‘რა იქნება შენი თანდასწრების. . . ნიშანი?’

„როდის იქნება ეს და რა იქნება შენი თანდასწრებისა და ამ სისტემის აღსასრულის ნიშანი?“ (მათე 24:3, აქ)

 1, 2. რა გვიჩვენებს, რომ ადამიანებს აინტერესებთ მომავალი?

მრავალ ადამიანს აინტერესებს, რას მოიტანს მომავალი. შენ? პროფესორ ელვინ ტოფლერმა თავის წიგნში, „მომავალი შოკი“ (ინგლ.), შენიშნა „მომავლის შემსწავლელი ორგანიზაციების უეცარი ზრდა“. ის უმატებს: ‘შეინიშნება მომავლის განმსაზღვრელი სამეცნიერო კვლევითი ინსტიტუტების დაარსება; ფუტურისტული ჟურნალების გამოჩენა ინგლისში, საფრანგეთსა და იტალიაში, გერმანიასა და შეერთებულ შტატებში; უნივერსიტეტებში წინასწარმეტყველების კურსების ზრდა’. თუმცა ტოფლერმა დაასკვნა: „ცხადია, რომ არცერთს შეუძლია „იცოდეს“ მომავალი სრული მნიშვნელობით“.

² წიგნში „მომავლის ნიშნები“ (ინგლ.) წერია: «ქირომანტია, „მაგიური კრისტალი“, კარტებზე მკითხაობა, ასტროლოგია, წიგნი „ი ცზინ“-ი — ყველა ეს რთული თუ იოლი საშუალება მეტ-ნაკლებად გვაძლევს წარმოდგენას, განსაკუთრებულად, ჩვენი მომავლის შესახებ». მაგრამ, ვიდრე ადამიანის მიერ გამოგონილ ხერხებს მივენდოთ, უმჯობესია მივმართოთ უტყუარ წყაროს — იეჰოვას.

 3. რატომ არის უფრო უკეთესი, მივმართოთ ღმერთს, თუ გვსურს გავიგოთ მომავლის შესახებ?

³ ჭეშმარიტმა ღმერთმა გვაცნობა: „როგორც ჩავიფიქრე, ისე იქნება; როგორც გადავწყვიტე, ისე მოხდება“ (ესაია 14:24, 27; 42:9). დიახ, ხშირად, იეჰოვა ადამიანი-წარმომადგენლის მეშვეობით ამცნობდა ხალხს, თუ რა უნდა მომხდარიყო. ამ წინასწარმეტყველებათაგან ერთ-ერთი წერდა: „არაფერს მოიმოქმედებს უფალი ღმერთი, თუ არა გაუცხადა თავისი საიდუმლო თავის მორჩილთ, წინასწარმეტყველთ“ (ამოსი 3:7, 8; 2 პეტრე 1:20, 21).

 4, 5. ა) რატომ შეუძლია იესოს დაგვეხმაროს, გავიგოთ მომავლის შესახებ? ბ) სხვადასხვა ნაწილისგან შემდგარი რომელი კითხვა იყო დასმული მოციქულების მიერ?

⁴ ღმერთის მთავარი წინასწარმეტყველი იყო იესო ქრისტე (ებრაელთა 1:1, 2). მივაქციოთ ყურადღება იესოს ერთ-ერთ ძირითად წინასწარმეტყველებას, რომლითაც იხსნება დღეს ჩვენს გარშემო მიმდინარე მოვლენები. ეს წინასწამეტყველება, ასევე, გვაძლევს შესაძლებლობას დავინახოთ, თუ როგორ დასრულდება არსებული ბოროტი სისტემა ახლო მომავალში და როგორ გადააქცევს ღმერთი დედამიწას სამოთხედ.

⁵ იესომ დაამტკიცა, რომ წინასწარმეტყველი იყო (მარკოზი 6:4; ლუკა 13:33; 24:19; იოანე 4:19; 6:14; 9:17). გასაგებია, რატომ ჰკითხეს მისმა მოციქულებმა მომავლის შესახებ, როდესაც ისხდნენ ზეთისხილის მთაზე და უყურებდნენ იერუსალიმს: „როდის იქნება ეს და რა იქნება შენი თანდასწრებისა და ამ სისტემის აღსასრულის ნიშანი?“ (მათე 24:3, აქ; მარკოზი 13:4).

