გამოსვლა

14 იეჰოვამ მოსეს უთხრა: 2 „გადაეცი ისრაელებს, რომ მობრუნდნენ და დაბანაკდნენ ფი-ჰახიროთთან მიგდოლსა და ზღვას შორის, საიდანაც ბაალ-ცეფონი მოჩანს;+ იქ დაბანაკდით, ზღვასთან. 3 ფარაონი ისრაელებზე იტყვის, დაბნეულები დაეხეტებიან, უდაბნომ მოიმწყვდიაო. 4 გავაჯიუტებ* ფარაონს+ და დაედევნება მათ. განვდიდდები მისი და მთელ მისი ჯარის დამარცხებით,+ და გაიგებენ ეგვიპტელები, რომ მე ვარ იეჰოვა“.+ ასეც მოიქცნენ ისინი.

5 შეატყობინეს ეგვიპტის მეფეს, ხალხი გაიქცაო. ინანეს ფარაონმა და მისმა მსახურებმა, ხალხი რომ გაუშვეს,+ და თქვეს: „ეს რა გავაკეთეთ?! როგორ გავათავისუფლეთ ისრაელი მონობიდან?!“ 6 მოამზადა ფარაონმა საომარი ეტლები და თან წაიყვანა თავისი ხალხი.+ 7 წაიყვანა 600 რჩეული ეტლიც და რაც კი ეტლი იყო ეგვიპტეში, და თითოეულზე მეომრები დასხა. 8 გააჯიუტა იეჰოვამ ფარაონი, ეგვიპტის მეფე, და დაედევნა ფარაონი ისრაელებს, რომლებიც თავაწეულნი მიდიოდნენ.+ 9 მისდევდნენ ისრაელებს ეგვიპტელები;+ უახლოვდებოდნენ მათ ფარაონის ეტლები, მისი მხედრები და ჯარი; ამ დროს ისრაელები ზღვასთან ბანაკდებოდნენ, ფი-ჰახიროთთან, საიდანაც ბაალ-ცეფონი მოჩანს.

10 უფრო რომ მიუახლოვდა მათ ფარაონი, გაიხედეს ისრაელებმა და დაინახეს, რომ მისდევდნენ ეგვიპტელები. შეშინდნენ ისრაელები და შეღაღადეს იეჰოვას.+ 11 უთხრეს მოსეს: „დასამარხი ადგილები ეგვიპტეში არ იყო, უდაბნოში რომ არ წამოგეყვანეთ დასახოცად?!+ ეს რა გაგვიკეთე, რატომ გამოგვიყვანე ეგვიპტიდან?! 12 ხომ გეუბნებოდით ეგვიპტეში, თავი დაგვანებე, ეგვიპტელების მსახურები ვიქნებითო?! გვირჩევნია, ეგვიპტელებს ვემსახუროთ, ვიდრე უდაბნოში დავიხოცოთ“.+ 13 მოსემ ხალხს მიუგო: „ნუ გეშინიათ.+ მტკიცედ იდექით და იხილავთ, როგორ გიხსნით დღეს იეჰოვა.+ ეგვიპტელებს, რომლებსაც დღეს ხედავთ, ვეღარასოდეს იხილავთ.+ 14 იეჰოვა იბრძოლებს თქვენთვის,+ თქვენ კი უშფოთველად იქნებით“.

15 იეჰოვამ მოსეს უთხრა: „მე რატომ შემომღაღადებ? მიდი ისრაელებს უთხარი, რომ დაიძრან. 16 ასწიე ჯოხი, გაიწოდე ზღვისკენ და გააპე, რომ ისრაელებმა შუა ზღვაში ხმელეთზე გაიარონ. 17 მე კი გავაჯიუტებ ეგვიპტელებს და დაგედევნებიან. გავანადგურებ ფარაონის ჯარს, საომარ ეტლებსა და მხედრებს და მისი დამარცხებით განვდიდდები.+ 18 გაიგებენ ეგვიპტელები, რომ მე ვარ იეჰოვა, როცა მის საომარ ეტლებსა და მხედრებს გავანადგურებ და მისი დამარცხებით განვდიდდები.+

19 ჭეშმარიტი ღვთის ანგელოზმა,+ რომელიც ისრაელის ბანაკს მიუძღოდა, უკან გადაინაცვლა; უკან გადაინაცვლა ღრუბლის სვეტმაც; მანამდე მათ წინ იყო და ახლა მათ უკან გაჩერდა.+ 20 ჩადგა ის ეგვიპტელთა და ისრაელთა ბანაკებს შორის.+ ღრუბლის ერთ მხარეს წყვდიადი იყო, მეორე მხარეს კი — სინათლე.+ მთელი ღამე ისე გავიდა, რომ ეგვიპტელთა ბანაკი ისრაელთა ბანაკს ვერ მიუახლოვდა.

21 გაიწოდა მოსემ ხელი ზღვისკენ.+ იეჰოვა აღმოსავლეთის ძლიერი ქარით მთელი ღამე დევნიდა წყალს, რომ ზღვის ფსკერი გამშრალიყო,+ და გაიპო წყალი.+ 22 გაიარეს ისრაელებმა შუა ზღვაში ხმელეთზე,+ მარჯვნივ და მარცხნივ კედლებად აღმართულ წყლებს შორის.+ 23 დაედევნენ ეგვიპტელები; ფარაონის მხედრები ცხენებითა და საომარი ეტლებით შუა ზღვაში შეჰყვნენ მათ.+ 24 დილის გუშაგობისას* დახედა იეჰოვამ ცეცხლისა და ღრუბლის სვეტიდან+ ეგვიპტელთა ბანაკს და თავგზა აუბნია მათ. 25 აძრობდა ბორბლებს მათ ეტლებს და უჭირდათ სვლა. ეგვიპტელები ამბობდნენ, გავეცალოთ ისრაელს, იეჰოვა იბრძვის მათთვის ეგვიპტელთა წინააღმდეგო.+

26 შემდეგ იეჰოვამ მოსეს უთხრა: „გაიწოდე ხელი ზღვისკენ, რომ ეგვიპტელებს, მათ საომარ ეტლებსა და მხედრებს წყალი თავზე ჩამოექცეთ“. 27 მოსემაც გაიწოდა ხელი ზღვისკენ და დილით წყალი თავის ადგილს დაუბრუნდა. გაურბოდნენ ეგვიპტელები წყალს, მაგრამ იეჰოვამ ისინი შუა ზღვაში მოაქცია.+ 28 დაფარა წყალმა ფარაონის საომარი ეტლები, მხედრები, ფარაონის მთელი ჯარი, ყველა, ვინც მათ შეჰყვა ზღვაში.+ ცოცხალი არავინ გადარჩენილა.+

29 ისრაელებმა შუა ზღვის ფსკერზე, ხმელეთზე გაიარეს;+ მარჯვნივ და მარცხნივ წყალი კედლებად იყო აღმართული.+ 30 ასე იხსნა იეჰოვამ ისრაელი იმ დღეს ეგვიპტელთა ხელიდან.+ ისრაელებმა ზღვის ნაპირზე დახოცილი ეგვიპტელები დაინახეს. 31 მათ იეჰოვას დიდი ძალაც იხილეს, რომელიც მან ეგვიპტელთა წინააღმდეგ გამოიყენა. შეეშინდა ხალხს იეჰოვასი; ირწმუნეს იეჰოვა და მისი მსახური მოსე.+