké dhéwé kudu sabar ngentèni Yéhuwah nepati kabèh janjiné?

¹¹ Isa terus nduwé harapan kuwi ora gampang. Kadhang, awaké dhéwé ora sabar ngentèni Yéhuwah nepati janji-janjiné. Tapi, Yéhuwah kuwi ana nganti saklawasé. Dadi nèk kanggoné awaké dhéwé wis suwé, kanggoné Yéhuwah kuwi lagi sedhéla. (2 Ptr. 3:8, 9) Ning, Yéhuwah mesthi bakal nepati janjiné pas ing wektuné, meskipun kuwi ora sesuai karo sing awaké dhéwé harapké. Dadi, piyé carané bèn awaké dhéwé isa terus sabar ngentèni Yéhuwah nepati kabèh janjiné?​—Yak. 5:7, 8.

12. Kenapa awaké dhéwé isa terus nduwé harapan nèk percaya Yéhuwah kuwi ana? (Ibrani 11:1, 6)

¹² Harapan kuwi asalé saka Yéhuwah. Mula, awaké dhéwé isa terus nduwé harapan nèk cedhak karo Yéhuwah. Awaké dhéwé kudu percaya nèk Yéhuwah kuwi bener-bener ana lan nèk Dhèwèké ”mènèhi upah marang wong-wong sing tenanan nggolèki Dhèwèké”. (Wacanen Ibrani 11:1, 6.) Nèk tenanan percaya Yéhuwah kuwi ana, awaké dhéwé mesthi bakal semakin yakin nèk Yéhuwah isa nepati kabèh janjiné. Tapi, piyé carané bèn isa tetep cedhak karo Yéhuwah lan terus nduwé harapan?

13. Piyé carané bèn isa cedhak karo Yéhuwah?

¹³ Ndonga lan maca Alkitab. Mémang, awaké dhéwé ora isa ndelok Gusti Allah. Mula bèn tetep cedhak karo Yéhuwah, awaké dhéwé isa ndonga lan maca Alkitab. Pas ndonga, awaké dhéwé kaya lagi omong-omongan karo Yéhuwah, lan Yéhuwah mesthi ngrungokké dongané awaké dhéwé. (Yér. 29:11, 12) Terus pas maca Alkitab lan ngrenungké isiné, awaké dhéwé kaya lagi ngrungokké Yéhuwah. Pas maca piyé Yéhuwah mbantu umaté jaman mbiyèn, harapané awaké dhéwé mesthi dadi saya kuwat. Ing Alkitab ditulis, ”Kabèh ayat sing ditulis mbiyèn ditulis kanggo mulang awaké dhéwé. Awaké dhéwé nduwé harapan merga ayat-ayat kuwi mbantu awaké dhéwé bèn sabar lan mènèhi awaké dhéwé penghiburan.”​—Rm. 15:4.

14. Apa manfaaté nèk ngrenungké carané Yéhuwah nepati janjiné karo abdiné jaman mbiyèn?

¹⁴ Ngrenungké piyé Yéhuwah wis nepati janjiné. Misalé, gatèkna kisahé Abraham karo Sara. Yéhuwah janji nèk Abraham karo Sara bakal nduwé anak. (PD. 18:10) Tapi, wong loro kuwi wis terlalu tuwa kanggo nduwé anak. Terus, Abraham piyé? Abraham ”tetep nduwé harapan lan iman nèk dhèwèké bakal dadi bapaké akèh bangsa”. (Rm. 4:18) Meskipun kétoké mustahil, Abraham yakin nèk Yéhuwah mesthi bakal nepati janjiné. (Rm. 4:19-21) Akhiré, wong loro kuwi bener-bener nduwé anak. Nèk ngrenungké kisahé Abraham, awaké dhéwé isa semakin yakin nèk Yéhuwah mesthi nepati janjiné, meskipun kanggoné manungsa kuwi kétoké mustahil.

15. Apa manfaaté nèk ngrenungké piyé Yéhuwah wis nepati janjiné kanggo awaké dhéwé?

¹⁵ Ngrenungké piyé Yéhuwah wis nepati janjiné kanggo njenengan. Njenengan mesthi wis ngrasakké dhéwé piyé Yéhuwah nepati janjiné. Misalé, Yésus ngomong nèk Yéhuwah bakal nyukupi kebutuhané umaté. (Mat. 6:32, 33) Terus, Yésus ya tau kandha nèk Yéhuwah bakal mènèhi roh suciné kanggo wong-wong sing njaluk marang Yéhuwah. (Luk. 11:13) Yéhuwah wis nepati janji-janjiné kuwi. Njenengan ya isa ngrenungké Yéhuwah wis nepati janjiné sing endi manèh kanggo njenengan. Misalé, Yéhuwah janji nèk bakal ngapura, menghibur, lan mènèhi njenengan tuntunan. (Mat. 6:14; 24:45; 2 Kor. 1:3) Nèk ngrenungké kuwi kabèh, awaké dhéwé mesthi dadi tambah yakin nèk sukmbèn Yéhuwah bakal nepati kabèh janjiné.

16. Kenapa harapan isa urip saklawasé kuwi luar biasa?

¹⁶ Harapan isa urip saklawasé kuwi luar biasa banget. Awaké dhéwé mesthi péngin kuwi ndang kelakon. Harapan kuwi isa kaya jangkar. Pas ana masalah, dianiaya, utawa diancam arep dipatèni, awaké dhéwé isa tetep kuwat merga nduwé harapan. Harapan kuwi ya kaya topi wesi. Nèk terus mikirké harapan, awaké dhéwé isa nolak kepénginan sing salah lan berbuat sing bener. Awaké dhéwé ya isa dadi luwih cedhak karo Yéhuwah lan ngerti nèk Yéhuwah sayang banget karo awaké dhéwé. Kuwi sebabé, awaké dhéwé kudu terus yakin karo harapané awaké dhéwé.

17. Kenapa harapané awaké dhéwé nggawé bahagia?

¹⁷ Rasul Paulus kandha, ”Kowé kudu ngrasa bahagia merga harapanmu.” (Rm. 12:12) Paulus isa ngrasa bahagia merga dhèwèké yakin bakal urip saklawasé ing swarga nèk tetep setya. Awaké dhéwé ya isa bahagia merga harapané awaké dhéwé. Awaké dhéwé yakin nèk Yéhuwah mesthi bakal nepati kabèh janjiné. Sing nulis Mazmur kandha, ’Wong sing berharap marang Yéhuwah Gusti Allahé kuwi bahagia. Dhèwèké mesthi bakal terus setya.’​—Mzm. 146:5, 6.