 6. რა კავშირია მათეს 24-ე, მარკოზის მე-13 და ლუკას 21-ე თავებს შორის; და რომელი შეკითხვა უნდა გვაინტერესებდეს ძალიან?

⁶ მათი შეკითხვა და იესოს პასუხი შეგიძლია იპოვო მათეს სახარების 24-ე, მარკოზის მე-13 და ლუკას 21-ე თავებში.a ბიბლიიდან მოყვანილი ეს ადგილები მრავალმხრივ ავსებენ ერთმანეთს, მაგრამ არ არიან ერთგვარნი. მაგალითად, მხოლოდ ლუკამ მოიხსენია „ადგილ-ადგილ მოსრვა [ეპიდემიები, აქ]“ (ლუკა 21:10, 11; მათე 24:7; მარკოზი 13:8). ამიტომ, ლოგიკურია შეკითხვა: ეხებოდა თუ არა იესოს წინასწარმეტყველება მხოლოდ თავის მსმენელთა ცხოვრების პერიოდს, თუ, ასევე შეიცავდა ჩვენს დროს და იმას რაც მომავალში მოხდება?

მოციქულებს სურდათ სცოდნოდათ

 7. განსაკუთრებით რა აინტერესებდათ მოციქულებს, მაგრამ რას გულისხმობდა იესო?

⁷ სიკვდილამდე რამდენიმე დღით ადრე იესომ განაცხადა, რომ ღმერთმა უარყო იერუსალიმი — იუდეველთა დედაქალაქი. ქალაქი და მისი დიდებული ტაძარი უნდა დანგრეულიყო. ზუსტად ამის შემდეგ ზოგიერთმა მოციქულმა ჰკითხა ‘იესოს თანდასწრებისა და ამ სისტემის აღსასრულის ნიშნის’ შესახებ (მათე 23:37–24:3). ცხადია, რომ ისინი ფიქრობდნენ ძირითადად იუდეველთა სისტემისა და იერუსალიმის შესახებ, რადგან ვერ ხვდებოდნენ მომავალი მოვლენების მნიშვნელობას. მაგრამ, პასუხის გაცემისას იესო ახალი წელთაღრიცხვით 70 წელს რომაელთა მიერ იერუსალიმის დანგრევასა და მანამდე მომხდარ მოვლენებზე ბევრად უფრო შორს იყურებოდა (ლუკა 19:11; საქმე 1:6, 7).

 8. რომელია იესოს წინასწარმეტყველების ზოგიერთი შემთხვევა?

⁸ როგორც სამი სახარებიდან შეგიძლია წაიკითხო, იესო საუბრობდა იმის შესახებ, რომ აღდგებოდა ერი ერის წინააღმდეგ და სამეფო სამეფოს წინააღმდეგ, იქნებოდა საკვების უკმარისობა, მიწისძვრები, საშინელებანი და დიდი ნიშნები ზეციდან. იესოს მიერ ნიშნების მიცემის წლიდან (ახალი წელთაღრიცხვით 33 წელი) იერუსალიმის დანგრევამდე (ახალი წელთაღრიცხვით 66–70 წლები) აღდგებოდნენ ცრუწინასწარმეტყველები და ცრუქრისტეები. ქრისტიანები, რომლებიც იქადაგებდნენ იესოს ცნობას, იუდეველთა მიერ დევნილნი იქნებოდნენ.

 9. როგორ შესრულდა იესოს წინასწარმეტყველება ახალი წელთაღრიცხვით პირველ საუკუნეში?

⁹ ისტორიკოსი იოსებ ფლავიუსი ადასტურებს, რომ ნიშნის ეს ნაწილები ნამდვილად შესრულდა. ის წერს, რომ რომაელების თავდასხმამდე ცრუ მესიები უკვე აქეზებდნენ ხალხს ასაჯანყებლად. იუდეასა და სხვა ადგილებში ხდებოდა საზარელი მიწისძვრები. რომის იმპერიის სხვადასხვა ნაწილში მიმდინარეობდა ომები. თუ იყო დიდი შიმშილის შემთხვევები? დიახ, იყო (შეადარე საქმე 11:27-30). რა შეიძლება ითქვას, სამეფოს შესახებ, სამქადაგებლო საქმიანობაზე? ახალი წელთაღრიცხვით 60 ან 61 წლებში, როდესაც კოლასელთა მიმართ წერილი დაიწერა, ღმერთის სამეფოს ‘სახარების იმედმა’ მიაღწია აფრიკას, აზიასა და ევროპასb (კოლასელთა 1:23).

