ყველა დღესასწაულს იწონებს ღმერთი?

იეჰოვას სურს, რომ გავიხაროთ ცხოვრებით და დროდადრო ახლობლებთან ერთად მოვილხინოთ კიდეც. თუმცა ისმის კითხვა: ყველა დღესასწაულს იწონებს ღმერთი? როგორ გავითვალისწინოთ ამ საკითხში მისი აზრი და, ამგვარად, დავუმტკიცოთ სიყვარული?

1. რატომაა ბევრი დღესასწაული იეჰოვას თვალში მიუღებელი?

შეიძლება გაგიკვირდეთ, რომ ბევრ დღესასწაულს წარმართული ფესვები აქვს ან არაბიბლიური შეხედულებები უდევს საფუძვლად. მაგალითად, ზოგი სპირიტიზმთანაა დაკავშირებული, ზოგი კი ეფუძნება შეხედულებას, რომ სული უკვდავია. ზოგს სხვადასხვა ცრურწმენა უდევს საფუძვლად, ზოგსაც შეხედულება, რომ ბედისწერა არსებობს (ესაია 65:11). იეჰოვა თავის თაყვანისმცემლებს ასეთ მითითებას აძლევს: „უწმინდურს ნუღარ მიეკარებით“ (2 კორინთელები 6:17).a

2. რას ფიქრობს იეჰოვა დღესასწაულებზე, რომლებიც ადამიანებს განადიდებს?

იეჰოვა გვაფრთხილებს, რომ ადამიანზე არ დავამყაროთ იმედი (წაიკითხეთ იერემიას 17:5). ზოგიერთი დღესასწაულის დროს მმართველებსა თუ ჯარისკაცებს განადიდებენ, ზოგის დროს კი ეროვნულ სიმბოლოებს მიაგებენ პატივს ან დამოუკიდებლობის მოპოვების დღეს აღნიშნავენ (1 იოანე 5:21). არსებობს ისეთი დღესასწაულებიც, რომლებიც ამა თუ იმ პოლიტიკურ ან სოციალურ მოძრაობას უწევს პოპულარიზაციას. როგორ ფიქრობთ, რას იგრძნობს იეჰოვა, თუ ადამიანებს ან ორგანიზაციებს განვადიდებთ, მით უმეტეს მაშინ, როცა მათი იდეოლოგია უპირისპირდება ღვთის თვალსაზრისს?

3. კიდევ რის გამოა ზოგი დღესასწაული ღვთისთვის მიუღებელი?

ღმერთი განსჯის „ლოთობას, ღრეობას [და] უზომო სმას“ (1 პეტრე 4:3). ზოგი დღესასწაულის დროს ხალხი თავაშვებულად იქცევა და ყველაფრის უფლებას აძლევს თავს. თუ იეჰოვასთან მეგობრობა გვინდა, საერთო არაფერი უნდა გვქონდეს ასეთ უწმინდურებასთან.

გაიღრმავეთ ცოდნა

4. ნუ აღნიშნავთ იეჰოვას შეურაცხმყოფელ დღესასწაულებს!

წაიკითხეთ ეფესოელების 5:10 და იმსჯელეთ ქვემოთ დასმულ კითხვებზე:

• რაზე უნდა დაფიქრდეთ მანამ, სანამ რომელიმე დღესასწაულის აღნიშვნას გადაწყვეტთ?

• რომელ დღესასწაულებს აღნიშნავენ იქ, სადაც თქვენ ცხოვრობთ?

• თქვენი აზრით, იწონებს იეჰოვა ამ დღესასწაულებს?

გიფიქრიათ, რას ფიქრობს ღმერთი დაბადების დღის აღნიშვნაზე? ბიბლიაში არცერთ ღვთის მსახურზე არაა ნათქვამი, რომ დაბადების დღეს აღნიშნავდა. თუმცა ვხვდებით ორ შემთხვევას, როცა მათ აღნიშნეს დაბადების დღე, ვინც არ იყვნენ იეჰოვას თაყვანისმცემლები. წაიკითხეთ დაბადების 40:20—22 და მათეს 14:6—10; შემდეგ იმსჯელეთ ქვემოთ დასმულ კითხვებზე:

• რა მსგავსებებს პოულობთ ამ ორ შემთხვევას შორის?

• ამ შემთხვევებიდან გამომდინარე, თქვენი აზრით, რა თვალსაზრისი აქვს იეჰოვას დაბადების დღეზე?

შეიძლება მაინც ფიქრობთ: „მართლა აქვს ღვთისთვის მნიშვნელობა, აღვნიშნავ თუ არა დაბადების დღეს ან ისეთ დღესასწაულს, რომელსაც არაბიბლიური შეხედულებები უდევს საფუძვლად?“. წაიკითხეთ გამოსვლის 32:1—8. შემდეგ ნახეთ ვიდეო და იმსჯელეთ ქვემოთ დასმულ კითხვებზე:

ვიდეო: „დღესასწაულები, რომლებსაც არ იწონებს ღმერთი“ (5:07)

• რატომ უნდა შევამოწმოთ ყოველთვის, რა არის მოსაწონი იეჰოვასთვის?

