135 ადიდეთ იაჰი!
ადიდეთ იეჰოვას სახელი,
ხოტბა შეასხით მას, იეჰოვას მსახურნო,+
2 თქვენ, ვინც მსახურობთ იეჰოვას სახლში,
ჩვენი ღვთის სახლის ეზოებში!+
3 ადიდეთ იაჰი, რადგან კარგია იეჰოვა!+
უგალობეთ მის სახელს, რადგან საამურია ის!
4 იაჰმა აირჩია იაკობი,
გამოარჩია ისრაელი და თავის საკუთრებად აქცია.+
5 კარგად ვიცი, რომ დიდებულია იეჰოვა,
ყველა სხვა ღმერთზე აღმატებულია ჩვენი უფალი.+
6 თუკი რამეს მოისურვებს იეჰოვა, აკეთებს კიდეც+
ცაში თუ დედამიწაზე, ზღვაში თუ მის სიღრმეებში.
7 ღრუბლები ამოჰყავს დედამიწის კიდეებიდან,
ელვას უხმობს საწვიმრად
და ქარი გამოჰყავს საცავებიდან.+
8 მან დახოცა ეგვიპტის პირმშოები,
კაციცა და პირუტყვიც.+
9 სასწაულები მოახდინა ეგვიპტეში,+
დასაჯა ფარაონი და ყველა მისი მსახური.+
10 მან დასცა მრავალი ერი+
და დახოცა ძლიერი მეფეები:+
11 ამორეველთა მეფე სიხონი,+
ბაშანის მეფე ოგი+ და ქანაანის ყველა სამეფო.
12 სამკვიდროდ მისცა მათი მიწა თავის ხალხს,
სამკვიდროდ მისცა ისრაელს.+
13 იეჰოვა, მარადიულია შენი სახელი.
იეჰოვა, თაობიდან თაობაშია შენი დიდება.+
14 იეჰოვა გამოესარჩლება თავის ხალხს+
და შეიბრალებს თავის მსახურებს.+
15 ხალხთა კერპები ვერცხლი და ოქროა,
ადამიანის ნახელავი:+
16 პირი აქვთ, მაგრამ ვერ ლაპარაკობენ,+
თვალები აქვთ, მაგრამ ვერ ხედავენ,
17 ყურები აქვთ, მაგრამ არ ესმით,
სული არ უდგათ პირში.+
18 მათ დაემსგავსებიან მათი გამკეთებლები+
და ყველა, ვინც მათზეა მინდობილი.+
19 ისრაელო, ადიდე იეჰოვა!
აარონის შთამომავლებო, ადიდეთ იეჰოვა!
20 ლევის შთამომავლებო, ადიდეთ იეჰოვა!+
იეჰოვას მოშიშნო, ადიდეთ იეჰოვა!
21 დაე იდიდოს სიონიდან იეჰოვამ,+
იერუსალიმში დამკვიდრებულმა!+
ადიდეთ იაჰი!+