„მაშინ“ მოვა აღსასრული

10. რატომ უნდა მივაქციოთ ყურადღება ბერძნულ სიტყვას ტო·ტე და რა მნიშვნელობა აქვს მას?

¹⁰ თავის წინასწარმეტყველებაში აღწერილი მოვლენები იესომ ზოგიერთ ნაწილში თანმიმდევრობით წარმოგვიდგინა. მან თქვა: „ექადაგება ეს სახარება სასუფევლის შესახებ. . . და მაშინ მოვა აღსასრული“ (მათე 24:14). აქ სიტყვა „მაშინ“ გამომდინარეობს ბერძნული ზმნიზედისგან ტო·ტე.c ბერძნული ენის მკვლევარები განმარტავენ, რომ ტო·ტე არის „დროის აღმნიშვნელი ზმნიზედა“, რომელიც გამოიყენება „დროში მიმდინარე მოვლენების გამოხატვის მიზნით“ ანუ „მომდევნო მოვლენების გამოსახატავად“. ამიტომ, იესომ იწინასწარმეტყველა, რომ ექადაგება სახარება სამეფოს შესახებ და მაშინ („მას შემდეგ“ ან „შემდგომ“) მოვიდოდა „აღსასრული“. რომელი აღსასრული?

11. როგორ მიუთითა იესომ უშუალოდ იერუსალიმის განადგურებასთან დაკავშირებულ მოვლენებზე?

¹¹ ერთი მხრივ, იესოს წინასწარმეტყველების შესრულება შეგვიძლია დავინახოთ იუდეველთა სისტემის განადგურებისაკენ მიმყვანი მოვლენების განხილვით. სამი ათწლეულის განმავლობაში მიმდინარეობდა ომები და მიწისძვრები, იყო საკვების უკმარისობა და სრულდებოდა იესოს მიერ ნაწინასწარმეტყველები სხვა მოვლენები. დაწყებული მათეს 24:15-დან, მარკოზის 13:14-სა და ლუკას 21:20-ში ვკითხულობთ მრავალი შემთხვევის შესახებ, რომელიც დაკავშირებული იყო უშუალოდ მოახლოებულ განადგურებასთან, როდესაც აღსასრული ძალიან ახლოს იყო. (ყურადღება მიაქციე, ერთი წყვეტილი ხაზით გამოყოფილ ტექსტს ცხრილში).

12. როგორ იყვნენ რომის ჯარები ჩართულნი მათეს 24:15-ში ჩაწერილი წინასწარმეტყველების შესრულებაში?

¹² იუდეველთა ამბოხების საპასუხოდ, ახალი წელთაღრიცხვით 66 წელს, რომის ჯარებმა ცესტიუს გალუსის ხელმძღვანელობით გაილაშქრეს იერუსალიმზე და იუდეველთათვის წმინდა ქალაქს ალყა შემოარტყეს (მათე 5:35). იუდეველთა წინააღმდეგობის მიუხედავად, რომაელები შევიდნენ ქალაქში. ამრიგად, მათეს 24:15-სა და მარკოზის 13:14-ში ჩაწერილი იესოს წინასწარმეტყველების თანახმად, ისინი ‘წმინდა ადგილზე იდგნენ’. მაგრამ, შემდეგ, ვითარება საოცრად შეიცვალა. რომის ჯარებმა, რომლებმაც ქალაქს ალყა შემოარტყეს, მოულოდნელად დატოვეს თავიანთი პოზიციები. ქრისტიანებმა დაუყოვნებლივ შეატყვეს იესოს წინასწარმეტყველების შესრულება და ის, რომ რომაელების უკან დახევა, მათ საშუალებას აძლევდა გაქცეულიყვნენ იუდეადან იორდანეს გაღმა მდებარე მთებში. ამის დასამტკიცებლად არსებობს ისტორიული ფაქტები.

13. რატომ შეძლეს ქრისტიანებმა გაქცევა, იესოს გაფრთხილების გათვალისწინებით?

