სწამს ყველა სასულიერო პირს ის, რასაც ასწავლის?

ქალს ქმარი ეს-ესაა გარდაეცვალა. მღვდელი ეუბნება, რომ მისი ქმარი არც იმდენად კარგი იყო, რომ პირდაპირ ზეცაში ასულიყო და არც იმდენად ცუდი, რომ ჯოჯოხეთის ცეცხლში მოხვედრილიყო. ასე რომ, მღვდლის განმარტების თანახმად, ის მანამდე უნდა იტანჯოს, სანამ ზეცაში მოხვედრის უფლებას მიიღებს. ქალი მღვდელს ფულს აძლევს, რათა ილოცოს, რომ მისი ქმარი რაც შეიძლება ჩქარა გათავისუფლდეს განსაწმენდელიდან. ქვრივი კმაყოფილია და ფიქრობს, რომ მღვდელსაც მასსავით გულწრფელად სწამს.

როგორ ფიქრობთ, გულს გაუტეხდა ქვრივს იმის გაგება, რომ მის მოძღვარს სინამდვილეში არ სწამდა სიკვდილის შემდეგ დასჯის არსებობა? მრავალს აწუხებს ის, რომ სასულიერო პირებს ბევრი რამ, რასაც თვითონ ასწავლიან, არ სწამთ. „ნეშენელ კათოლიკ რეპორტერმა“ იმის შესახებ, რასაც „სასულიერო პირთა სექსზე უარესი პრობლემა“ უწოდა, აღნიშნა: „საერთოდ, მრავალ მღვდელს აღარ სწამს ღვთის არსებობა ან დოგმატი დაჯილდოების ან დასჯის შესახებ, ან მკვდრეთით აღდგომა. . . და ეს ურწმუნოება სასულიერო პირთა აზროვნების განუყოფელ ნაწილად იქცა, რაც ჩამოწოლილი შავი სქელი ნისლის მსგავსია“.

სხვა ეკლესიებიც მსგავს რთულ მდგომარეობაში არიან. ინგლისის ეკლესიის სამრევლოს მღვდელთა გამოკითხვის შედეგად გამოვლინდა, რომ მრავალს „არ სწამს ტრადიციული ქრისტიანული რწმენის ისეთი ძირითადი საკითხები, როგორიცაა: ქალწულის მიერ შობა, იესოს სასწაულები და მესიის მეორედ მოსვლა“, — აღნიშნავს ავსტრალიის „კანბერა ტაიმზი“.

რელიგიათმცოდნე ჯორჯ. რ. პლეგენზს აინტერესებდა, თუ როგორ შეეძლო მღვდელს, სუფთა სინდისით წარმოეთქვა სარწმუნოების სიმბოლო, რომელიც თვითონ არ სწამდა. ამაზე ერთმა მსახურმა უთხრა, რომ ის, უბრალოდ, ცვლიდა სიმბოლოს პირველ სიტყვას „მწამს“. მან თქვა: «სიმბოლოს წარმოთქმას შემდეგი სიტყვებით ვიწყებ: „მათ სწამთ ერთი ღმერთი, მამა ყოვლისა მპყრობელი. . .“. პლეგენზმა ასეთ თვალთმაქცობას „ქვეყანაში არსებული უდიდესი თაღლითობა უწოდა“.

სამწუხაროდ, მღვდლების ასეთმა ურწმუნოებამ და თვალთმაქცობამ მრავალს საერთოდ დაუკარგა რელიგიისადმი ინტერესი. მაგრამ მხოლოდ ამით არ ამოიწურება დღევანდელი რელიგიის აღმაშფოთებელი მხარეები. ეკლესიაში რეგულარულად მოსიარულეთა უმეტესობას ასწავლეს, რომ ბიბლია ღვთის სიტყვაა. განა არ გააოცებდა მათ იმის გაგება, რომ ზოგი დოგმატი, რომელიც უკვე დიდი ხანია ეკლესიაში დამკვიდრებული, არაბიბლიურია? მომდევნო სტატიაში განვიხილავთ ამის ერთ-ერთ მაგალითს.