რას შეიცავს ეს წიგნი

პიროვნება, რომელიც პირველად შედის ბიბლიოთეკაში, შეიძლება ჩამწკრივებულმა წიგნებმა დააბნიოს. მაგრამ ცოტაც რომ აუხსნან, თუ რა პრინციპითაა ისინი დალაგებული, მალე იპოვის საჭირო წიგნებს. ამის მსგავსად, რამეს მოძებნა ბიბლიაში მაშინ გაგიადვილდებათ, როცა გესმით, თუ როგორაა შედგენილი მისი შინაარსი.

სიტყვა „ბიბლია“ წარმოიშვა ბერძნული სიტყვიდან „ბი·ბლიʹა“, რაც „პაპირუსის გრაგნილებს“ ან „წიგნებს“ ნიშნავდა¹. სინამდვილეში, ბიბლია არის 66 ცალკეული წიგნის კრებული, ბიბლიოთეკა, და მათი დაწერა გრძელდებოდა 1600 წელს, ძვ. წ. 1513 წლიდან დაახლოებით ახ. წ. 98 წლის ჩათვლით.

პირველი 39 წიგნი, ბიბლიის შინაარსის დაახლოებით სამი მეოთხედი, ცნობილია როგორც ებრაული წერილები, ვინაიდან ისინი ძირითადად ამ ენაზე დაიწერა. ეს წიგნები, ჩვეულებრივ, სამ ნაწილად შეიძლება დაიყოს: 1) ისტორიული — „დაბადებიდან“ „ესთერის“ ჩათვლით, 17 წიგნი; 2) პოეტური — „იობიდან“ „ქებათა-ქება სოლომონისას“ ჩათვლით, 5 წიგნი, და 3) წინასწარმეტყველური — „ესაიადან“ „მალაქიას“ ჩათვლით, 17 წიგნი. ებრაულ წერილებში განხილულია დედამიწისა და კაცობრიობის ადრინდელი ისტორია, ასევე ძველი ისრაელი ერის ისტორია მისი წარმოშობიდან ძვ. წ. მე-5 საუკუნის ჩათვლით.

დანარჩენი 27 წიგნი ცნობილია ქრისტიანულ-ბერძნულ წერილებად, რადგან ისინი დაიწერა იმ დროისთვის საერთაშორისო ბერძნულ ენაზე. ისინი ძირითადად თემების მიხედვითაა დაწყობილი: 1) 5 ისტორიული წიგნი — სახარებები და „საქმეები“; 2) 21 წერილი და 3) „გამოცხადება“. ქრისტიანულ-ბერძნული წერილები ყურადღებას ამახვილებს იესო ქრისტესა და პირველ საუკუნეში მცხოვრები მისი მოწაფეების სწავლებებსა და საქმეებზე.