¹³ მაგრამ, თუ რომაელებმა მიატოვეს გარშემორტყმული იერუსალიმი, იყო თუ არა საჭირო გაქცევა? იესოს სიტყვები ადასტურებდა ‘რომ იერუსალიმის აოხრება მოახლოებული იყო’ (ლუკა 21:20). დიახ, აოხრება. იესომ იწინასწარმეტყველა ‘ჭირის შესახებ, როგორიც არ ყოფილა სამყაროს დასაბამიდან ახლანდლამდე და აღარც არასოდეს იქნებოდა’. დაახლოებით სამ-ნახევარი წლის შემდეგ, ახალი წელთაღრიცხვით 70 წელს იერუსალიმმა ნამდვილად განიცადა „დიდი ჭირი“ რომაელთა ჯარებისგან, რომელთაც გენერალი ტიტუსი მეთაურობდა (მათე 24:21; მარკოზი 13:19). მაგრამ, რატომ აღწერა იესომ ეს შემთხვევა, როგორც დიდი ჭირი, რომლის მსგავსი არც მანამდე, არც მას შემდეგ არ ყოფილა?

14. რატომ შეგვიძლია ვთქვათ, რომ ის, რაც ახალი წელთაღრიცხვით 70 წელს მოხდა იერუსალიმში — იყო „დიდი ჭირი“, რომლის მსგავსი არც მანამდე, არც მას შემდეგ ყოფილა?

¹⁴ ძველი წელთაღრიცხვით 607 წელს იერუსალიმი ბაბილონელთა მიერ იყო განადგურებული, ასევე ჩვენს საუკუნეში ქალაქმა საშინელი ბრძოლები იხილა. მაგრამ ის, რაც მოხდა ახალი წელთაღრიცხვით 70 წელს — შეუდარებლად დიდი ჭირი იყო. თითქმის ხუთ თვიან ლაშქრობაში ტიტუსის მეომრებმა საბოლოოდ დაამარცხეს იუდევლები. მათ მოკლეს დაახლოებით 1 100 000 ადამიანი და თითქმის 100 000 ტყვედ წაიყვანეს. გარდა ამისა, რომაელებმა დაანგრიეს იერუსალიმი. ამ მოქმედებამ დაამტკიცა, რომ წინათ მოწონებული იუდეველთა სისტემის თაყვანისმცემლობა, რომელიც ტაძარში სრულდებოდა, საბოლოოდ დაიქცა (ებრაელთა 1:2). დიახ, ახალი წელთაღრიცხვით 70 წლის მოვლენები მართებულად განიხილება, როგორც ‘ჭირი, რომლის მსგავსი არ ყოფილა [ქალაქში, ერში და სისტემაში] სამყაროს დასაბამიდან ახლანდლამდე და აღარც არასოდეს იქნება’ (მათე 24:21).d

წინასწარმეტყველების თანახმად ჯერ კიდევ არ იყო აღსასრული

15. ა) იესოს წინასწარმეტყველების თანახმად, რომელი მოვლენები მოჰყვებოდა ჭირს, რომელიც იერუსალიმს დაატყდა? ბ) მათეს 24:23-28-ის გათვალისწინებით, რა დასკვნა უნდა გამოვიტანოთ იესოს წინასწარმეტყველების შესრულებიდან?

¹⁵ მაგრამ იესოს წინასწარმეტყველება არ შემოიფარგლებოდა პირველ საუკუნეში მომხდარი ჭირით. ბიბლია გვიჩვენებს, რომ ამ ჭირს კიდევ ბევრი შემთხვევა მოჰყვებოდა, როგორც ეს გამომდინარეობს მათეს 24:23-სა და მარკოზის 13:21-ში გამოყენებული სიტყვიდან ტო·ტე ანუ „მაშინ“. რა უნდა მომხდარიყო ახალი წელთაღრიცხვით 70 წლის მომდევნო პერიოდში? ჭირის შემდეგ, რომელიც თავს დაატყდა იუდეველთა სისტემას, გამოჩნდებოდა მრავალი ცრუქრისტე და ცრუწინასწარმეტყველი (შეადარე მარკოზის 13:6 მარკოზის 13:21-23-თან). ისტორია ადასტურებს, რომ ახალი წელთაღრიცხვით 70 წელს მომხდარი განადგურების შემდეგ, საუკუნეების განმავლობაში იყო ბევრი ასეთი პიროვნება, მაგრამ, მათ ვერ შეაცდინეს ადამიანები, რომელთაც ჰქონდათ კარგი სულიერი მხედველობა და ქრისტეს „თანდასწრებას“ ელოდებოდნენ (მათე 24:27, 28). მიუხედავად ამისა, ყველაფერი, რაც მოხდა ახალი წელთაღრიცხვით 70 წლის შემდეგ, იმაზე მიუთითებს, რომ იესო გულისხმობდა ბევრად უფრო მეტს, ვიდრე მხოლოდ ჭირს, რომელიც წინასწარმეტყველების შესრულების პირველსახე იყო.

