რუთი

4 გავიდა ბოაზი ქალაქის კარიბჭესთან+ და იქ დაჯდა. გამოიარა გამომსყიდველმა, რომელიც მან რუთთან ახსენა.+ ამ კაცს, რომლის სახელი ხსენების ღირსიც არაა, ბოაზმა დაუძახა: „მოდი, დაჯექი!“ ისიც მივიდა და დაჯდა. 2 მოუხმო ბოაზმა ქალაქის ათ უხუცესს+ და უთხრა: „დასხედით!“ ისინიც დასხდნენ.

3 მან გამომსყიდველს+ უთხრა: „მოაბიდან დაბრუნებული ნაომი+ ჩვენი ძმის, ელიმელექის,+ მიწის ნაკვეთს ყიდის. 4 ვიფიქრე, შევატყობინებ და ვეტყვი-მეთქი, იყიდე ხალხისა და უხუცესების თანდასწრებით.+ თუ გამოისყიდი, გამოისყიდე, მაგრამ, თუ არ გამოისყიდი, მითხარი, რომ ვიცოდე, რადგან შენ შემდეგ მე ვარ გამომსყიდველი“. მან მიუგო: „გამოვისყიდი“.+ 5 მაშინ ბოაზმა უთხრა: „გახსოვდეს, რომ მიწა, რომელსაც ნაომისგან იყიდი, მოაბელი რუთისაცაა, რომელსაც ქმარი ჰყავს მკვდარი. ამგვარად გარდაცვლილის მემკვიდრეობა კვლავ მის სახელზე დარჩება“.+ 6 გამომსყიდველმა მიუგო: „ვერ გამოვისყიდი, რადგან შეიძლება ვიზარალო*. ჩემ მაგივრად შენ ისარგებლე გამოსყიდვის უფლებით და გამოისყიდე, რადგან მე ვერ გამოვისყიდი“.

7 უწინ ასეთი ჩვეულება იყო ისრაელში: ქონების გადაცემის ან გამოსყიდვის უფლების დასადასტურებლად, კაცს სანდალი უნდა გაეხადა+ და მეორე მხარისთვის მიეცა. ეს შეთანხმების ნიშანი იყო ისრაელში. 8 ასე რომ, გამომსყიდველმა ბოაზს უთხრა: „შენ გამოისყიდე“, და სანდალი გაიხადა. 9 ბოაზმა უხუცესებსა და ხალხს მიმართა: „თქვენ მოწმენი ხართ+ დღეს, რომ მე ვყიდულობ ნაომისგან ყველაფერს, რაც ელიმელექს, ქილიონსა და მახლონს ეკუთვნოდათ! 10 მახლონის ცოლს, მოაბელ რუთსაც, მე გამოვისყიდი და ცოლად შევირთავ, რათა გარდაცვლილის მემკვიდრეობა კვლავ მისი სახელით იწოდებოდეს+ და მისი სახელი კვლავ იხსენიებოდეს მის მოძმეებს შორის და ქალაქის კარიბჭესთან! თქვენ ამის მოწმენი ხართ დღეს!“+

11 კარიბჭესთან მყოფმა ხალხმა და უხუცესებმა მიუგეს: „მოწმენი ვართ! აკურთხოს იეჰოვამ ქალი, რომელიც შენს სახლში შემოდის! იყოს ის რახელივით და ლეასავით, რომლებმაც გაამრავლეს ისრაელი!+ ხელი მოგემართოს ეფრათაში+ და სახელი მოგეხვეჭოს ბეთლემში!+ 12 იეჰოვამ მოგცეს მაგ ყმაწვილქალისგან შთამომავალი და შენი სახლეულობა ფერეცის+ სახლეულობასავით გახდეს, თამარმა რომ უშვა იუდას!“+

13 მოიყვანა ბოაზმა რუთი ცოლად და დაწვა მასთან. აკურთხა რუთი იეჰოვამ, დაორსულდა იგი და გააჩინა ვაჟი. 14 უთხრეს ქალებმა ნაომის: „დიდება იეჰოვას, რომელმაც არ დაგტოვა გამომსყიდველის გარეშე! სახელი გაითქვას ყრმამ ისრაელში! 15 მან შთაგბერა ახალი სიცოცხლე და ის იზრუნებს შენზე სიბერეში, რადგან იგი შენმა მოყვარულმა რძალმა გააჩინა,+ შვიდ ვაჟს რომ გირჩევნია!“ 16 ნაომიმ აიყვანა ბავშვი და გულში ჩაიკრა. ის გახდა მისი გამზრდელი. 17 მეზობელმა ქალებმა ბავშვს ობედი+ დაარქვეს და თქვეს, ნაომის ვაჟი შეეძინაო. ის გახდა დავითის მამის, იესეს,+ მამა.

18 ესენი არიან ფერეცის+ შთამომავლები: ფერეცს შეეძინა ხეცრონი,+ 19 ხეცრონს — რამი, რამს — ამინადაბი,+ 20 ამინადაბს+ — ნახშონი, ნახშონს — სალმონი, 21 სალმონს — ბოაზი, ბოაზს — ობედი, 22 ობედს — იესე,+ იესეს — დავითი.+