რატომ არის სასარგებლო ბიბლიური პრინციპებით ცხოვრება?

ჩვენი შემოქმედი ჩვენზე ბევრად ბრძენია. როგორც მოსიყვარულე მამა, ის ზრუნავს ჩვენზე. ღმერთს ისე არ შევუქმნივართ, რომ მისგან დამოუკიდებლად შევძლოთ ცხოვრება (იერემია 10:23). როგორც ბავშვებს სჭირდებათ მშობლების დახმარება, ჩვენც ისე გვჭირდება ღვთის ხელმძღვანელობა (ესაია 48:17, 18). ღმერთი ბიბლიის მეშვეობით გვხელმძღვანელობს. ეს წიგნი ნამდვილად დიდი საჩუქარია ღვთისგან. წაიკითხეთ 2 ტიმოთეს 3:16.

იეჰოვას კანონები და პრინციპები დღესვე საუკეთესოდ წარმართავს ჩვენს ცხოვრებას და მარადიული სიცოცხლისკენ მივყავართ. რადგან ღმერთმა შეგვქმნა, სწორი და სამართლიანია, რომ მის ხელმძღვანელობას მივყვეთ და მადლიერები ვიყოთ ამისთვის. წაიკითხეთ ფსალმუნის 19:7, 11; გამოცხადების 4:11.

ძირითადი ბიბლიური პრინციპები გვიჩვენებს, თუ როგორ ვიცხოვროთ ღვთის მოსაწონად, მაგრამ ბიბლიაში ასევე ჩაწერილია კანონები, რომლებიც გვასწავლის, როგორ მოვიქცეთ კონკრეტულ სიტუაციებში (კანონი 22:8). გამჭრიახობაა საჭირო, რომ ადამიანმა გაიგოს, როგორ გამოიყენოს ესა თუ ის პრინციპი ამა თუ იმ შემთხვევაში (იგავები 2:10—12). მაგალითად, ბიბლიიდან ვიგებთ, რომ სიცოცხლე დიდი ძღვენია ღვთისგან. ამის ცოდნა გვეხმარება გონივრულად მოვიქცეთ სამსახურში, სახლში თუ მგზავრობისას და საფრთხეში არ ჩავაგდოთ საკუთარი თუ სხვების სიცოცხლე. წაიკითხეთ ფსალმუნის 100:3.

უამრავი პრინციპიდან იესომ ორი განსაკუთრებულად გამოყო. პირველი ეხება იმას, თუ რა უნდა იყოს ადამიანის ცხოვრების მიზანი — იცნობდეს ღმერთს, უყვარდეს ის და ერთგულად ემსახურებოდეს მას. ამ პრინციპს ყოველი გადაწყვეტილების მიღებისას უნდა ვითვალისწინებდეთ (იგავები 3:6). ისინი, ვინც მის თანახმად ცხოვრობენ, ღმერთთან ახლო ურთიერთობით, ნამდვილი ბედნიერებითა და მარადიული სიცოცხლით დატკბებიან. წაიკითხეთ მათეს 22:36—38.

მეორე პრინციპი კი სხვებთან მშვიდობიანი ურთიერთობის დამყარებაში გვეხმარება (1 კორინთელები 13:4—7). ამ პრინციპის თანახმად ცხოვრება ნიშნავს, ადამიანებს ისე მოვექცეთ, როგორც ღმერთი ექცევა. წაიკითხეთ მათეს 7:12; 22:39, 40.

ბიბლიური პრინციპები ოჯახებს ასწავლის, როგორ გაერთიანდნენ სიყვარულით (კოლოსელები 3:12—14). ბიბლიაში ასევე ჩაწერილია სხვა პრინციპი, რომელიც ეხმარება წყვილებს, თავიანთი ქორწინება მუდმივ კავშირად აქციონ. წაიკითხეთ დაბადების 2:24.

ბიბლიური პრინციპების გათვალისწინება დაგვეხმარება, მატერიალურად უზრუნველვყოთ საკუთარი თავი და ოჯახი და გვქონდეს შინაგანი სიმშვიდე. მაგალითად, დამსაქმებლები ხშირად ისეთ თანამშრომლებს ეძებენ, რომლებიც ბიბლიაში ჩაწერილი პატიოსნებისა და შრომისმოყვარეობის პრინციპებით ცხოვრობენ (იგავები 10:4, 26; ებრაელები 13:18). ღვთის სიტყვიდან იმასაც ვსწავლობთ, რომ კმაყოფილები ვიყოთ იმ აუცილებლით, რაც გვაქვს და მატერიალურ საგნებზე მეტად ღმერთთან ურთიერთობა დავაფასოთ. წაიკითხეთ მათეს 6:24, 25, 33; 1 ტიმოთეს 6:8—10.

ბიბლიური პრინციპების გათვალისწინება კარგი ჯანმრთელობის შენარჩუნებაშიც გვეხმარება (იგავები 14:30; 22:24, 25). მაგალითად, გადამეტებულ სმასთან დაკავშირებით ღვთის კანონის გათვალისწინება დაგვიცავს სასიკვდილო დაავადებებისა და უბედური შემთხვევებისგან (იგავები 23:20). ღმერთი არ კრძალავს ალკოჰოლური სასმელების დალევას, თუმცა აქაც გარკვეული ზღვარი უნდა დაადგინოს ადამიანმა (ფსალმუნი 104:15; 1 კორინთელები 6:10). ღვთიური პრინციპები გვეხმარება, გავაკონტროლოთ არა მარტო საქციელი, არამედ საკუთარი ფიქრებიც (ფსალმუნი 119:97—100). თუმცა ჭეშმარიტი ქრისტიანები ღვთიურ პრინციპებსა და კანონებს მხოლოდ იმიტომ არ იცავენ, რომ ეს მათთვის სასარგებლოა და კარგია. ისინი, პირველ რიგში, ამას იეჰოვას განდიდების მიზნით აკეთებენ. წაიკითხეთ მათეს 5:14—16.