• როგორ შეგვიძლია ამის გაკეთება?

როგორ გავიგოთ, რომელ დღესასწაულს არ იწონებს ღმერთი

• არაბიბლიურ შეხედულებებს ხომ არ ეფუძნება? ამ კითხვაზე პასუხის მისაღებად გაარკვიეთ, საიდან იღებს ეს დღესასწაული სათავეს.

• ადამიანს, ორგანიზაციას ან ეროვნულ სიმბოლოს ხომ არ განადიდებს? ჩვენ მხოლოდ იეჰოვას განვადიდებთ და მისი იმედი გვაქვს, რომ გლობალურ პრობლემებს მოაგვარებს.

• აღნიშვნის დროს ხომ არ ირღვევა ბიბლიური ნორმები? ჩვენ ზნეობრივი სიწმინდე უნდა შევინარჩუნოთ.

5. პატივისცემით განაწყვეთ სხვები თქვენდამი

ვიდეო: „ტაქტიანად აუხსენით სხვებს თქვენი შეხედულებები“ (2:01)

წაიკითხეთ მათეს 7:12 და შემდეგ იმსჯელეთ ქვემოთ დასმულ კითხვებზე:

• ამ მუხლიდან გამომდინარე, უნდა დაუშალოთ დღესასწაულების აღნიშვნა ოჯახის წევრებს, რომლებიც არ იზიარებენ თქვენს შეხედულებებს?

• მიუხედავად იმისა, რომ ოჯახთან ერთად აღარ აღნიშნავთ დღესასწაულებს, როგორ შეგიძლიათ თქვენს სიყვარულსა და პატივისცემაში დაარწმუნოთ ისინი?

6. იეჰოვას სურს, გავიხაროთ ცხოვრებით

იეჰოვას სურს, რომ ოჯახის წევრებთან და მეგობრებთან ერთად სასიამოვნოდ გავატაროთ ხოლმე დრო. წაიკითხეთ ეკლესიასტეს 8:15 და იმსჯელეთ ქვემოთ დასმულ კითხვაზე:

• როგორ ჩანს ამ მუხლიდან, რომ იეჰოვას სურს, გავიხაროთ ცხოვრებით?

იეჰოვას სურვილია, მისი მსახურები ერთად სასიამოვნოდ ატარებდნენ დროს. ეს განსაკუთრებით კარგად ჩანს საერთაშორისო კონგრესებზე. ნახეთ ვიდეო.

ვიდეო: „და-ძმების სტუმართმოყვარეობა საერთაშორისო კონგრესების დროს“ (5:40)

წაიკითხეთ გალატელების 6:10 და იმსჯელეთ ქვემოთ დასმულ კითხვებზე:

• აუცილებელია დღესასწაულების აღნიშვნა საიმისოდ, რომ სხვებს „სიკეთე გავუკეთოთ“?

• რა უფრო გაბედნიერებთ, როცა ვალდებულების გამო უკეთებთ სხვებს საჩუქრებს თუ საკუთარი ინიციატივით?

• ბევრი იეჰოვას მოწმე დროდადრო შვილებს წვეულებას უწყობს და საჩუქრებსაც უკეთებს. თუ თქვენც გყავთ შვილები, რისი გაკეთება შეგიძლიათ მათ გასახარად?

შეჯამება:

იეჰოვას სურს, რომ ოჯახთან და მეგობრებთან ერთად სასიამოვნოდ გავატაროთ დრო. თუმცა ის მოელის, რომ მისთვის მიუღებელ დღესასწაულებს არ აღვნიშნავთ.

გასამეორებელი კითხვები:

• როგორ გავიგოთ, რომელ დღესასწაულს არ იწონებს ღმერთი?

• როგორ ავუხსნათ ოჯახის წევრებსა და მეგობრებს, რატომ არ აღვნიშნავთ ამა თუ იმ დღესასწაულს?

• საიდან ვიცით, რომ იეჰოვას სურს, გავიხაროთ ცხოვრებით?

გაიგეთ მეტი:

წაიკითხეთ სტატია, რომელშიც განხილულია, რატომ არ აღნიშნავენ ქრისტიანები ზოგიერთ დღესასწაულს.

„რატომ არ აღნიშნავენ იეჰოვას მოწმეები ამა თუ იმ დღესასწაულს?“ (სტატია ვებგვერდზე)

გაიგეთ, რა მიზეზების გამო ვფიქრობთ, რომ დაბადების დღის აღნიშვნა ღვთისთვის მიუღებელია.

„რატომ არ აღნიშნავენ იეჰოვას მოწმეები დაბადების დღეს?“ (სტატია ვებგვერდზე)

ნახეთ, როგორ შეუძლიათ ბავშვებს, გული გაუხარონ იეჰოვას დღესასწაულების დროს.

„იეჰოვასთვის ძვირფასი ხარ!“ (11:35)

მილიონობით იეჰოვას მოწმე არ აღნიშნავს შობის დღესასწაულს. წაიკითხეთ, რას ამბობენ ისინი.

„მათ შობის დღესასწაულზე ძვირფასი რამ იპოვეს“ („საგუშაგო კოშკი“, 1 დეკემბერი, 2012)