16. იესოს წინასწარმეტყველების რა დამატებით თვალსაზრისს შეიცავს ლუკას 21:24 და რა მნიშვნელობა აქვს მას?

¹⁶ თუ მათეს 24:15-28-ს და მარკოზის 13:14-23-ს შევადარებთ ლუკას 21:20-24-თან, ჩვენ ვნახავთ მეორე მითითებას იმაზე, რომ იესოს წინასწარმეტყველება იერუსალიმის დანგრევაზე მეტს ითვალისწინებდა. გაიხსენე, რომ მხოლოდ ლუკა მოიხსენიებს ეპიდემიებს. მსგავსად ამისა, მხოლოდ მან დაასრულა იესოს წინასწარმეტყველების ეს მონაკვეთი ასეთი სიტყვებით: „იერუსალიმი გათელილი იქნება წარმართთა მიერ, ვიდრე დასრულდება წარმართთა დრო“e(ლუკა 21:24). ძველი წელთაღრიცხვით 607 წელს ბაბილონელებმა დაამხეს იუდეველთა უკანასკნელი მეფე, რის შემდეგ, იერუსალიმი, რომელიც ღმერთის სამეფოს წარმოადგენდა იყო გათელილი (მეოთხე მეფეთა 25:1-26; პირველი ნეშტთა 29:23; ეზეკიელი 21:30-32). ლუკას 21:24-ში იესომ მიუთითა, რომ ასეთი ვითარება ღმერთის მიერ სამეფოს აღდგენამდე დარჩებოდა.

17. რა არის მესამე მითითება იმაზე, რომ იესოს წინასწარმეტყველება შესრულდებოდა შორეულ მომავალში?

¹⁷ არის კიდევ მესამე მითითება იმაზე, რომ იესოს წინასწარმეტყველება შორეულ მომავალში შესრულდებოდა: საღვთო წერილის თანახმად, მესია უნდა მომკვდარიყო და აღდგენილიყო, რის შემდეგაც დაჯდებოდა ღმერთის მარჯვნივ, სანამ მამა გაგზავნიდა მას მტრების დასამარცხებლად (ფსალმუნი 109:1, 2). იესომ მოიხსენია თავისი მამის მარჯვნივ დაჯდომა (მარკოზი 14:62). მოციქული პავლე ადასტურებდა, რომ მკვდრეთით აღმდგარი იესო იჯდა იეჰოვას მარჯვნივ და ელოდებოდა იმ დროს, როდესაც გახდებოდა მეფე და ღმერთის მიერ გამოტანილი განაჩენის შემსრულებელი (რომაელთა 8:34; კოლასელთა 3:1; ებრაელთა 10:12, 13).

18, 19. როგორ არის დაკავშირებული გამოცხადების 6:2-8-ში მოცემული წინასწარმეტყველება სახარებებში ჩაწერილ წინასწარმეტყველებებთან?

¹⁸ მეოთხე და დასკვნითი მითითება, რომ იესოს წინასწარმეტყველება, ამ სისტემის აღსასრულის შესახებ, ეხება არა მხოლოდ პირველ საუკუნეს, შეგვიძლია ვნახოთ გამოცხადების მე-6 თავში. ახალი წელთაღრიცხვით 70 წლიდან რამდენიმე ათწლეულის შემდეგ, მოციქულმა იოანემ აღწერა განსაცვიფრებელი სანახაობა — მოქმედი ცხენოსნები (გამოცხადება 6:2-8). ‘უფლის დღის’ — მისი თანდასწრების დღის გარჩევით წინასწარმეტყველური თვალსაზრისი განსაზღვრავს XX საუკუნეს, როგორც დიდი ომების (მუხლი 4), საკვების ფართოდ გავრცელებული უკმარისობისა (მუხლი 5 და 6) და ‘ჭირის’ დროს (მუხლი 8). ნათელია, რომ ყოველივე ეს ეთანხმება სახარებებში ჩაწერილ იესოს სიტყვებს და ამტკიცებს, რომ მისი წინასწარმეტყველება დიდი მასშტაბით შესრულდება ‘უფლის დღის’ პერიოდში (გამოცხადება 1:10).

¹⁹ გათვითცნობიერებული ადამიანები აღიარებენ, რომ შედგენილი ნიშანი, ნაწინასწარმეტყველები მათეს 24:7-14-სა და გამოცხადების 6:2-8-ში, გამომჟღავნდა 1914 წლის მსოფლიო ომის დაწყებით. მთელ მსოფლიოში იეჰოვას მოწმეები აცხადებდნენ, რომ ახლა იესოს წინასწარმეტყველება სრულდება მეორედ — დიდი მასშტაბით, ამაზე მოწმობენ სასტიკი ომები, დამანგრეველი მიწისძვრები, საშინელი შიმშილი და ძალზე გავრცელებული დაავადებები. უკანასკნელის შესახებ ჟურნალში „აშშ-ს ახალი ამბები და მსოფლიო უწყებები“ (ინგლ.) (1992 წლის 27 ივლისი), ნათქვამია: „შიდს-ის ეპიდემიის. . . მსხვერპლი ხდება მილიონობით ადამიანი და შესაძლოა მალე ეს ეპიდემია გახდეს ყველაზე კატასტროფული და დიდ ხარჯებთან დაკავშირებული ავადმყოფობა მთელი ისტორიის განმავლობაში. XIV საუკუნეში შავი ჭირისაგან მოკვდა 25 მილიონი ადამიანი. ხოლო 2 000 წლამდე შიდს-ის გამომწვევი ვირუსის, აივ-ის მატარებელი იქნება 30-დან 110 მილიონამდე ადამიანი, დაწყებული დღეს მცხოვრები 12 მილიონით. მკურნალობის შეუძლებლობის გამო, მათ, ყველას, სიკვდილი ემუქრება“.

20. რას შეიცავდა მათეს 24:4-22-ის პირველი შესრულება, ხოლო რომელ სხვა შესრულებას ვხედავთ თვალნათლივ?

²⁰ რა დასკვნა შეგვიძლია გამოვიტანოთ მოციქულების შეკითხვაზე იესოს მიერ გაცემული პასუხიდან? მის წინასწარმეტყველებაში ზუსტად იყო აღნიშნული იერუსალიმის დანგრევა და მასთან მიმყვანი მოვლენები, ასევე იყო აღნიშნული შემთხვევები, რომელიც ახალი წელთაღრიცხვით 70 წელს მოჰყვებოდა. მაგრამ, ამათგან უმრავლესობა შესრულდებოდა მომავალში, მეორედ და უფრო დიდი მასშტაბით და მიიყვანდა დიდ ჭირამდე, რომელსაც მოჰყვებოდა თანამედროვე ბოროტი სისტემის აღსასრული. ეს ნიშნავს, რომ იესოს წინასწარმეტყველება, ჩაწერილი მათეს 24:4-22-სა და ასევე მარკოზისა და ლუკას სახარებებში, შესრულდა დაწყებული ახალი წელთაღრიცხვით 33 წლიდან თვით ახალი წელთაღრიცხვით 70 წელს მომხდარი ჭირის ჩათვლით. მაგრამ, ამავე მუხლებში ჩაწერილი უნდა შესრულებულიყო მეორედ. ყოველივე ეს კი მომავალში დასრულდებოდა უფრო დიდი ჭირით. წინასწარმეტყველების ეს, უფრო დიდი შესრულება ჩვენს დროში მიმდინარეობს; ჩვენ შეგვიძლია ყოველდღე ვადევნოთ მას თვალყური.f

რისკენ მივყავართ ამ მოვლენებს?

21, 22. სად შეგვიძლია ვიპოვოთ წინასწარმეტყველური მითითება, რომ მოსალოდნელი იყო დამატებითი მოვლენები?

²¹ იესომ არ დაამთავრა თავისი წინასწარმეტყველება ცრუწინასწარმეტყველების მოხსენიებით, რომლებიც მოიმოქმედებდნენ დიდ მაცდუნებელ ნიშნებს ხანგრძლივი პერიოდის განმავლობაში, სანამ „დასრულდება წარმართთა დრო“ (ლუკა 21:24; მათე 24:23-26; მარკოზი 13:21-23). იესომ გააგრძელა საუბარი სხვა, შემაძრწუნებელი შემთხვევების შესახებ, რომლებიც მთელი დედამიწის ზურგზე შეიმჩნევა. ყოველივე ეს იქნებოდა დაკავშირებული ძე კაცისას მოსვლასთან დიადი ძალითა და დიდებით. მარკოზის 13:24-27-ში მოცემულია მისი წინასწარმეტყველების გაგრძელება:

²² „მაგრამ იმ დღეებში, იმ ჭირის შემდგომ, მზე დაბნელდება და მთვარე აღარ გამოსცემს თავის შუქს. და იქნება ვარსკვლავთა ცვენა და ციური ძალები შეირყევიან. და მაშინ იხილავენ ძე კაცისას, ღრუბლებზე მომავალს დიადი ძალითა და დიდებით. მაშინ წარგზავნის თავის ანგელოზებს და შეკრებენ მის რჩეულებს ოთხთა ქართაგან, დედამიწის კიდიდან ცის კიდემდე“.

23. რატომ შგვიძლია მოველოდეთ, რომ მათეს 24:29-31-ში ჩაწერილი წინასწარმეტყველება შესრულდება ახალი წელთაღრიცხვით პირველი საუკუნიდან დიდი ხნის შემდეგ?

²³ ძე კაცისა, აღდგენილი იესო ქრისტე, არ მოსულა ხილულად ახალი წელთაღრიცხვით 70 წელს იუდეველთა სისტემის განადგურების შემდეგ. ის არც დედამიწის ყველა ტომს უნახავს, როგორც მათეს 24:30-შია აღნიშნული, არც ზეციურ ანგელოზებს შეუკრებიათ ცხებული ქრისტიანები მთელი დედამიწიდან. მაგრამ, როდის შესრულდება იესოს ძალზე მნიშვნელოვანი წინასწარმეტყველების დამატებითი ნაწილი? სრულდება კი ის მოვლენებით, რომლებიც ახლა ჩვენს გარშემო მიმდინარეობს, თუ უფრო უზრუნველგვყოფს ღვთიური გამჭრიახობით იმისათვის, რასაც ახლო მომავალში უნდა მოველოდეთ? რასაკვირველია, ჩვენ გვსურს ვიცოდეთ ამის შესახებ, რადგან ლუკამ ჩაწერა იესოს გაფრთხილება: „როცა ამის ახდენა დაიწყება, გაიმართეთ და თავი ასწიეთ, იმიტომ, რომ ახლოვდება თქვენი ხსნა“ (ლუკა 21:28).

[სქოლიოები]

თუ გახსოვს?

□ როგორ შესრულდა მათეს 24:3-ში მოცემულ შეკითხვაზე იესოს მიერ გაცემული პასუხი ახალი წელთაღრიცხვით 70 წლამდე?

□ როგორ გვეხმარება სიტყვა ტო·ტე-ს გამოყენება, სწორად გავიგოთ იესოს წინასწარმეტყველება?

□ რა გაგებით იყო პირველი საუკუნის „ჭირი“ უფრო „დიდი“, ვიდრე ყველა მანამდე მომხდარი?

□ რომელ ორ დამატებით წვრილმანს გვატყობინებს ლუკა იესოს წინასწარმეტყველების შესახებ, რომელიც მხოლოდ ჩვენს დღეებს ეხება?

□ რა მიუთითებს მათეს 24:4-22-ში ჩაწერილი წინასწარმეტყველების მეორედ და დასკვნით შესრულებაზე?

[ცხრილი 24-ე გვერდზე]

[ტექსტი სრულად მოცემულია პუბლიკაციაში]

[სურათი მე-20 გვერდზე]

ახალი წელთაღრიცხვით 70 წელს იერუსალიმსა და იუდეველთა სისტემას თავს დაატყდა ყველაზე დიდი ჭირი, რომელიც კი ოდესმე განუცდია